Ўзбекистон Республикаси Президентининг 2025 йил 19 мартдаги «Умуммиллий тотувлик ва хориждаги ватандошлар билан алоқаларни мустаҳкамлашни янги босқичга олиб чиқишга оид чора-тадбирлар тўғрисида»ги ПФ-52-сон Фармони ижросини таъминлаш мақсадида қарор қиламан:

1. Қуйидагилар:

(а) Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитаси (кейинги ўринларда — Қўмита) тўғрисидаги низом 1-иловага мувофиқ;

(б) Мамлакатимизда умуммиллий тотувлик ва хориждаги ватандошлар билан алоқаларни мустаҳкамлаш бўйича «йўл харита» 2-иловага* мувофиқ тасдиқлансин.

2. Қорақалпоғистон Республикаси Вазирлар Кенгаши, вилоятлар ва Тошкент шаҳри, туман (шаҳар) ҳокимликлари ҳузуридаги Миллатлараро тотувлик, бағрикенглик ва ҳамжиҳатликни таъминлаш бўйича жамоатчилик кенгашлари Умуммиллий бирдамлик ва ҳамжиҳатликни таъминлаш бўйича жамоатчилик кенгашлари (кейинги ўринларда — ҳудудий жамоатчилик кенгашлари) деб қайта номлансин.

3. Вазирлар Маҳкамаси Қўмита ҳузуридаги жамоатчилик кенгашининг янгиланган таркиби ва ҳудудий жамоатчилик кенгашларининг янгиланган (намунавий) таркибини давлат органлари, нодавлат нотижорат ташкилотлар аъзолари, фан ва маданият намояндалари ҳамда фуқаролик жамиятининг бошқа институтлари вакилларидан иборат таркибда тасдиқласин.

4. Белгилансинки:

(а) Қўмита ҳузуридаги жамоатчилик кенгаши маслаҳат-кенгаш органи ҳисобланиб, Қўмитага юкланган вазифа ва мажбуриятларнинг бажарилишига кўмаклашади;

(б) ҳудудий жамоатчилик кенгашларнинг ташкилий-техник таъминоти Қорақалпоғистон Республикаси Вазирлар Кенгаши ва вилоятлар ҳамда туман (шаҳар) ҳокимликлари томонидан амалга оширилади.

5. Қўмита ҳузуридаги жамоатчилик кенгашининг асосий вазифалари этиб қуйидагилар белгилансин:

(а) Ўзбекистон халқининг бирдамлигини таъминлаш, хориждаги ватандошларни тарихий Ватани билан бирлаштиришга қаратилган чора-тадбирлар ижросини комплекс таҳлил қилишда иштирок этиш, уларнинг амалга оширилиши юзасидан самарали жамоатчилик назоратини ўрнатиш;

(б) мамлакатимизда умуммиллий тотувлик ва ҳамжиҳатликни мустаҳкамлаш, Ўзбекистоннинг халқаро имижини оширишда халқ дипломатияси механизмларидан фойдаланиш борасида олиб борилаётган ишлар самарадорлигини оширишга қаратилган таклифлар тайёрлаш ва Қўмитага киритиш;

(в) аҳолида Ўзбекистон халқининг умуммиллий қадриятлари устуворлигини англаш туйғусини кучайтиришда давлат ва жамоат ташкилотлари ҳамда фуқаролик жамиятининг бошқа институтлари билан ўзаро ҳамкорлик қилиш;

(г) жамиятда умуммиллий бирдамлик, хорижий давлатлар ҳудудлари билан дўстлик ва биродарлик алоқаларини ривожлантиришга оид тарғибот ишларини тизимли олиб бориш.

6. Белгилаб қўйилсинки:

(а) Қўмита бошқарув ходимларининг лавозим маошини аниқлашда ягона тариф сеткаси бўйича меҳнатга ҳақ тўлаш разрядларига кўра тариф коэффициентлари 3 баравар (Қўмита раҳбариятига 4 баравар) оширилган миқдорда қўлланилади;

(б) Қўмита ходимлари ойлик маошининг 50 фоизи миқдорида Қўмита ходимларини моддий рағбатлантириш махсус жамғармаси шакллантирилади;

(в) Қўмита бошқарув ходимлари учун аввалги иш жойида ҳарбий ва махсус унвонлар (мартаба даражалари, малака тоифалари, дипломатик даражалар ва бошқалар) учун берилган устама ва қўшимча тўловлар сақлаб қолинади;

(г) Қўмитада ишланган давр ҳарбий ва махсус унвонларни (мартаба даражалари, малака тоифалари, дипломатик даражалар ва бошқаларни) олиш учун зарур бўлган иш стажига қўшилади;

(д) Қўмита бошқарув ходимларининг лавозим маошига рағбатлантириш коэффициенти ҳисобга олинган ҳолда давлат органларидаги кўп йиллик меҳнати учун 2 йилдан 5 йилгача — 0,1; 5 йилдан 10 йилгача — 0,2; 10 йилдан 15 йилгача — 0,3; 15 йилдан 20 йилгача — 0,4; 20 йилдан ортиқ — 0,5 коэффициентларда ҳар ойлик устамалар тўланади.

7. Қўмита бошқарув ходимлари таркиби юклатилган вазифаларга мос, уларни профессионал даражада амалга оширишга қодир бўлган малакали, зарур назарий билим ва амалий кўникмаларга эга (устуворлик асосида социолог, сиёсатшунос, халқаро муносабатлар соҳасидаги мутахассислар, тарихчи, юрист, филолог) бўлган масъулиятли кадрлар билан тўлдирилишини таъминласин.

8. Қўмита:

(а) ўз ваколатлари доирасида қабул қилган қарорлари давлат органлари, маҳаллий ижро этувчи ҳокимият органлари, бошқа ташкилотлар ва уларнинг мансабдор шахслари, шунингдек, фуқаролар томонидан бажарилиши мажбурий ҳисобланади;

(б) соҳада фаолият юритаётган давлат ва нодавлат ташкилотларга доимий равишда ахборот, маслаҳат, ташкилий ва услубий жиҳатдан кўмаклашиб боради.

9. Ташқи ишлар вазирлиги хорижий мамлакатларда фаолият олиб бораётган турдош ташкилотлар, ўзбек маданий марказлари ва жамиятлари ҳақида маълумотлар базасини шакллантириш ва юритишда, шунингдек, хорижий мамлакатларда фаолият олиб бораётган тегишли ташкилотлар билан ўзаро ҳамкорлик алоқаларини йўлга қўйишда ва ривожлантиришда Қўмитага амалий ёрдам кўрсатсин.

10. Қўмита ходимларининг иш ҳақи ва унга тенглаштирилган тўловлар, шунингдек, Қўмитанинг моддий-техник базасини мустаҳкамлаш билан боғлиқ харажатлар 2025 йилда Олий Мажлис ҳузуридаги Фуқаролик жамияти институтларини қўллаб-қувватлаш жамоат фондидан «Ватандошлар» жамоат фондига ажратилган давлат субсидияси маблағлари ҳисобидан амалга оширилсин ҳамда 2026 йилдан бошлаб Ўзбекистон Республикасининг Давлат бюджети параметрларида кўзда тутилсин.

11. Қўмита:

(а) «Ватандошлар» жамоат фонди, миллий маданий марказлар ва дўстлик жамиятларига доимий равишда ахборот, маслаҳат, ташкилий ва услубий жиҳатдан кўмаклашиб борсин;

(б) манфаатдор вазирлик ва идоралар билан биргаликда 2026 йил 1 январга қадар Умуммиллий бирдамликни таъминлаш соҳасида давлат сиёсати концепцияси ва Хориждаги ватандошлар билан алоқалар соҳасида давлат сиёсати концепциясини тасдиқлаш бўйича тегишли норматив-ҳуқуқий ҳужжатлар лойиҳаларини Вазирлар Маҳкамасига киритсин.

12. Қўмита Тошкент шаҳри Бобур кўчаси 45-уйда жойлаштирилсин.

Белгилансинки, Тошкент шаҳрида фаолият юритувчи ва ўз биноларига эга бўлмаган миллий маданий марказлар, «Ватандошлар» жамоат фонди ва «Oʻzbekiston» журнали таҳририяти» давлат муассасаси ушбу манзилда жойлашган бинонинг Қўмита томонидан белгиланадиган жойларига бепул фойдаланиш ҳуқуқи асосида жойлаштирилади.

13. Ўзбекистон Республикаси Рақамли технологиялар вазирлиги белгиланган тартибда Қўмитани зарур алоқа воситалари, шу жумладан, Ҳукумат алоқа воситалари билан таъминласин.

14. Қўмита бошқа манфаатдор вазирлик ва идоралар билан биргаликда икки ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

15. Мазкур қарор ижросини назорат қилиш Ўзбекистон Республикаси Бош вазири А.Н. Арипов зиммасига юклансин.

1. Мазкур Низом Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитанинг (кейинги ўринларда — Қўмита) мақоми, асосий вазифалари ва функциялари, ҳуқуқлари ва жавобгарлигини, шунингдек, фаолиятини ташкил этиш тартибини белгилайди.

2. Қўмита умуммиллий тотувлик ҳамда хориждаги ватандошлар масалалари бўйича ваколатли республика ижро этувчи органи ҳисобланади ҳамда ушбу масалалар бўйича давлат органлари ва ташкилотлар фаолиятини мувофиқлаштиради.

3. Қўмита ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек, ушбу Низомга амал қилади.

4. Қўмита ўз фаолиятини давлат бошқаруви органлари, маҳаллий давлат ҳокимияти органлари, хўжалик бирлашмалари ва бошқа ташкилотлар, шу жумладан, халқаро ташкилотлар билан ўзаро ҳамкорликда амалга оширади.

5. Қўмитанинг ўз ваколатлари доирасида қабул қилган қарорлари давлат бошқаруви органлари, маҳаллий ижро этувчи ҳокимият органлари, бошқа ташкилотлар ва уларнинг мансабдор шахслари, шунингдек, фуқаролар томонидан бажарилиши мажбурий ҳисобланади.

6. Қўмита юридик шахс ҳисобланади, Ўзбекистон Республикаси Давлат герби тасвири туширилган ва ўзининг номи давлат тилида ёзилган муҳр ва бланкларга, мустақил балансга, миллий ва чет эл валютасидаги шахсий ғазна ҳисобварақларига эга бўлади.

7. Қўмитанинг расмий номи:

а) давлат тилида:

тўлиқ номи — Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмита, қисқартирилган номи — Миллатлараро муносабатлар қўмитаси;

б) рус тилида:

тўлиқ номи — Комитет по вопросам межнациональных отношений и соотечественников за рубежом Республики Узбекистан, қисқартирилган номи — КМОС;

в) инглиз тилида:

тўлиқ номи — The Committee on Interethnic relations and Compatriots abroad of the Republic of Uzbekistan, қисқартирилган номи — the CIRCA.

8. Қўмитанинг жойлашган жойи (почта манзили): 100100, Тошкент шаҳри, Яккасарой тумани, Бобур кўчаси, 45-уй.

9. Қўмита тизимига қуйидагилар киради:

Қўмита таркибий бўлинмалари;

«Oʻzbekiston» журнали таҳририяти» давлат муассасаси.

10. Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимларининг жамоат ва диний ташкилотлар билан алоқалар бўйича ўринбосарлари миллатлараро муносабатлар ва хориждаги ватандошлар масалалари бўйича Қўмитага ҳисобот беради.

«Oʻzbekiston» журнали таҳририяти» давлат муассасаси Қўмитага ҳисобот беради.

11. Қуйидагилар Қўмитанинг асосий вазифалари ҳисобланади:

миллатлараро муносабатларни уйғунлаштириш, жамиятда дўстлик, ўзаро ҳамжиҳатлик, бағрикенглик ва бирдамликни мустаҳкамлаш орқали ягона фуқаровий ўзликни шакллантириш;

Ўзбекистонда яшовчи барча миллат ва элатларнинг ҳуқуқлари ҳамда қонуний манфаатларини таъминлаш орқали уларнинг умуммиллий тараққиётга дахлдорлигини кучайтириш;

халқ дипломатияси механизмлари орқали хорижий мамлакатлар билан ижтимоий-маданий ва дўстлик алоқалари ҳамда Ўзбекистоннинг халқаро майдондаги ижобий имижини мустаҳкамлаш;

хориждаги ватандошлар жамоалари ва ўзбек диаспораларининг миллий ўзлигини сақлашга кўмаклашиш ҳамда уларнинг ижтимоий ва иқтисодий салоҳиятини Ватанимиз ривожига сафарбар этишни қўллаб-қувватлаш;

жамиятда ва ахборот маконида миллатлараро тотувликка салбий таъсир кўрсатувчи хавфли омилларни барвақт аниқлаш ҳамда уларнинг олдини олишга кўмаклашиш;

Ўзбекистон халқи ҳамда хориждаги ватандошларнинг жамиятнинг муштарак мақсадлари йўлида бирдамлиги, умуммиллий ҳамжиҳатлик масалаларини тизимли ёндашув асосида таҳлил қилиш, стратегик истиқболларни белгилаш.

12. Қўмита ўзига юкланган вазифаларни бажариш учун қуйидаги функцияларни амалга оширади:

а) миллатлараро муносабатларни уйғунлаштириш, жамиятда дўстлик, ўзаро ҳамжиҳатлик, бағрикенглик ва бирдамликни мустаҳкамлаш орқали ягона фуқаровий ўзликни шакллантириш борасида:

умуммиллий тотувлик ва ҳамжиҳатликни мустаҳкамлашга қаратилган давлат сиёсатини изчил амалга оширади;

жамиятда дўстлик, ўзаро ишонч ва тушуниш муҳитини асраб-авайлаш ҳамда мустаҳкамлашга қаратилган чора-тадбирларни ишлаб чиқади ва амалга оширади;

давлат ва нодавлат ташкилотлар, фуқаролик жамияти институтлари билан ҳамкорликда «Биргаликда кучмиз» ғояси остида ёшларни умуммиллий қадриятлар атрофида бирлаштирувчи тарғибот тадбирларини олиб боради;

умуммиллий ҳамжиҳатликни акс эттирувчи спорт ва маданий-маърифий тадбирлар, танловларни республика — туман — маҳалла (овул) миқёсида ўтказишга кўмаклашади;

миллатлараро тотувлик, дўстлик ва ҳамжиҳатликни қарор топтиришга йўналтирилган ижтимоий ташаббусларни рағбатлантиради ва қўллаб-қувватлайди;

ёшларни умуммиллий қадриятлар руҳида тарбиялаш, миллий анъана ва урф-одатларни асраш ва ривожлантиришга қаратилган ғоя ва лойиҳаларни кенг тарғиб қилишда иштирок этади;

аҳоли орасида умуммиллий тотувлик, дўстлик ва бирдамликни таъминлашга қаратилган чора-тадбирлар дастурини ишлаб чиқади, уни давлат ва нодавлат ташкилотлар билан ҳамкорликда амалга оширади;

ёшларни Ватанга муҳаббат, садоқат руҳида тарбиялаш, уларнинг Ватан олдидаги бурч ва масъулиятини теран англашига хизмат қиладиган замонавий медиаконтентлар ишлаб чиқади;

давлат дастурлари, концептуал ва стратегик ҳужжатларда бағрикенглик, бирдамликни таъминлашга қаратилган чора-тадбирларни амалга оширишда ёшларни кенг жалб қилади ва уларнинг салоҳиятидан тўлақонли фойдаланади;

б) Ўзбекистонда яшовчи барча миллат ва элатларнинг ҳуқуқлари ҳамда қонуний манфаатларини таъминлаш орқали уларнинг умуммиллий тараққиётга дахлдорлигини кучайтириш борасида:

мамлакатдаги барча миллат ва элатларнинг конституциявий ҳуқуқлари ва қонуний манфаатларини ҳимоя қилиш, улар ўртасида ўзаро тушуниш ҳамда ёрдам ҳиссини кучайтиришга зарур шарт-шароит яратишда кўмаклашади;

барча фуқароларни «Янги Ўзбекистон — менинг тақдирим» шиори атрофида бирлаштириш, бу орқали уларнинг ўз тақдири Ўзбекистон билан боғланганини англаб етишига қаратилган тадбирлар ташкил этишда қатнашади;

юртимизда яшовчи турли миллат ва элатлар вакилларининг ўзига хос анъаналари, урф-одатлари ва расм-русумларини асраб-авайлашга кўмаклашади;

Ўзбекистон тараққиётига дахлдорликни оширишга қаратилган «Ўзбекистон — ягона Ватан» ғояси атрофида маданий-маърифий тадбирларни ўтказишда фаол иштирок этади;

мамлакатимизга ишлаш, таълим олиш мақсадида узоқ муддатга келган хорижий фуқароларнинг маҳаллий шарт-шароитларга ва ижтимоий-маданий мослашувини таъминлаш ва умумий манфаатларни рўёбга чиқаришга қаратилган чора-тадбирлар ишлаб чиқади ҳамда уни идоралараро ҳамкорлик асосида амалга оширади;

миллий маданий марказлар ва соҳага ихтисослашган бошқа жамоат бирлашмалари фаолиятини мувофиқлаштиради, уларга амалий ва услубий ёрдам кўрсатади, улар фаолиятининг қонунийлигини таъминлашда адлия органлари билан ҳамкорлик қилади;

миллий маданий марказларга умуммиллий манфаатларга хизмат қилувчи маданий-маърифий тадбирларни ташкил этишга кўмаклашади;

мамлакатда яшовчи турли миллат ва элат вакилларини умуммиллий қадриятлар атрофида бирлаштирувчи ижтимоий буюртмалар амалга оширилишини қўллаб-қувватлайди ва бу борада Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди ва нодавлат нотижорат ташкилотлар билан ҳамкорлик қилади;

в) халқ дипломатияси механизмлари орқали хорижий мамлакатлар билан ижтимоий-маданий ва дўстлик алоқалари ҳамда Ўзбекистоннинг халқаро майдондаги ижобий имижини мустаҳкамлаш борасида:

хорижий мамлакатлар билан дўстлик алоқаларини ривожлантириш бўйича дастурларни ишлаб чиқади ва амалга оширишда бевосита иштирок этади;

мамлакатимизда фаолият кўрсатаётган хорижий ташкилотлар ва дипломатик ваколатхоналар, хорижий давлатлардаги турдош ташкилотлар билан халқ дипломатияси асосида дўстона муносабатлар ўрнатади ва уни ривожлантиришга қаратилган тизимли ишлар олиб боради;

жаҳон ҳамжамиятида мамлакатимизнинг бой тарихи ҳамда Янги Ўзбекистоннинг бугунги тараққиёт босқичидаги ютуқларига бағишланган кўргазмалар, илмий-амалий семинарлар, анжуманлар, маданий тадбирларни ташкил қилади ва нуфузли ОАВда ёритилишини таъминлайди;

ўзбек халқининг бой тарихий анъаналари тўғрисида туркум материаллар тайёрлайди ва кенг жамоатчиликка етказилишини таъминлайди;

ўзбек заминида туғилган буюк олим ва мутафаккирларнинг барҳаёт меросини, уларнинг жаҳон илм-фани ва маданияти ривожига қўшган ҳиссасини кенг намоён этиш бўйича чора-тадбирларни ишлаб чиқади;

ўзбек халқининг хорижий давлатлар ҳудудларида жойлашган ва сақланаётган моддий-маданий мероси объектларини асраб-авайлашда давлат ва нодавлат ташкилотлар билан фаол ҳамкорлик қилади;

юртимиз ва хорижий мамлакатлар ҳудудлари ўртасида дўстлик, ўзаро ишонч ва биродарлик алоқаларини ўрнатиш ҳамда ривожлантиришда манфаатдор ташкилотлар билан чора-тадбирлар амалга оширилишини мувофиқлаштиради ва кўмаклашади;

хорижий давлатлар ва халқаро ташкилотлар билан халқаро шартномалар ва бошқа халқаро ҳужжатлар тузади, Ўзбекистоннинг давлат органлари ва нодавлат нотижорат ташкилотлари билан хорижий мамлакатларнинг турдош ташкилотлари ва фуқаролик жамиятлари институтлари ўртасидаги кўп томонлама алоқалар ва алмашинувлар ривожланишини қўллаб-қувватлайди;

дўстлик жамиятлари ва биродарлашган ҳудудлар фаолиятини қўллаб-қувватлайди ҳамда инвестиция лойиҳалари, ижтимоий буюртмаларни шакллантиради ва уларни амалга оширишга кўмаклашади;

г) хориждаги ватандошлар жамоалари ва ўзбек диаспораларининг миллий ўзлигини сақлашга кўмаклашиш ҳамда уларнинг ижтимоий ва иқтисодий салоҳиятини Ватанимиз ривожига сафарбар этишни қўллаб-қувватлаш борасида:

хориждаги ватандошларни «Ўзбекистон — ягона Ватан», «Янги Ўзбекистон — менинг тақдирим» ғоялари атрофида бирлаштириш, уларнинг тарихий Ватанига дахлдорлиги, ўз тақдири у билан узвий боғланганини ифодаловчи маданий-маърифий тадбирлар ғоясини яратади ва амалга оширади;

хорижий давлатлардаги ватандошларимиз ва улар томонидан тузилган ташкилотлар, шунингдек, чет элдаги турдош ташкилотлар билан алоқаларни мустаҳкамлашга кўмаклашади;

хориждаги ватандошлар жамоалари билан ҳамкорликнинг янги «ўсиш нуқта»ларини белгилашга қаратилган мақсадли лойиҳа ва дастурлар ишлаб чиқишда иштирок этади;

хорижий мамлакатлардаги ватандошларни мамлакатимизда амалга оширилаётган иқтисодий, инвестициявий ва туристик стартап лойиҳаларда фаол иштирок этишга жалб қилиш орқали уларда тарихий Ватани ривожига дахлдорлик туйғусини кучайтиришга қаратилган таклифлар ишлаб чиқади;

хорижда истиқомат қилаётган ватандошлар ва улар томонидан тузилган жамоат бирлашмаларини қўллаб-қувватлаш борасида давлат органлари ва жамоат бирлашмалари билан ҳамкорлик қилади;

хориждаги ватандошларимиз билан доимий ахборот алмашинувини таъминлайди ҳамда ўзаро ҳамкорликнинг замонавий механизмларини жорий қилади;

хориждаги ватандошлар, биринчи, иккинчи ва учинчи авлод ўзбек диаспора вакилларини Ўзбекистоннинг умуммиллий тараққиётига дахлдорлигини кучайтиришга қаратилган мақсадли, манзилли дастур ва лойиҳаларни қўллаб-қувватлайди ва амалга оширади;

хорижда ватандошлар иштирокидаги тадбирларда мамлакатимизнинг таниқли ёзувчи ва шоирлари, фан арбоблари, маданият ва санъат вакиллари, спортчилари иштирокини таъминлашга кўмаклашади;

д) жамиятда ва ахборот маконида миллатлараро тотувликка салбий таъсир кўрсатувчи хавфли омилларни барвақт аниқлаш ва уларнинг олдини олишга кўмаклашиш борасида:

ахборот маконида миллатлараро тотувликка, умуммиллий ҳамжиҳатликка рахна солувчи ҳолатларни (миллатчилик, айирмачилик ва бошқалар) мониторинг ва таҳлил қилади, бунда замонавий ахборот-коммуникация технологиялари имкониятларидан кенг фойдаланади;

турли миллат ва элат вакилларининг турмуш тарзи, урф-одатлари ва анъаналари билан боғлиқ масалаларни тизимли ўрганади ва бу борада давлат ва нодавлат ташкилотлар билан ҳамкорлик қилади;

жамиятда миллий, этник омиллар сабабли юзага келиши мумкин бўлган баҳсли ҳолатларни баҳолайди, уларни профилактика қилишга қаратилган чора-тадбирларни ишлаб чиқади ва амалга оширишда иштирок этади;

миллатлараро муносабатлар йўналишидаги жараёнлар мониторингини олиб боради, ахборот-таҳлилий шарҳлар тайёрлайди, эълон қилади;

ахборот маконида умуммиллий тотувликка салбий таъсир кўрсатувчи турли даъватлар, чақириқларни тезкор ўрганади ҳамда Ўзбекистоннинг бу борадаги қатъий позицияси бўйича асослантирилган таклиф ва тавсиялар ишлаб чиқади;

жамиятда ва ахборот маконидаги турли таҳдидларга қарши асослантирилган фикрларни шакллантиришда олимлар, экспертлар ва фикр етакчилари билан фаол ҳамкорлик қилади;

е) Ўзбекистон халқи ҳамда хориждаги ватандошларнинг жамиятнинг муштарак мақсадлари йўлида бирдамлиги, умуммиллий ҳамжиҳатлик масалаларини тизимли ёндашув таҳлил қилиш ва стратегик истиқболларни белгилаш борасида:

қонунлар, Президент ҳужжатлари, Президент Администрацияси топшириқлари, Ҳукумат қарор ва фармойишлари, баёнлари, идоралараро ва идоравий норматив-ҳуқуқий ҳужжатларда Қўмитага юклатилган вазифалар ижроси ўз вақтида ва сифатли бажарилишини таъминлайди;

умуммиллий бирдамлик ва хориждаги ватандошлар билан алоқаларни мустаҳкамлашга оид асосий кўрсаткичларни ишлаб чиқади ва соҳага оид маълумотлар базасини яратади;

соҳага оид вазиятни тезкор ва автоматик равишда сунъий интеллект ёрдамида таҳлил қилувчи ва баҳоловчи замонавий технологияларни жорий қилиш бўйича таклифлар тайёрлайди;

миллатлараро муносабатлар ва хориждаги ватандошлар масалалари бўйича илғор хорижий тажрибани ўрганади ва комплекс таҳлил асосида стратегик истиқболларни белгилаш бўйича таклифлар ишлаб чиқади;

яқин, ўрта ва узоқ истиқболда умуммиллий бирдамликни таъминлашга хизмат қиладиган чора-тадбирларни ишлаб чиқади ҳамда уни давлат ва нодавлат ташкилотлар билан ҳамкорликда амалга оширади;

миллатлараро муносабатлар ва хориждаги ватандошлар масалаларига доир қонун ва қонуности ҳужжатлар лойиҳаларини ишлаб чиқади;

юридик ва жисмоний шахсларнинг мурожаатларини кўриб чиқади ва улардаги долзарб масалалар юзасидан таклифлар тайёрлайди;

таълим ташкилотлари билан ҳамкорликда соҳа учун малакали мутахассислар тайёрлаш, қайта тайёрлаш ва уларнинг профессионал кўникмаларини оширишда иштирок этади;

услубий қўлланмалар, ўқув дарсликлари, илмий адабиётларни ишлаб чиқиш ва такомиллаштиришда умуммиллий бирдамлик ва ҳамжиҳатликни таъминловчи таклиф ва тавсияларни илгари суради;

олий таълим муассасалари, илмий-тадқиқот марказлари томонидан амалга ошириладиган соҳага оид масалалар бўйича илмий-амалий лойиҳалар ва ижтимоий буюртмаларни қўллаб-қувватлайди;

соҳага оид тадқиқот ишларини олиб бораётган илмий изланувчиларга кўмаклашади, уларни рағбатлантириш бўйича таклифлар беради;

етакчи маҳаллий ва хорижий олимлар, экспертлар ва мутахассислар иштирокида миллатлараро муносабатлар соҳасида илмий-назарий ва илмий-амалий конференциялар, анжуманлар, семинарлар, давра суҳбатлари ва бошқа тадбирларни ташкил этади ва ўтказади.

13. Қўмита ўзига юкланган вазифалар ва функцияларни бажариш учун қуйидаги ҳуқуқларга эга:

Вазирлар Маҳкамасига ва Ўзбекистон Республикаси Президенти Администрациясига норматив-ҳуқуқий ҳужжатлар лойиҳаларини, шунингдек, Қўмитага юкланган вазифалар ва функцияларни бажариш билан боғлиқ бошқа ҳужжатларни белгиланган тартибда киритиш;

республика ва маҳаллий ижро этувчи ҳокимият органлари, хўжалик бирлашмалари, бошқа ташкилотлар ва уларнинг мансабдор шахслари, шунингдек, фуқаролар учун бажарилиши мажбурий бўлган норматив-ҳуқуқий ҳужжатларни қабул қилиш, зарур ҳолларда, бошқа вазирликлар ва идоралар билан биргаликда қўшма қарорлар ва бошқа ҳужжатларни қабул қилиш;

Қўмитанинг ваколатига кирувчи масалаларда республика ва маҳаллий ижро этувчи ҳокимият органлари, хўжалик бирлашмалари фаолиятини мувофиқлаштириш;

Қўмитага тегишли вазифаларни амалга ошириш учун, зарур ҳолларда, давлат органлари, илмий муассасалар ва бошқа ташкилотларнинг раҳбарлари ҳамда мутахассисларини жалб қилиш, ишчи гуруҳлар тузиш;

ўз ваколатларига кирувчи масалалар юзасидан давлат органлари ва ташкилотларидан статистика, таҳлилий материаллар, хулосалар ва бошқа маълумотларни сўраш ва бепул олиш;

давлат органлари ва ташкилотлари раҳбарларига мамлакатимиздаги умуммиллий тотувлик ва ҳамжиҳатлик, ватандошлар билан алоқаларни мустаҳкамлаш масалаларига оид қонунчилик ҳужжатлари бузилиши, уларни келтириб чиқарувчи сабаблар ва шарт-шароитларни бартараф этиш бўйича кўриб чиқилиши мажбурий бўлган тақдимномалар киритиш;

Қўмитанинг ваколатига кирувчи масалаларда судларга ариза (шикоят) ва даъволарни киритиш;

умуммиллий бирдамлик ҳамда ватандошлар билан алоқаларни мустаҳкамлашга доир ташаббуслар билан чиқиш ҳамда таклифлар киритиш;

ўз ваколати доирасида миллий маданий марказларнинг фаолиятини мувофиқлаштириш, уларга ушбу фаолиятни амалга оширишда ташкилий, ҳуқуқий, услубий ёрдам кўрсатиш;

миллий маданий марказлар, дўстлик жамиятлари ва бошқа тегишли ташкилотларнинг рўйхатдан ўтишда тақдим этадиган ҳужжатлари бўйича адлия органлари сўровларига мувофиқ хулосалар киритиш;

Қўмита фаолиятини самарали ташкил этиш, унга юкланган вазифаларни ўз вақтида ва сифатли амалга ошириш учун хорижий илмий-тадқиқот марказларининг мутахассис ва экспертларини шартнома асосида жалб қилиш;

соҳага доир илмий ва амалий тадқиқотлар ҳамда ишланмаларни амалга ошириш бўйича лойиҳаларни саралаб олиш учун танловлар эълон қилиш ва танлов комиссияларини тузиш;

Қўмита ходимлари томонидан фаолият самарадорлигининг мақсадли кўрсаткичлари (KPI) бажарилишини ҳисобга олган ҳолда моддий рағбатлантириш тартибини, миқдорини ва шартларини белгилаш;

Қўмита ваколатига кирувчи масалалар бўйича таклифларни Ўзбекистон Республикаси Президенти Администрациясига, Вазирлар Маҳкамасига, республика ва маҳаллий ижро этувчи ҳокимият органлари ҳамда хўжалик бирлашмаларига кўриб чиқиш учун киритиш;

Қўмита ваколати доирасида халқаро шартномалар ва идоралараро битимлар тузиш, халқаро, ҳукуматлараро битим лойиҳаларини тақдим этиш;

Қўмита ваколати доирасида Ўзбекистон Республикаси манфаатларини халқаро миқёсда ҳимоя қилиш;

ўзига юкланган вазифалар доирасида хорижий давлатлардаги турдош ташкилотлар, илмий ва таълим муассасалари билан ҳамкорлик қилиш;

бошқарув ходимларининг белгиланган умумий чекланган сони ва меҳнатга ҳақ тўлаш фонди доирасида Қўмитанинг тасдиқланган тузилмасига ўзгартиришлар киритиш;

таркибий бўлинмаларнинг функционал вазифалари ҳамда бошқа ҳужжатлари, смета ва штат жадвалларини тасдиқлаш;

Қўмита тизимида кадрларни танлаш, тайёрлаш, қайта тайёрлаш ва уларнинг малакасини ошириш жараёнларини самарали ташкил этиш;

Қўмита ваколатига кирадиган масалалар бўйича жорий ва стратегик вазифаларни ёритиш учун белгиланган тартибда ноширлик фаолиятини амалга ошириш, расмий веб-сайтлар, ижтимоий тармоқларда саҳифалар очиш, конференциялар, семинарлар, симпозиумлар, кўргазмалар, ярмаркалар ўтказиш, шунингдек, услубий материаллар ва тавсиялар ишлаб чиқиш;

биноларга хизмат кўрсатиш, жиҳоз ва ускуналар, автотранспорт, алоқа ҳамда ҳисоблаш воситалари, компьютер ва ташкилий техника воситаларини сақлаш ва ишлатиш бўйича ишларни бажариш, дастурий таъминотни сотиб олиш тўғрисида белгиланган тартибда шартномалар тузиш;

Қўмита ҳамда идоравий бўйсунувидаги ташкилотларнинг моддий-техника базасини яхшилаш чораларини кўриш;

қонунчилик ҳужжатларига мувофиқ Қўмитанинг ижтимоий инфратузилмасини яратиш ва такомиллаштириш ҳамда Қўмита, унинг таркибий бўлинмалари ходимларини моддий рағбатлантириш ва мукофотлашнинг ягона тизимини шакллантириш;

Қўмита қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

14. Қўмита:

ўзига юкланган вазифалар ва функцияларни самарали бажариш, шунингдек, умуммиллий тотувликни ва хориждаги ватандошлар билан алоқаларни мустаҳкамлаш бўйича давлат сиёсатини самарали амалга ошириш;

ўз фаолияти билан боғлиқ прогноз кўрсаткичларга сўзсиз эришилишини таъминлаш;

Ўзбекистон Республикаси Президенти Администрацияси ва Вазирлар Маҳкамасига киритилаётган норматив-ҳуқуқий ҳужжатлар лойиҳалари ва бошқа ҳужжатлар, шунингдек, Қўмита томонидан қабул қилинаётган қарорларнинг сифати, пировард натижалари ва амалга оширилиши оқибатлари;

ўз фаолияти соҳасини ривожлантириш бўйича дастурлар, чора-тадбирлар режалари, «йўл хариталари» ва бошқа дастурий ҳужжатларнинг самарали бажариш;

фуқаролар ва тадбиркорлик субъектларининг ҳуқуқларига риоя этилишини ва қонуний манфаатлари ҳимоя қилинишини таъминлаш учун жавоб беради.

15. Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳри ҳокимларининг жамоат ва диний ташкилотлар билан алоқалар бўйича ўринбосарлари қуйидаги ҳуқуқларга эга:

Қўмита зиммасига юкланган вазифаларни ўз ҳудудларида самарали ташкил этиш мақсадида давлат органлари ва ташкилотларидан статистика, таҳлилий материаллар, хулосалар ва бошқа маълумотларни сўраш ва бепул олиш;

зарур ҳолларда, зиммасига юкланган вазифаларни амалга ошириш учун давлат органлари, илмий муассасалар ва бошқа ташкилотларнинг раҳбарлари ҳамда мутахассисларини жалб қилиш, ишчи гуруҳлар тузиш;

ўз ваколати доирасида миллий маданий марказларга ташкилий, ҳуқуқий, услубий ёрдам кўрсатиш ишларини ташкил қилиш;

миллий маданий марказларнинг жамиятда умуммиллий тотувликни таъминлашга қаратилган фаолиятини қўллаб-қувватлаш, хорижий давлатлар ҳудудлари билан дўстлик ва биродарлик алоқаларини ривожлантиришга оид таклифларни ишлаб чиқиш;

соҳага оид қонунчилик ҳужжатларининг ижро этилишини, шу жумладан, ҳудудларда турли миллат вакилларининг ҳуқуқ ва қонуний манфаатларига риоя этилишини ўрганиш ва таҳлил қилиш;

соҳа фаолияти билан боғлиқ масалалар юзасидан давлат бошқаруви органлари ва жамоат бирлашмаларининг ҳудудий бўлинмалари раҳбарлари ва масъул ходимлари иштирокида йиғилишлар ўтказиш;

давлат органлари ва ташкилотлари ҳудудий бўлинмаларининг миллатлараро муносабатларни қўллаб-қувватлашга оид масалаларни кўриб чиқиш билан боғлиқ мажлислари ва йиғилишларида иштирок этиш;

ахборот-таҳлилий материалларни тайёрлаш ва дастурий ҳужжатларни ишлаб чиқиш учун республика ижро этувчи ҳокимият органлари ва хўжалик бирлашмаларининг ҳудудий бўлимлари, шунингдек, илмий ташкилотларнинг юқори малакали мутахассисларини жалб қилиш;

умуммиллий ҳамжиҳатликнинг мавжуд ҳолати, уни янада мустаҳкамлаш истиқболлари тўғрисида тегишли ахборот, ахборот-таҳлилий ҳужжатлар, ҳисоботлар тайёрлаш;

Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳри ҳокимларининг жамоат ва диний ташкилотлар билан алоқалар бўйича ўринбосарлари ўз ваколатлари доирасида ўзларига юкланган вазифалардан келиб чиққан ҳолда бошқа ҳуқуқларга ҳам эга бўлиши мумкин.

16. Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳар ҳокимларининг жамоат ва диний ташкилотлар билан алоқалар бўйича ўринбосарлари:

Қўмитага юкланган вазифаларни ҳудудларда сифатли бажарилишини ташкил этиш, таъсирчан назоратни амалга ошириш;

ҳудудларда умуммиллий тотувлик ва хориждаги ватандошлар билан алоқаларнинг мавжуд ҳолати, уни янада мустаҳкамлаш истиқболлари тўғрисида тегишли ахборот, ахборот-таҳлилий ҳужжатлар, ҳисоботларни Қўмитага киритиш;

соҳани ривожлантириш ва ҳудудларнинг муаммоли масалаларини ҳал қилиш бўйича дастур, чора-тадбирлар режаси, «йўл хариталари» ва бошқа ҳужжатлар ижросини таъминлаш;

ҳудудларда миллий маданий марказлар умуммиллий ҳамжиҳатликни мустаҳкамлашга қаратилган фаолиятини амалга оширишига кўмаклашиш;

хорижий давлатлар ҳудудлари билан дўстлик ва биродарлик алоқаларини ривожлантириш чораларини кўриш;

фуқаролар ва тадбиркорлик субъектларининг ҳуқуқларига риоя этилишини ва қонуний манфаатлари ҳимоя қилинишини таъминлаш учун жавоб беради.

17. Қўмита раисининг асосий функционал вазифалари:

Ўзбекистон Республикаси Конституцияси ва қонунларига, шунингдек, бошқа норматив-ҳуқуқий ҳужжатлар талабларига риоя қилиш;

Қўмита фаолиятига умумий раҳбарлик қилиш, Қўмитага Ўзбекистон Республикаси Президентининг тегишли фармонлари, қарорлари ва фармойишлари, Вазирлар Маҳкамасининг қарорлари ва фармойишлари, бошқа қонунчилик ҳужжатлари билан юкланган вазифалар ва функцияларнинг бажарилишини таъминлаш;

Ўзбекистон Республикаси Президентининг ҳужжатлари ва Вазирлар Маҳкамасининг қарорлари билан тасдиқланган Қўмита фаолиятини янада такомиллаштириш бўйича концепциялар, комплекс дастурлар ва чора-тадбирлар режаларини амалга ошириш бўйича танқидий ва чуқур таҳлиллар ўтказиш;

Қўмитанинг ҳудудий вакиллари фаолияти билан боғлиқ истиқболдаги кўрсаткичларга эришишни таъминлаш бўйича амалий чора-тадбирларни ишлаб чиқиш ва қабул қилиш;

Ўзбекистон Республикаси Президенти Администрацияси ва Вазирлар Маҳкамаси, шунингдек, тегишли вазирлик ва идоралар билан Қўмита фаолиятига тааллуқли бўлган масалалар бўйича ўзаро ҳамкорлик қилиш, Вазирлар Маҳкамаси йиғилишларида ва унинг Раёсати мажлисларида кўриб чиқиладиган масалалар юзасидан қатнашиш;

Ўзбекистон Республикаси Президенти, Ўзбекистон Республикасининг Бош вазири кўрсатмаларини бажариш;

ўз ўринбосарларининг ваколатларини белгилаш, мажбуриятларни тақсимлаш, Қўмита таркибий бўлинмалари раҳбарларининг ваколатларини белгилаш, Қўмита фаолиятининг маълум бир соҳаларини бошқаришда ўз ўринбосарлари ва бўлинма раҳбарларининг шахсий жавобгарлик даражасини белгилаш;

Қўмита фаолияти режалаштирилишини ташкил этиш, даврий иш режаларини тасдиқлаш, уларнинг бажарилиши юзасидан назоратни таъминлаш;

Қўмита тизимида рақамлаштиришни жорий этиш;

миллатлараро муносабатлар ва хориждаги ватандошлар соҳаси фаолиятини янада такомиллаштириш бўйича Ўзбекистон Республикаси Президентининг ҳужжатлари ва Вазирлар Маҳкамаси қарорлари билан тасдиқланган комплекс дастур ва чора-тадбирлар ижросини танқидий ва чуқур таҳлил қилиш;

Қўмита ва унинг таркибий бўлинмалари фаолияти билан боғлиқ кўрсаткичлар, мақсадли индикаторлар ва ривожлантириш дастурларининг самарали амалга оширилишига эришишни сўзсиз таъминлаш юзасидан амалий чора-тадбирларни ишлаб чиқиш ва қабул қилиш;

Ўзбекистон Республикаси Президенти Администрациясининг таркибий бўлинмалари ва Вазирлар Маҳкамаси аппарати таркибий бўлинмалари, шунингдек, тегишли вазирлик ва идоралар билан Қўмита фаолият соҳасига кирадиган масалалар бўйича ўзаро ҳамкорлик қилиш, масалаларнинг Вазирлар Маҳкамаси ва унинг Раёсати мажлисларида кўриб чиқилишида иштирок этиш;

Ўзбекистон Республикаси Президенти, Бош вазири ва Бош вазир ўринбосарлари топшириқларининг ўз вақтида, тўлиқ ва сифатли ижро этилишини ташкил этиш;

Ўзбекистон Республикаси Президенти ва Вазирлар Маҳкамасининг қарорлари ва топшириқлари ижросини ташкил этиш ва мониторинг олиб боришнинг амалий тизимини яратиш, Қўмита фаолиятида ижро интизомини мустаҳкамлаш бўйича комплекс амалий чора-тадбирларни бажариш, шунингдек, ҳудудий бўлимлар ва идоравий мансуб ташкилотлар раҳбарларининг шахсий масъулиятини ошириш чора-тадбирларини кўриш;

Қўмита тизимида ходимларни танлаш ва жой-жойига қўйиш, уларнинг самарали фаолияти учун зарур шарт-шароитлар яратиш, кадрлар захирасини шакллантириш;

Ўзбекистон Республикаси Президенти, Ўзбекистон Республикаси Президенти Администрацияси ва Вазирлар Маҳкамаси номенклатурасига кирадиган бўш лавозимларга таклиф этилган кадрларнинг, шунингдек, Қўмитага ишга қабул қилинадиган бошқа кадрларнинг касб маҳорати, ўз ишини билиши, юксак даражадаги ишчанлик ва маънавий-ахлоқий фазилатларга эга бўлишини таъминлашга қаратилган чора-тадбирларни амалга ошириш;

Ўзбекистон Республикаси Президенти, Вазирлар Маҳкамаси топшириқларига ва ўз ташаббусига кўра норматив-ҳуқуқий ҳужжатлар лойиҳалари сифатли ишлаб чиқилишини, улар Ўзбекистон Республикаси қонунлари, Вазирлар Маҳкамаси ҳамда Президент Администрацияси Регламентлари талабларига мувофиқ равишда ўз вақтида Вазирлар Маҳкамасига киритилишини ташкил этиш, уларнинг Вазирлар Маҳкамаси аппаратида пухта ишланишида, Вазирлар Маҳкамасида ҳимоя қилиниши ва Президенти Администрациясида кўриб чиқилишида иштирок этиш;

Қўмитага киритилган таклифлар ва тақдим этилган норматив-ҳуқуқий ҳужжатлар лойиҳаларининг тўлиқ ва ҳар томонлама кўриб чиқилишини таъминлаш, шунингдек, Вазирлар Маҳкамаси ва Президент Администрацияси Регламентларида белгиланган муддатларда келишиш (виза қўйиш);

Қўмита ваколатига кирувчи масалалар бўйича норматив-ҳуқуқий ҳужжатларни ишлаб чиқиш, зарур ҳолларда, давлат бошқарувининг бошқа органлари билан биргаликда қарорлар ва бошқа ҳужжатларни қабул қилиш;

Қўмита ходимларининг хизмат сафарларини Ўзбекистон Республикаси Президентининг 2014 йил 5 мартдаги ПҚ-2142-сон ва 2017 йил 3 августдаги ПҚ-3170-сон қарорлари талабларига тўла мувофиқ равишда ташкил этиш, хизмат сафарларининг асосланганлиги, самарадорлиги ва натижадорлигини, уларга ажратиладиган маблағлардан оқилона фойдаланишни таъминлаш;

ўз ўринбосарлари ва таркибий бўлинмалар раҳбарлари фаолиятининг самарадорлиги ва натижадорлигини мунтазам танқидий таҳлил қилиш, Қўмита ҳайъат мажлисларида уларнинг шахсий ҳисоботларини эшитиш, муҳокама якунлари бўйича зарур чоралар кўриш;

Қўмита таркибий бўлинмалари раҳбарлари фаолиятини мувофиқлаштириш ва назорат қилиш;

Қўмита ходимларини рағбатлантириш ва интизомий жавобгарликка тортиш масалаларини ҳал қилиш, ўз ўринбосарларини рағбатлантириш ва интизомий жавобгарликка тортиш масалаларини, шу жумладан, келгусида уларнинг эгаллаб турган лавозимларига лойиқлиги масалаларини кўриб чиқиш тўғрисида таклифлар киритиш, уларнинг шахсий жавобгарлигини ошириш бўйича тизимли чораларни амалга ошириш;

Қўмита ходимларининг Давлат фуқаролик хизматчиларининг одоб-ахлоқ қоидалари талабларига риоя қилиши бўйича назоратни ташкил этиш;

ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ Қўмита тизимида коррупция ва бошқа ҳуқуқбузарликларнинг олдини олиш чораларини кўриш, шунингдек, уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

замонавий ахборот-коммуникация технологияларидан фойдаланиш орқали давлат хизматлари кўрсатишнинг самарадорлиги ва очиқлигини таъминлаш;

жисмоний ва юридик шахсларнинг мурожаатларини кўриб чиқишга доир самарали ишларни ташкил этиш, аҳоли билан тўғридан-тўғри ва очиқ мулоқотни йўлга қўйиш, қонунчилик ҳужжатларида белгиланган муддатларда ва тартибда жисмоний ва юридик шахслар вакилларини мунтазам равишда шахсан қабул қилиш, шу жумладан, жойларга бориб сайёр қабул қилиш;

Президентнинг Халқ қабулхоналари билан самарали ҳамкорликни, Қўмита раҳбарлари ва ходимларининг улар фаолиятида фаол иштирок этишини ташкил этиш, жисмоний ва юридик шахслар мурожаатлари ўз вақтида ва тўлиқ кўриб чиқилишини таъминлаш;

давлат сирларини ташкил этувчи маълумотлар ва махфий ахборот билан ишлашда қонунчилик ҳужжатлари талабларига риоя қилиш;

Қўмита ходимларини белгиланган тартибда лавозимга тайинлаш ва лавозимдан озод этиш;

Қўмита тизимида кадрлар захирасини шакллантириш, шунингдек, тизим ходимларини қайта тайёрлаш ва уларнинг малакасини ошириш (хорижий мамлакатларда) ишларини тизимли асосда ташкил қилиш;

Қўмита фаолияти соҳасида ҳамкорлик тўғрисида битимлар тузиш ва белгиланган тартибда ўзига юкланган вазифалар доирасида хорижий давлатларнинг органлари ва халқаро ташкилотлар билан ҳамкорлик қилиш;

давлат органлари ва бошқа ташкилотларда, Ўзбекистон Республикаси, шунингдек, халқаро ташкилотлар ва хорижий мамлакатлар вакиллари иштирокида ўтказиладиган расмий тадбирларда Қўмита номидан иштирок этиш;

Ўзбекистон Республикаси Олий Мажлиси Қонунчилик палатасининг қонун лойиҳаларини муҳокама қилиш бўйича мажлисларида иштирок этиш ва уларга доир фикр билдириш;

зарур ҳолларда, бошқарув ходимларининг белгиланган умумий чекланган сони ва меҳнатга ҳақ тўлаш фонди доирасида Қўмитанинг тасдиқланган тузилмасига ўзгартиришлар киритиш;

Қўмита ходимлари бажариши шарт бўлган буйруқлар ва фармойишлар қабул қилиш ҳамда кўрсатмалар бериш;

Қўмита тизимида фаолият юритаётган ходимларни рағбатлантириш ва интизомий жавобгарликка тортиш масалаларини ҳал этиш, алоҳида ўрнак кўрсатган ходимларни Ўзбекистон Республикасининг давлат мукофотлари билан тақдирлашга тақдим этиш, шунингдек, соҳа тармоқларини ривожлантиришда алоҳида ўрнак кўрсатган ходимларни фахрий ёрлиқлар ҳамда бошқа рағбатлантиришлар билан тақдирлаш;

Қўмита мол-мулкини қонунчилик ҳужжатларида белгиланган тартибда тасарруф этиш;

Қўмита ваколатига кирадиган масалалар юзасидан Ўзбекистон Республикасининг халқаро шартномаларини қонунчиликда белгиланган тартибда тузиш;

Қўмита ҳайъат мажлисларида раислик қилиш.

Қўмита раиси қонунчилик ҳужжатларига мувофиқ бошқа функционал вазифаларга ҳам эга бўлиши мумкин.

18. Қўмита раиси ўринбосарларининг умумий функционал вазифалари:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

Қўмита раиси вақтинча бўлмаганда, тегишли буйруқ асосида унинг вазифаларини бажариш;

Қўмита фаолиятини мувофиқлаштириш, назорат қилиш ва бевосита бошқариш, ходимлар ўртасида вазифаларни тақсимлаш;

Ўзбекистон Республикаси Президенти ва Вазирлар Маҳкамасининг қарорлари билан Қўмита фаолиятини янада такомиллаштириш юзасидан дастур ва чора-тадбирлар ижроси ҳолатини танқидий ва чуқур таҳлил қилиш;

Қўмита ҳузуридаги Жамоатчилик кенгаши фаолиятини, жумладан, унинг йиғилишларини самарали ташкил этишда кўмаклашиш;

Ўзбекистонда яшовчи миллат ва элатларнинг тили ва маданиятини сақлашга шароит яратиш орқали миллий маданий хилмахилликни таъминлаб бориш йўналишидаги ишларни мувофиқлаштириш;

этник келиб чиқиши ва маданий мансублигидан қатъий назар барчага бир хил имкониятлар яратиш, бағрикенглик ва бирдамлик қадриятларини мустаҳкамлаш орқали ягона фуқаровий ўзликни шакллантириш юзасидан таклифлар тайёрлаш;

жамиятда миллатлараро муносабатларнинг мавжуд ҳолатини ўрганиш, таҳлил қилиш ҳамда жамиятда умуммиллий тотувлик муҳитини мустаҳкамлашга қаратилган илмий асосланган таклифлар тайёрлашда Ўзбекистон Фанлар академияси, Олий таълим, фан ва инновациялар вазирлиги ва бошқа манфаатдор вазирлик, идора ва ташкилотлар билан ҳамкорлик қилиш;

халқаро ва республика даражасидаги илмий конференция, семинарлар ташкил этиш, соҳага ихтисослашган хорижий институтлар ва марказлар билан ҳамкорлик алоқаларини ривожлантириш бўйича таклифлар тайёрлаш;

Ўзбекистондаги миллий маданий марказлар ва дўстлик жамиятлари фаолиятининг қонунийлигини таъминлашда адлия органлари билан ҳамкорлик қилиш;

Ўзбекистондаги миллий маданий марказлар ва дўстлик жамиятларига ташкилий, ҳуқуқий ва услубий ёрдам кўрсатиш ишларини ташкил этиш;

миллатлараро муносабатлар ва хориждаги ватандошлар билан алоқалар масалаларини тартибга солувчи қонун ҳужжатлари лойиҳаларини ишлаб чиқиш ва экспертиза қилишда иштирок этиш;

чет эллардаги ватандошларнинг ҳуқуқ ва эркинликларини ҳимоя қилишда Ташқи ишлар вазирлиги, Вазирлар Маҳкамаси ҳузуридаги Миграция агентлиги ва бошқа манфаатдор вазирлик, идора ва ташкилотлар билан ҳамкорлик қилиш;

турли соҳаларда фаолият юритаётган ватандошларимизнинг салоҳиятини мамлакатимиз тараққиётига самарали йўналтириш юзасидан ташаббуслар ишлаб чиқиш, ушбу йўналишдаги ишларни мувофиқлаштириш;

хориждаги ватандошлар билан алоқалар масалаларини тартибга солувчи қонун ҳужжатлари лойиҳаларини ишлаб чиқиш ва экспертиза қилишда иштирок этиш;

дўстлик жамиятларига ташкилий, ҳуқуқий ва услубий ёрдам кўрсатиш ишларини ташкил этиш;

хорижий мамлакатлар, уларнинг шаҳарлари ва фуқаролик ҳамжамиятлари билан дўстлик ҳамда биродарлашган алоқаларни ўрнатиш ва ривожлантириш юзасидан чора-тадбирлар ишлаб чиқилиши ҳамда уларнинг ижро этилишини таъминлаш;

Ўзбекистон Республикаси Президенти ва Вазирлар Маҳкамасининг қарорлари ва топшириқлари ижросини таъминлаш, Қўмитада ижро интизоми бўйича комплекс амалий чора-тадбирларни амалга ошириш, шунингдек, топшириқлар ўз вақтида ва сифатли ижро этилиши учун ходимлар шахсий масъулиятини ошириш чора-тадбирларини кўриш;

Қўмита ҳайъати қарорлари, Қўмита раиси буйруқлари ва топшириқларининг ўз вақтида ва сифатли бажарилишини таъминлаш;

Қўмита раисига кадрларни танлаш ва жой-жойига қўйиш бўйича таклифлар тақдим этиш, уларнинг касб маҳорати, ўз ишини билиши, амалий иш тажрибаси, юқори ишчанлик даражаси ва маънавий-ахлоқий сифатлари кафолатланганини таъминлаш, уларнинг касбий малакасини ошириш чораларини кўриш, таркибий бўлинмаларда кадрлар захирасини шакллантириш;

ходимлар томонидан норматив-ҳуқуқий ҳужжатлар лойиҳалари сифатли ишлаб чиқилишини ташкил этиш, Қўмитада тайёрланган норматив-ҳуқуқий ҳужжатлар лойиҳаларини муҳокама этиш, имзолаш (виза қўйиш) учун кўриб чиқиш ва виза қўйиш, уларнинг Ўзбекистон Республикаси Президенти Администрацияси ва Вазирлар Маҳкамаси Регламентлари талабларига қатъий риоя қилган ҳолда Ўзбекистон Республикаси Вазирлар Маҳкамасига ўз вақтида киритилишини таъминлаш, Қўмита раиси топшириғига мувофиқ Ўзбекистон Республикаси Президенти Администрацияси ва Вазирлар Маҳкамасида норматив-ҳуқуқий ҳужжатлар лойиҳаларини ишлаб чиқишда иштирок этиш;

Қўмитага тақдим этилган норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш;

хизмат сафарларини Ўзбекистон Республикаси Президентининг 2014 йил 5 мартдаги ПҚ-2142-сон, 2017 йил 3 августдаги ПҚ-3170-сон қарорлари талабларига тўла мувофиқ равишда ташкил этиш, хизмат сафарларининг асосланганлиги, самарадорлиги ва натижадорлигини, хизмат сафарларига ажратиладиган маблағлардан оқилона фойдаланишни таъминлаш;

ходимлар фаолиятининг самарадорлиги ва натижадорлигини доимий танқидий таҳлил қилиб бориш, Қўмитанинг ҳайъат йиғилишларида уларнинг шахсий ҳисоботларини эшитиш, муҳокама якунлари бўйича зарур чоралар кўриш;

Қўмита фаолиятини такомиллаштириш юзасидан амалий чора-тадбирлар қабул қилиш, миллатлараро муносабатлар ва хориждаги ватандошлар билан ҳамкорлик соҳасидаги қонунчилик ҳужжатларини такомиллаштириш тўғрисида таклифлар ишлаб чиқиш ва уларни кўриб чиқиш учун Қўмита раисига киритиш;

ходимларни рағбатлантириш ва интизомий жавобгарликка тортиш, шу жумладан, уларнинг эгаллаб турган лавозимда қолиш-қолмаслиги мақсадга мувофиқлиги масаласини кўриб чиқиш тўғрисида Қўмита раисига таклифлар киритиш, уларнинг функционал мажбуриятини ва юкланган вазифалар бажарилишида шахсий масъулиятини ошириш юзасидан тизимли чоралар кўриш;

Қўмита ходимлари томонидан Давлат фуқаролик хизматчиларининг одоб-ахлоқ қоидалари талабларига риоя этилиши таъминланишини назорат қилиш;

ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ Қўмита тизимида коррупция ва бошқа ҳуқуқбузарликларнинг олдини олиш чораларини кўриш, шунингдек, уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

Қўмита раисига давлат хизматларини кўрсатиш самарадорлиги, сифати ва улардан эркин фойдаланиш даражасини ошириш бўйича таклифлар киритиш;

жисмоний ва юридик шахсларнинг мурожаатларини кўриб чиқишга доир самарали ишларни ташкил этиш, аҳоли билан тўғридан-тўғри ва очиқ мулоқотни йўлга қўйиш, қонунчилик ҳужжатларида белгиланган муддатларда ва тартибда жисмоний ва юридик шахслар вакилларини мунтазам равишда шахсан қабул қилиш, шу жумладан, жойларга бориб сайёр қабул қилиш;

Ўзбекистон Республикаси Президентининг Халқ қабулхоналари билан самарали ҳамкорлик қилиш, улар фаолиятида фаол иштирок этиш, Президентнинг Виртуал қабулхонасидан тушадиган жисмоний ва юридик шахслар мурожаатлари ўз вақтида ва тўлиқ кўриб чиқилишини таъминлаш;

давлат сирини ташкил этувчи маълумотлар ва махфий ахборот билан ишлашда қонунчилик ҳужжатлари талабларига риоя қилиш;

Қўмита ходимларини тизимли равишда қайта тайёрлаш ва хорижий мамлакатларда уларнинг малакасини оширишни ташкил этиш;

хорижий давлатлар, халқаро ва хорижий ташкилотлар билан ҳамкорликни амалга ошириш.

19. Қўмита таркибий тузилмаси бўлинмалари раҳбарларининг функционал вазифалари:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

бўлинмаларга юкланган вазифалар ва функциялар ижросини таъминлаш;

фаолиятни мунтазам таҳлил қилиб бориш ва қайд этилган кўрсаткичларга таркибий бўлинмалар томонидан сўзсиз эришишни таъминлашга йўналтирилган қўшимча чоралар кўриш юзасидан таклифларни кўриб чиқиш учун Қўмита раисининг мутасаддилик қиладиган ўринбосарига киритиш;

Ўзбекистон Республикаси Президенти ва Вазирлар Маҳкамаси қарорлари ва топшириқлари ижросини таъминлаш, Қўмита таркибий бўлинмалари ходимларининг ижро интизомини мустаҳкамлаш бўйича комплекс амалий чора-тадбирларни амалга ошириш, топшириқларнинг ўз вақтида ва сифатли бажарилиши учун таркибий бўлинмалар ходимларининг шахсий масъулиятини ошириш чора-тадбирларини кўриш;

ҳайъат қарорлари, Қўмита раиси ва унинг ўринбосарлари буйруқлари ва топшириқларининг ўз вақтида ва сифатли бажарилишини таъминлаш;

таркибий бўлинмаларнинг иш режаларини ишлаб чиқиш, тасдиқлаш учун киритиш, уларда қайд этилган вазифалар ва тадбирларнинг ўз вақтида ва сифатли бажарилишини таъминлаш;

таркибий бўлинмаларга юкланган вазифаларнинг ижросини назорат қилиш ва мувофиқлаштириш, идоравий мансуб ташкилотлар фаолиятига амалий ва методик ёрдам кўрсатиш;

таркибий бўлинмалар фаолияти соҳаларига оид қонунчилик ҳужжатлари ва ҳуқуқни қўллаш амалиётини такомиллаштириш бўйича таклифларни ишлаб чиқиш ва уларни кўриб чиқиш учун Қўмита раҳбариятига киритиш;

Қўмита раҳбариятига таркибий бўлинмаларда кадрларни танлаш ва жой-жойига қўйишда таклифлар тақдим этиш, уларнинг профессионаллиги, ўз ишини билиши, амалий тажрибага, юксак ишчанлик ва маънавий-ахлоқий фазилатларга эга эканлиги кафолатини таъминлаш, касбий малакасини ошириш чораларини кўриш, таркибий бўлинмаларда кадрлар захирасини шакллантириш;

таркибий бўлинмаларга тақдим этилган таклифлар ва норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш;

хизмат сафарларини белгиланган талабларга мувофиқ равишда амалга ошириш, уларнинг асосланганлиги, самарадорлиги ва натижадорлигини, ажратиладиган маблағлардан оқилона фойдаланишни таъминлаш;

таркибий бўлинмалар ходимлари фаолиятининг самарадорлиги ва натижадорлигини доимий танқидий таҳлил қилиб бориш, йиғилишларда уларнинг шахсий ҳисоботларини эшитиш, уларни кўриб чиқиш якунлари бўйича зарур чораларни кўриш;

ходимларининг Давлат фуқаролик хизматчиларининг одоб-ахлоқ қоидалари талабларига риоя этилишини таъминлаш;

ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали «Коррупцияга қарши курашиш тўғрисида»ги Ўзбекистон Республикаси Қонуни талабларига мувофиқ таркибий бўлинмаларда коррупция ва бошқа ҳуқуқбузарликларнинг олдини олиш чораларини кўриш, шунингдек, уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

Қўмита раҳбариятига давлат хизматларини кўрсатиш самарадорлиги, сифати ва улардан фойдаланиш даражасини ошириш бўйича таклифларни кўриб чиқиш учун киритиш;

жисмоний ва юридик шахсларнинг мурожаатларини кўриб чиқишга доир самарали ишларни ташкил этиш, аҳоли билан тўғридан-тўғри ва очиқ мулоқотни йўлга қўйиш, қонунчилик ҳужжатларида белгиланган муддатларда ва тартибда жисмоний ва юридик шахслар вакилларини мунтазам равишда шахсан қабул қилиш, шу жумладан, жойларга бориб сайёр қабул қилиш;

жисмоний ва юридик шахслар мурожаатлари ўз вақтида ва тўлиқ кўриб чиқилишини таъминлаш;

давлат сирини ташкил этувчи маълумотлар ва махфий ахборот билан ишлашда қонунчилик талабларига риоя қилиш.

20. Қўмита раиси:

Ўзбекистон Республикаси Президентининг 2021 йил 10 февралдаги «Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида» ги ПФ-6166-сон Фармони ҳамда 2021 йил 31 майдаги «ijro.gov.uz» ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида»ги ПҚ-5132-сон қарори ўз вақтида, тўлиқ ва сифатли ижро этилиши;

мазкур Низом ва бошқа қонунчилик ҳужжатлари билан Қўмитага юкланган вазифаларнинг сифатли ва ўз вақтида бажарилиши, шунингдек, Қўмита ишидаги камчиликларни бартараф этиш бўйича чоралар кўрилиши;

амалга оширилаётган дастурлар, стратегия ва концепцияларда кўзланган натижаларга эришилиши, уларнинг мамлакатда умуммиллий тотувликни таъминлаш ва хориждаги ватандошлар билан алоқаларни мустаҳкамлаш соҳасидаги давлат сиёсатини амалга оширишга таъсири;

тегишли соҳалар ва тармоқларни ривожлантириш бўйича белгиланган параметрлар ва кўрсаткичларга эришишга қаратилган амалий чора-тадбирлар ишлаб чиқилиши ва амалга оширилиши;

Қўмита тизимида ижро интизомига қатъий риоя этилиши учун жавоб беради.

21. Қўмита раисининг ўринбосарлари:

қонунчилик ҳужжатлари билан юкланган йўналишлар ва соҳалар бўйича вазифалар ва функцияларнинг ўз вақтида бажарилиши ҳамда натижадорлиги;

мутасаддилик қилинаётган йўналишлар бўйича соҳаларнинг барқарор ривожланишини таъминлашга оид чора-тадбирларнинг самарадорлиги ва натижадорлиги учун жавоб беради.

22. Қўмита таркибий бўлинмалари раҳбарлари:

тегишли таркибий бўлинмаларга юкланган вазифалар ва функцияларнинг ўз вақтида бажарилиши ҳамда натижадорлиги;

фаолият йўналишларига оид қонунчилик ҳужжатлари, Қўмита раҳбарларининг топшириқлари бажарилишининг ҳолати тўғрисида ҳаққоний таҳлилий ва бошқа ахборотларни сифатли тайёрлаш ва ўз вақтида тақдим этиш юзасидан жавоб беради.

23. Қўмитага Ўзбекистон Республикаси Президенти томонидан лавозимга тайинланадиган ва лавозимдан озод этиладиган раис раҳбарлик қилади.

24. Қўмита раиси мақоми, маиший таъминоти, тиббий ва транспорт хизматидан фойдаланиш борасидаги шарт-шароитларига кўра ― вазирга, унинг ўринбосарлари ― вазир ўринбосарларига тенглаштирилади.

25. Қўмита раисининг Вазирлар Маҳкамаси томонидан лавозимга тайинланадиган ва лавозимдан озод этиладиган икки нафар ўринбосари бўлади.

26. Қўмита раиси бўлмаган вақтда, унинг ваколатлари раис ўринбосари томонидан раиснинг тегишли буйруғига асосан амалга оширилади.

27. Қўмита ходимлари Қўмита раиси томонидан лавозимга тайинланади ва лавозимдан озод этилади.

28. Қўмита ўз вазифалари ва функцияларини амалга оширишда давлат бошқаруви органлари, маҳаллий ижро этувчи ҳокимият органлари, хўжалик бирлашмалари, фуқаролик жамияти институтлари ва бошқа ташкилотлар билан ўзаро ҳамкорлик қилади.

29. Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳри ҳокимларининг жамоат ва диний ташкилотлар билан алоқалар бўйича котибиятлари миллатлараро муносабатлар ва хориждаги ватандошлар билан алоқаларни мустаҳкамлаш масалаларида ўз ваколатлари доирасида давлат бошқаруви органлари, маҳаллий ижро этувчи ҳокимият органлари, хўжалик бирлашмалари ва бошқа ташкилотлар билан ўзаро ҳамкорлик қилади.

30. Қўмитада раис (ҳайъат раиси), унинг ўринбосарлари, шунингдек, унинг фаолиятининг асосий йўналишларини мувофиқлаштирувчи таркибий бўлинмалар раҳбарларидан иборат таркибда ҳайъат тузилади.

Ҳайъат таркибининг сони ва шахсий таркиби Қўмита раисининг тақдимномасига биноан Вазирлар Маҳкамаси томонидан тасдиқланади.

31. Ҳайъатга қуйидаги вазифалар юкланади:

Қўмита фаолиятининг ушбу Низомда белгиланган асосий йўналишларини ишлаб чиқиш ва амалга ошириш;

қонунчилик ҳужжатларида, Ўзбекистон Республикаси Президентининг ҳужжатлари ва Ўзбекистон Республикаси Ҳукуматининг қарорларида белгиланган вазифалар ўз вақтида ва сифатли амалга оширилишини таъминлаш учун Қўмита тизимидаги ходимлар ва раҳбарларнинг шахсий жавобгарлигини ошириш чораларини кўрган ҳолда таркибий бўлинмалар ҳамда идоравий мансуб ташкилотлар раҳбарларининг ҳисоботлари мунтазам равишда эшитилишини ташкил этиш;

Қўмита фаолияти соҳасидаги ҳудудий ва тармоқ дастурлари амалга оширилишининг натижадорлигини тизимли равишда ҳар чоракда ва мунтазам кўриб чиқиш;

Қўмита фаолияти доирасидаги долзарб масалаларни муҳокама қилишни таъминлаган ҳолда ҳайъатнинг кенгайтирилган, шу жумладан, жойларда сайёр мажлисларини ўтказишни ташкил этиш, шунингдек, юзага келган муаммоларни бартараф этиш бўйича тегишли қарорларни тайёрлаш ва қабул қилиш;

Қўмита ва унинг тизимига кирадиган лавозимлар номенклатурасини кўриб чиқиш ва тасдиқлаш;

Қўмита номенклатурасига кирадиган лавозимларни юклатилган вазифаларга мос, уларни профессионал даражада бажаришга қодир, малакали, зарур назарий билим ва амалий кўникмаларга эга бўлган (устуворлик асосида социолог, сиёсатшунос, халқаро муносабатлар, филолог, тарихчи, юрист) масъулиятли кадрлар билан жамлаш масалаларини кўриб чиқиш;

Ўзбекистон Республикаси Президенти ва Вазирлар Маҳкамасининг қарорлари ва топшириқлари билан белгиланган вазифалар ўз вақтида ва сифатли бажарилишини таъминлаш учун Қўмита раҳбарлари ҳамда ходимларининг ижро интизомини мустаҳкамлаш, шахсий жавобгарлигини ошириш.

Ҳайъат Қўмита ваколатига киритилган бошқа масалаларни ҳам кўриб чиқиши мумкин.

32. Ҳайъат мажлисига республика ва маҳаллий ижро этувчи ҳокимият органлари, хўжалик бирлашмалари ва бошқа ташкилотлар раҳбарлари уларнинг ваколатига кирадиган масалалар юзасидан таклиф этилиши мумкин.

33. Ҳайъат, агар унинг мажлисида ҳайъат таркибининг ярмидан кўпи қатнашса, ваколатли ҳисобланади. Кўриб чиқилаётган масалалар юзасидан қарорлар кўпчилик овоз билан қабул қилинади.

34. Ҳайъат қарорлари Қўмита раисининг буйруқлари билан амалга оширилади.

35. Қўмита раиси ва ҳайъат аъзолари ўртасида келишмовчиликлар юзага келган тақдирда, Қўмита раиси юзага келган келишмовчиликлар ҳақида Вазирлар Маҳкамасига ахборот берган ҳолда мустақил равишда қарор қабул қилади. Ҳайъат аъзолари ҳам Вазирлар Маҳкамасига ўз фикрини маълум қилиши мумкин.

36. Ҳайъат фаолиятининг тартиби унинг ҳайъат томонидан тасдиқланадиган регламенти билан белгиланади.

37. Қўмита фаолиятининг самарадорлигини ошириш мақсадида унинг ҳузурида нодавлат нотижорат ташкилотлар аъзолари, фан ва маданият намояндалари ҳамда фуқаролик жамиятининг бошқа институтлари вакилларидан иборат таркибда жамоатчилик кенгаши ташкил этилади.

38. Жамоатчилик кенгаши маслаҳат-кенгаш органи ҳисобланиб, қабул қилинаётган норматив-ҳуқуқий ҳужжатларда, қарорларда, шунингдек, соҳага оид давлат ва тармоқ дастурларида жамоатчилик манфаатлари ва фикри ҳисобга олиниши, Қўмита зиммасига юкланган ижтимоий шериклик доирасида амалга ошириладиган битимлар, шартномалар, лойиҳалар ва дастурларни рўёбга чиқариш бўйича Қўмита ва унинг мансабдор шахсларининг фаолияти устидан жамоатчилик назоратини амалга оширади.

39. Қўмита Қорақалпоғистон Республикаси Вазирлар Кенгаши, вилоятлар ва Тошкент шаҳри, туман (шаҳар) ҳокимликлари ҳузуридаги умуммиллий бирдамлик ва ҳамжиҳатликни таъминлаш бўйича жамоатчилик кенгашлари билан ҳамкорлик қилади.

40. Қўмита ҳузуридаги Жамоатчилик кенгашининг асосий вазифалари этиб қуйидагилар белгиланади:

Ўзбекистон халқининг бирдамлигини таъминлаш, хориждаги ватандошларни тарихий Ватани билан бирлаштиришга қаратилган чора-тадбирлар ижросини комплекс таҳлил қилишда иштирок этиш, уларнинг амалга оширилиши юзасидан самарали жамоатчилик назоратини ўрнатиш;

мамлакатимизда умуммиллий тотувлик ва ҳамжиҳатликни мустаҳкамлаш, Ўзбекистоннинг халқаро имижини оширишда халқ дипломатияси механизмларидан фойдаланиш борасида олиб борилаётган ишлар самарадорлигини оширишга қаратилган таклифлар тайёрлаш ва Қўмитага киритиш;

аҳолида ягона Ўзбекистон халқининг умуммиллий қадриятлар устуворлигини англаш туйғусини кучайтиришда давлат ва жамоат ташкилотлари ҳамда фуқаролик жамиятининг бошқа институтлари билан ўзаро ҳамкорлик қилиш;

жамиятда умуммиллий бирдамлик, хорижий давлатлар ҳудудлари билан дўстлик ва биродарлик алоқалари ривожлантиришга оид тарғибот ишларини тизимли олиб бориш.

41. Қўмита ҳузуридаги Жамоатчилик кенгаши тўғрисидаги низом ва унинг таркиби Ўзбекистон Республикаси Вазирлар Маҳкамаси томонидан тасдиқланади.

42. Қўмита фаолиятининг самарадорлиги мунтазам баҳоланади.

43. Қўмита фаолиятининг самарадорлиги ва натижадорлигини баҳолаш тегишли мезонлар ва ишчи индикаторларга асосланади.

44. Қўмита фаолияти самарадорлиги ва натижадорлигини баҳолаш якунлари бўйича:

Қўмита раҳбарлари ва ходимларини рағбатлантириш (мукофотлаш) ёки уларга нисбатан интизомий жазо чоралари;

Қўмита фаолиятида аниқланган камчиликларни бартараф этиш ва унинг фаолиятини янада такомиллаштириш чоралари кўрилади.

45. Қўмита фаолиятининг самарадорлиги ва натижадорлигини баҳолаш тартиби қонунчилик ҳужжатларида белгиланади.

46. Қуйидагилар Қўмита фаолиятини молиялаштиришнинг асосий манбалари ҳисобланади:

Ўзбекистон Республикаси Давлат бюджети маблағлари;

Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитаси ходимларини моддий рағбатлантириш махсус жамғармаси маблағлари;

қонунчилик ҳужжатларида тақиқланмаган бошқа манбалар.

47. Қўмита ходимларининг иш ҳақи лавозим маоши, мукофотлар, қўшимча ҳақ, устамалар ва қонунчиликда назарда тутилган бошқа рағбатлантирувчи тўловлардан иборат.

48. Қўмита бошқарув ходимларининг лавозим маошини аниқлашда ягона тариф сеткаси бўйича меҳнатга ҳақ тўлаш разрядларига кўра тариф коэффициентлари 3 баравар (Қўмита раҳбариятига 4 баравар) оширилган миқдорда қўлланилади.

49. Қўмита, унинг идоравий мансуб ташкилотлари ходимларининг лавозим маоши Ягона тариф сеткасининг тасдиқланган разрядлари бўйича белгиланади.

Қўмита ходимларининг лавозим маоши ягона тариф сеткаси бўйича меҳнатга ҳақ тўлашнинг тасдиқланган разрядлари асосида белгиланади.

Қўмита ходимлари ойлик маошининг 50 фоизи миқдорида Қўмита ходимларини моддий рағбатлантириш махсус жамғармаси шакллантирилади.

50. Қўмита бошқарув ходимлари учун аввалги иш жойида ҳарбий ва махсус унвонлар (мартаба даражалари, малака тоифалари, дипломатик даражалар ва бошқалар) учун берилган устамалар ва қўшимча тўловлар сақлаб қолинади.

Қўмитада ишланган давр ҳарбий ва махсус унвонларни (мартаба даражалари, малака тоифалари, дипломатик даражалар ва бошқаларни) олиш учун зарур бўлган иш стажига қўшилади;

нуфузли халқаро рейтинг ташкилотларининг юқори 500 талик рўйхатига киритилган хорижий олий таълим муассасаларини (бакалавриат, магистратура) тамомлаган ёки уларда илмий даража (PhD ва унга тенглаштирилган бошқа илмий даража) олган ёш мутахассис ходимларга — Ўзбекистон Республикаси Президентининг «Ёшларни ҳар томонлама қўллаб-қувватлаш ва уларнинг ижтимоий фаоллигини янада оширишга оид қўшимча чора-тадбирлар тўғрисида» 2021 йил 13 июлдаги ПФ-6260-сон Фармонида белгиланган тартиб ва миқдорларда тўлаб бериладиган қўшимча устамалар;

Илмий даражага (PhD, DSc) эга ходимларга — лавозим маошининг 10 фоизигача (PhD — 5 фоиз, DSc — 10 фоиз) миқдорида қўшимча устама.

51. Қўмита бошқарув ходимларининг умумий иш стажидан келиб чиқиб, Ўзбекистон Республикасининг Давлат бюджети маблағлари ҳисобидан қуйидаги миқдорда кўп йиллик ишлаганлик учун ҳар ойлик устама тўланади (рағбатлантириш коэффициентини инобатга олган ҳолда лавозим маошига нисбатан коэффициентларда):

2 йилдан 5 йилгача — 0,1;

5 йилдан 10 йилгача — 0,2;

10 йилдан 15 йилгача — 0,3;

15 йилдан 20 йилгача — 0,4;

20 йилдан ортиқ — 0,5.

52. Қўмита ходимлари ойлик маошининг 50 фоизи миқдорида Қўмита ходимларини моддий рағбатлантириш махсус жамғармаси ҳисобидан қонунчиликда белгиланган ишланмайдиган байрам кунларида ва бошқа муҳим саналарда мукофотлаш, шунингдек, устама, рағбатлантириш ва қўшимча ҳақ, мукофотлар ва иш ҳақига бошқа тўловлар миқдори Қўмита раиси томонидан белгиланади.

Қўмита ҳузуридаги Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитаси ходимларини моддий рағбатлантириш махсус жамғармаси маблағлари ҳисобидан ходимларга қонунчиликда тақиқланмаган бошқа тўловлар ҳам тўланиши мумкин.

53. Қўмита ходимларига ойлик устамалар, моддий ва кўп йиллик меҳнати учун рағбатлантиришлар тарзидаги лавозим маошларига қўшимча тўловлар қонунчилик ҳужжатларига мувофиқ амалга оширилади.

54. Қўмита раҳбарлари ўз фаолияти тўғрисида Ўзбекистон Республикаси Президентига, Ўзбекистон Республикаси Президенти Администрациясининг тегишли таркибий бўлинмаларига, Вазирлар Маҳкамасига ҳисобот беради.

Қўмита Ўзбекистон Республикаси Президенти Администрацияси ва Вазирлар Маҳкамаси билан ўзаро ҳамкорлик қилиш доирасида:

ўзига юкланган вазифалар ва функцияларни бажариш билан боғлиқ норматив-ҳуқуқий ҳужжатлар ҳамда бошқа ҳужжатлар лойиҳаларини белгиланган тартибда киритади;

Ўзбекистон Республикаси Президенти Администрацияси ва Вазирлар Маҳкамасига тақдим этиш учун республика ва маҳаллий ижро этувчи ҳокимият органлари, хўжалик бирлашмалари билан биргаликда ўз фаолияти соҳасидаги муаммоларни ҳал этиш, давлат бошқаруви тизимини мақбуллаштиришга қаратилган таклиф, тавсия ва таҳлилий маълумотлар тайёрланишини таъминлайди;

умуммиллий тотувлик ва хориждаги ватандошлар билан алоқаларни мустаҳкамлашнинг энг муҳим йўналишлари ҳамда вазифаларни амалга оширишда мавжуд тизимли муаммо ва камчиликларнинг мунтазам равишда кўриб чиқилиши ва бартараф этилишини ташкил қилади;

белгиланган тартибда бошқа функцияларни ҳам амалга оширади.

55. Вазирлар Маҳкамаси Қўмита раҳбарларининг фаолиятини юкланган вазифаларнинг улар томонидан самарали бажарилиши бўйича доимий мониторинг қилиб боради, Қўмита фаолияти самарадорлигини холисона баҳолайди.

56. Мониторинг ва баҳолаш натижаларига кўра Қўмитанинг алоҳида ўрнак кўрсатган ходимларини рағбатлантириш чоралари кўрилади, жиддий камчиликларга йўл қўйган ходимларга нисбатан эса тегишли жавобгарлик чоралари қўлланади.

57. Қўмита қонунчилик ҳужжатларида белгиланган тартибда қайта ташкил этилади ва тугатилади.