Халқ депутатлари маҳаллий Кенгашларининг депутатлик назорати соҳасидаги фаолиятини тартибли йўлга қўйишни ташкил этишга кўмаклашиш мақсадида «Ўзбекистон Республикаси Олий Мажлисининг Сенати тўғрисида»ги Конституциявий Қонуннинг 16-моддасига ва «Ўзбекистон Республикаси Олий Мажлиси Сенатининг Регламенти тўғрисида»ги Қонуннинг 6-моддасига мувофиқ Ўзбекистон Республикаси Олий Мажлиси Сенатининг Кенгаши қарор қилади:

1. Халқ депутатлари маҳаллий Кенгашлари сессияларида ҳудудий давлат органлари ва ташкилотлари мансабдор шахсларининг ҳисобот (ахборот)ларини эшитишнинг намунавий тартиби иловага мувофиқ тасдиқлансин.

2. Халқ депутатлари вилоятлар, Тошкент шаҳар, туман ва шаҳар Кенгашларига:

бир ой муддатда мазкур Намунавий тартибни ўз сессияларида кўриб чиқиш ва унинг асосида тегишли тартибни тасдиқлаш;

тегишли ҳудудлардаги давлат органлари раҳбарларининг ҳисоботи (ахбороти)ни эшитишга доир назорат тадбирларини юқори савияда ташкил этиш ва ўтказиш;

ҳисобот (ахборот)ларни эшитиш учун тайёргарлик жараёнларига Кенгашлар ҳузуридаги Экспертлар гуруҳлари аъзоларини жалб этиш, уларнинг имкониятларидан самарали фойдаланиш тавсия этилсин.

3. Ўзбекистон Республикаси Олий Мажлиси Сенати девони Ҳудудий вакиллик органлари фаолиятини ўрганиш маркази (Қ. Муқумов) мазкур Қарорнинг ижросини таъминлашда халқ депутатлари маҳаллий Кенгашларига амалий ва услубий кўмак кўрсатиб борсин.

4. Мазкур Қарорнинг ижросини назорат қилиш Ўзбекистон Республикаси Олий Мажлиси Сенатининг Маҳаллий ҳокимият вакиллик органлари фаолиятини кучайтиришга кўмаклашувчи комиссияси (А. Туйчиев) зиммасига юклансин.

5. Ушбу Қарор қабул қилинган кундан эътиборан кучга киради.

1. Халқ депутатлари маҳаллий Кенгашлари сессияларида ҳудудий давлат органлари ва ташкилотлари мансабдор шахсларининг ҳисобот (ахборот)ларини эшитишнинг намунавий тартиби (бундан буён матнда Намунавий тартиб деб юритилади) Ўзбекистон Республикаси Конституцияси, «Маҳаллий давлат ҳокимияти тўғрисида»ги Ўзбекистон Республикаси Қонуни ва бошқа қонун ҳужжатларига мувофиқ ишлаб чиқилган.

2. Намунавий тартиб халқ депутатлари вилоят, Тошкент шаҳар, туман (шаҳар) Кенгаши (бундан буён матнда маҳаллий Кенгаш деб юритилади) сессияларида ҳудудий давлат органлари ва ташкилотлари мансабдор шахсларининг (бундан буён матнда мансабдор шахс деб юритилади) ҳисоботи (ахбороти)ни эшитишга оид депутатлик назорати тадбирини амалга ошириш тартибини белгилайди.

3. Мансабдор шахснинг ҳисоботи (ахбороти)ни эшитиш маҳаллий Кенгаш иш режаларига, қарорларига, маҳаллий Кенгаш, унинг доимий комиссиялари (муваққат комиссиялари), партия гуруҳлари, шунингдек, депутатлар ташаббусига мувофиқ ўтказилади.

4. Маҳаллий Кенгаш сессияларида мансабдор шахснинг ҳисоботи (ахбороти) эшитуви депутатлик назоратининг алоҳида шаклларидан бири бўлиб, унинг фаолиятига доир масалалар, шу жумладан қонунчилик ҳужжатларига риоя этилиши, тегишли маҳаллий Кенгаш қарорлари, унинг доимий комиссиялари (муваққат комиссиялари) тавсияларининг бажарилиши юзасидан ҳисоботи (ахбороти)ни эшитишдир.

5. Мансабдор шахснинг ҳисоботи (ахбороти)ни эшитиш тезкор-қидирув фаолиятини амалга оширувчи органларнинг, суриштирув ва тергов органларининг, судларнинг иш юритувидаги муайян ишлар ва материалларга, шунингдек, ижро иши юритиш ҳамда нотариал иш юритишнинг муайян материалларини кўриб чиқиш билан боғлиқ фаолиятга тааллуқли бўлиши мумкин эмас.

6. Маҳаллий Кенгаш томонидан мансабдор шахснинг ҳисоботи (ахбороти)ни эшитишдан асосий мақсад долзарб ҳудудий муаммоларни аниқлаш ва уларни ҳал қилиш бўйича чоралар белгилашдан иборат бўлиб, бунда қуйидаги масалаларга алоҳида эътибор қаратилади:

қонунларда, Олий Мажлис палаталарининг қарорларида, Ўзбекистон Республикаси Президентининг фармонлари ва қарорларида, шунингдек, халқ депутатлари маҳаллий Кенгашларининг қарорлари билан мамлакатни ва ҳудудларни ривожлантиришнинг устувор йўналишларини амалга ошириш бўйича олиб борилаётган ишлар ҳолатига;

ҳисобот ёки ахборот берувчи орган олдига қўйилган мақсад ва вазифаларининг, унинг йиллик ва оралиқ режа ва дастурларини ишлаб чиқишда эътиборга олганлигига шунингдек, уларнинг тўлиқ бажарилганлигига;

режа ва амалга оширилган ишларининг давлат томонидан олиб борилаётган ислоҳотларга, хусусан, Ўзбекистон Республикаси Президенти томонидан белгилаб берилган вазифаларига ҳамоҳанглигига, режадаги тадбирлар самарали, натижадор бўлганлигига;

ҳисобот ёки ахборот берувчи орган олдига қўйилган мақсад ва вазифаларининг бажарилмай қолганлиги сабабларига, уларни келажакда бажариш имкониятларига;

аҳолининг ижтимоий муаммоларини ўрганиш ва уларни ҳал этиш борасида аниқ рақамларга асосланган маълумотларга, «маҳалла еттилиги билан ҳамкорлигига, маҳаллаларни барқарор ижтимоий-иқтисодий ривожлантириш бўйича белгиланган чора-тадбирларнинг бажарилишига, камбағалликни қисқартиришга, маҳаллалардаги муаммоларни ҳал этиш борасидаги ишлар ҳолатига;

соҳада коррупцион ҳолатларнинг олдини олиш ва унга қарши кураш борасида амалга оширилган ишлар ва келгусида режалаштирилган тадбирларга;

маҳаллий бюджет маблағларидан тежамкорлик билан самарали фойдаланилишига, амалга оширилган давлат харидлари ва уларнинг қонунийлиги ва асослилигига;

Кенгаш, депутатлар, доимий комиссиялар, сиёсий партия гуруҳларининг топшириқлари, тавсиялари, сўровларига ўтган давр мобайнида қанчалик

ўз вақтида ва самарали муносабат билдирилганлигига;

мазкур орган бўйича ҳуқуқни муҳофаза қилувчи ва назорат идоралари маълумотлари таҳлилига;

ҳисобот ёки ахборот берувчи органнинг фаолиятини баҳолаш бўйича мезонлар, индикаторлар, рейтинглар мавжуд бўлган ҳолда улардаги ўринига;

ҳисобот ёки ахборот берувчи органнинг фаолиятини охирги 3 йилликдаги таҳлилига кўра ушбу соҳа ёки йўналишда ўсиш ёки пасайиш кўрсаткичларига;

округ ёки маҳаллалар кесимида маълумотлар, натижадорлик мавжудлигига;

Халқ қабулхоналарига, юқори турувчи давлат органларига ушбу орган фаолияти бўйича тушган мурожаатлар, шунингдек, аҳоли томонидан йўлланаётган мурожаатлардаги муаммоларни ҳал қилиш борасида амалга оширилган ишлар таҳлилига;

ҳисобот ёки ахборот берувчи орган фаолиятида очиқлик ва шаффофликнинг таъминланганлигига, амалга оширган ишлари, йиллик режаларни бажарилиши бўйича ўзининг расмий сайтлари орқали кенг жамоатчиликка маълумотларни ўз вақтида етказаётганлик даражасига, фаолияти бўйича ижтимоий тармоқлардаги фикр-мулоҳазалар таҳлилига;

давлат вакиллик ва ижроия ҳокимияти органлари, нодавлат нотижорат ташкилотлари, фуқароларнинг ўзини ўзи бошқариш органлари, тадбиркорлик субъектлари ва бошқа манфаатдор ташкилотларнинг ваколат ва имкониятларидан фойдаланган ҳолда ўзи раҳбарлик қилаётган соҳани ривожлантириш юзасидан ҳамкорлик қилиш йўналишларига;

миллий ва хорижий тажрибаларни эътиборга олган ҳолда соҳада ишга солинмаган резервлар ва ташаббуслар ҳисобидан ўсиш нуқталари, модернизация ва трансформация истиқболлари ва уларнинг ижтимоий-иқтисодий натижадорлиги масалаларига;

ҳисобот ёки ахборот якунида мазкур орган томонидан қонунчиликни такомиллаштириш, ҳуқуқни қўллаш амалиётини яхшилаш бўйича таклифлар илгари сурилганлигига, маҳаллий Кенгаш ваколатига кирадиган масалалар бўйича таклиф киритилганлигига.

7. Мансабдор шахснинг ҳисоботи (ахбороти)ни эшитиш ишларини ташкил этиш, шу жумладан тайёргарлик кўриш, тегишли қарор лойиҳаларини ишлаб чиқиш ва бошқа чораларни кўриш маҳаллий Кенгаш раиси белгилаган доимий комиссия ёхуд комиссиялар (бундан буён матнда масъул Комиссия деб юритилади) томонидан амалга оширилади.

8. Мансабдор шахснинг ҳисоботи (ахбороти) эшитувига юқори савияда тайёргарлик кўриш мақсадида ҳамда тегишли материаллар ва ҳужжатларни пухта ҳамда сифатли тайёрлаш учун масъул Комиссия томонидан ишчи гуруҳ тузилиши мумкин.

Ишчи гуруҳ таркибига депутатлар, маҳаллий Кенгаш ҳузуридаги эксперт гуруҳи аъзолари, давлат органлари ва ташкилотлари ходимлари, мутахассислар, нодавлат нотижорат ташкилотлари ва оммавий ахборот воситалари вакиллари киритилиши мумкин.

9. Масъул Комиссия ишчи гуруҳ билан биргаликда:

маҳаллий Кенгаш доимий комиссиялари (муваққат комиссиялари) эшитувга доир соҳалар бўйича амалга оширган депутатлик назорати тадбирлари, шунингдек, ўтказилган конференциялар, семинарлар ва давра суҳбатлари натижаларини таҳлил қилади;

эшитувга тайёргарлик кўриш учун зарур бўлган материалларни (тегишли соҳани тартибга солувчи норматив-ҳуқуқий ҳужжатлар, хорижий мамлакатлар тажрибаси, ҳуқуқни қўллаш амалиётида вужудга келган муаммолар, давлат органлари ва ташкилотлари, нодавлат нотижорат ташкилотларидан келиб тушган маълумотлар, жисмоний ва юридик шахсларнинг мурожаатлари, оммавий ахборот воситалари, Интернет жаҳон ахборот тармоғида эълон қилинган материаллар ва бошқалар) йиғади ва таҳлилий маълумот тайёрлайди;

эшитувда жавоб олиниши керак бўлган саволларни шакллантиради;

эшитувга оид масалалар бўйича зарур ахборот материалларини тайёрлайди;

мавжуд материаллар асосида эшитув натижалари бўйича қабул қилинадиган қарорлар лойиҳаларини ва бошқа зарур ҳужжатларни ишлаб чиқади.

Зарур ҳолларда эшитувга юқори савияда тайёргарлик кўриш мақсадида ҳуқуқни қўллаш амалиётида вужудга келган муаммолар бевосита тегишли давлат органлари ва ташкилотларига, шунингдек, жойларга чиқиб ўрганилиши мумкин.

10. Ишчи гуруҳ очиқлик ва шаффофликни таъминлаш, маҳаллий Кенгашнинг назорат-таҳлил фаолияти самарадорлигини ошириш ҳамда унинг фаолияти тўғрисида ҳудуд аҳолисини мунтазам равишда хабардор қилиб бориш мақсадида эшитувни ўтказишга доир пресс-релиз лойиҳасини тайёрлайди.

11. Ишчи гуруҳ томонидан мансабдор шахснинг ҳисоботи (ахбороти)ни эшитиш бўйича барча зарур материаллар тайёрлангандан сўнг, улар масъул Комиссия мажлисида кўриб чиқилади.

12. Масъул комиссиянинг мажлиси Халқ депутатлари маҳаллий Кенгашлари доимий комиссиялари тўғрисидаги низомда белгиланган тартибда ўтказилади.

13. Масъул Комиссия мажлисида мансабдор шахс шахсан ҳисобот (ахборот) билан иштирок этади.

Агар мансабдор шахс узрли сабабларга кўра масъул Комиссия мажлисида иштирок эта олмайдиган тақдирда унинг ўринбосари маъруза билан чиқади ва бу ҳақда Комиссияга мажлисдан камида бир кун олдин ёзма равишда хабар берилади.

14. Масъул Комиссия мажлисида дастлаб Комиссия раиси мажлис кун тартиби, регламенти, иштирокчилар таркиби тўғрисида тўхталиб ўтади. Сўнгра ҳисобот (ахборот) бериш учун сўзни мансабдор шахсга беради ҳамда унинг ҳисоботи (ахбороти) эшитилади.

Мансабдор шахснинг ҳисоботи (ахбороти) эшитилгандан сўнг масъул Комиссия аъзолари томонидан унга ҳисобот (ахборот) бўйича савол ва таклифлар берилади.

Шундан сўнг масъул Комиссия томонидан ташкил этилган ишчи гуруҳ аъзоларининг фикрлари эшитилади.

15. Масъул Комиссия мажлиси сўнгида мансабдор шахснинг ҳисоботи (ахбороти)ни қабул қилиш ва Кенгаш сессияси муҳокамасига киритиш ёки уни маромига етказиш учун мансабдор шахсга қайтариш тўғрисида қарор қабул қилинади.

16. Масъул Комиссия мажлисида мансабдор шахснинг ҳисоботи (ахбороти)ни эшитиш жараёнида аниқланмаган фактлар, ишчи гуруҳи томонидан тайёрланган маълумотларга зид ахборотлар тақдим этилганда, мазкур маълумотларга аниқлик киритиш мақсадида мансабдор шахснинг ҳисоботи (ахбороти)ни маромига етказиш бўйича қарор қабул қилинади.

Ушбу қарорда мансабдор шахснинг қайтадан ҳисобот (ахборот) тақдим этиш муддати белгиланади.

17. Масъул Комиссия мажлисида мансабдор шахснинг ҳисоботи (ахбороти) қабул қилинган тақдирда:

ҳисобот (ахборот) эшитуви маҳаллий Кенгаш сессиясида очиқ ёки ёпиқ шаклда ўтказиш масаласи ҳал қилинади;

мазкур масала юзасидан Кенгаш сессиясида маъруза билан иштирок этувчи масъул Комиссия аъзоси белгилаб олинади.

18. Масъул Комиссия қарори Комиссия аъзолари умумий сонининг кўпчилик овози билан қабул қилинади.

19. Мансабдор шахснинг ҳисоботи (ахбороти) эшитувини ўтказиш тўғрисидаги масала маҳаллий Кенгаш сессияси кун тартибига масъул Комиссия таклифига асосан киритилади.

20. Масъул Комиссия томонидан мансабдор шахснинг ҳисоботи (ахбороти)ни эшитиш масаласини маҳаллий Кенгаш сессиясига киритиш бўйича қуйидаги материалларни масъул Комиссия қарорига илова қилган ҳолда Кенгаш раисига ёзма шаклда киритилади:

мансабдор шахснинг ҳисоботи (ахбороти);

масалага оид ҳуқуқни қўллаш амалиётида вужудга келган муаммолар, давлат органлари ва ташкилотлари, нодавлат нотижорат ташкилотларидан келиб тушган маълумотлар, жисмоний ва юридик шахсларнинг мурожаатлари, оммавий ахборот воситалари, ижтимоий тармоқларда эълон қилинган материаллар асосида масъул Комиссия томонидан тайёрланган таҳлилий маълумотлар ҳамда масъул Комиссиянинг хулосаси;

масалани сессияда муҳокама қилиш бўйича олиб бориш тартиби (ҳисобот ва ахборот берувчилар, масъул комиссиядан сўзга чиқувчилар, муносабат билдирувчилар аниқ кўрсатилади);

эшитув натижалари бўйича қабул қилинадиган маҳаллий Кенгаш қарори лойиҳаси, зарур ҳолларда чора-тадбирлар дастури лойиҳалари.

21. Масъул Комиссия маҳаллий Кенгаш котибияти билан биргаликда Кенгаш қарори лойиҳасини тайёрлаш учун масъул ҳисобланади.

22. Мансабдор шахснинг ҳисоботи (ахбороти)ни эшитиш масаласи навбатдаги сессия кун тартибига киритилгандан сўнг масъул Комиссия ва маҳаллий Кенгаш котибияти барча зарур материалларни сессиядан камида етти кун олдин маҳаллий Кенгаш депутатларига танишиш учун юборади.

23. Мансабдор шахснинг ҳисоботи (ахбороти)ни эшитиш масаласи маҳаллий Кенгашнинг навбатдаги сессияси кун тартибига киритилганлиги тўғрисидаги хабар сессия ўтказиладиган кундан камида уч кун олдин мансабдор шахсга юборилади.

24. Мансабдор шахснинг ҳисоботи (ахбороти)ни эшитиш масаласи маҳаллий Кенгашнинг навбатдаги сессияси кун тартибига киритилгандан сўнг масъул Комиссия маҳаллий Кенгаш котибияти билан биргаликда мажлисда иштирок этувчи тегишли давлат органлари ва ташкилотлари рўйхатини шакллантиради ҳамда маҳаллий Кенгаш сессияси ўтказиладиган жой ва вақт ҳақида уларни хабардор қилади.

25. Агар ҳисобот (ахборот) эшитилиши режалаштирилаётган мансабдор шахснинг маҳаллий Кенгаш сессиясига келиш имконияти бўлмаган тақдирда, бу ҳақда сессиядан камида бир кун олдин ўзининг кела олмаслик сабабларини кўрсатган ҳолда ёзма равишда хабардор қилади.

Бунда ҳисобот (ахборот) мансабдор шахснинг тегишли ўринбосари томонидан тақдим этилиши ёки ушбу масалани кўриб чиқиш маҳаллий Кенгашнинг кейинги сессиясига қолдирилиши мумкин.

26. Мансабдор шахснинг ҳисоботи (ахбороти)ни эшитиш маҳаллий Кенгаш сессиясига раислик қилувчининг қисқа кириш сўзи билан бошланиб, у муҳокама қилинадиган масала, эшитувни ўтказиш тартиби (унинг очиқ ёки ёпиқ шаклда ўтказиш), таклиф этилган шахслар тўғрисида маълумот беради.

27. Маҳаллий Кенгаш сессияларида мансабдор шахснинг ҳисоботи (ахбороти) эшитуви очиқ ёки ёпиқ шаклда ўтказилиши мумкин.

Очиқ эшитувга давлат органлари ва ташкилотлари, нодавлат нотижорат ташкилотлари ва фуқаролик жамиятининг бошқа институтлари, оммавий ахборот воситаларининг вакиллари, шунингдек, мутахассислар, экспертлар ва олимлар таклиф қилиниши мумкин.

Ёпиқ эшитувда давлат сирлари ёки қонун билан қўриқланадиган бошқа сир билан боғлиқ масалалар муҳокама қилинади.

Ёпиқ эшитувга фақат кўриб чиқиладиган масалага алоқадор давлат органлари ва ташкилотларининг вакиллари таклиф қилинади.

Ёпиқ эшитувни ўтказиш халқ депутатлари маҳаллий Кенгашларининг Регламентида белгиланган тартибда амалга оширилади.

Ёпиқ эшитувнинг материалларидан фақат қонун ҳужжатларида белгиланган тартибда қабул қилинган қарорлар ижро этилиши учун масъул бўлган идоралар фойдаланиши мумкин.

Эшитув очиқ шаклда ўтказилган тақдирдагина оммавий ахборот воситалари ва маҳаллий Кенгашнинг расмий веб-сайтида ёритилади.

28. Кўриладиган масала юзасидан мансабдор шахсга ҳисобот (ахборот) тақдим этиш учун 30 дақиқагача, бошқа мансабдор шахсларга эса, қўшимча ахборот ёки депутатларнинг мунозара нутқлари учун 5 дақиқагача вақт берилади.

Раислик қилувчи томонидан мажлисда сўзга чиқишлар учун ажратиладиган вақтнинг бошқача давомийлиги белгиланиши мумкин.

29. Раислик қилувчининг кириш сўзидан сўнг муҳокама қилинаётган масала юзасидан мансабдор шахсга ҳисобот (ахборот) бериш учун сўз берилади.

Мансабдор шахснинг ҳисоботи (ахбороти) эшитилгандан сўнг масъул Комиссия вакили томонидан доимий Комиссиянинг мазкур масала юзасидан қабул қилинган хулосаси ўқиб эшиттирилади.

30. Мансабдор шахснинг маърузасидан сўнг мажлис иштирокчилари эшитувда кўриб чиқиладиган масалаларни муҳокама қилишга ўтадилар.

Дастлаб депутатлар ва мажлиснинг бошқа иштирокчилари мансабдор шахсга саволлар беришлари мумкин. Сўнгра депутатларнинг эшитилаётган ҳисобот (ахборот) бўйича муносабатлари эшитилади.

31. Мансабдор шахснинг ҳисоботи (ахбороти)ни эшитиш якунлари бўйича маҳаллий Кенгаш қарори қабул қилинади. Қарор маҳаллий Кенгаш аъзолари умумий сонининг кўпчилиги овози билан қабул қилинади.

32. Маҳаллий Кенгаш қарори кириш қисми, асослантирувчи қисм ва якунловчи қисмдан иборат бўлади.

Қарорнинг кириш қисмида:

қарорнинг номи;

ҳисобот (ахборот)ни эшитишдан кўзланган мақсад (қонунчилик ҳужжатларига, Давлат дастури ёки ҳудудий дастурларга ёхуд иш режага асосан, маҳаллий Кенгаш, доимий комиссия (муваққат комиссия), партия гуруҳлари ҳамда депутатларнинг ташаббуслари асосида ва бошқа ҳолатларда);

қонунчилик ҳужжатлари билан тегишли давлат органи ва ташкилотининг зиммасига юкланган вазифаларнинг ижро этилиши ҳолати;

тегишли давлат органи ёки ташкилоти томонидан қонунчилик ҳужжатлари ижросида йўл қўйилаётган хато ва камчиликлар;

ягона ҳуқуқни қўллаш амалиётини таъминлаш мақсадида нормалари амалиётда қўлланилмаётган қонунчилик ҳужжатлари ва улардаги бўшлиқлар;

маҳаллаларни барқарор ижтимоий-иқтисодий ривожлантириш бўйича белгиланган чора-тадбирларнинг бажарилиши, камбағалликни қисқартириш, маҳаллалардаги муаммоларни ҳал этиш борасида қилинган ишлар ва йўл қўйилган камчиликлар;

тегишли соҳаларда аҳоли томонидан йўлланаётган мурожаатларнинг ва уларни қийнаб келаётган муаммоларни ҳал қилиш борасида амалга оширилаётган ишлар ва фойдаланилмаган имкониятлар;

«Маҳалла еттилиги» билан ҳамкорликда олиб борилган ишлар ва бу борада кузатилган камчиликлар;

давлат органи ва ташкилоти фаолияти билан боғлиқ бошқа идоралар томонидан тақдим этилган маълумотлар ва бошқалар;

Қарорнинг асослантирувчи (қарор) қисмида:

мансабдор шахс томонидан қилинган ишларга берилган баҳо;

давлат органи ва ташкилоти фаолияти самарадорлигини оширишга ва келгусида соҳада амалга оширилиши лозим бўлган долзарб масалалар юзасидан таклиф ҳамда топшириқлар;

бошқа давлат органлари ва ташкилотларига ҳисобот (ахборот) натижалари юзасидан бериладиган тавсия ва топшириқлар;

қарорнинг ижро этилиш муддатлари ва унинг назорати;

қарорнинг кучга кириш санаси ва эълон қилиниши назарда тутилади.

33. Маҳаллий Кенгаш ҳисобот (ахборот)ни эшитиш якунлари бўйича мансабдор шахснинг фаолиятини қониқарсиз деб топиши мумкин.

Бунда эшитув бўйича қабул қилинган маҳаллий Кенгаш қарорида ҳисобот (ахборот) берувчи мансабдор шахсга тўғридан-тўғри топшириқлар берилиши, унинг юқори турувчи идорасига ушбу шахснинг масъулияти ва фаолияти самарадорлигини ошириш ёки эгаллаб турган лавозимига лойиқлиги масаласини кўриб чиқиш бўйича таклифлар берилади.

Шунингдек, мансабдор шахснинг ҳисоботи (ахбороти)ни эшитиш жараёнида аниқланмаган фактлар, масъул Комиссия томонидан тайёрланган маълумотларга зид ахборотлар тақдим этилганда, мазкур маълумотларга аниқлик киритиш мақсадида мансабдор шахснинг ҳисоботи (ахбороти)ни маромига етказиш учун маҳаллий Кенгаш қарори билан мансабдор шахсга қайтадан ҳисобот (ахборот) бериш вақти кўрсатилган ҳолда юборилади.

34. Мансабдор шахснинг ҳисоботи (ахбороти)ни эшитиш якунлари бўйича қабул қилинган маҳаллий Кенгаш қарори ўн кунлик муддатда тегишли давлат органлари ва ташкилотларига юборилади.

35. Мансабдор шахснинг ҳисоботи (ахбороти)ни эшитиш якунлари бўйича қабул қилинган қарорнинг ижросини назорат қилиш масъул Комиссия томонидан амалга оширилади.

36. Эшитув якунлари бўйича қабул қилинган қарорнинг ижро этилиши юзасидан маълумотлар масъул Комиссия ёки зарурат бўлганда маҳаллий Кенгаш мажлисларида муҳокама қилиб борилади.

37. Маҳаллий Кенгаш сессияларида мансабдор шахснинг ҳисоботи (ахбороти) эшитувига тайёргарлик кўриш жараёнида тегишли материаллар белгиланган муддатларда тайёрланиши, қонунчиликка мувофиқлиги, унда кўрсатилган маълумотлар асослилиги учун масъул Комиссия раиси ва аъзолари шахсан жавобгар ҳисобланади.

38. Намунавий тартиб бузилишида айбдор бўлган шахсларга нисбатан белгиланган тартибда интизомий ёки бошқа жавобгарлик чоралари қўлланилиши мумкин.

39. Намунавий тартибга ўзгартириш ва қўшимчалар киритиш, уни ўз кучини йўқотган деб топиш Кенгаш қарори билан амалга оширилади.