Ўзбекистон Республикасининг «Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида»ги ва «Риэлторлик фаолияти тўғрисида»ги қонунларига мувофиқ Ўзбекистон Республикаси Давлат активларини бошқариш агентлиги ва Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти қарор қилади:

1. Ўзбекистон Республикаси Давлат мулкини бошқариш давлат қўмитаси ҳамда Ўзбекистон Республикаси Бош прокуратураси ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш департаментининг 2011 йил 8 августдаги 01/19-18/04 ва 27-сон қарори билан тасдиқланган Риэлторлик ташкилотлари учун жиноий фаолиятдан олинган даромадларни легаллаштиришга ва терроризмни молиялаштиришга қарши курашиш бўйича ички назорат қоидаларига (рўйхат рақами 2257, 2011 йил 24 август) (Ўзбекистон Республикаси қонун ҳужжатлари тўплами, 2011 й., 34-35-сон, 357-модда) иловага мувофиқ ўзгартириш ва қўшимчалар киритилсин.

2. Мазкур қарор расмий эълон қилинган кундан эътиборан кучга киради.

1. 1-бандда:

ўн учинчи хатбоши қуйидаги таҳрирда баён этилсин:

«юқори мансабдор шахслар — чет давлатнинг қонун чиқарувчи. ижро этувчи, маъмурий ёки суд органида, шу жумладан ҳарбий тузилмаларида ёхуд халқаро ташкилотда доимий, вақтинча ёки махсус ваколат бўйича тайинланадиган ёки сайланадиган, ташкилий-бошқарув вазифаларини бажарувчи ва юридик аҳамиятга эга бўлган ҳаракатларни содир этишга ваколатли шахслар, шунингдек чет давлат корхоналарининг юқори мартабали раҳбарлари, чет давлатнинг таниқли сиёсатчилари ва сиёсий партияларининг таниқли аъзолари (шу жумладан собиқ);»;

қуйидаги мазмундаги ўн тўртинчи хатбоши билан тўлдирилсин:

«юқори мансабдор шахсларга яқин бўлган шахслар — юқори мансабдор шахслар билан ижтимоий ва касбий жиҳатдан бевосита боғлиқ бўлган жисмоний шахслар;»;

ўн тўртинчи — ўн саккизинчи хатбошилар тегишлича ўн бешинчи — ўн тўққизинчи хатбошилар деб ҳисоблансин.

2. 3-бандда:

ўн биринчи хатбоши қуйидаги таҳрирда баён этилсин:

«сўровномалар бўйича мижозлар базасидан жиноий фаолиятдан олинган даромадларни легаллаштиришга, террорчилик фаолиятини молиялаштиришга ва (ёки) оммавий қирғин қуролини тарқатишни молиялаштириш билан боғлиқ бўлган шахсларни аниқлаш;»;

ўн учинчи хатбоши қуйидаги таҳрирда баён этилсин:

«юқори мансабдор шахслар, уларнинг оила аъзолари ҳамда юқори мансабдор шахсларга яқин бўлган шахслар амалга ошираётган операцияларини чуқур мониторинг қилиш;».

3. Қуйидаги мазмундаги 4¹ ва 4²-бандлар билан тўлдирилсин:

«4¹. Ҳар бир риэлторлик ташкилоти қонунчиликка ҳамда ушбу Қоидаларга асосан масъул шахснинг вазифалари, ҳуқуқлари ва жавобгарлигини белгилаб берадиган низомни ишлаб чиқиши, тасдиқлаши ва амалга киритиши шарт.

Мазкур банднинг биринчи хатбошисида кўрсатилган низомда масъул шахсга қўйиладиган қуйидаги талаблар белгиланиши лозим:

унинг мақсади ва вазифалари;

унинг риэлторлик ташкилотининг бошқа ходимларидан мустақиллигини таъминлаш усуллари;

унинг раҳбарият билан, шу жумладан чет элдаги филиаллар ва ваколатхоналар (агар бўлса) билан ўзаро муносабатлари;

ўз функцияларини амалга ошириш учун зарур ахборотни олиш ҳуқуқи, шунингдек риэлторлик ташкилоти, шу жумладан чет элдаги филиаллар ва ваколатхоналар (агар бўлса) ходимларининг бундай ахборотни тақдим этиш масалалари бўйича ҳамкорлик қилиш мажбурияти:

қонунчилик ва ички ҳужжатлар талаблари бузилишларини ўрганиш ҳуқуқи;

малакасини ошириб бориш бўйича талаблар;

махсус ваколатли давлат органининг қўшимча маълумотларни тақдим этиш ҳақидаги сўровларни ва мижозларнинг пул маблағлари ёки бошқа мол-мулк билан боғлиқ операцияларни тўхтатиб туриш ҳақидаги талабномасини ўз вақтида бажариш бўйича чоралар.

4². Илгари суд томонидан иқтисодиёт соҳасидаги жиноятлар, бошқарув тартибига қарши, жиноий фаолиятдан олинган даромадларни легаллаштиришга, терроризмни молиялаштиришга боғлиқ бўлган жиноятлар учун жиноий жавобгарликка тортилган шахслар масъул шахс этиб сайланиши мумкин эмас.».

4. 14-банддаги «энг кам ойлик иш ҳақи миқдорининг» деган сўзлар «базавий ҳисоблаш миқдорининг» деган сўзлар билан алмаштирилсин.

5. 20²-бандда:

тўққизинчи хатбоши қуйидаги таҳрирда баён этилсин:

«юқори мансабдор шахслар, уларнинг яқин қариндошлари ва юқори мансабдор шахсларга яқин шахслар;»;

қуйидаги мазмундаги ўнинчи — ўн иккинчи хатбошилар билан тўлдирилсин:

«мижозни лозим даражада текшириш имконияти мавжуд бўлмаган дастурий мажмуалардан фойдаланувчи мижозлар;

оффшор ҳудудларда ҳисобвараққа эга бўлган резидент ва норезидентлар;

ҳақиқатда жойлашган жойи таъсис ёки рўйхатга олиш ҳужжатларида кўрсатилган маълумотларга мувофиқ бўлмаган ташкилотлар ва якка тартибдаги тадбиркорлар;»;

ўнинчи хатбоши ўн учинчи хатбоши деб ҳисоблансин.

6. 21-банддаги «энг кам иш ҳақининг» деган сўзлар «базавий ҳисоблаш миқдорининг» деган сўзлар билан алмаштирилсин.

7. Қуйидаги мазмундаги 31¹-банд билан тўлдирилсин:

«31¹. Риэлторлик ташкилотлари ички ва ташқи вазиятларнинг ўзгаришини инобатга олган ҳолда, тижорат банки ички назорат тизимини доимий равишда мониторинг қилади ва самарадорлигини баҳолаб боради, шунингдек самарали ишлашини таъминлаш учун заруратга қараб уни мустаҳкамлайди.

Риэлторлик ташкилотида ички аудит хизмати мавжуд бўлган тақдирда, ички назорат фаолияти самарадорлигини мониторинг қилиш ушбу хизмат томонидан амалга оширилади.».