Ўзбекистон Республикаси Президентининг «Йўл ҳаракати хавфсизлигини таъминлаш тизимини янада такомиллаштириш чора-тадбирлари тўғрисида» 2017 йил 11 июлдаги ПҚ-3127-сон қарорини бажариш юзасидан, Ўзбекистон Республикасида автомототранспорт воситаларини давлат рўйхатидан ўтказиш тартибини такомиллаштириш мақсадида Вазирлар Маҳкамаси қарор қилади:

2. Қуйидагилар:

Автомототранспорт воситаларини давлат рўйхатидан ўтказиш тартиби тўғрисидаги низом 1-иловага мувофиқ;

Жисмоний ва юридик шахсларга автомототранспорт воситалари учун исталган ҳарф ва рақамлар комбинациясига эга бўлган рўйхатдан ўтказиш давлат рақами белгиларини ягона оширилган тўлов эвазига бериш тартиби тўғрисидаги низом 3-иловага мувофиқ тасдиқлансин.

3. Қуйидаги тартиб ўрнатилсин, унга мувофиқ:

Фуқароларнинг яшаш жойига бориб, автомототранспорт воситаларини давлат рўйхатидан ўтказиш ва рўйхатдан ўтказиш давлат рақами белгиларини бериш бўйича давлат хизматлари қўшимча тўлов асосида кўрсатилади.

Бунда ушбу хизматлар Вазирлар Маҳкамасининг 2023 йил 31 июлдаги 321-сон қарори билан тасдиқланган Фуқароларнинг яшаш жойига бориб, автомототранспорт воситаларини давлат рўйхатидан ўтказиш ва рўйхатдан ўтказиш давлат рақами белгиларини бериш бўйича давлат хизматларини кўрсатишнинг маъмурий регламентига асосан кўрсатилади.

4. Ўзбекистон Республикаси Ички ишлар вазирлиги:

Ўзбекистон Республикаси Иқтисодиёт ва молия вазирлиги билан биргаликда бир ой муддатда Ўзбекистон Республикаси Ички ишлар вазирлигининг моддий-техник базасини ривожлантириш, ходимларини моддий рағбатлантириш ва бошқа харажатлар Махсус жамғармаси тўғрисидаги низомни қайта кўриб чиқсин ва янги таҳрирда тасдиқласин;

Ўзбекистон Республикаси Рақамли технологиялар вазирлиги билан биргаликда, «Электрон ҳукумат» тизимининг маълумотлар тизими ҳамда марказий маълумотлар базаси билан, маълумотлардан фойдаланиш имконияти тоифаларини сақлаган ҳолда, автомототранспорт воситаларининг рўйхатдан ўтганлик гувоҳномаларини ҳисобга олиш реестрини юритиш бўйича дастурий таъминотни босқичма-босқич интеграциялаштиришнинг янада оширилишини таъминласин;

ЙҲХХ ва ҳудудий бошқармаларни икки ой муддатда, автотранспорт воситалари учун оширилган тўлов ставкалари бўйича аукционга қўйилган рўйхатдан ўтказиш давлат рақами белгилари тўғрисидаги маълумотларни ёритиш учун катта форматдаги интерактив экранлар билан жиҳозласин;

ушбу қарорни бажариш билан боғлиқ бўлган харажатларни Ўзбекистон Республикаси Ички ишлар вазирлигининг моддий-техник базасини ривожлантириш, ходимларини моддий рағбатлантириш ва бошқа харажатлар Махсус жамғармаси ҳисобидан амалга оширсин;

Ўзбекистон миллий телерадиокомпанияси билан биргаликда, мазкур қарорнинг талабларини автомототранспорт воситалари эгалари ва аҳолига, улар ўртасида тушунтириш ишлари олиб борган ҳолда, шу жумладан телерадиоканалларда видеоролик ҳамда ҳаракатланувчи сатрларни ташкил этиш йўли билан етказсин.

5. Ўзбекистон Республикаси Ички ишлар вазирлиги Иқтисодиёт ва молия вазирлиги билан биргаликда, ушбу қарорга мувофиқ автотранспорт воситалари учун рўйхатдан ўтказиш давлат рақами белгиларини бериш мониторингининг мунтазам олиб борилишини таъминласин, зарурат бўлганда, тегишли ўзгартиришлар тўғрисида Ўзбекистон Республикаси Вазирлар Маҳкамасига таклифлар киритсин.

8. «Ўзбектелеком» АК ўз маблағлари ҳисобидан, ҳудудий бошқармаларнинг рўйхатдан ўтказиш ва имтиҳон олиш бўлинмалари ва биржанинг ҳудудий филиаллари ўртасида оптик толали тармоқ линиялар алоқаси ўтказишни таъминласин.

9. Ўзбекистон Республикаси Ички ишлар вазирлиги манфаатдор вазирликлар ва идоралар билан биргаликда уч ой муддатда автотранспорт воситаси конструкциясининг ва (ёки) унинг қисмининг йўл ҳаракати хавфсизлиги ва автотранспорт воситасини қайта жиҳозлаш талабларига мувофиқлиги тўғрисида гувоҳномалар бериш тартибини ишлаб чиқсин ва тасдиқлаш учун киритсин.

10. Ўзбекистон Республикаси Вазирлар Маҳкамасининг 4-иловага мувофиқ айрим қарорлари ўз кучини йўқотган деб ҳисоблансин.

11. Ўзбекистон Республикаси Ички ишлар вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

12. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Қўчқоров, Ўзбекистон Республикаси молия вазири Б.А. Хўжаев ва Ўзбекистон Республикаси ички ишлар вазири А.А. Азизов зиммасига юклансин.

1. Ушбу Низом транспорт воситаларининг Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг (кейинги ўринларда — ЙҲХХ) Қорақалпоғистон Республикаси Ички ишлар вазирлиги, Тошкент шаҳар ва Тошкент вилояти ички ишлар бош бошқармалари, вилоятлар ички ишлар бошқармалари жамоат хавфсизлиги хизмати йўл ҳаракати хавфсизлиги бошқармаларида (кейинги ўринларда — ҳудудий бошқармалар) транспорт воситаларини давлат рўйхатидан ўтказиш тартибини белгилайди.

2. Ушбу Низомда қуйидаги асосий тушунчалар қўлланилади:

транспорт воситасининг эгаси — автомототранспорт воситасига мулк ҳуқуқи ёки бошқа ашёвий ҳуқуқлар асосида эгалик қилувчи юридик ёки жисмоний шахс;

автомототранспорт воситаларини вақтинчалик рўйхатдан ўтказиш — автомототранспорт воситасини вақтинчалик ҳисобга қўйиш, рўйхатдан ўтказиш ҳақида вақтинчалик гувоҳнома ва рўйхатдан ўтказиш давлат рақами белгиларини бериш;

рўйхатдан ўтказиш давлат рақами белгиси (кейинги ўринларда — РЎДРБ деб аталади) — Ўзбекистон Республикаси Вазирлар Маҳкамасининг «Автомототранспорт воситалари учун рўйхатдан ўтказиш давлат рақами белгиларининг янги намуналарини жорий этиш чора-тадбирлари тўғрисида» 2007 йил 27 июндаги 131-сон қарори билан тасдиқланган автомототранспорт воситасига уни давлат рўйхатидан ўтказишни ҳисобга олиш учун ҳудудий кодлар ва давлат рақамлари белгиларининг типларига мувофиқ бериладиган махсус рақамли белги;

ягона оширилган тўлов эвазига автомототранспорт воситалари учун РЎДРБ — исталган ҳарф ва рақамлар комбинациясидан иборат бўлган, ихтиёрий танловга кўра ягона оширилган тўлов эвазига бериладиган РЎДРБ

автомототранспорт воситаларини давлат рўйхатидан ўтказиш — автомототранспорт воситасини доимий ҳисобга қўйиш, автомототранспорт воситасини рўйхатдан ўтказиш ҳақидаги гувоҳнома ва РЎДРБни бериш;

рўйхатга олиш жойи — автомототранспорт воситаларини давлат рўйхатидан ўтказишни амалга оширувчи ЙҲХХ ва унинг ҳудудий бошқармаларининг жойлашган жойи;

автомототранспорт воситаларини қайта рўйхатдан ўтказиш — тегишли ҳуқуқий асослар мавжуд бўлганда автомототранспорт воситасининг рўйхатдан ўтказиш ҳужжатларига ўзгартириш ва қўшимчалар киритиш;

автомототранспорт воситасини қайта жиҳозлаш — бошқа модел ва модификациялар агрегат ва узеллари, эҳтиёт қисмлар ва бутловчи деталлардан фойдаланган ҳолда автомототранспорт воситаси таркибий қисмлари элементлари ва тузилишига ўзгартиришлар киритиш;

рўйхатдан ўтказиш ҳаракатлари — қонунчиликка мувофиқ ЙҲХХ ва унинг ҳудудий бошқармалари томонидан автомототранспорт воситаларини вақтинчалик рўйхатдан ўтказиш, қайта рўйхатдан ўтказиш ва уларни ҳисобдан чиқариш, шунингдек автомототранспорт воситаларини рўйхатга олиш ҳақида гувоҳнома ва РЎДРБни беришдан иборат давлат рўйхатидан ўтказиш бўйича ҳаракатлар комплекси;

рўйхатдан ўтказиш ҳужжати — унинг йўл ҳаракатида иштирок этишига ҳуқуқ берилганлигини тасдиқловчи автомототранспорт воситасини рўйхатдан ўтказиш ҳақида гувоҳнома, шунингдек автомототранспорт воситасининг рўйхатдан ўтказиш картаси;

транспорт воситаси — йўловчиларнинг, багажнинг, юк багажининг, юкларнинг, почта ва курьерлик жўнатмаларининг ёки махсус ишларни амалга ошириш учун ускуналарнинг йўлларда ҳаракатланиши ёки ташилиши учун мўлжалланган қурилма. Мазкур Низом мақсадларидан келиб чиқиб, транспорт воситалари автотранспорт воситалари (автомобиллар, электромобиллар), мототранспорт воситалари (мотоцикл, электромотоцикл, мопед ва скутерлар) ҳамда тиркама ва ярим тиркамаларга бўлинади;

«TRADE-IN» — илгари фойдаланишда бўлган автомототранспорт воситасини янги автомототранспорт воситасига нархларидаги фарқни тўлаган (нархларидаги фарқни олган) ҳолда алмаштириш;

дистрибютор ташкилоти — Ўзбекистон Республикаси ҳудудида янги автомототранспорт воситаларини реализация қилиш бўйича ишлаб чиқарувчи билан тегишли дистрибюторлик келишувига эга юридик шахс;

яроқсиз автомототранспорт воситаси — транспорт воситасининг асосий қисмларидан бири, яъни двигатель, шасси (юриш қисми, трансмиссия, бошқарув қисми) ва кузови мавжуд бўлмаган транспорт воситалари;

дилер ташкилоти — Ўзбекистон Республикаси ҳудудида янги автомототранспорт воситаларини реализация қилиш бўйича дистрибютор ташкилоти ёки ишлаб чиқарувчи билан тегишли дилерлик келишувига эга юридик шахс;

«TRADE-UP» — илгари фойдаланишда бўлган автомототранспорт воситасини илгари фойдаланишда бўлган автомототранспорт воситасига нархларидаги фарқни тўлаган (нархларидаги фарқни олган) ҳолда алмаштириш.

антиквар» автомототранспорт воситалари — ишлаб чиқарилганига 50 йил ва ундан ортиқ бўлган, асл ҳолати (ташқи кўриниши), тузилиши ва асосий агрегатлари сақланиб қолган автомототранспорт воситалари;

3. Рўйхатдан ўтказиш ҳаракатлари Қорақалпоғистон Республикаси Ички ишлар вазирлиги, Тошкент шаҳар ва Тошкент вилояти ички ишлар бош бошқармалари ҳамда вилоятлар ички ишлар бошқармалари жамоат хавфсизлиги хизмати йўл ҳаракати хавфсизлиги бошқармаларининг рўйхатдан ўтказиш ва имтиҳон олиш бўлинмалари (кейинги ўринларда — ЙҲХХ ва унинг ҳудудий бошқармалари) томонидан амалга оширилади.

Автомототранспорт воситаларини давлат рўйхатидан ўтказиш, қайта рўйхатдан ўтказиш ва уларга давлат рақами белгиларини бериш Тошкент, Нукус шаҳарларида ва вилоятлар марказларида биттадан рўйхатдан ўтказиш ва имтиҳон олиш бўлинмаларида экстерриториаллик тамойили асосида амалга оширилади.

Бунда автомототранспорт воситаси фуқаронинг доимий яшаш манзили ёки юридик шахснинг рўйхатга олинган манзили бўйича рўйхатдан ўтказилади.

4. ЙҲХХ ва унинг ҳудудий бошқармаларида қуйидаги транспорт воситалари давлат рўйхатидан ўтказилади:

двигателининг иш ҳажми 50 см³ ва ундан ошадиган, конструктив тезлиги соатига 50 километр ва ундан ошадиган автотранспорт воситалари, шунингдек, электродвигателининг қуввати 4 киловатт ва ундан ошадиган, конструктив тезлиги соатига 50 километр ва ундан ошадиган транспорт воситалари — автомобиль, электромобиллар ва гибрид автомобиллар сифатида;

двигателининг иш ҳажми 50 см³ ва ундан ошадиган, конструктив тезлиги соатига 50 километр ва ундан ошадиган ён тиркамасиз ёки ён тиркамали (кажавали) икки ёки уч (тўрт) ғилдиракли мотоцикллар ва уларга тенглаштирилган транспорт воситалари — мотоцикл сифатида;

электродвигателининг қуввати 4 киловатт ва ундан ошадиган, конструктив тезлиги соатига 50 километр ва ундан ошадиган ён тиркамасиз ёки ён тиркамали (кажавали) икки ёхуд уч (тўрт) ғилдиракли электромотоцикллар ва уларга тенглаштирилган транспорт воситалари — электромотоцикл сифатида;

двигателининг иш ҳажми 25 см³ ва ундан ортиқ, лекин 50 см³дан ошмайдиган, конструктив тезлиги соатига 25 километр ва ундан ортиқ, 50 километрдан ошмайдиган икки ёки уч (тўрт) ғилдиракли мопедлар ва уларга тенглаштирилган транспорт воситалари — мопед сифатида;

электродвигателининг қуввати 0,25 киловатт ва ундан ортиқ, лекин 4 киловаттдан ошмайдиган, конструктив тезлиги соатига 25 километрдан ортиқ, бироқ 50 километрдан ошмайдиган икки ёки уч (тўрт) ғилдиракли скутерлар ва уларга тенглаштирилган транспорт воситалари — скутер сифатида;

конларда, шахта ва карьерларда қўлланиладиган махсус транспорт воситалари;

тиркама ва ярим тиркамалар.

«антиквар» транспорт воситалари.

Автомототранспорт воситаларининг тузилмаси техник тартибга солиш соҳасидаги норматив ҳужжатлар, шунингдек йўл ҳаракати хавфсизлигини таъминлаш соҳасидаги меъёр талабларига мос келиши керак.

5. ЙҲХХ ва унинг ҳудудий бошқармаларида қуйидаги транспорт воситалари давлат рўйхатидан ўтказилмайди:

ёпиқ жойларда ва қишлоқ хўжалигида қўлланиладиган умумий йўлларда фойдаланишга мўлжалланмаган технологик транспорт воситалари (трактор, трактор тиркамалари, қурилиш-йўл ва мелиоратив техникаси, ўзиюрар ва қишлоқ хўжалиги машиналари);

трамвай ва троллейбуслар;

Ўзбекистон Республикаси Мудофаа вазирлиги, Ўзбекистон Республикаси Давлат хавфсизлик хизмати, Ўзбекистон Республикаси Ички ишлар вазирлиги, Ўзбекистон Республикаси Миллий гвардиясига тегишли бўлган ҳарбий транспорт воситалари;

ишлаб чиқарилганига 50 йил ва ундан ортиқ бўлган транспорт воситалари («антиквар» автомототранспорт воситалари бундан мустасно);

Иккинчи, учинчи ва тўртинчи хатбошиларда кўрсатилган транспорт воситалари тегишли вазирликлар ва идоралар томонидан белгиланган тартибда давлат рўйхатидан ўтказилади.

6. Автомототранспорт воситасининг эгаси ёки унинг вакили автомототранспорт воситасига мулк ҳуқуқи ёки бошқа ашёвий ҳуқуқлар пайдо бўладиган, ўтадиган, чекланадиган ва тугатиладиган кундан ёки транспорт воситасининг ҳуқуқий ҳолати ўзгаришидан бошлаб ўн календарь кун ичида мазкур Низомнинг 14 ва 15-бандларига мувофиқ тегишли ЙҲХХ ва унинг ҳудудий бошқармаларига техник кўрикдан ўтказиш учун автомототранспорт воситасини (конларда, шахта ва карьерларда қўлланиладиган махсус транспорт воситалари бундан мустасно), унинг техник ҳолатидан қатъи назар ва мазкур Низомда назарда тутилган ҳужжатларни тақдим этган ҳолда мурожаат қилиши зарур. Агар ЙҲХХ ва унинг ҳудудий бошқармаларига мурожаат қилиш муддатининг охирги куни дам олиш, байрам (иш куни бўлмаган) кунларга тўғри келса, ундан кейинги биринчи иш куни муддатнинг тугаган куни ҳисобланади.

Автомототранспорт воситасининг носозлиги, эгаси соғлиғининг ҳолати, ҳайдовчилик гувоҳномасининг мавжуд эмаслиги ёки бошқариш ҳуқуқидан маҳрум бўлганлиги ёки автомототранспорт воситасининг бошқа ҳудудда турганлиги билан боғлиқ ҳолатларда техник кўрикдан ўтказиш ишлари автомототранспорт воситаси турган жойдаги рўйхатдан ўтказиш ва имтиҳон олиш бўлинмалари ходимлари томонидан бевосита жойига чиққан ҳолда экстерриториаллик тамойили асосида амалга оширилади.

Бунда автомототранспорт воситасининг носозлиги Йўл ҳаракати қоидаларида белгиланган транспорт воситаларидан фойдаланишни тақиқловчи шартларига жавоб бермаслиги билан белгиланади.

Автомототранспорт воситаси уни қайта рўйхатдан ўтказишга сабаб бўладиган барча ҳолатларда, ЙҲХХ ва унинг ҳудудий бошқармалари томонидан белгиланган тартибда техник кўрикдан ўтказилади.

Автомототранспорт воситаси ЙҲХХ ва унинг ҳудудий бошқармалари томонидан тип, марка, модель ва модификация, РЎДРБ, идентификацияловчи шасси (рама), кузов ва двигателлар рақамларининг, шунингдек, автомототранспорт воситасининг тўлиқ вазни, юксиз вазни, ўриндиқлар сони тўғрисидаги маълумотларни рўйхатдан ўтказиш ҳужжатларида кўрсатилган маълумотларга мос келиши предмети юзасидан техник кўрикдан ўтказилади.

Аукцион савдолари натижалари тўғрисидаги баённома асосида давлат рўйхатидан ўтказилаётган автомототранспорт воситасининг Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг Ягона автоматлаштирилган ахборот тизими (кейинги ўринларда — ЯААТ) «Автомототранспорт ҳисоби» модули орқали илгари рўйхатдан ўтказилганлиги (ёки ўтказилмаганлиги) текширилади.

Бунда автомототранспорт воситаси муқаддам ДЙҲХХ рўйхатидан ўтказилмаган бўлса (суд қарори асосида давлат фойдасига ўтказилган ёки ҳарбий тузилмаларга тегишли ҳарбий транспорт воситалари бундан мустасно), масъул ходим томонидан ҳолатга аниқлик киритилади.

Ноқонуний ҳолатлар аниқланган тақдирда, белгиланган тартибда ҳужжатлар расмийлаштирилиб, тергов органларига юборилади.

6¹. Конларда, шахта ва карьерларда қўлланиладиган махсус транспорт воситалари эгаси ёки вакилининг мурожаатига асосан ҳудудий рўйхатдан ўтказиш ва имтиҳон олиш бўлинмалари ходимлари томонидан жойига чиқиб, техник кўрикдан ўтказиш натижаларига кўра расмийлаштирилади.

7. Автомототранспорт воситасининг бошқа шахсга ўтказилиши ҳақидаги битимлар нотариус томонидан тасдиқланиши давомида автомототранспорт воситасининг рақам агрегатлари ва бошқа техник параметрларнинг рўйхатдан ўтказиш маълумотларига мос келиши юзасидан мурожаат қилувчилар томонидан текширилади ва бу ҳақида шартномада акс эттирилади.

Дистрибютор ва дилер ташкилотлари томонидан илгари фойдаланишда бўлган автомототранспорт воситаларининг олди-сотди шартномасини, шу жумладан, улар томонидан «TRADE-IN» ва «TRADE-UP» дастурлари бўйича олди-сотди шартномасини расмийлаштиришдан олдин:

Ўзбекистон Республикасининг Оила кодекси 24-моддаси тўртинчи қисми талабларига риоя этган ҳолда хотин (эр)нинг нотариал тартибда тасдиқланган розилиги олиниши;

автомототранспорт воситаси рақам агрегатлари ва бошқа техник параметрларининг рўйхатдан ўтказиш маълумотларига мос келиши юзасидан текширилиши учун сотиб олувчининг танловига кўра хоҳлаган ҳудудий ДЙҲХХ органларига тақдим этилиши зарур.

Бунда автомототранспорт воситасини кўрикдан ўтказиш натижалари бўйича кўрикдан ўтказиш маълумотлари ЙҲХХ ва унинг ҳудудий бошқармалари ходимлари томонидан бериладиган маълумотномага кўрикдан ўтказган мансабдор шахснинг фамилияси, исми ва отасининг исми, кўрикдан ўтказиш санаси кўрсатилган ҳолда ва мансабдор шахснинг имзоси билан белгиланган намунадаги штамп босилиши йўли билан қайд қилинади. Штамп ўн календарь кун мобайнида ҳақиқий ҳисобланади.

8. Рўйхатдан ўтказиш ҳаракатларини амалга оширишда, шунингдек нотариус томонидан битимларнинг тасдиқланишидан олдин кўрикдан ўтказилишида автомототранспорт воситасини рўйхатдан ўтказиш ҳужжатларидаги маълумотлар ЙҲХХ ва унинг ҳудудий бошқармалари томонидан олиб қочилган ва ўғирланган автомототранспорт воситалари бўйича маълумотлар базаси билан таққосланади, шунингдек Ўзбекистон Республикаси қонунчиликка мувофиқ автомототранспорт воситаси бошқа шахсга ўтказилишига тақиқ ёки хатловнинг мавжудлиги юзасидан текширилади.

Бунда автомототранспорт воситасини бошқа шахсга бериш тўғрисидаги шартномани «ягона дарча» тамойили асосида расмийлаштириш мақсадида нотариуслар томонидан автомототранспорт воситасини бошқа шахсга бериш тўғрисидаги битимлар тасдиқланишида автомототранспорт воситасини рўйхатдан ўтказиш ҳужжатларидаги маълумотлар ЙҲХХ ва унинг ҳудудий бошқармаларининг олиб қочилган ва ўғирланган автомототранспорт воситалари бўйича маълумотлар базаси билан интеграция қилиш орқали таққосланади.

Автотранспорт воситаларига нисбатан тақиқ мавжуд ёки мавжуд эмаслиги тўғрисидаги маълумотлар «Рақамли ҳукумат» тизимининг идоралараро интеграциялашув платформаси орқали аниқланади.

9. Юк ташувчи автотранспорт воситалари, автобус ва микроавтобусларга нисбатан рўйхатдан ўтказиш ҳаракатлари амалга оширилганда ЙҲХХ ва унинг ҳудудий бошқармалари мудофаа ишлари бўйича бўлимларни белгиланган тартибда ҳисобга қўйиш ёки ҳисобдан чиқариш учун хабардор қилишади.

Кўтарувчи механизмлар билан жиҳозланган автотранспортларга (автокран) нисбатан рўйхатдан ўтказиш ҳаракатлари, улар Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитаси томонидан ҳисобга қўйилгандан (ҳисобдан чиқарилгандан) сўнг амалга оширилади.

10. Давлат рўйхатидан ўтган транспорт воситалари ва уларнинг эгалари тўғрисидаги маълумотлар қонунда белгиланган тартибда терговга қадар текширув, суриштирув, дастлабки тергов, суд ҳамда қонунчилик билан ваколат берилган бошқа органларга тақдим этилиши мумкин.

11. ЙҲХХ ва унинг ҳудудий бошқармалари рўйхатдан ўтказиш ва имтиҳон олиш бўлинмаларининг рўйхатдан ўтказишни амалга ошириш, автомототранспорт воситаларининг техник ҳолати ва тузилишининг хавфсизлик талабларига жавоб беришини баҳолаш бўйича ишларини ташкил этиши, шунингдек иш юритишни олиб бориши Ўзбекистон Республикаси Ички ишлар вазирлиги томонидан тасдиқланган тартибга мувофиқ амалга оширилади.

11¹. Автомототранспорт воситасининг эгаси ёки вакили автомототранспорт воситасини давлат рўйхатидан ўтказиш учун ЙҲХХнинг мобиль иловаси, расмий веб-сайти, «Call» маркази ёки Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали мурожаат этганда, ушбу Низомнинг 2 — 7-бобларида кўрсатилган автомототранспорт воситаларини давлат рўйхатидан ўтказиш турини танлайди.

11². ЙҲХХнинг мобиль иловаси, расмий веб-сайти, «Call» маркази ёки ЯИДХП орқали ушбу Низомнинг 17 — 20-бандларида назарда тутилган ҳужжатлар тўғрисидаги маълумотларни киритади, зарур ҳолларда уларнинг нусхаларини юклайди (нотариал тасдиқланган ҳужжатлар бундан мустасно), шунингдек, телефон рақамини киритиб ушбу маълумотларни тасдиқлайди.

11³. Маълумотлар тасдиқлангандан сўнг автомототранспорт воситасининг эгаси ёки вакилининг телефон рақамига тўлов реквизитлари ва миқдори тўғрисида SMS-хабар юборилади.

11⁴. Автомототранспорт воситасини давлат рўйхатидан ўтказиш учун йиғим ва тўловлар онлайн тўлов тизимлар орқали белгиланган тартибда тўланади ҳамда ахборот тизимлари билан тасдиқланади.

11⁵. Автомототранспорт воситасини давлат рўйхатидан ўтказиш учун тўловлар тўлангандан кейин ЙҲХХнинг дастурий таъминоти (мобиль илова) ёки ЯИДХП орқали шакллантирилган мурожаат ЙҲХХ ва унинг ҳудудий бошқармаларига онлайн режимида юборилади.

11⁶. Мурожаат юборилгандан сўнг автомототранспорт воситасининг эгаси ёки вакили автомототранспорт воситасини техник кўрикдан ўтказиш учун ушбу Низомнинг 6-бандида белгиланган муддатдан кечиктирмасдан ҳамда ушбу Низомнинг 17 — 20-бандларида назарда тутилган ҳужжатларни тақдим этган ҳолда, ЙҲХХ ва унинг ҳудудий бошқармаларига олиб бориши шарт.

11⁷. ЙҲХХ ва унинг ҳудудий бошқармаларининг масъул ходимлари автомототранспорт воситасининг эгаси ёки вакили томонидан тақдим этилган ҳужжатлардаги маълумотларни ЯИДХП орқали юборилган мурожаатдаги маълумотлар билан солиштиради, шунингдек, автомототранспорт воситасини, унинг типи, маркаси, модель ва модификацияси, РЎДРБ, идентификацияловчи шасси (рама), кузов ва двигателлар рақамлари, тўлиқ вазни, юксиз вазни, ўриндиқлар сони тўғрисидаги маълумотлари асосида техник кўрикдан ўтказади.

Бунда автомототранспорт воситаларини давлат рўйхатидан ўтказишда автомототранспорт воситасининг олди-сотди шартномалари ва бошқа нотариал тасдиқланган битимлар талаб қилинмайди ва ушбу ҳужжатлар «Рақамли ҳукумат» тизимининг идоралараро интеграциялашув платформаси орқали «Нотариус» автоматлаштирилган ахборот тизимидан юклаб олинади.

11⁸. Автомототранспорт воситасининг маълумотлари тақдим этилган ҳужжатлар билан мос келган тақдирда, автомототранспорт воситаси давлат рўйхатидан ўтказилади ва рўйхатдан ўтказилганлик тўғрисида гувоҳнома расмийлаштирилиб, РЎДРБ билан бирга автомототранспорт воситаси эгаси ёки вакилига тақдим этилади.

11⁹. Автомототранспорт воситаси эгаси ёки вакили автомототранспорт воситаси рўйхатдан ўтказилганлиги тўғрисидаги гувоҳнома ва РЎДРБни олганлиги, уларнинг шахсини идентификация қилиш (электрон рақамли имзо, бармоқ изларини идентификация (верификация) қилиш ва бошқалар) орқали тасдиқланади.

11¹⁰. Автомототранспорт воситасининг эгаси ёки вакили автомототранспорт воситасини давлат рўйхатидан ўтказиш учун бевосита ЙҲХХ ва унинг ҳудудий бошқармаларига мурожаат этганда, уларнинг мурожаатлари ЙҲХХ ва унинг ҳудудий бошқармаларининг масъул ходимлари томонидан махсус техник қурилмалар (планшет) орқали кўриб чиқади.

Бунда автомототранспорт воситасининг эгаси ёки вакили ҳамда масъул ходим томонидан ушбу Низомнинг 11¹ — 11⁹-бандларида назарда тутилган ҳаракатлар амалга оширилади.

12. Автомототранспорт воситаларини давлат рўйхатидан ўтказиш ҳудудий ДЙҲХХ органлари томондан қуйидаги ҳолатларда амалга оширилади:

а) ЙҲХХ ва унинг ҳудудий бошқармаларида рўйхатдан ўтказилмаган янги автомототранспорт воситаси олинганда;

б) Ўзбекистон Республикаси божхона ҳудудига киритилган автомототранспорт воситалари ва улар тиркамалари ва ярим тиркамаларининг эркин муомалага чиқариш (импорт) божхона режимида божхона рўйхатидан ўтказишда;

в) илгари ЙҲХХ ва унинг ҳудудий бошқармаларида рўйхатдан ўтган автомототранспорт воситасининг эгаси ўзгарганда;

г) автомототранспорт воситасининг рўйхатдан ўтган жойини ўзгартиришни талаб қилувчи, автомототранспорт воситаси эгасининг яшаш (турар) жойи ёки жойлашган жойи (почта манзили) ўзгарган ҳолатларда.

13. Автомототранспорт воситаси унинг эгасининг — жисмоний ёки юридик шахснинг номига давлат рўйхатидан ўтказилади.

Юридик шахс тузмасдан фаолиятини амалга оширувчи якка тартибдаги тадбиркорлар, деҳқон хўжаликлари, оилавий тадбиркорлик субъектларига тегишли бўлган автомототранспорт воситаларини давлат рўйхатидан ўтказиш ушбу Низомда жисмоний шахсларнинг автомототранспорт воситаларини давлат рўйхатидан ўтказиш учун белгиланган тартибга мувофиқ амалга оширилади.

14. Жисмоний шахсларнинг автомототранспорт воситалари уларнинг доимий рўйхатга олинган жойи бўйича, доимий рўйхатга олинган жойи бўлмаса — вақтинча турган жойи бўйича давлат рўйхатидан ўтказилади.

Бунда рўйхатдан ўтказиш автомототранспорт воситаси эгасининг доимий рўйхатга олинган ҳудудидан қатъи назар, ҳар бир ҳудудда автомототранспорт воситаларини давлат рўйхатидан ўтказиш, қайта рўйхатдан ўтказиш ва уларга давлат рақами белгиларини бериш учун масъул этиб белгиланган ҳудудий ЙҲХХ органларида ҳам амалга оширилиши мумкин.

Автотранспорт воситасини 18 ёшга тўлмаган жисмоний шахс номига, мототранспорт воситасини эса 16 ёшга тўлмаган жисмоний шахс номига давлат рўйхатидан ўтказишда, уларнинг номидан қонуний вакиллари (ота-оналари, фарзандликка олувчилари, васий ёки ҳомийлари) иштирок этади.

Муомалага лаёқатсиз жисмоний шахс номига автомототранспорт воситасини давлат рўйхатидан ўтказиш, агар муомалага лаёқатсиз шахсда автомототранспорт воситасига бўлган мулк ҳуқуқи белгиланган тартибда мерос ёки ҳадя натижасида пайдо бўлган бўлса амалга оширилади.

Агар ҳадя шартномаси, суд қарори ёки мерос тўғрисидаги гувоҳномада бир автомототранспорт воситасининг эгаси сифатида бир неча шахслар кўрсатилган бўлса, автомототранспорт воситаси уларнинг келишувига кўра улардан бирининг номига давлат рўйхатидан ўтказилади. Автомототранспорт воситалари эгаларининг, автомототранспорт воситасини улардан бирининг номига давлат рўйхатидан ўтказиш тўғрисидаги келишуви нотариус томонидан тасдиқланади.

15. Юридик шахсларнинг автомототранспорт воситаларини давлат рўйхатидан ўтказиш юридик шахсларни давлат рўйхатидан ўтказиш гувоҳномасида кўрсатилган жойлашган жой, юридик шахс номи, СТИР рақами бўйича амалга оширилади.

Аккредитациядан ўтган ёки қонунчиликда белгиланган тартибда Ўзбекистон Республикасида рўйхатдан ўтган дипломатик ваколатхоналар ёки консуллик муассасаларига; халқаро ташкилотларга, уларнинг ваколатхоналарига ва филиалларига (халқаро ҳукуматлараро ва ноҳукумат ташкилотларни киритган ҳолда); чет давлатларнинг ҳукумат ва ноҳукумат ташкилотларига, уларнинг ваколатхоналари ва филиалларига; мухбирлар ва мухбирлик пунктларига (бюро, офис); савдо ваколатхоналарига, чет эл банклари ва тижорат ташкилотлари ваколатхоналарига, шунингдек доимий муассасаларга тегишли бўлган автомототранспорт воситалари Ўзбекистон Республикаси Ташқи ишлар вазирлиги ҳузуридаги «Дипломатик сервис хизмати» давлат муассасаси ёрдамида давлат рўйхатидан ўтказилади.

16. Автомототранспорт воситасини давлат рўйхатидан ўтказиш учун унинг эгаси ёки вакили ЙҲХХ ва унинг ҳудудий бошқармаларига қуйидаги ҳужжатларни тақдим этган ҳолда мурожаат этади:

автомототранспорт воситаси эгасининг ёки унинг вакили шахсини тасдиқловчи ҳужжат;

автомототранспорт воситасининг аввалги эгасига берилган автомототранспорт воситасини рўйхатдан ўтказиш тўғрисидаги гувоҳнома;

автомототранспорт воситасига бўлган мулк ҳуқуқи ва бошқа ашёвий ҳуқуқларни тасдиқловчи ҳужжат (нотариал тасдиқланган ҳужжатлар бундан мустасно);

Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитасининг газ баллонларини синовдан ўтказиш ҳуқуқини берувчи рухсатномаси мавжуд бўлган ташкилот томонидан транспорт воситаларига ўрнатилган газ баллонлари синовдан ўтказилганлиги тўғрисидаги далолатнома (газ баллони ўрнатилмаган транспорт воситалари мустасно);

ЙҲХХ ва унинг ҳудудий бошқармаларининг рўйхатга олиш билан боғлиқ хизматлари учун тўлов тўлаганлиги ҳақидаги банк тўлов ҳужжати (йиғимлар ва тўловлардан озод этилган шахслар ҳамда электрон тўлов тизимлар орқали тўлов амалга оширилган ҳоллар бундан мустасно);

Автомототранспорт воситасини аввал берилган (аввал қўлланилган) РЎДРБни қайта бериш билан давлат рўйхатидан ўтказиш учун мазкур Низомнинг 31-бандига мувофиқ автомототранспорт воситасининг янги эгаси ёки унинг вакили томонидан ҳудудий бошқармаларига қуйидаги қўшимча ҳужжатлар тақдим этилади:

жисмоний шахслар учун — яқин қариндошликни тасдиқловчи ҳужжат ёки умумий мулкка бўлган эгалик ҳуқуқи тўғрисида гувоҳнома ёки меросга бўлган эгалик ҳуқуқи тўғрисидаги гувоҳнома;

юридик шахслар учун — аризачининг автомототранспорт воситаси аввалги эгаси олдида ҳуқуқий ворисликни тасдиқловчи ҳужжат ёки аризачи автомототранспорт аввалги эгасининг иштирокчиси (таъсисчи, аъзоси) бўлганлигини тасдиқловчи ҳужжат ёки автомототранспорт аввалги эгаси аризачининг иштирокчиси (таъсисчи, аъзоси) бўлганлигини тасдиқловчи ҳужжат.

Бунда автомототранспорт воситасини давлат рўйхатидан ўтказишда қуйидаги ҳужжатлар ваколатли органлардан идоралараро электрон ҳамкорлик орқали олинади:

автомототранспорт воситасининг олди-сотди шартномаси ва бошқа нотариал тасдиқланган битимлар;

«Электрон онлайн аукционларни ташкил этиш» АЖ томонидан берилган аукцион баённомалари;

давлат улуши мавжуд корхоналар томонидан ишлаб чиқарилган автомототранспорт воситаларига бериладиган электрон ҳисоб-маълумотлар;

автомототранспорт воситаси мулкдорининг маълумотлари (жисмоний шахс Ф.И.О., юридик шахс номи, ташкилий-ҳуқуқий шакли, манзили) ўзгарганини тасдиқловчи маълумотлар.

17. Автомототранспорт воситаси эгасининг ёки унинг вакилининг шахсини тасдиқловчи ҳужжатларга қуйидагилар киради:

а) жисмоний шахслар учун — жисмоний шахснинг шахсини тасдиқловчи ҳужжат:

Ўзбекистон Республикаси фуқаролари учун — фуқаролик паспорти ёки идентификацияловчи ID-картаси ёки янги намунадаги миллий ҳайдовчилик гувоҳномаси;

16 ёшга тўлмаган Ўзбекистон Республикаси фуқаролари учун — туғилганлик ҳақида гувоҳнома;

Ўзбекистон Республикаси ҳарбий хизматчилари учун — ички ишлар органларининг прописка тўғрисидаги ёки ҳарбий қисмларнинг уй ажратиш тўғрисидаги маълумотномасини илова қилган ҳолда ҳарбий қисм ёки ҳарбий муассасалар қўмондонлиги томонидан бериладиган шахсни тасдиқловчи ҳужжат ёки ҳарбий билет (ҳарбий хизматга мажбур фуқароларнинг ҳарбий билетлари бундан мустасно);

чет эл фуқаролари учун — чет эл фуқаросининг идентификацияловчи ID-картаси, ҳаракатланиш ҳужжати ёхуд дипломатик паспорти ёки Ўзбекистон Республикасида аккредитацияни ўтаётганликни тасдиқловчи аккредитация карточкаси;

фуқаролиги бўлмаган шахслар учун — фуқаролиги бўлмаган шахснинг идентификацияловчи ID-картаси ёки янги намунадаги миллий ҳайдовчилик гувоҳномаси ёки ҳаракатланиш ҳужжати;

б) жисмоний шахсларнинг вакиллари учун:

нотариус томонидан тасдиқланган жисмоний шахсларнинг вакили ваколатларини тасдиқловчи ишончнома ёки жисмоний шахс қонуний вакили ваколатларини тасдиқловчи ҳужжат;

вакилнинг шахсини тасдиқловчи ҳужжат (мазкур банднинг «а» кичик бандида кўрсатилган ҳужжатлар);

в) юридик шахслар учун:

юридик шахснинг давлат рўйхатидан ўтказилганлиги тўғрисидаги гувоҳноманинг нусхаси;

юридик шахснинг раҳбари (директор, раис) томонидан имзоланган ва унинг муҳри билан тасдиқланган (тадбиркорлик субъектларидан муҳр билан тасдиқлаш талаб қилинмайди) юридик шахс вакили ваколатларини тасдиқловчи ишончнома. Юридик шахснинг эркинликлари ифодалаган ҳолатларда, ишончноманинг ўрнига унинг раҳбари томонидан уни ушбу лавозимга тайинлаш тўғрисидаги қарорнинг нусхаси юридик шахснинг муҳри билан тасдиқланган ҳолда (тадбиркорлик субъектларидан муҳр билан тасдиқлаш талаб қилинмайди) тақдим этилади.

вакилнинг шахсини тасдиқловчи ҳужжат (мазкур банднинг «а» кичик бандида кўрсатилган ҳужжатлар).

18. Автомототранспорт воситасига бўлган мулк ҳуқуқи ёки бошқа ашёвий ҳуқуқларни тасдиқловчи ҳужжатларга қуйидагилар киради:

меросга бўлган ҳуқуқ ёки мулкий ҳуқуқлар тўғрисида нотариус томонидан берилган гувоҳнома;

суднинг қонуний кучга кирган қарори;

нотариус томонидан тасдиқланган автомототранспорт воситасини бошқа шахсга бериш тўғрисида шартнома (олди-сотди, айирбошлаш, ҳадя, рента ва бошқалар);

дистрибютор ёки дилер ташкилоти томонидан реализация қилинган янги ва илгари фойдаланишда бўлган автомототранспорт воситаларига, шу жумладан, «TRADE-IN» ва «TRADE-UP» дастурлари бўйича автомототранспорт воситаларига бериладиган электрон ҳисоб-маълумот;

дистрибютор ёки дилер ташкилоти билан тузилган илгари фойдаланишда бўлган автомототранспорт воситаси олди-сотди шартномаси, шу жумладан, «TRADE-IN» ва «TRADE-UP» дастурлари бўйича тузилган илгари фойдаланишда бўлган автомототранспорт воситаси олди-сотди шартномаси;

Ўзбекистон Республикаси Давлат активларини бошқариш агентлиги ҳузуридаги «Электрон онлайн аукционларни ташкил этиш маркази» давлат унитар корхонаси томонидан ташкил этилган аукционларда автомототранспорт воситаларига эга бўлишни тасдиқловчи аукцион натижалари тўғрисидаги баённома;

юқори турувчи давлат органининг автомототранспорт воситасини бир тизим ичида текинга бериш тўғрисидаги қарори (буйруғи, фармойиши);

юридик шахснинг юқори турувчи бошқарув органининг юридик шахснинг устав жамғармасига (устав капиталига) автомототранспорт воситасини киритиш тўғрисида ёки шу юридик шахснинг иштирокчисига (таъсисчи, аъзо) юридик шахснинг автомототранспорт воситасини дивиденд сифатида тўлаш тўғрисидаги қарори (иштирокчилар (таъсисчилар, аъзолар) умумий йиғилишининг баённомаси, ёки ягона иштирокчининг қарори);

давлат божхона хизмати органи томонидан берилган юк божхона декларацияси;

шахснинг автомототранспорт воситасини оммавий ўйинда (лотереяда) ютганлигини тасдиқловчи ҳужжат;

давлат органининг транспорт воситасини мукофот (ҳадя) сифатида тақдим этганлиги тўғрисидаги қарорининг нусхаси;

ишлаб чиқарувчи ва дистрибютор ёки дилер ташкилоти, шунингдек, дистрибютор ва дилер ташкилотлари ўртасида автомототранспорт воситасининг олди-сотди шартномаси ва топшириш-қабул қилиш далолатномаси;

қонунчиликда назарда тутилган бошқа ҳужжат.

19. Яқин қариндошликни тасдиқловчи ҳужжатга туғилганлик ҳақидаги гувоҳнома ёки никоҳ тузилганлиги тўғрисидаги гувоҳнома ёки яқин қариндошликни тасдиқловчи ваколатли орган томонидан берилган бошқа ҳужжат киради.

Аризачининг автомототранспорт воситасининг аввалги эгаси олдида ҳуқуқий ворислигини тасдиқловчи ҳужжатга аризачи-юридик шахснинг устави ёки таъсис шартномаси киради.

Аризачи-юридик шахс автомототранспорт воситасининг аввалги эгаси-юридик шахс иштирокчиси (таъсисчиси, аъзоси, акционери) эканлигини тасдиқловчи ҳужжатга охиргисининг устав таъсис шартномаси ёки акциядорлар реестри киради.

Автомототранспорт воситасининг аввалги эгаси-юридик шахс аризачи-юридик шахснинг иштирокчиси (таъсисчи, аъзо, акциядор) эканлигини тасдиқловчи ҳужжатга охиргисининг устави ёки таъсис шартномаси ёхуд акциядорлар реестри киради.

20. ЙҲХХ ва унинг ҳудудий бошқармаларида илгари рўйхатга қўйилмаган янги автомототранспорт воситасини ёки Ўзбекистон Республикаси ҳудудига киритилган ва давлат божхона хизмати органи томонидан юк божхона декларацияси берилган автомототранспорт воситасини давлат рўйхатидан ўтказишда мазкур Низомнинг 16-банди тўртинчи хатбошида кўрсатилган автомототранспорт воситасини рўйхатдан ўтказиш тўғрисидаги гувоҳномани тақдим этиш талаб этилмайди.

Автомототранспорт воситаси суд қарори асосида давлат мулкига қаратилганда, давлат фойдасига рад этиш божхона режимига расмийлаштирилганда ёки эгаси йўқ деб топилиб жойлардаги ижро ҳокимияти органининг қарорига кўра давлат фойдасига ўтганда, башарти аукционда сотиш мобайнида унинг рўйхатга олиш тўғрисидаги гувоҳномаси мавжуд бўлмаса ёки йўқотилган бўлса, унинг рўйхатга олиниши аукционда автомототранспорт воситасини сотиб олганликни тасдиқловчи аукцион натижалари тўғрисидаги баённома асосида амалга оширилади.

Автомототранспорт воситасининг рўйхатда туриш жойини ўзгартиришга олиб келадиган автомототранспорт воситаси эгасининг яшаш (турар) жойи ёки жойлашган жойи (почта манзили) ўзгариши муносабати билан транспорт воситасини давлат рўйхатидан ўтказишда, мазкур Низомнинг 16-банди бешинчи хатбошида келтирилган автомототранспорт воситасига бўлган мулк ҳуқуқи ёки бошқа ашёвий ҳуқуқларни тасдиқловчи ҳужжатларни тақдим этиш талаб этилмайди.

21. Автомототранспорт воситаларини рўйхатга олиш ёки уни рўйхатга олишни асосли рад этиш ЙҲХХ ва унинг ҳудудий бошқармаларида мурожаат қилган куннинг ўзида амалга оширилади.

22. ЙҲХХ ва унинг ҳудудий бошқармалари томонидан автомототранспорт воситасини давлат рўйхатига қўйиш ёзма шаклда қуйидаги ҳолатларда рад этилиши мумкин:

а) мазкур Низомда белгиланган тегишли ҳужжатлар тақдим этилмаганда;

б) автомототранспорт воситасини рул бошқаруви ўнг томонда жойлашган ҳолда тақдим этганда;

в) ЙҲХХ ва унинг ҳудудий бошқармаларида фойдаланувга яроқсизлиги туфайли ҳисобдан чиқарилган автомототранспорт воситасини тақдим этганда;

в¹) ишлаб чиқарилганига 50 йил ва ундан ортиқ бўлган транспорт воситалари тақдим этилганда («антиквар» автомототранспорт воситалари бундан мустасно);

г) конструкцияси ёки конструкциясига киритилган ўзгартиришлар техник тартибга солиш соҳасидаги норматив ҳужжатлар талабларига, шунингдек йўл ҳаракати хавфсизлигини таъминлаш соҳасида белгиланган тартибда нормаларга жавоб бермайдиган ҳолатларда автомототранспорт воситасини тақдим этганда;

д) ЙҲХХ томонидан бериладиган рухсатсиз мустақил равишда эҳтиёт қисмлар ва агрегатлардан тайёрланган ва йиғилган автомототранспорт воситасини тақдим этганда;

е) автомототранспорт воситасига ташкилот — ишлаб чиқарувчилар томонидан қўйилган идентификация тамғасини яшириш, сохталаштириш, ўзгартириш, йўқ қилиш аломатлари ёхуд тақдим этилган ҳужжатларнинг сохталаштирилиши, тақдим этилган ҳужжатларда ёки рўйхатга доир ҳужжатларда кўрсатиб ўтилган маълумотларга автомототранспорт воситаси ва рақам агрегатларининг номувофиқлиги аниқланганда;

ж) автомототранспорт воситасининг, рақам агрегатларининг қидирувда эканлиги ёки тақдим этилган ҳужжатларнинг йўқолганлиги (ўғирланганлиги) тўғрисида маълумотлар мавжуд бўлганда;

з) Ўзбекистон Республикаси қонунчилигига мувофиқ автомототранспорт воситасининг тасарруф этилишига тақиқ ёки унинг хатлаб қўйилиши мавжуд бўлганда.

Автомототранспорт воситаси эгаси ёки унинг вакили автомототранспорт воситасини давлат рўйхатидан ўтказишга рад этиш асосларини бартараф этган тақдирда, автомототранспорт воситасини давлат рўйхатига қўйиш тўғрисида ариза билан қайтадан мурожаат қилишга ҳақли.

23. Автомототранспорт воситалари давлат рўйхатидан ўтказилганда унинг эгаларига ҳудудий бошқармалари томонидан РЎДРБ ва автомототранспорт воситасини давлат рўйхатидан ўтказганлик тўғрисида гувоҳнома берилади. Илгари берилган автомототранспорт воситасини рўйхатдан ўтказганлик тўғрисидаги гувоҳнома ва РЎДРБ, шунингдек чет эл ҳужжатлари ва рўйхатдан ўтиш рақамли белгилари олиб қўйилади (улар мавжуд бўлганда).

Бунда автомототранспорт воситасини рўйхатдан ўтказиш тўғрисидаги гувоҳноманинг 5-банди (манзили) тўлдирилмайди.

Давлат рўйхатидан ўтказилган автомототранспорт воситаларининг РЎДРБ ва автомототранспорт воситасини давлат рўйхатидан ўтказганлик тўғрисидаги гувоҳномалар эгаларига уларнинг шахсини идентификация қилиш (бармоқ изларини сканер қилиш ва бошқалар) йўли билан топширилади ва электрон қайд этилади.

Автомототранспорт воситаси эгасининг яшаш (турар) жойи ўзгарганлиги муносабати билан автомототранспорт воситасининг давлат рўйхатини амалга оширган ЙҲХХ ва унинг ҳудудий бошқармалари мустақил равишда ушбу автомототранспорт воситасини ҳисобдан чиқаришни бу ҳақдаги тегишли маълумотни рўйхатдан ўтган автомототранспорт воситаларининг Ягона маълумотлар базасига киритиш йўли билан амалга оширади.

24. Автомототранспорт воситасини давлат рўйхатидан ўтказиш мобайнида ЙҲХХ ва унинг ҳудудий бошқармалари автомототранспорт воситасининг рўйхатдан ўтказиш электрон картасини очади, унга агрегат рақамлари, автомототранспорт воситасининг бошқа техник параметрлари, автомототранспорт воситаси эгаси тўғрисида маълумотлар, унинг яшаш (турар) жойи ва бошқа зарур маълумотлар киритилади.

Транспорт воситасининг рўйхатдан ўтказиш электрон картасига рўйхатдан ўтказишда қуйидаги маълумотлар ҳам киритилади:

автотранспорт воситасини 18 ёшга тўлмаган жисмоний шахс номига, мототранспорт воситасини эса 16 ёшга тўлмаган шахс ёки муомалага лаёқатсиз шахс номига рўйхатдан ўтказишда — автомототранспорт воситасининг эгаси қонуний вакиллари: ота онаси, фарзандликка олувчилар, васий ва ҳомийлар тўғрисида;

ҳадя шартномасида ёки мерос гувоҳномасида автомототранспорт эгаси сифатида кўрсатилган шахслардан бирининг номига автомототранспортни рўйхатдан ўтказишда — автомототранспорт воситасининг бошқа эгалари тўғрисидаги маълумотлар;

25. Ушбу бўлим қоидалари транспорт воситаларини вақтинчалик рўйхатга қўйиш, қайта рўйхатга олиш ва бошқа шахснинг ихтиёрига бериш билан боғлиқ бўлмаган ҳолатларда транспорт воситалари билан битимларни ҳисобга олиш тартибига, мазкур Низомнинг тегишли бўлимларида кўрсатилган ҳолатларни ҳисобга олган ҳолда, қўлланилади.

26. РЎДРБ:

автотранспорт воситаларининг олд ва орқа қисмларида мустаҳкамлаш учун бир жуфт РЎДРБ;

мототранспорт воситалари ҳамда тиркама ва ярим тиркамаларнинг орқа қисмига жойлаштириш учун бир дона РЎДРБ берилади.

РЎДРБ ЯААТ «Давлат рақами белгилари» модулида автоматик тарзда тасодифий танлаш орқали берилади, ягона оширилган тўлов эвазига бериладиган РЎДРБ бундан мустасно;

ягона оширилган тўлов эвазига бериладиган автомототранспорт воситалари учун РЎДРБ жисмоний ва юридик шахсларнинг тўғридан-тўғри электрон мурожаатига асосан тақдим этилади;

юридик шахсларга, давлат ташкилотлари ва устав фондида 50 фоиздан ортиқ давлат улуши бўлган юридик шахслардан ташқари — I, IA ёки IЕ, IAЕ типли РЎДРБ;

жисмоний шахсларга — III, IIIA ёки IIIЕ, IIIАЕ типли РЎДРБ.

Бунда:

умумий вазни (юки билан) 44 тоннадан ортиқ бўлган, юридик шахсларга тегишли юк автомобилларига I, IA ёки IE, IAE типли, жисмоний шахсларга тегишли юк автомобилларига III, IIIA ёки IIIE, IIIAE типли «YUK» серияли РЎДРБ;

конларда, шахта ва карьерларда қўлланиладиган юридик шахсларга тегишли махсус транспорт воситаларига I, IA ёки IE, IAE типли, жисмоний шахсларга тегишли махсус транспорт воситаларига III, IIIA ёки IIIE, IIIAE типли, «KON» серияли РЎДРБ;

юридик шахсларга тегишли «антиквар» автомобилларга I, IA ёки IE, IAE типли, жисмоний шахсларга тегишли «антиквар» автомобилларга III, IIIA ёки IIIE, IIIAE типли, «ANT» серияли РЎДРБ;

юридик шахсларга тегишли йўналишсиз таксиларга I, IA ёки IE, IAE типли, «ТТТ» серияли РЎДРБ берилади.

Автотранспорт воситаларининг сонидан келиб чиққан ҳолда юқоридаги серияли РЎДРБларининг охирги ҳарфлари ўрнига бошқа ҳарфлар қўлланилиши мумкин;

Илгари фойдаланишда бўлган барча тоифалардаги рўйхатдан ўтказиш давлат рақами белгилари автомототранспорт воситаси қайта давлат рўйхатидан ўтказилганда, ушбу транспорт воситаси эгасининг хоҳишига кўра ҳамда ягона оширилган тўловнинг 50 фоизи миқдорида тўлов амалга оширилган тақдирда унинг эгасининг номида қолдирилиши ёки қонунчилик ҳужжатларида белгиланган тартибда бошқа шахс номига ўтказилиши мумкин.

27. Берилган РЎДРБ, шу жумладан, ягона оширилган тўлов эвазига бериладиган автомототранспорт воситалари учун РЎДРБ транспорт воситаси эгасининг мулки ҳисобланмасдан, улардан қатъиян мақсадли фойдаланилиши учун унга тақдим этилади.

28. ЙҲХХнинг онлайн режимида узлуксиз равишда янгиланиб турадиган ягона очиқ маълумотлар базасида бўш турган ягона оширилган тўлов эвазига бериладиган автомототранспорт воситалари учун РЎДРБ ҳақида тўлиқ маълумот бўлиши лозим.

29. Автомототранспорт воситасини бошқа шахсга ўтказишда олдин берилган (илгари фойдаланишда бўлган) барча тоифалардаги рўйхатдан ўтказиш давлат рақами белгилари транспорт воситасининг аввалги эгасининг аризасига кўра ҳудудий бошқармаларга ўн икки ой муддатга сақлаш учун топширилиши мумкин. РЎДРБни ўн икки ой муддатга сақлаганлик учун тўлов ундирилмайди.

Ушбу муддат тугагандан сўнг, қўшимча равишда бир маротаба ўн икки ойдан ошмаган муддатга базавий ҳисоблаш миқдорининг бир баравари миқдорида тўлов тўлаган ҳолда РЎДРБ сақлаш муддатини узайтириш мумкин.

Сақлаш учун ундирилган тўлов суммаси ЙҲХХнинг Давлат йўл ҳаракати хавфсизлиги хизмати моддий-техника базасини ривожлантириш, ходимларини рағбатлантириш ва мукофотлаш жамғармасига ўтказилади.

Жисмоний ва юридик шахслар сақлаш учун топширилган РЎДРБларнинг ҳолатини текшириш учун мазкур Низомнинг 1¹-бобида белгиланган тартиб асосида ЙҲХХнинг мобиль иловаси, расмий веб-сайти ёки ЯИДХП орқали мурожаат этишлари мумкин.

30. Автомототранспорт воситасини давлат рўйхатидан ўтказишда олдин берилган (илгари фойдаланишда бўлган) барча тоифалардаги РЎДРБ алмаштиришига олиб келса, транспорт воситасининг аввалги эгасининг хоҳишига кўра ушбу РЎДРБ сақлаб қолинади ва ягона оширилган тўловнинг 50 фоизи миқдорида тўлов амалга оширилган тақдирда такроран берилади:

а) жисмоний шахслар учун — ушбу шахсга ёхуд унинг яқин қариндошига (ота-она, туғишган ва ўгай ака-ука ва опа-сингиллар, эр-хотин, фарзандлар, шу жумладан фарзандликка олинганлар, бобоси, бувиси, неваралар, шунингдек эр-хотиннинг ота-онаси, туғишган ва ўгай ака-укалари ва опа-сингилларига), шунингдек умумий мулкка эгалик қилиш ҳуқуқига эга бўлган шахсларга ва меросхўрларга тегишли бўлган бошқа автотранспорт воситасига;

б) юридик шахслар учун — рўйхатдан ўтказиб берилаётган бошқа автотранспорт воситасига ўша юридик шахсга — автотранспорт воситасининг аввалги эгаси ёки унинг ҳуқуқий вориси (юридик шахс номи қайта ўзгарганда, бирлашганда, қўшилганда, бўлинганда, ажралиб чиққанда ёки қайта ташкил этилганда) ёки юридик шахс томонидан — унинг иштирокчисига (таъсисчисига, аъзосига) ёхуд юридик шахснинг иштирокчиси (таъсисчиси, аъзоси) ҳисобланган юридик шахсга — автотранспорт воситасининг аввалги эгаси.

30¹. Автомототранспорт воситаси қайта давлат рўйхатидан ўтказилганда, эгасининг хоҳишига кўра унинг номида қолдириладиган ёки қонунчилик ҳужжатларида белгиланган тартибда бошқа шахс номига ўтказиладиган давлат рақами белгиларини ДЙҲХХда қайта расмийлаштириб беришдан келиб тушадиган маблағларнинг:

35 фоизи — Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Хавфсиз йўл ва хавфсиз пиёда» республика жамғармасига;

15 фоизи — Ўзбекистон Республикаси Ички ишлар вазирлигининг моддий-техника базасини ривожлантириш, ходимларини моддий рағбатлантириш ва бошқа харажатлар махсус жамғармасига;

50 фоизи — Давлат бюджетига йўналтирилади.

31. Олдин берилган (илгари фойдаланишда бўлган) барча тоифадаги РЎДРБ транспорт воситаларининг эгалари томонидан сақланмаганда, белгиланган тартибда ҳудудий ДЙҲХХ органлари томонидан олиб қўйилади ва йўқ қилинади. Ушбу РЎДРБнинг рақам ва ҳарфлари комбинациялари ЙҲХХнинг онлайн режимида узлуксиз равишда янгиланиб турадиган ягона очиқ маълумотлар базасида бўш турган ягона оширилган тўлов эвазига бериладиган автомототранспорт воситалари учун РЎДРБ сифатида қайд этилади.

Бундай РЎДРБ кейинчалик ягона оширилган тўлов эвазига бериладиган автомототранспорт воситалари учун РЎДРБни бериш тартиби асосида такроран ишлаб чиқарилиши ва берилиши мумкин.

Олиб қўйилган РЎДРБларини йўқ қилиш тартиби Ўзбекистон Республикаси Ички ишлар вазирлиги томонидан белгиланади.

33. Автомототранспорт воситаларини вақтинчалик рўйхатдан ўтказиш ЙҲХХ ва унинг ҳудудий бошқармалари томонидан қуйидаги ҳолатларда амалга оширилади:

а) Ўзбекистон Республикаси ҳудудига вақтинчалик олиб кириш божхона режимига олиб келинган автомототранспорт воситалари давлат божхона хизмати органлари томонидан расмийлаштирилганда;

б) автомототранспорт воситаси тажриба намуналари синовларидан ўтказилганда;

в) автомототранспорт воситасининг лизинг (сублизинг) шартномасига асосан автомототранспорт воситаси лизингга (сублизингга) берилганда;

в¹) дистрибютор ёки дилер ташкилоти томонидан, шу жумладан, «TRADE-IN» ва «TRADE-UP» дастурлари бўйича илгари фойдаланишда бўлган автомототранспорт воситаси сотиб олинганда;

г) автомототранспорт ҳужжатларининг қонунийлигига шубҳа ёки бошқа аниқлик киритилиши талаб этилаётган ҳолат пайдо бўлганда;

д) автомототранспорт воситаси эгасининг яшаш (турган) жойи ёки жойлашган жойи (почта манзили) ўзгарганда, автомототранспорт воситасининг вақтинчалик рўйхатдан ўтказиш жойини ўзгартириш талаб этилганда;

е) автомототранспорт воситаси билан эгасининг яшаш (турган) жойи олти ойдан кўп бўлган муддатга вақтинчалик ўзгарганда, шунингдек нотариус томонидан тасдиқланган шартнома, ишончнома бўйича вақтинчалик ўтказилиши билан боғлиқ ҳолда автомототранспорт воситаси у рўйхатдан ўтган ЙҲХХ ва унинг ҳудудий бошқармалари ташқарисига чиқиб кетганда.

34. Ўзбекистон Республикаси ҳудудига олиб келинган автомототранспорт воситасини давлат рўйхатидан ўтказиш учун ёки вақтинчалик олиб кириш божхона режимига расмийлаштирилган автомототранспорт воситасини вақтинчалик рўйхатдан ўтказиш учун эгаси ёки унинг вакили ҳудудий бошқармаларга қуйидаги ҳужжатларни тақдим этган ҳолда мурожаат қилади:

юк божхона декларацияси;

транспорт воситаси эгасининг ёки унинг вакилининг шахсини тасдиқловчи ҳужжати;

ЙҲХХ ва унинг ҳудудий бошқармаларининг рўйхатдан ўтказиш ҳаракатларини амалга оширишдаги хизматлари учун тўловларнинг тўланганлиги ҳақидаги банк тўлов ҳужжати (йиғим ва тўловлардан озод этилган шахслар ва электрон тўлов тизимлар орқали тўлов амалга оширилган ҳоллар бундан мустасно).

Ўзбекистон Республикаси ҳудудига олиб келинган ва вақтинчалик олиб кириш божхона режимига расмийлаштирилган автомототранспорт воситасини вақтинчалик рўйхатдан ўтказиш вақтинчалик олиб кириш рухсатномасида кўрсатилган муддатга амалга оширилади.

35. Автомототранспорт воситаларининг синовлардан ўтказилаётган тажриба намуналарини вақтинчалик рўйхатдан ўтказиш ҳудудий бошқармалар томонидан қуйидаги ҳужжатлар асосида амалга оширилади:

автомототранспорт воситасининг тажриба намунаси эгасининг ёки унинг вакилининг аризаси;

автомототранспорт воситаси эгасининг ёки унинг вакилининг шахсини тасдиқловчи ҳужжати;

автомототранспорт воситаси тажриба намунасининг тўхташ жойи тўғрисида маълумотлар.

Автомототранспорт воситаларининг тажриба намуналарини вақтинчалик рўйхатдан ўтказиш синовдан ўтказиш муддатига амалга оширилади.

Вақтинчалик рўйхатдан ўтказилган автомототранспорт воситасининг тажриба намунасига вақтинчалик рўйхатдан ўтказиш муддатига автомототранспорт воситасининг рўйхатдан ўтказилганлиги ҳақида гувоҳнома ва «TAJRIBA» типидаги РЎДРБ берилади.

36. Лизингга (сублизингга) берилаётган автомототранспорт воситасини вақтинчалик рўйхатдан ўтказиш учун эгаси ёки унинг вакили ЙҲХХ ва унинг ҳудудий бошқармаларига қуйидаги ҳужжатларни тақдим этади:

автомототранспорт воситасининг эгаси ёки унинг вакилининг белгиланган намунадаги аризаси;

автомототранспорт воситаси эгасининг ёки унинг вакилининг шахсини тасдиқловчи ҳужжати;

автомототранспорт воситасини рўйхатдан ўтказиш тўғрисидаги гувоҳномаси ёки дистрибютор ёки дилер ташкилоти томонидан бериладиган электрон ҳисоб-маълумот;

автомототранспорт воситасининг лизинг ёки сублизинг шартномаси (қонунчиликда белгиланган ҳолатларда — нотариус томонидан тасдиқланганлиги);

ЙҲХХ ва унинг ҳудудий бошқармаларининг рўйхатдан ўтказиш ҳаракатларини амалга оширишдаги хизматлари учун белгиланган миқдордаги тўловларнинг тўланганлиги ҳақида банк тўлов ҳужжати (тўловларни тўлашдан озод этилган шахслар бундан мустасно).

36¹. Дистрибютор ёки дилер ташкилоти томонидан илгари фойдаланишда бўлган автомототранспорт воситаси сотиб олинганда, шу жумладан, «TRADE-IN» ва «TRADE-UP» дастурлари бўйича вақтинча рўйхатдан ўтказиш учун дистрибютор ёки дилер ташкилоти вакили ҳудудий ДЙҲХХ органларига қуйидаги ҳужжатларни тақдим этади:

дистрибютор ёки дилер ташкилотининг аризаси;

дистрибютор ёки дилер ташкилоти вакилининг шахсини тасдиқловчи ҳужжат;

ўрнатилган тартибда расмийлаштирилган дистрибютор ёки дилер ташкилоти вакилининг ишончномаси;

дистрибютор ёки дилер ташкилоти билан автомототранспорт воситасининг эгаси ўртасида тузилган олди-сотди шартномаси;

автомототранспорт воситасининг РЎДРБ ва рўйхатдан ўтказилганлиги ҳақидаги гувоҳномаси.

Дистрибютор ёки дилер ташкилоти томонидан сотиб олинган илгари фойдаланишда бўлган автомототранспорт воситасини, шу жумладан, «TRADE-IN» ва «TRADE-UP» дастурлари бўйича дистрибютор ва дилер ташкилоти томонидан ДЙҲХХ органларида вақтинча рўйхатдан ўтказишда маълумотнома берилади (вақтинча рўйхатдан ўтказилган автомототранспорт воситасига РЎДРБ ва рўйхатдан ўтказилганлиги ҳақидаги гувоҳнома берилмайди).

Мазкур маълумотнома автомототранспорт воситасини бошқариш ҳуқуқини бермайди (дистрибютор ёки дилер ташкилотининг жойлашган манзилига ёки автомототранспорт воситасини сақлаш жойига етиб олиш бундан мустасно).

Дистрибютор ва дилер ташкилотлари томонидан илгари фойдаланишда бўлган автомототранспорт воситаларини сотиб олганлик учун, шу жумладан, «TRADE-IN» ва «TRADE-UP» дастурлари бўйича уларни ДЙҲХХ органларида вақтинча рўйхатдан ўтказиш вақтида йиғим тўланмайди.

37. Бир шахс томонидан бошқа шахсга лизинг ёки сублизинг шартномаси доирасида вақтинчалик эгалик қилиш ва фойдаланишга бериш учун олинган автомототранспорт воситасини вақтинчалик рўйхатдан ўтказиш, тузилган автомототранспорт воситасининг лизинг (сублизинг) шартномаси талабларидан келиб чиқиб, лизинг берувчи ёки лизинг олувчи номига лизинг (сублизинг) шартномасида кўрсатилган муддатга амалга оширилади. Агар лизинг шартномасида лизинг олувчи номига автомототранспорт воситасини вақтинчалик рўйхатдан ўтказиш ҳақида бир хилдаги қоидалари мавжуд бўлмаса, унда автомототранспорт воситаси лизинг берувчи номига рўйхатдан ўтказилади.

Автомототранспорт воситасини лизинг берувчига вақтинчалик рўйхатдан ўтказиш лизинг берувчининг яшаш (турган) жойи бўйича, лизинг олувчига эса — лизинг олувчининг яшаш (турган) жойи бўйича амалга оширилади.

38. Лизингга (сублизингга) берилаётган автомототранспорт воситасини вақтинчалик рўйхатдан ўтказиш лизинг (сублизинг) шартномасида кўрсатилган муддатга автомототранспорт воситасини рўйхатдан ўтказиш тўғрисидаги гувоҳнома берилиши билан амалга оширилади.

39. Лизингга (сублизингга) берилаётган вақтинчалик рўйхатдан ўтказилган транспорт воситасининг рўйхатдан ўтказиш электрон картасига автомототранспорт воситасини вақтинчалик рўйхатдан ўтказиш муддатининг тугаши, лизинг (сублизинг) шартномасининг рақами ва санасини кўрсатган ҳолда «Лизинг, «___» ________ 20___йилдаги «___ -сон лизинг (сублизинг) шартномасига асосан вақтинчалик рўйхатдан ўтказиш ____________ гача» деган ёзув киритилади.

40. Лизинг олувчига автомототранспорт воситаси мулк ҳуқуқи асосида ўтишини назарда тутувчи лизинг (сублизинг) шартномасининг амал қилиш муддати тугаши билан автомототранспорт воситаси лизинг (сублизинг) шартномаси ва лизинг берувчининг автомототранспорт воситасига бўлган мулк ҳуқуқининг лизинг олувчига ўтганлиги ҳақидаги тасдиқловчи хати асосида лизинг олувчининг номига давлат рўйхатидан ўтказилади.

Лизинг олувчига автомототранспорт воситасига бўлган мулк ҳуқуқининг ўтиши назарда тутилмаган лизинг шартномасининг амал қилиш муддати тугаши билан лизинг олувчига автомототранспорт воситаси фақат нотариус томонидан тасдиқланган автомототранспорт воситасини бошқа шахсга ўтказиш шартномаси (олди-сотди, айирбошлаш, ҳадя, рента ва бошқалар) асосида рўйхатдан ўтказилиши мумкин.

41. Лизинг олувчи номига рўйхатдан ўтказилган автомототранспорт воситасининг лизинг берувчига қайтариб берилишини назарда тутувчи лизинг шартномасини бекор қилган ҳолда, кўрсатилган автомототранспорт воситаси лизинг шартномасининг бекор қилинганлиги ҳақида ҳужжат ёки автомототранспорт воситасини лизинг берувчига қайтарилишини назарда тутувчи суд ёки бошқа органлар ижро ҳужжатининг нусхаси илова қилинган ҳолда лизинг берувчининг аризасига асосан лизинг берувчи номига рўйхатдан ўтказилади.

42. Давлат рўйхатидан (вақтинчалик рўйхатдан) ўтказиш учун тақдим этилган автомототранспорт воситаларининг ҳужжатлари ЙҲХХ ва унинг ҳудудий бошқармаларида уларнинг асли эканлигига ёки улардаги маълумотларнинг ҳақиқийлигига шубҳа туғдирса ёхуд бошқа аниқлик киритилиши лозим бўлган ҳолатлар мавжуд бўлса, лекин шу билан бирга мазкур Низомнинг 22-бандида кўрсатилган автомототранспорт воситасини давлат рўйхатидан ўтказишга рад қилиш учун асослар мавжуд бўлмаса, олти ойдан ошмаган муддатга вақтинчалик рўйхатга олинади.

Кўрсатилган автомототранспорт воситаларини вақтинчалик рўйхатдан ўтказиш мазкур Низомнинг 16, 34 ёки 36-бандларига мувофиқ тақдим этилган ҳужжатлар асосида амалга оширилади.

Вақтинчалик рўйхатдан ўтказиш муддати давомида ЙҲХХ ва унинг ҳудудий бошқармалари бошқа ваколатли органлар билан ўзаро ҳамкорликда тақдим қилинган ҳужжатларни текшириш бўйича тегишли тадбирларни амалга оширади. Шубҳалар тасдиқланганда ва рўйхатдан ўтказиш учун асослар пайдо бўлганда ЙҲХХ ва унинг ҳудудий бошқармалари аввалги эгасига автомототранспорт воситасининг рўйхатдан ўтказилганлигини тиклаб бериб, автомототранспорт воситасининг рўйхатдан ўтганлигини бекор қилади ёхуд қонунчиликда белгиланган бошқа чораларни кўради. ЙҲХХ ва унинг ҳудудий бошқармаларининг шубҳалари тасдиқланмаганда ёки автомототранспорт воситасининг вақтинчалик рўйхатдан ўтказиш муддати тугаганда, у автомототранспорт воситаси эгасининг ЙҲХХ ва унинг ҳудудий бошқармалари томонидан рўйхатдан ўтказишдаги ҳаракатлари учун ундириладиган тўловисиз умумий асосларга кўра рўйхатдан ўтказилади.

43. Автомототранспорт воситасининг вақтинчалик рўйхатдан ўтказиш жойи ўзгартирилиши талаб этилаётган автомототранспорт воситаси эгасининг яшаш (турган) жойи ёки жойлашган жойи (почта манзили) ўзгарганда, автомототранспорт воситасини вақтинчалик рўйхатдан ўтказиш учун эгаси ёки унинг вакили ҳудудий бошқармаларга қуйидаги ҳужжатларни тақдим этган ҳолда мурожаат қилади:

автомототранспорт воситаси эгасининг ёки унинг вакилининг шахсини тасдиқловчи ҳужжати;

автомототранспорт воситаси эгасининг яшаш (турган) жойи ёки жойлашган жойи (почта манзили) ўзгарганлигини тасдиқловчи ҳужжатлар (яшаш бўйича рўйхатдан ўтганлиги тўғрисида белгиси билан паспорт ёки идентификацияловчи ID-карта, юридик шахснинг давлат рўйхатидан ўтказилганлиги тўғрисидаги гувоҳнома ва бошқалар);

ЙҲХХ ва унинг ҳудудий бошқармаларининг рўйхатдан ўтказиш ҳаракатларини амалга оширишдаги хизматлари учун белгиланган миқдордаги тўловларнинг тўланганлиги ҳақида банк тўлов ҳужжати (тўловларни тўлашдан озод этилган шахслар ва электрон тўлов тизимлар орқали тўлов амалга оширилган ҳоллар бундан мустасно).

Ушбу асос бўйича автомототранспорт воситасини вақтинчалик рўйхатдан ўтказиш, тегишли асосларнинг мавжуд ҳолатларидан ташқари, олдинги вақтинчалик рўйхатдан ўтказиш муддатини ўзгартирмаган ҳолда амалга оширилади.

44. Автомототранспорт воситаси билан эгасининг яшаш (турган) жойи олти ойдан кўп бўлган муддатга вақтинчалик ўзгарганда, шунингдек автомототранспорт воситаси у рўйхатдан ўтган ҳудудий бошқармалардан ташқарисига вақтинча чиқиб кетганда, автомототранспорт воситаси қуйидаги ҳужжатларни тақдим этган ҳолда вақтинчалик рўйхатдан ўтказилади:

автомототранспорт воситасининг эгаси ёки унинг вакилининг белгиланган намунадаги аризаси;

автомототранспорт воситаси эгасининг ёки унинг вакилининг шахсини тасдиқловчи ҳужжати;

автомототранспорт воситаси эгасининг яшаш (турган) жойи вақтинчалик ўзгарганлиги ҳолатларини тасдиқловчи ҳужжатлар (паспорт (яшаш жойи бўйича рўйхатдан ўтганлиги тўғрисида маълумоти билан) ёки идентификацияловчи ID-карта, хизмат сафари тўғрисидаги гувоҳнома ва бошқалар).

45. Нотариуслар, шунингдек, қонунчиликда назарда тутилган ҳолатларда эса консуллар томонидан ҳам тасдиқланган автомототранспорт воситаларидан фойдаланиш ва (ёки) тасарруф этиш ишончномалари, ижара, текинга фойдаланиш ва автомототранспорт воситаларини гаровга қўйиш шартномалари, автомототранспорт воситасининг рўйхатдан ўтиш жойи бўйича тегишли ҳудудий бошқармаларда автомототранспорт воситаларини рўйхатдан ўтказмасдан ҳисобга қўйилади.

Автомототранспорт воситаларини бегоналаштириш билан боғлиқ бўлмаган битишувларни ҳисобга олиш юридик шахслар томонидан ўз ходимларига берилган автомототранспорт воситаларидан фойдаланиш ва (ёки) уларни тасарруф этиш ҳуқуқига ишончномаларга ҳамда енгил автомобилларни ва мототранспорт воситаларини ижарага бериш бўйича хизматлар кўрсатувчи юридик шахслар ҳамда жисмоний шахслар ўртасида енгил автомобилларни ва мототранспорт воситаларини, шунингдек каршеринг ташкилотларининг йўловчилар автотранспорти ва мототранспорт воситаларини жисмоний ва юридик шахсларга ўттиз кунгача муддатга қисқа муддатли ижарага бериш юзасидан оддий ёзма шаклда тузиладиган ижара шартномаларига нисбатан қўлланилмайди.

46. Мазкур Низомнинг 45-бандида кўрсатилган ҳужжатларни ҳисобга қўйиш учун нотариус ва консуллар томонидан уларнинг электрон шакллари ҳудудий бошқармаларига юборилади ёки ЙҲХХнинг автомототранспорт воситаларини ҳисобга қўйишни рўйхатдан ўтказиш ЯААТга киритилади.

2018 йил 1 январига қадар кўрсатилган ҳужжатларни ҳисобга қўйиш учун ҳудудий бошқармаларга:

автомототранспорт воситаси эгасининг ёки унинг вакилининг шахсини тасдиқловчи ҳужжати;

автомототранспорт воситасини рўйхатдан ўтказиш тўғрисидаги гувоҳнома;

нотариус томонидан тасдиқланган ҳисобга қўйиладиган ҳужжатнинг иккита нусхаси (ишончнома биттадан ортиқ ишончли шахсга берилган тақдирда, ЙҲХХ ва унинг ҳудудий бошқармаларига ишончли шахслар сони бўйича ишончномалар нусхалари, шунингдек ЙҲХХ ва унинг ҳудудий бошқармаларига битта нусхаси берилади).

47. Мазкур Низомнинг 45-бандида назарда тутилган ҳужжатларни ҳисобга қўйиш ҳисобга қўйиладиган ҳужжатлар ҳақидаги маълумотларни автомототранспорт воситасининг рўйхатдан ўтказиш картасига киритиш йўли билан амалга оширилади, унга ҳужжатнинг электрон шакли илова қилинади.

48. Мазкур Низомнинг 45-бандида кўрсатилган ҳужжатларни рўйхатга қўйиш юк ташувчи автотранспорт воситалари, автобуслар ва микроавтобусларга нисбатан мудофаа ишлари бўйича бўлимни хабардор қилмасдан ЙҲХХ ва унинг ҳудудий бошқармалари томонидан, кўтариш механизмлари билан жиҳозланган автотранспорт воситаларига (автокран) нисбатан эса Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитаси томонидан амалга оширилади.

49. Мазкур Низомнинг 45-бандида кўрсатилган ҳужжатларни ҳисобга қўйиш Ўзбекистон Республикаси Вазирлар Маҳкамаси ҳузуридаги Республика йўл жамғармасига йиғимларни ва ҳудудий бошқармаларининг рўйхатдан ўтказиш ҳаракатларини амалга оширишдаги хизматлари учун йиғимларни ундирмасдан амалга оширилади.

50. Автомототранспорт воситаларини қайта рўйхатдан ўтказиш қуйидаги ҳолатларда амалга оширилади:

а) мулкдор — жисмоний шахснинг фамилияси, исми, отасининг исми ўзгарганда, шунингдек мулкдор — юридик шахс қайта ташкил этилганда ёки номланиши ўзгарганда;

б) автомототранспорт воситасининг рўйхатдан ўтказиш жойини ўзгартиришни талаб қилмаган ҳолатда автомототранспорт воситаси эгасининг яшаш (турган) жойи ёки жойлашган жойи (почта манзили) ўзгарганда;

в) юридик шахсларга тегишли юк автотранспорт воситаларининг, автобус ва микроавтобусларининг сақлаб туриладиган жойи ўзгарганда;

г) автомототранспорт воситаларининг ранги ва (ёки) рақам агрегати ўзгарганда;

д) автомототранспорт воситаси қайта жиҳозланганда;

е) автомототранспорт воситасини ёки РЎДРБни рўйхатдан ўтказиш гувоҳномаси яроқсиз ҳолга келганда, шикастланганда ёки йўқолганда.

51. Мулкдор — жисмоний шахснинг фамилияси, исми, отасининг исми ўзгарганда, шунингдек, мулкдор — юридик шахс қайта ташкил этилганда ёки номланиши ўзгарганда, автомототранспорт воситасини қайта рўйхатдан ўтказиш учун мулкдор ёки унинг вакили ЙҲХХ ва унинг ҳудудий бошқармаларига қуйидаги ҳужжатларни тақдим этади:

автомототранспорт воситаси эгаси ёки унинг вакилининг белгиланган намунадаги аризаси;

автомототранспорт воситаси эгаси ёки унинг вакилининг шахсини тасдиқловчи ҳужжат.

Қуйидаги маълумотлар «Рақамли ҳукумат» тизимининг идоралараро интеграциялашув платформаси орқали аниқланади:

мулкдор — жисмоний шахснинг фамилияси, исми, отасининг исми, шунингдек, мулкдор — юридик шахснинг қайта ташкил этилиши ёки номланиши ўзгарганлиги;

рўйхат ҳаракатларини амалга ошириш мобайнидаги ЙҲХХ ва унинг ҳудудий бошқармаларининг хизматлари учун белгиланган миқдордаги тўловларни тўлаганлиги.

Юридик шахснинг номи ёки ташкилий-ҳуқуқий шакли, жисмоний шахснинг, шунингдек, жисмоний шахс бўлган тадбиркорлик субъектининг фамилияси, исми, отасининг исми ўзгарганлиги сабабли қайта рўйхатдан ўтказишда, автомототранспорт воситаси эгаси ёки унинг вакилининг хоҳишига кўра автомототранспорт воситасини қайта рўйхатдан ўтказиш бўйича аризалар композит тарзда юборилиши мумкин.

Бунда қайта рўйхатдан ўтказиш учун зарур бўлган маълумотлар мазкур банднинг тўртинчи хатбошисида белгиланган тартибда аниқланади.

Мулкдор — жисмоний шахснинг фамилияси, исми, отасининг исми ўзгарганда, шунингдек мулкдор — юридик шахс қайта ташкил этилганда ёки номланиши ўзгарганда автомототранспорт воситасининг рўйхатга олиш картасига тегишли ўзгартиришлар киритилади, илгари берилган автомототранспорт воситасини рўйхатдан ўтказиш тўғрисидаги гувоҳнома эса автомототранспорт воситаси эгаси ҳақида янги маълумотларни кўрсатган ҳолда алмаштирилади.

52. Автомототранспорт воситаси эгасининг рўйхатдан ўтган жойини ўзгартиришни талаб этмайдиган автомототранспорт воситаси эгасининг яшаш (турган) жойи ёки жойлашган жойи (почта манзили) ўзгарганда автомототранспорт воситасини қайта рўйхатдан ўтказиш учун мулкдор ёки унинг вакили ЙҲХХ ва унинг ҳудудий бошқармаларига қуйидаги ҳужжатларни тақдим этади:

автомототранспорт воситаси эгаси ёки унинг вакилининг белгиланган намунадаги аризаси;

автомототранспорт воситаси эгаси ёки унинг вакилининг шахсини тасдиқловчи ҳужжат;

автомототранспорт воситаси эгасининг яшаш (турган) жойи ёки жойлашган жойи (почта манзили) ўзгарганлигини тасдиқловчи ҳужжат (яшаш жойи бўйича прописка тўғрисидаги белги билан паспорт, юридик шахснинг давлат рўйхатидан ўтказилганлиги тўғрисидаги гувоҳнома ва бошқалар);

рўйхатдан ўтказиш ҳаракатларини амалга ошириш мобайнидаги ЙҲХХ ва унинг ҳудудий бошқармалари томонидан ундириладиган белгиланган миқдордаги тўловларни тўлаганликни тасдиқловчи банк тўлов ҳужжати (тўловлардан озод этилган шахслардан ташқари).

Автомототранспорт воситаси эгасининг рўйхатдан ўтган жойини ўзгартиришни талаб этмайдиган автомототранспорт воситаси эгасининг яшаш (турган) жойи ёки жойлашган жойи (почта манзили) ўзгарганда, автомототранспорт воситасининг рўйхатга олиш электрон картасига тегишли ўзгартиришлар киритилади, илгари берилган автомототранспорт воситасини рўйхатдан ўтказиш тўғрисидаги гувоҳнома эса автомототранспорт воситаси эгасининг янги яшаш (турган) жойи ёки жойлашган жойини (почта манзилини) кўрсатган ҳолда алмаштирилади.

53. Юридик шахсларга тегишли юк автотранспорт воситаларининг, автобус ва микроавтобусларнинг сақлаб туриладиган жойи ўзгарганда автотранспорт воситасини қайта рўйхатдан ўтказиш учун мулкдор ёки унинг вакили ЙҲХХ ва унинг ҳудудий бошқармаларига қуйидаги ҳужжатларни тақдим этади:

автотранспорт воситаси эгаси ёки унинг вакилининг белгиланган намунадаги аризаси;

автомототранспорт воситаси эгаси ёки унинг вакилининг шахсини тасдиқловчи ҳужжат;

рўйхатдан ўтказиш ҳаракатларини амалга ошириш мобайнидаги ЙҲХХ ва унинг ҳудудий бошқармалари томонидан ундириладиган белгиланган миқдордаги тўловларни тўлаганликни тасдиқловчи банк тўлов ҳужжати (тўловлардан озод этилган шахслардан ташқари).

54. Автомототранспорт воситаларининг ранги ва (ёки) номер агрегати ўзгарганда, автотранспорт воситасини қайта рўйхатдан ўтказиш учун мулкдор ёки унинг вакили ЙҲХХ ва унинг ҳудудий бошқармаларига қуйидаги ҳужжатларни тақдим этган ҳолда мурожаат қилади:

автотранспорт воситаси эгаси ёки унинг вакилининг шахсини тасдиқловчи ҳужжат;

рақам агрегатларининг қонуний олинганлигини тасдиқловчи ҳужжат (электрон счёт-маълумотнома, божхона юк декларацияси, битта юридик шахсга тегишли бўлган автотранспорт воситалари учун юк хати (электрон кўринишдаги нотариус томонидан тасдиқланган олди-сотди шартномаси «Нотариус» тизимидан олинади);

автотранспорт воситаларини таъмирлаш ва техник хизмат кўрсатиш бўйича махсус корхонада рақам агрегатларининг алмаштирилганлигини ва (ёки) рангининг ўзгартирилганлигини (ранг ўзгартирилганда) тасдиқловчи ҳужжат;

Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитасининг газ баллонларини синовдан ўтказиш ҳуқуқини берувчи рухсатномаси мавжуд бўлган ташкилот томонидан транспорт воситаларига ўрнатилган газ баллонлари синовдан ўтказилганлиги тўғрисидаги далолатнома (газ баллон ўрнатилмаган транспорт воситалари мустасно);

рўйхатдан ўтказиш ҳаракатларини амалга ошириш мобайнидаги ЙҲХХ ва унинг ҳудудий бошқармалари томонидан ундириладиган белгиланган миқдордаги тўловлар тўлаганлигини тасдиқловчи банк тўлов ҳужжати (тўловлардан озод этилган шахслар ва электрон тўлов тизимлар орқали тўлов амалга оширилган ҳоллар бундан мустасно).

Транспорт воситасининг ранги ва (ёки) рақам агрегати ўзгарганда, автомототранспорт воситасининг рўйхатга олиш электрон картасига тегишли ўзгартиришлар киритилади, илгари берилган автомототранспорт воситасини рўйхатдан ўтказиш тўғрисидаги гувоҳнома эса транспорт воситасининг янги ранги ва (ёки) рақам агрегатини кўрсатган ҳолда алмаштирилади.

55. Автотранспорт воситаси қайта жиҳозлаганда уни қайта рўйхатдан ўтказиш қуйидаги ҳужжатлар асосида амалга оширилади:

автотранспорт воситаси эгаси ёки унинг вакилининг шахсини тасдиқловчи ҳужжат;

рақамли агрегатлар (электрон счёт-маълумотнома, божхона юк декларацияси, битта юридик шахсга тегишли бўлган автотранспорт воситалари учун юк хати (электрон кўринишдаги нотариус томонидан тасдиқланган олди-сотди шартномаси «Нотариус» тизимидан олинади) ва автотранспорт воситаси қайта жиҳозланганда ишлатилган бошқа деталларнинг олинганлигининг қонунийлигини тасдиқловчи ҳужжатлар;

ЙҲХДХ томонидан берилган автотранспорт воситаларини қайта жиҳозлашга рухсати бўлган автотранспорт воситаларини таъмирлаш ва техник хизмат кўрсатиш бўйича махсус корхонада қайта жиҳозлашни амалга оширганликни тасдиқловчи ҳужжат;

газ баллон ускуналарини автотранспорт воситасига қонунчиликда белгиланган тартибда ўрнатиш далолатномасининг нусхаси ва газ баллонларнинг мувофиқлик сертификатининг нусхаси (газ баллон ускунаси ўрнатилган ҳолда қайта жиҳозланган автотранспорт воситалари учун);

ушбу автотранспорт воситасида қайта жиҳозлашни амалга ошириш учун ДЙҲХХ томонидан берилган рухсатноманинг нусхаси (тегишли тасдиқномага эга бўлган автотранспорт воситасини таъмирлаш ва унга техник хизмат кўрсатиш бўйича ихтисослаштирилган корхоналарда автотранспорт воситаси қайта жиҳозланган ҳолатлар бундан мустасно);

рўйхатдан ўтказиш ҳаракатларини амалга ошириш мобайнидаги ЙҲХХ ва унинг ҳудудий бошқармалари томонидан ундириладиган белгиланган миқдордаги тўловларни тўлаганликни тасдиқловчи банк тўлов ҳужжати (тўловлардан озод этилган шахслар ва электрон тўлов тизимлар орқали тўлов амалга оширилган ҳоллар бундан мустасно).

Автотранспорт воситасини қайта жиҳозлашни амалга оширганда автомототранспорт воситасининг рўйхатга олиш электрон картасига тегишли ўзгартиришлар киритилади, илгари берилган автомототранспорт воситасини рўйхатдан ўтказиш тўғрисидаги гувоҳнома эса транспорт воситасининг янги рақам агрегатини кўрсатган ҳолда алмаштирилади.

56. Автомототранспорт воситасини рўйхатдан ўтказиш гувоҳномаси яроқсиз ҳолга келганда, шикастланганда ёки ўғирланганда ва (ёки) РЎДРБ, ягона оширилган тўлов эвазига бериладиган автомототранспорт воситалари учун РЎДРБ яроқсиз ҳолга келганда, шикастланганда ёки ўғирланганда, автотранспорт воситаси қуйидаги ҳужжатлар асосида қайта рўйхатдан ўтказилади:

автомототранспорт воситаси эгаси ёки унинг вакилининг шахсини тасдиқловчи ҳужжат;

автомототранспорт воситасини рўйхатдан ўтказиш тўғрисидаги гувоҳнома яроқсиз ҳолга келганда (у яроқсиз ҳолга келганда);

шикастланган РЎДРБ, ягона оширилган тўлов эвазига бериладиган автомототранспорт воситалари учун РЎДРБ (улар шикастланганда);

ички ишлар органларининг автомототранспорт воситаларини рўйхатдан ўтказиш тўғрисидаги гувоҳноманинг ва (ёки) РЎДРБ, ягона оширилган тўлов эвазига бериладиган автомототранспорт воситалари учун РЎДРБ ўғирланганлиги (йўқотилганлиги) тўғрисидаги маълумотномаси;

рўйхатдан ўтказиш ҳаракатларини амалга ошириш мобайнидаги ЙҲХХ ва унинг ҳудудий бошқармалари томонидан ундириладиган белгиланган миқдордаги тўловлар тўлаганлигини тасдиқловчи банк тўлов ҳужжати (тўловлардан озод этилган шахслардан ташқари).

Автомототранспорт воситасини рўйхатдан ўтказиш гувоҳномаси яроқсиз ҳолга келганда, шикастланганда, йўқотилганда ёки ўғирланганда автомототранспорт воситасини рўйхатдан ўтказиш электрон картаси маълумотлари асосида ҳудудий бошқармалари автомототранспорт воситасини рўйхатдан ўтказиш гувоҳномасининг дубликатини берадилар.

Ўзбекистон Республикаси фуқароси республика ҳудудидан ташқарида эгалигида бўлган автомототранспорт воситаси рўйхатдан ўтказилганлиги тўғрисидаги гувоҳномасини йўқотиб ёки ўғирлатиб қўйганда, автомототранспорт воситасини рўйхатдан ўтказиш электрон картаси маълумотлари асосида автомототранспорт воситасини рўйхатдан ўтказиш гувоҳномасининг дубликати белгиланган тўловлар асосида бир ойгача бўлган муддатга берилади. Автомототранспорт воситаси республика ҳудудига қайтиб келгандан сўнг белгиланган тартибда техник кўрикдан ўтказилиб, тегишли тўловларга асосан доимий рўйхатдан ўтказилганлиги тўғрисидаги гувоҳнома алмаштириб берилади.

РЎДРБ, ягона оширилган тўлов эвазига бериладиган автомототранспорт воситалари учун РЎДРБ шикастланганда автотранспорт воситасининг рўйхатдан ўтказиш маълумотлари асосида ҳудудий бошқармалари уларнинг дубликатини беради. РЎДРБ, ягона оширилган тўлов эвазига бериладиган автомототранспорт воситалари учун РЎДРБларнинг дубликати ҳудудий бошқармалар талабномасига асосан тайёрланади.

Жисмоний ва юридик шахслар шикастланган РЎДРБнинг дубликатларини олиш учун мазкур Низомнинг 1¹-бобида белгиланган тартиб асосида ЙҲХХнинг мобиль иловаси, расмий веб-сайти ёки ЯИДХП орқали мурожаат этишлари мумкин.

РЎДРБ, ягона оширилган тўлов эвазига бериладиган автомототранспорт воситалари учун РЎДРБ йўқолганда ёки ўғирланганда, автотранспорт воситасининг рўйхатдан ўтказиш маълумотлари асосида ҳудудий бошқармалар янги РЎДРБ берилишини таъминлайди.

РЎДРБ, ягона оширилган тўлов эвазига бериладиган автомототранспорт воситалари учун РЎДРБ дубликатлари йўқолган ёки ўғирланганларининг ўрнига берилишига йўл қўйилмайди.

Ягона оширилган тўлов эвазига бериладиган автомототранспорт воситалари учун РЎДРБ топилганда, ҳудудий бошқармалари топилган ва ягона оширилган тўлов эвазига бериладиган автомототранспорт воситалари учун РЎДРБ автотранспорт воситаси эгасининг аризасига асосан белгиланган тартибда берилишини таъминлайди.

Амалга оширилган рўйхатга олиш тўғрисидаги маълумотлар (автомототранспорт воситасини рўйхатга олиш тўғрисидаги гувоҳноманинг дубликатини, дубликат ёки янги РЎДРБни бериш) автомототранспорт воситасининг рўйхатга олиш электрон картасига киритилади, автомототранспорт воситасини рўйхатга олиш тўғрисидаги гувоҳнома, (ёки) РЎДРБ, ягона оширилган тўлов эвазига бериладиган автомототранспорт воситалари учун РЎДРБ тўғрисидаги маълумотлар йўқолган ёки ўғирланган тақдирда ҳам Ўзбекистон Республикаси Ички ишлар вазирлигининг Ахборот марказига юборилади.

57. Автомототранспорт воситаси қуйидаги ҳолатларда ЙҲХХ ва унинг ҳудудий бошқармаларининг ҳисобидан чиқарилади:

расмийлаштирилган юк божхона декларациясига асосан Ўзбекистон Республикаси ҳудудидан автомототранспорт воситаси товар сифатида четга чиқарилганда;

автомототранспорт воситасининг рўйхатдан ўтказиш жойини ўзгартиришни талаб қилмайдиган ҳолатда автомототранспорт воситаси эгасининг яшаш (турган) жойи ёки жойлашган жойи (почта манзили) ўзгарганда;

автомототранспорт воситаси яроқсиз деб ҳисобланганда, шу жумладан, ишлаб чиқарилганига 50 йил ва ундан ортиқ бўлган транспорт воситалари («антиквар» автомототранспорт воситалари бундан мустасно).

58. Расмийлаштирилган юк божхона декларациясига асосан Ўзбекистон Республикаси ҳудудидан автомототранспорт воситаси товар сифатида четга чиқарилганда автомототранспорт воситасини ҳисобдан чиқариш қуйидаги ҳужжатларга асосан амалга оширилади;

автомототранспорт воситаси эгаси ёки унинг вакилининг белгиланган намунадаги аризаси;

автомототранспорт воситаси эгаси ёки унинг вакилининг шахсини тасдиқловчи ҳужжат;

расмийлаштирилган юк божхона декларацияси;

автомототранспорт воситасини рўйхатдан ўтказиш тўғрисида гувоҳнома.

Автомототранспорт воситаси унинг чет давлат ҳудудига чиқарилганлиги муносабати билан ҳисобдан чиқарилганда, олдинги РЎДРБ ДЙҲХХ органлари томонидан вақтинчалик (бир марталик қоғозли транзит) йўл ҳаракатида иштирок этиш учун рухсат этилган автомототранспорт воситалари учун РЎДРБга алмаштирилади, автомототранспорт воситасини рўйхатдан ўтказиш тўғрисидаги гувоҳнома билан бирга ҳисобдан чиқаришнинг сабаблари, белгиланган манзил ва ҳисобдан чиқариш санаси тўғрисидаги маълумотнома тақдим этилади.

Ўзбекистон Республикасига вақтинчалик олиб келинган халқаро автотранспорт воситаларини уларнинг Ўзбекистон Республикаси ҳудудидан чиқариб кетилиши муносабати билан ҳисобдан чиқарганда аризачиларга автомототранспорт воситасини ҳисобдан чиқарганлик тўғрисидаги белги билан автомототранспорт воситасини рўйхатдан ўтказиш тўғрисидаги гувоҳнома берилади, шунингдек чет давлатларнинг рўйхатдан ўтган автомототранспорт воситаларининг РЎДРБлари қайтариб берилади, улар мавжуд бўлмаганда — вақтинчалик (бир марталик қоғозли транзит) йўл ҳаракатида иштирок этиш учун рухсат этилган автомототранспорт воситалари учун РЎДРБлар берилади.

59. Автомототранспорт воситасининг рўйхатдан ўтказиш жойини ўзгартиришни талаб қилмайдиган ҳолатда автомототранспорт воситаси эгасининг яшаш (турган) жойи ёки жойлашган жойи (почта манзили) ўзгарганда автомототранспорт воситасини ҳисобдан чиқариш ЙҲХХ ва унинг ҳудудий бошқармалари томонидан автотранспорт воситасининг рўйхатдан ўтган янги жойи бўйича Рўйхатдан ўтган автомототранспорт воситаларининг ягона маълумотлар базасига тегишли маълумотларни киритган ҳолда амалга оширилади.

60. Яроқсиз автомототранспорт воситасини, шу жумладан, ишлаб чиқарилганига 50 йил ва ундан ортиқ бўлган транспорт воситаларини («антиквар» автомототранспорт воситалари бундан мустасно) ҳисобдан чиқариш қуйидаги ҳужжатлар асосида амалга оширилади:

автомототранспорт воситаси эгаси ёки унинг вакилининг белгиланган намунадаги аризаси;

автомототранспорт воситаси эгаси ёки унинг вакилининг шахсини тасдиқловчи ҳужжат;

автомототранспорт воситасини рўйхатдан ўтказиш тўғрисидаги гувоҳнома;

автомототранспорт воситасини яроқсиз деб топиш ва уни ҳисобдан чиқариш тўғрисидаги буйруқ (фақат юридик шахслар учун);

Яроқсиз автомототранспорт воситаси ҳисобдан чиқарилганда автомототранспорт воситасини рўйхатдан ўтказиш тўғрисидаги гувоҳнома ва ушбу автомототранспорт воситасининг РЎДРБи олиб қўйилади, мазкур Низомнинг 29 — 31-бандларида назарда тутилган РЎДРБни сақлаб қолиш ҳолатлари бундан мустасно.

61. Транспорт воситасини ҳисобдан чиқариш ёки уни ҳисобдан чиқаришни асосли рад этиш мурожаат этилган кунда амалга оширилади.

62. Транспорт воситаси қуйидаги ҳолатларда ҳисобдан чиқарилмайди:

мазкур Низомнинг 58 ёки 60-бандларида назарда тутилган ҳужжатлар тақдим этилмаганда;

автомототранспорт воситасига туширилган идентификация тамғасининг яширилиши, сохталаштирилиши, ўзгартирилиши, йўқ қилиниши аломатлари ёхуд тақдим этилган ҳужжатларнинг сохталаштирилиши, тақдим этилган ҳужжатларда ёки рўйхатга доир ҳужжатларда кўрсатиб ўтилган маълумотларга автомототранспорт воситаси ва рақам агрегатларининг номувофиқлиги аниқланганда;

автомототранспорт воситаси, рақам агрегатларининг қидирувда эканлиги ёки тақдим этилган ҳужжатларнинг йўқолганлиги (ўғирланганлиги) тўғрисида маълумотлар мавжуд бўлганда;

қонунчиликка мувофиқ автомототранспорт воситасининг тасарруф этилишига тақиқ ёки унинг хатлаб қўйилиши мавжуд бўлганда;

васийлик ва ҳомийлик органининг ёки белгиланган ёшга етмаган ёхуд муомалага лаёқатсиз автомототранспорт воситаси эгасининг қонуний вакилларининг рухсати бўлмаганда;

туман (шаҳар) Аҳоли бандлигига кўмаклашиш маркази томонидан илгари автомототранспорт воситаси учун берилган рухсат мавжуд бўлмаганда;

лизинг берувчининг розилиги мавжуд бўлмаганда — лизингга тақдим этилган автомототранспорт воситалари учун.

Автомототранспорт воситаси эгаси ёки унинг вакили автомототранспорт воситасини ҳисобдан чиқаришнинг рад этиш асосларини бартараф этган тақдирда, автомототранспорт воситасини ҳисобдан чиқариш тўғрисида ариза билан қайтадан мурожаат қилишга ҳақли.

63. Автомототранспорт воситаси ҳисобдан чиқарилганда автомототранспорт воситасининг рўйхатга олиш электрон картасига ҳисобдан чиқаришнинг сабаблари тўғрисидаги маълумотлар киритилади.

Ҳисобдан чиқарилиши лозим бўлган автомототранспорт воситасини рўйхатга олиш тўғрисидаги гувоҳнома ва (ёки) автомототранспорт воситасининг РЎДРБи йўқолганда, уларнинг ЙҲХХ ва унинг ҳудудий бошқармаларида мавжудлиги текширилгандан сўнг, автомототранспорт воситасининг рўйхатга олиш электрон картасига автомототранспорт воситасини рўйхатга олиш тўғрисидаги гувоҳнома ва (ёки) автомототранспорт воситасининг РЎДРБи йўқолганлиги тўғрисида тегишли ёзув киритилади. Бунда ҳисобдан чиқарилиши лозим бўлган автомототранспорт воситасини рўйхатга олиш тўғрисидаги гувоҳнома ва (ёки) автомототранспорт воситасининг РЎДРБи тўғрисидаги маълумотлар ҳам Ўзбекистон Республикаси Ички ишлар вазирлигининг Ахборот марказига юборилади.

Зарурат бўлганда, автомототранспорт воситасининг эгасига ўрнатилган тартибда автомототранспорт воситасининг рақам агрегатлари ҳисобдан чиқарилганлиги тўғрисидаги тегишли маълумотнома берилади.

64. ЙҲХДХ органларида рўйхатга олиш ҳаракатларини амалга ошириш учун асос бўладиган ҳужжатларнинг сақланиш муддати 3 йилни ташкил этади (Автомототранспорт воситаларини рўйхатга олиш, РЎДРБларни ҳамда автомототранспорт воситаси рўйхатдан ўтказилганлиги тўғрисидаги гувоҳномаларни тақсимлаш китобидан ташқари).

Автомототранспорт воситаларини рўйхатга олиш, РЎДРБларни ҳамда автомототранспорт воситаси рўйхатдан ўтказилганлиги тўғрисидаги гувоҳномаларни тақсимлаш китобининг сақланиш муддати 75 йилни ташкил этади.

65. РЎДРБ электрон журналга қайд этган ҳолда ҳудудий бошқармаларга юборилади.

66. Амалдаги харидоргирлигига қараб илгари ишлаб чиқилган партиялар орасидан, шу жумладан ишлаб чиқарилиши амалга оширилмаган қўшимча РЎДРБлар ишлаб чиқарилиши мумкин. РЎДРБнинг берилиши ўрнатилган тартибда ҳудудий бошқармалар томонидан белгиланган намунадаги махсус электрон журнални юритган ҳолда амалга оширилади.

67. РЎДРБлар белгиланган тартибда ЙҲХХ ва унинг ҳудудий бошқармалари томонидан уларнинг берилишига қадар қатъий навбат асосида ортиб борилган тартибда сақланади.

68. Мазкур Низом талаблари бузилишида айбдор бўлган шахслар қонунчиликка мувофиқ жавоб берадилар.

69. Иш юритиш Ўзбекистон Республикаси Ички ишлар вазирлиги томонидан тасдиқланган тартибда амалга оширилади.

1. Ушбу Низом жисмоний ва юридик шахсларга автомототранспорт воситалари учун исталган ҳарф ва рақамлар комбинациясига эга бўлган рўйхатдан ўтказиш давлат рақами белгиларини (кейинги ўринларда — РЎДРБ) ягона оширилган тўлов эвазига бериш тартибини белгилайди.

Исталган ҳарф ва рақамлар комбинациясига эга бўлган РЎДРБ бериладиган транспорт воситалари Ўзбекистон Республикаси Вазирлар Маҳкамаси томонидан белгиланган тартибда давлат рўйхатидан ўтказилади.

2. Исталган ҳарф ва рақамлар комбинациясига эга бўлган РЎДРБ жисмоний ва юридик шахслар томонидан ихтиёрий равишда фақат электрон тарзда танланади. Бунда:

Қорақалпоғистон Республикаси Ички ишлар вазирлиги, Тошкент шаҳар ва Тошкент вилояти ички ишлар бош бошқармалари ҳамда вилоятлар ички ишлар бошқармалари жамоат хавфсизлиги хизмати йўл ҳаракати хавфсизлиги бошқармаларининг рўйхатдан ўтказиш ва имтиҳон олиш бўлинмаларида (кейинги ўринларда — рўйхатдан ўтказиш бўлинмалари) жойлашган инфокиосклар;

Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг (кейинги ўринларда — ЙҲХХ) мобил иловаси;

ЙҲХХнинг расмий веб-сайти;

Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали мурожаат қилиниши мумкин.

3. Исталган ҳарф ва рақамлар комбинациясига эга бўлган РЎДРБ автоматлаштирилган ахборот тизими орқали танланади ва банд қилинади.

Ушбу автоматлаштирилган ахборот тизими инсон омилини тўлиқ истисно этган ҳолда фаолият кўрсатади ҳамда РЎДРБни танлашда субъектив аралашув ёки имтиёз бериш ҳолатлари юзага келишига йўл қўйилмайди.

Ҳар қандай давлат хизматчиси ёки бошқа шахс томонидан РЎДРБни тақсимлаш жараёнига аралашув қатъиян тақиқланади.

4. Исталган ҳарф ва рақамлар комбинациясига эга бўлган РЎДРБни танлаш учун ЙҲХХ томонидан автоматлаштирилган ахборот тизимида РЎДРБларнинг ягона очиқ маълумотлар базаси юритилади.

Очиқ маълумотлар базаси орқали фуқаролар учун РЎДРБни танлаш жараёнининг шаффофлиги ва холислиги таъминланади.

5. Исталган ҳарф ва рақамлар комбинациясига эга бўлган РЎДРБ учун ягона оширилган тўлов миқдори «Uzavtomotobelgi» давлат унитар корхонаси томонидан белгиланади.

6. «Uzavtomotobelgi» давлат унитар корхонаси аҳолининг талаб ва таклифидан келиб чиққан ҳолда автомототранспорт воситалари учун олтитагача ҳарф ва (ёки) рақамлар комбинациясидан иборат бўлган «ноёб» РЎДРБни очиқ кимошди электрон савдоларини ўтказиш орқали бериш ҳуқуқига эга.

Бунда «ноёб» РЎДРБ амалдаги РЎДРБни такрорламаслиги, қонунчиликка ва ахлоқий нормаларга хилоф маънога эга бўлмаслиги керак.

«Ноёб» РЎДРБни бериш бўйича очиқ кимошди электрон савдолари ўтказиш тартиби Ўзбекистон Республикаси Ички ишлар вазирлиги томонидан тасдиқланади.

7. Ушбу тартиб I, IE, III, IIIE, X, XI, XIE, XI¹, XIE¹, XI², XI³ типидаги РЎДРБга нисбатан қўлланади.

8. Автоматлаштирилган ахборот тизимида танланган рақам комбинацияси дастур томонидан банд қилинмагани текширилиб, буюртма берувчи номига ягона оширилган тўлов учун инвойс шакллантирилади. Тўловни амалга ошириш учун жисмоний шахсларга ҳар бири 20 дақиқагача вақтдан иборат бўлган иккита имконият, юридик шахсларга эса 72 соат вақт берилади. Ушбу вақт мобайнида комбинация бошқа шахслар томонидан танланмаслиги учун тизимда вақтинча захирага олинади.

9. Ариза берувчи танланган РЎДРБ комбинациясини олиш учун белгиланган тартибда ягона оширилган тўловни электрон шаклда тўлайди. Тўлов ЯИДХП ёки ЙҲХХнинг мобил иловаси ёхуд расмий веб-сайтининг интеграциялашган тўлов тизими орқали онлайн амалга оширилиши лозим.

Тўлов қабул қилингач, автоматлаштирилган тизим томонидан мазкур рақам комбинацияси учун ариза берувчи номига расмий банд қилинганлиги тасдиқланади ва РЎДРБ бериш жараёнини якунлаш учун махсус тасдиқнома (электрон шаклда) ариза берувчига тақдим этилади.

10. Ушбу Низомнинг 8-бандида назарда тутилган вақт мобайнида танланган РЎДРБ комбинация учун ягона оширилган тўлов амалга оширилмаган тақдирда, айнан шу буюртма берувчига айнан шу рақам комбинациясини такроран банд қилиш Автоматлаштирилган ахборот тизими томонидан олти ой муддатга блокланади, тўлов амалга оширилмаган танланган РЎДРБ комбинацияси 12 соат мобайнида очиқ маълумотлар базасига қайтарилади.

11. РЎДРБ белгиланган тартибда транспорт воситасига бириктириш учун берилади. Бунда транспорт воситасини давлат рўйхатидан ўтказиш ёки қайта рўйхатдан ўтказиш жараёнида танланган ва ягона оширилган тўлови тўланган РЎДРБ мазкур транспорт воситасига бириктирилади. ЙҲХХ ҳудудий бўлинмалари ариза берувчи томонидан тақдим этилган тасдиқнома асосида белгиланган тартибда РЎДРБни тайёрлаб беради.

12. Танланган ва ягона оширилган тўлов амалга оширилган РЎДРБ қуйидаги муддатларда ишлаб чиқарилади ва ариза берувчининг транспорт воситаси расмийлаштириладиган ЙҲХХ ҳудудий бўлинмаларига етказиб берилади:

I, IE, III, IIIE типидаги давлат рақами белгилари — 30 дақиқада;

X, XI, XIE, XI¹, XIE¹, XI², XI³ типидаги давлат рақами белгилари — 14 иш куни мобайнида.

Бу ҳақда ариза берувчига электрон хабар юборилади.

13. Ягона оширилган тўлов эвазига олинган РЎДРБни ариза берувчининг транспорт воситасига бириктириш ва расмийлаштириш қонунчиликда белгиланган умумий тартибда ЙҲХХ ҳудудий бўлинмалари томонидан амалга оширилади.

14. Исталган ҳарф ва рақамлар комбинациясига эга бўлган РЎДРБ транспорт воситаси эгасига муайян транспорт воситасига бириктириш учун берилади, лекин мазкур РЎДРБ транспорт воситаси эгасининг мулки ҳисобланмайди. РЎДРБ белгиланган тартибда фақат белгиланган транспорт воситасига тегишли ҳуқуқий мақсадларда фойдаланиш учун тақдим этилади.

15. Транспорт воситаси бошқа шахсга ўтказилганда (сотилганда) ёки белгиланган тартибда қайта рўйхатдан ўтказилганда, транспорт воситасининг аввалги эгаси исталган ҳарф ва рақамлар комбинациясига эга бўлган РЎДРБни ўзида сақлаб қолиш ҳуқуқига эга бўлади.