Ўзбекистон Республикаси Президентининг 2025 йил 5 майдаги ПФ-76-сон «Таълим сифатини таъминлаш ва таълим хизматлари кўрсатиш тизимини такомиллаштириш бўйича қўшимча чора-тадбирлар тўғрисида»ги Фармони ҳамда Ўзбекистон Республикаси Вазирлар Маҳкамасининг 2025 йил 6 августдаги 498-сон «Ўрта махсус, касбий, олий ва олий таълимдан кейинги таълим, шунингдек, кадрларни қайта тайёрлаш ва уларнинг малакасини ошириш ташкилотларини комплекс ҳамда махсус давлат аккредитациясидан ўтказиш тизимини жорий этиш тўғрисида»ги қарорига мувофиқ буюраман:

1. Таълим ташкилотларини комплекс ва махсус давлат аккредитациясидан ўтказиш учун йиғимлар миқдорлари ва уларни ҳисоблаш тартиби тўғрисидаги низом иловага мувофиқ тасдиқлансин.

2. Мазкур буйруқ Ўзбекистон Республикаси Иқтисодиёт ва молия вазирлиги, Олий таълим, фан ва инновациялар вазирлиги, Рақобатни ривожлантириш ва истеъмолчилар ҳуқуқларини ҳимоя қилиш қўмитаси, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ҳамда Савдо-саноат палатаси билан келишилган.

3. Ушбу буйруқ расмий эълон қилинган кундан эътиборан кучга киради.

Ушбу Низом ўрта махсус, касбий, олий ва олий таълимдан кейинги таълим, шунингдек кадрларни қайта тайёрлаш ва уларнинг малакасини ошириш бўйича фаолият юритувчи давлат ва нодавлат таълим ташкилотларини (бундан буён матнда таълим ташкилотлари деб юритилади) комплекс ва махсус давлат аккредитациясидан ўтказиш тўғрисидаги аризани кўриб чиқиш ҳамда комплекс ва махсус давлат аккредитациясидан ўтказиш учун йиғимлар миқдорлари ва уларни ҳисоблаш тартибини белгилайди.

1. Комплекс ва махсус давлат аккредитацияси Ўзбекистон Республикаси Президенти Администрацияси ҳузуридаги Таълим сифатини таъминлаш миллий агентлиги (бундан буён матнда Агентлик деб юритилади) томонидан амалга оширилади.

2. Ушбу Низомда қуйидаги асосий тушунчалар қўлланилади:

аризани кўриб чиқиш учун йиғим — таълим ташкилотларини комплекс ва махсус давлат аккредитациясидан ўтказиш тўғрисидаги аризани (бундан буён матнда ариза деб юритилади) кўриб чиқиш ҳамда ариза ва унга илова қилинган ҳужжатларнинг тўлиқлиги ва тўғрилигини текшириш билан боғлиқ харажатларни қоплаш учун ундириладиган тўлов;

базавий йиғим миқдори — таълим ташкилотларини комплекс ва махсус давлат аккредитациясидан ўтказиш жараёнида ҳисоб-китобларни амалга ошириш учун асос сифатида белгиланган бошланғич тўлов миқдори;

коэффициентлар — таълим ташкилотидаги талабалар ва дастурлар сонидан ҳамда аризаларни қабул қилиш муддатидан келиб чиқиб, аккредитация жараёнидаги харажатлар миқдорини аниқлашда базавий йиғим миқдорига нисбатан қўлланиладиган нисбий кўрсаткичлар;

комплекс давлат аккредитацияси — ўрта махсус, касбий, олий таълимни ва олий таълимдан кейинги таълимни, шунингдек, кадрларни қайта тайёрлашни ва уларнинг малакасини оширишни амалга оширувчи давлат ва нодавлат таълим ташкилотларини ташқи баҳолаш натижаларига асосланган жараён;

махсус давлат аккредитацияси — ўрта махсус, касбий, олий таълимни ва олий таълимдан кейинги таълимни, шунингдек, кадрларни қайта тайёрлаш ва уларнинг малакасини оширишни амалга оширувчи давлат ва нодавлат таълим ташкилотларида таълим дастурлари бўйича ўқув жараёни бошланишидан олдин амалга ошириладиган жараён.

3. Олий таълим ташкилотларини комплекс давлат аккредитациясидан ўтказиш бўйича йиғим миқдори қуйидаги формулага асосан ҳисобланади:

Бунда:

KA_O — олий таълим ташкилотларини комплекс давлат аккредитациясидан ўтказиш бўйича йиғим миқдори;

Y_KO — олий таълим ташкилотларини комплекс давлат аккредитациясидан ўтказиш бўйича базавий йиғим миқдори;

K_T — талабалар сони коэффициенти;

K_D — дастурлар сони коэффициенти;

Y_K — олий таълим ташкилотининг асосий биноси (бинолар мажмуи, кампус) жойлашган ҳудуддан (Қорақалпоғистон Республикаси, вилоятлар ва Тошкент шаҳри) ташқаридаги ҳар бир ўқув биноси (бинолари мажмуи, кампус) учун йиғим миқдори.

4. Ўрта махсус, касбий, олий таълимдан кейинги таълим ҳамда кадрларни қайта тайёрлаш ва уларнинг малакасини ошириш ташкилотларини комплекс давлат аккредитациясидан ўтказиш бўйича йиғим миқдори қуйидаги формулага асосан ҳисобланади:

Бунда:

KA_B — ўрта махсус, касбий, олий таълимдан кейинги таълим ҳамда кадрларни қайта тайёрлаш ва уларнинг малакасини ошириш ташкилотларини комплекс давлат аккредитациясидан ўтказиш бўйича йиғим миқдори;

Y_KB — ўрта махсус, касбий, олий таълимдан кейинги таълим ҳамда кадрларни қайта тайёрлаш ва уларнинг малакасини ошириш ташкилотларини комплекс давлат аккредитациясидан ўтказиш бўйича базавий йиғим миқдори;

K_D — дастурлар сони коэффициенти;

Y_K — ўрта махсус, касбий, олий таълимдан кейинги таълим ҳамда кадрларни қайта тайёрлаш ва уларнинг малакасини ошириш ташкилотининг асосий биноси (бинолар мажмуи, кампус) жойлашган ҳудуддан (Қорақалпоғистон Республикаси, вилоятлар ва Тошкент шаҳри) ташқаридаги ҳар бир ўқув биноси (бинолари мажмуи, кампус) учун йиғим миқдори.

5. Таълим ташкилотларининг таълим дастурларини махсус давлат аккредитациясидан ўтказиш бўйича йиғим миқдори қуйидаги формулага асосан ҳисобланади:

Бунда:

MA — таълим дастурларини махсус давлат аккредитациясидан ўтказиш бўйича йиғим миқдори;

Y_MB — махсус давлат аккредитацияси бўйича базавий йиғим миқдори;

Y_K — таълим ташкилотининг асосий биноси (бинолар мажмуи, кампус) жойлашган ҳудуддан (Қорақалпоғистон Республикаси, вилоятлар ва Тошкент шаҳри) ташқаридаги ҳар бир ўқув биноси (бинолари мажмуи, кампус) учун йиғим миқдори.

6. Аризани кўриб чиқиш учун базавий ҳисоблаш миқдорининг икки баравари миқдорида йиғим ундирилади.

7. Комплекс ва махсус давлат аккредитациясидан ўтказиш учун қуйидаги миқдорларда базавий йиғим ундирилади:

ўрта махсус ва касбий таълим ташкилотларини комплекс давлат аккредитациясидан ўтказиш учун — базавий ҳисоблаш миқдорининг юз баравари, махсус давлат аккредитациясидан ўтказиш учун (ҳар бир таълим дастури учун) — базавий ҳисоблаш миқдорининг ўн саккиз баравари;

олий таълим ташкилотларини комплекс давлат аккредитациясидан ўтказиш учун — базавий ҳисоблаш миқдорининг тўрт юз йигирма баравари, махсус давлат аккредитациясидан ўтказиш учун (ҳар бир таълим дастури учун) — базавий ҳисоблаш миқдорининг юз баравари;

олий таълимдан кейинги таълим ташкилотларини комплекс давлат аккредитациясидан ўтказиш учун — базавий ҳисоблаш миқдорининг икки юз ўттиз саккиз баравари, махсус давлат аккредитациясидан ўтказиш учун (ҳар бир таълим дастури учун) — базавий ҳисоблаш миқдорининг саксон олти баравари;

кадрларни қайта тайёрлаш ва уларнинг малакасини ошириш таълим ташкилотларини комплекс давлат аккредитациясидан ўтказиш учун — базавий ҳисоблаш миқдорининг юз баравари, махсус давлат аккредитациясидан ўтказиш учун (ҳар бир таълим дастури учун) — базавий ҳисоблаш миқдорининг ўн етти баравари.

8. Давлат аккредитациясидан ўтказиш учун амалга оширилган барча йиғимлар, аккредитация натижасидан қатъи назар, таълим ташкилотига қайтарилмайди.

9. Таълим ташкилотини комплекс ёки махсус давлат аккредитациясидан ўтказишда, таълим ташкилотининг асосий биноси (бинолар мажмуи, кампус) жойлашган ҳудуддан (Қорақалпоғистон Республикаси, вилоятлар ва Тошкент шаҳри) ташқаридаги ҳар бир ўқув биноси (бинолари мажмуи, кампус) учун базавий ҳисоблаш миқдорининг ўн икки баравари миқдорида йиғим ундирилади.

10. Олий таълим ташкилотини комплекс давлат аккредитациясидан ўтказиш учун базавий йиғим миқдори таълим ташкилотидаги талабаларнинг умумий сонига мутаносиб равишда талабалар сони коэффициентига кўпайтириш орқали ҳисобланади.

Бунда коэффициентнинг бошланғич қиймати бир бирлик этиб белгиланади ҳамда сиртқи ва масофавий таълим шаклларидаги ҳар бир талаба учун коэффициентга 0,000016 бирлик ва бошқа шаклларидаги ҳар бир талаба учун коэффициентга 0,00004 бирлик қўшиб борилади.

11. Таълим ташкилотларини комплекс давлат аккредитациясидан ўтказишда базавий йиғим миқдори таълим дастурларининг умумий сонига мутаносиб равишда дастурлар сони коэффициентига кўпайтириш орқали ҳисобланади.

Бунда коэффициентнинг бошланғич қиймати бир бирлик этиб белгиланади ҳамда ҳар бир таълим дастури учун коэффициентга 0,01 бирлик қўшиб борилади.

Таълим дастурларининг умумий сонини аниқлашда ўрта махсус таълим йўналишлари, касбий таълимнинг касб ва мутахассисликлари, бакалавриат таълим йўналишлари, магистратура мутахассисликлари, олий таълимдан кейинги таълим ихтисосликлари ҳамда қайта тайёрлаш ва малака ошириш курсларининг сони инобатга олинади.

12. Махсус давлат аккредитациясидан ўтказиш учун Ўзбекистон Республикаси Вазирлар Маҳкамасининг 2025 йил 6 августдаги 498-сон «Ўрта махсус, касбий, олий ва олий таълимдан кейинги таълим, шунингдек, кадрларни қайта тайёрлаш ва уларнинг малакасини ошириш ташкилотларини комплекс ҳамда махсус давлат аккредитациясидан ўтказиш тизимини жорий этиш тўғрисида»ги қарорида белгиланган аризаларни қабул қилиш муддатларидан ташқари бошқа муддатларда ариза тақдим этилганда, Агентлик ва таълим ташкилоти ўртасида тузиладиган шартнома шартларига мувофиқ махсус давлат аккредитациясидан ўтказиш учун белгиланган базавий йиғим миқдорига 1,5 оширувчи коэффициент қўлланилади.

13. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгарликка тортиладилар.