Oʻzbekiston Respublikasi Prezidentining 2025-yil 23-iyundagi “Oʻzbekiston Respublikasida mahalliy davlat hokimiyati vakillik organlari faoliyatini 2030-yilga qadar rivojlantirish konsepsiyasini tasdiqlash toʻgʻrisida” PF-98-son Farmoni tasdiqlangan.

Oʻzbekiston Respublikasi Vazirlar Mahkamasining 2023-yil 14-dekabrdagi “Davlat mulkini ijaraga berish tartibini yanada takomillashtirish toʻgʻrisida”gi 660-sonli qaror bilan tasdiqlangan “Davlat mulkini ijaraga berish tartibi toʻgʻrisida”gi Nizomning 33 va 34-bandlariga muvofiq, Davlat aktivlarini boshqarish agentligi Namangan viloyati hududiy boshqarmasining 2025-yil 11-dekabrdagi 01-23-19/2223-sonli xatini inobatga olib, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6 va 24-moddalariga asosan, Xalq deputatlari viloyat Kengashi qaror qiladi:

1. Davlat aktivlarini boshqarish agentligi Namangan viloyat hududiy boshqarmasi B. Matmusayevning Namangan viloyati hududida 2026-yilda davlat koʻchmas mulkidan foydalanganlik uchun ijara toʻlovining eng kam stavkalari toʻgʻrisidagi maʼlumot uchun qabul qilinsin.

2. Davlat aktivlarini boshqarish agentligi Namangan viloyat hududiy boshqarmasining viloyat hududida 2026-yilda davlat koʻchmas mulkidan foydalanganlik uchun ijara toʻlovining eng kam stavkalari yuzasidan taqdimoti maʼlumot uchun qabul qilinsin.

3. Davlat aktivlarini boshqarish agentligi Namangan viloyat hududiy boshqarmasining Namangan viloyati hududida 2026-yilda davlat koʻchmas mulkidan foydalanganlik uchun ijara toʻlovining eng kam stavkalari yuzasidan berilgan takliflari inobatga olinsin.

4. Namangan viloyati hududida 2026-yilda davlat koʻchmas mulkidan foydalanganlik uchun ijara toʻlovining eng kam stavkalari ilovalarga muvofiq tasdiqlansin.

Namangan viloyatida 2026-yil davlat koʻchmas mulkidan foydalanganlik uchun ijara toʻlovining eng kam stavkalari 1-ilovaga muvofiq;

Sanoat zonalari hududlaridagi davlat koʻchmas mulkini 2026-yilda ijaraga berishda qoʻllaniladigan ijara toʻlovining eng kam stavkalari 2-ilovaga muvofiq;

Ijara toʻlovi stavkalariga qoʻllaniladigan koeffitsiyentlar 3-ilovaga muvofiq;

Ijara toʻlovining eng kam stavkalariga qoʻllaniladigan koeffitsiyentlarning hisoblash tartibi 4-ilovaga muvofiq;

Viloyat markazi hamda shahar va tumanlar markaziy (birinchi darajali) koʻchalar roʻyxati 5-ilovaga muvofiq tasdiqlansin.

5. Oʻzbekiston Respublikasi Davaktiv agentligi huzuridagi Davlat mulki obyektlaridan samarali foydalanish markazining viloyat hududiy boshqarmasi boshligʻi (A. Axmadaliyev)ga:

davlat mulkini ijaraga berishni tashkil etish va ijaraga berish;

ijaraga berilgan davlat mulkini va uni ijaraga berishdan tushadigan mablagʻlarni hisobga olish va monitoringini olib borish;

ijaraga beriladigan davlat mulki boʻyicha maʼlumotlar bazasini shakllantirish;

ijara obyektlaridan maqsadli foydalanilishini va ularning saqlanishini, shuningdek ijara toʻlovi oʻz vaqtida va toʻliq toʻlanishini nazorat qilish;

davlat mulkini ijaraga berish sohasidagi qonunchilikni buzish holatlari aniqlangan hollarda maʼmuriy huquqbuzarlik toʻgʻrisida bayonnomalar rasmiylashtirish va sudlarga yuborish;

foydalanilmayotgan davlat mulki ijaraga berilishi toʻgʻrisidagi eʼlonlarni va ijaraga berilayotgan davlat mulklari roʻyxatlarini davriy nashrlarda hamda viloyat hokimligining, Oʻzbekiston Respublikasi Davlat aktivlarini boshqarish agentligi viloyat hududiy boshqarmasining va Savdo-sanoat palatasi viloyat hududiy boshqarmasining veb-saytlarida va ijtimoiy tarmoqlardagi sahifalarida joylashtirilishini taʼminlash topshirilsin.

6. Oʻzbekiston Respublikasi Davaktiv agentligi huzuridagi Davlat mulki obyektlaridan samarali foydalanish markazining viloyat hududiy boshqarmasi boshligʻi (A. Axmadaliyev), viloyat Soliq boshqarmasi (Sh. Imomov), shahar va tuman hokimliklari hududlarda ijara munosabatlarini tartibga solish, ijaraga berilayotgan davlat mulki hisobotini toʻgʻri yuritish va budjetga qoʻshimcha mablagʻlarni jalb qilish maqsadida davlat mulkini balansda saqlovchilari tomonidan ijaraga berish samaradorligini oshirish va tashkillashtirishda oʻzaro hamkorlikni yoʻlga qoʻysin.

7. Vazirlik va idoralarning viloyat boshqarmalari hamda tizim tashkilotlari balansidagi davlat mulklarini xatlovdan oʻtkazsin va boʻsh turgan yoki samarasiz foydalanilayotgan davlat mulklarini ijaraga berish boʻyicha har chorak yakuni bilan hisobot oyidan keyingi oyning 10-sanasigacha Davaktiv agentligi huzuridagi Davlat mulki obyektlaridan samarali foydalanish markazining viloyat hududiy boshqarmasiga bu mulkning joylashgan joyi, miqdori, tarkibi va boshqa umumiy tavsiflari koʻrsatilgan maʼlumotlarini taqdim etib borsin.

8. Davlat kadastrlar palatasi viloyat hududiy boshqarmasi (M. Tursunbayev)har chorak yakuni bilan keyingi oyning 5-sanasiga qadar viloyatda mavjud davlat mulki obyektlarining roʻyxatini elektron holatda Davaktiv agentligi huzuridagi Davlat mulki obyektlaridan samarali foydalanish markazining viloyat hududiy boshqarmasiga taqdim etib borsin.

9. Viloyat hududida 2025-yilda davlat mulki boʻlgan binolar va xonalarda joylashgan budjet tashkilotlari uchun ijara toʻlovining “nol” stavkasi belgilansin.

10. Mazkur qaror “Namangan haqiqati” va “Namanganskaya pravda”gazetalarida eʼlon qilinsin hamda viloyat hokimligining rasmiy veb saytiga joylashtirilsin.

11. Viloyat hokimining 2025-yil 30-yanvardagi Namangan viloyatida 2025-yilda davlat koʻchmas mulkidan foydalanganlik uchun ijara toʻlovining eng kam stavkalarini tasdiqlash toʻgʻrisida”gi 44-6-0-Q/25-son qarori 2026-yil 1-yanvardan oʻz kuchini yoʻqotgan deb hisoblansin.

12. Mazkur qaror bajarilishini nazorat qilish xalq deputatlari viloyat Kengashining mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi raisi I. Ikromov hamda viloyat hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari-iqtisodiyot va moliya bosh boshqarmasi boshligʻi Z. Baxriddinov zimmasiga yuklansin.

13. Ushbu Kengash qarori 2026-yil 1-yanvar kunidan kuchga kiradi.