Иқтисодиёт тармоқларида нефть маҳсулотлари ва газдан оқилона ҳамда самарали фойдаланишни давлат томонидан назорат қилишнинг ягона тизимини такомиллаштириш, «Энергиядан оқилона фойдаланиш тўғрисида»ги Ўзбекистон Республикаси Қонунини ҳамда Ўзбекистон Республикаси Вазирлар Маҳкамасининг «Табиий газ етказиб бериш ва унинг учун ҳисоб-китоб қилиш тизимини такомиллаштириш тўғрисида» 1999 йил 21 сентябрдаги 439-сон қарорини бажариш мақсадида Вазирлар Маҳкамаси қарор қилади:

1. «Ўзнефтгазинспекция» негизида Ўзбекистон Республикаси Вазирлар Маҳкамаси ҳузуридаги Ўзбекистон нефть маҳсулотлари ва газдан, фойдаланишни назорат қилиш давлат инспекцияси («Ўдавнефтгазинспекция») ташкил этилсин, у «Ўзбекнефтгаз» миллий холдинг компанияси таркибидан чиқарилсин.

2. Қуйидагилар «Ўздавнефтгазинспекция»нинг асосий вазифалари этиб белгилансин:

иқтисодиёт тармоқларида нефть маҳсулотлари ва газдан самарали фойдаланиш масалаларини мунтазам ўрганишни ташкил этиш ва амалга ошириш;

иқтисодиёт тармоқларида нефть маҳсулотлари ва газнинг сифати ва миқдори жиҳатидан сақланиши норма ва қоидаларига, нефть-газ тармоғи объектларидан фойдаланиш чоғида белгиланган технологик жараёнларга ҳамда технологик асбоб-ускуналар ҳолатига риоя этилишини, шунингдек нефть-газ тармоқлари объектларини қуриш ва асбоб-ускуналарини ўрнатишда нефть-газ тармоғи объектларини барпо этувчи қурилиш-монтаж ташкилотлари томонидан норма ва қоидаларига риоя этилишини назорат қилиш;

нефть маҳсулотлари ва газдан оқилона фойдаланиш масалалари бўйича энергияни тежовчи тадбирлар, дастурлар ва лойиҳаларни ишлаб чиқишда ҳамда амалга оширишда қатнашиш.

3. «Ўдавнефтгазинспекция» тўғрисидаги Низом ва унинг ташкилий тузилмаси 1 ва 2-иловаларга мувофиқ тасдиқлансин.

«Ўздавнефтгазинспекция» тизими ходимларининг чекланган сони (хизмат кўрсатувчи ходимлардан ташқари) 164 киши, шу жумладан, унинг марказий аппарати ходимлари сони 32 киши этиб белгилансин.

4. Белгилансинки, «Ўздавнефтгазинспекция» фаолиятини маблағ билан таъминлаш:

«Ўзтрансгаз» акциядорлик компанияси, «Ўзнефтмаҳсулот» акциядорлик компаниясининг вилоят бўлинмалари, «Ўзбекнефтгаз» миллий холдинг компаниясининг «Ўзгеобурғунефтгазқазибчиқариш» акциядорлик компанияси «Шўртаннефтгаз» нефть-газ ишлаб чиқариш бошқармаси ва Муборак газни қайта ишлаш заводининг нефть маҳсулотлари ва газ сотиш бўйича даромадларидан 0,1 фоизгача миқдордаги мажбурий ажратмалари;

нефть маҳсулотлари ва газдан фойдаланиш қоидаларини бузганлик учун Ўзбекистон Республикаси Вазирлар Маҳкамасининг 1994 йил 9 мартдаги 124-сон қарори билан белгиланган тартибга мувофиқ иқтисодий жазоларни қўллашдан тушадиган маблағларнинг бир қисми ҳисобига амалга оширилади.

«Ўдавнефтгазинспекция» таъминотининг харажатлар сметаси белгиланган тартибда ҳар йили Ўзбекистон Республикаси Молия вазирлиги билан келишилган ҳолда тасдиқланади.

5. Белгилаб қўйилсинки:

«Ўздавнефтгазинспекция» бошлиғи ва унинг ўринбосарлари лавозимга Ўзбекистон Республикаси Вазирлар Маҳкамаси томонида тайинланадилар;

«Ўдавнефтгазинспекция» ҳудудий бўлинмалари бошлиқлари лавозимга инспекция бошлиғи томонидан Ўзбекистон Республикаси Вазирлар Маҳкамаси билан келишилган ҳолда тайинланадилар.

«Ўдавнефтгазинспекция» бошлиғи мақоми ҳамда моддий, ижтимоий-маиший ва транспорт хизмати кўрсатиш шароитлари бўйича вазирнинг биринчи ўринбосарига, бошлиқ ўринбосарлари вазир ўринбосарларига тенглаштирилсин.

6. «Ўзтрансгаз» акциядорлик компанияси «Ўзнефтмаҳсулот» акциядорлик компаниясининг вилоят бўлинмалари, «Ўзбекнефтгаз» миллий холдинг компаниясининг «Ўзгеонефтгазқазибчиқариш» акциядорлик компанияси «Шўртаннефтгаз» нефть-газ ишлаб чиқариш бошқармаси ва Муборак нефтни қайта ишлаш заводи «Ўдавнефтгазинспекция» таъминотига маблағ ажратишни назарда тутсинлар, ушбу маблағларни Ўзбекистон Республикаси Вазирлар Маҳкамасининг 1999 йил 5 февралдаги 54-сон қарори билан тасдиқланган «Маҳсулот (ишлар, хизматлар)ни ишлаб чиқариш ва сотиш харажатларининг таркиби ҳамда молиявий натижаларини шакллантириш тартиби тўғрисида Низом»нинг 1.1.4-бандига мувофиқ ишлаб чиқариш билан боғлиқ моддий харажатларга киритсинлар.

7. «Ўзбекнефтгаз» миллий холдинг компанияси «Ўзнефтгазинспекция» балансидаги мавжуд асбоб-ускуналар, инвентарлар ва транспорт воситаларини «Ўздавнефтгазинспекция»га текин берсин.

8. Ўзбекистон почта ва телекоммуникациялар агентлиги бир ой муддатда «Ўдавнефтгазинспекция» Марказий аппаратини зарур алоқа воситалари, шу жумладан ҳукумат алоқаси билан таъминласин.

9. Қорақалпоғистон Республикаси Вазирлар Кенгаши, Вилоятлар ва Тошкент шаҳар ҳокимликлари бир ой муддатда «Ўздавнефтгазинспекция»нинг Марказий аппарати ва ҳудудий бўлинмалари учун бинолар ажратсинлар.

10. Ўзбекистон Республикаси Вазирлар Маҳкамаси қарорларига 3-иловага мувофиқ ўзгартириш ва қўшимчалар киритилсин.

11. Ўзбекистон Республикаси Адлия вазирлиги, тегишли вазирликлар ва идоралар бир ой муддатда амалдаги меъёрий ҳужжатларни ушбу қарорга мувофиқлаштирсинлар.

12. Мазкур қарорнинг бажарилишини назорат қилиш Бош вазир ўринбосари В.Й. Атаев зиммасига юклансин.

1. Ўзбекистон нефть маҳсулотлари ва газдан фойдаланишни назорат қилиш давлат инспекцияси (кейинги ўринларда «Ўдавнефтгазинспекция» деб аталади) нефть маҳсулотлари ва газдан оқилона ва самарали фойдаланилиши, вазирликлар, давлат қўмиталари, идоралар, бирлашмаларда, идоравий бўйсуниши ва мулкчилик шаклларидан қатьий назар, Ўзбекистон Республикаси ҳудудида жойлашган корхоналар ва ташкилотларда (кейинги ўринларда назоратдаги объектлар деб аталади) нефть маҳсулотларининг сифат ва миқдор жиҳатидан сақланишини таъминлаш, нефть, нефть маҳсулотлари, табиий, сиқилган ва суюлтирилган газ қазиб олиш, уларни қайта ишлаш, транспортда ташиш, сақлаш ва сотиш бўйича нефть-газ тармоғи объектлари қуриш ва улардан фойдаланишда белгиланган технология жараёнларига риоя қилиниши устидан давлат назоратини амалга оширувчи орган ҳисобланади.

2. «Ўдавнефтгазинспекция» ўз фаолиятида Ўзбекистон Республикаси Конституциясига, Ўзбекистон Республикаси қонунларига, Ўзбекистон Республикаси Олий Мажлисининг қарорлари ва бошқа ҳужжатларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, мазкур Низомга ҳамда Ўзбекистон Республикасининг бошқа қонун ҳужжатларига, Ўзбекистон Республикасининг халқаро шартномаларига амал қилади.

3. «Ўздавнефтгазинспекция»нинг тузилмаси ва ходимлари сони Ўзбекистон Республикаси Вазирлар Маҳкамаси томонидан тасдиқланади.

Штат жадвали «Ўдавнефтгазинспекция» бошлиғи томонидан тасдиқланади.

4. «Ўдавнефтгазинспекция» юридик шахс ҳисобланади, банк муассасаларида ҳисоб-китоб ва бошқа ҳисоб рақамларига, Ўзбекистон Республикаси Давлат герби тасвири туширилган ва ўз номи ёзилган думалоқ муҳрга эга бўлади.

5. Қуйидагилар «Ўздавнефтгазинспекция»нинг асосий вазифалари ҳисобланади:

иқтисодиёт тармоқларида нефть маҳсулотлари ва газдан самарали фойдаланиш масалаларини мунтазам ўрганишни ташкил этиш ва амалга ошириш;

нефть маҳсулотлари ва газдан оқилона фойдаланиш масалалари бўйича энергияни тежовчи тадбирлар, дастурлар ва лойиҳаларни ишлаб чиқишда ҳамда амалга оширишда қатнашиш;

назоратдаги объектларда нефть маҳсулотлари ва газдан оқилона ва самарали фойдаланилиши;

нефть омборлари ва автомобиль ёнилғиси қуйиш шохобчаларига эга бўлган корхоналар ва ташкилотларда нефть маҳсулотларининг сифат ва миқдор жиҳатидан сақланиши;

нефть, нефть маҳсулотлари, табиий, сиқилган ва суюлтирилган газ қазиб олиш, уларни қайта ишлаш, транспортда ташиш, сақлаш ва сотиш бўйича нефть-газ тармоғи объектларидан фойдаланишда белгиланган технология жараёнларига риоя қилиниши ва технология асбоб-ускуналарининг ҳолати;

нефть-газ тармоғи объектларини қурувчи қурилиш-монтаж ташкилотлари томонидан белгиланган технология жараёнлари таъминланиши юзасидан нормалар ва қоидалар талабларига риоя қилиниши;

республика вазирликлари, идоралари, бирлашмалари, корхоналарида, нефть маҳсулотлари билан таъминлаш тизимида нефть маҳсулотлари қабул қилиниши, сақланиши, транспортда ташилиши, ҳисоби ва ҳисоботини тартибга солувчи амалдаги қоидалар ва йўриқномалар талабларига риоя этиш устидан идоравий назорат ташкил этилиши ва амалга оширилиши;

нефть маҳсулотлари билан таъминлаш корхоналари, автомобиль ёнилғиси қуйиш шохобчалари, автомобилларга суюлтирилган газ қуйиш шохобчалари, автомобилларга компрессор воситасида газ тўлдириш шохобчалари ҳамда нефть маҳсулотлари ва газ истеъмолчилари томонидан нефть маҳсулотлари ва газ билан таъминлаш ҳамда улардан фойдаланиш ишларини тартибга солувчи қонун ҳужжатлари, қоидалар, йўриқномалар, давлат стандартлари ва бошқа меъёрий ҳужжатлар талабларига амал қилинишини таъминлаш;

газ узатиш ташкилотлар, ҳудудий газ таъминоти корхоналари ва газ истеъмолчилари (аҳолидан ташқари) томонидан газ билан таъминлаш ва ундан фойдаланиш ишларини тартибга солувчи қонун ҳужжатлари, қоидалар, йўриқномалар, давлат стандартлари ва бошқа меъёрий ҳужжатлар талабларига риоя қилиниши;

ёқилғи истеъмол қилувчи назоратдаги объектларни қуриш, реконструкция қилиш ва техника билан қайта жиҳозлаш лойиҳаларининг газдан оқилона ва самарали фойдаланиш талабларига мувофиқлиги;

назоратдаги объектларда ёқилғи истеъмол қилувчи қурилмаларда режим-созлаш ишларининг сифатли бажарилиши устидан давлат назоратини амалга ошириш.

6. «Ўздавнефтгазинспекция» ўзига юкланган вазифаларга мувофиқ қуйидаги функцияларни бажаради:

газдан белгиланган мақсаддан ташқари фойдаланилишига йўл қўймаслик ҳамда мулкчилик шаклларидан қатъи назар, газ истеъмолчилари (аҳолидан ташқари) ўзбошимчалик билан ўрнатиб олган газдан фойдаланиш қурилмаларини аниқлаш юзасидан газ узатиш ташкилотлари, ҳудудий газ таъминоти корхоналари газ ташиш ташкилотлари ишларини белгиланган тартибда текширади;

манфаатдор вазирликлар, идоралар ва бошқа органлар билан биргаликда истеъмолчиларнинг нефть маҳсулотлари, табиий ва суюлтирилган газдан фойдаланиши қоидалари, газ истеъмол қилувчи қурилмалар, нефть-газ технологик объектлари, автомобиль ёнилғиси қуйиш шохобчалари, автомобилларга компрессор воситасида газ тўлдириш шохобчалари, автомобилларга газ қуйиш шохобчаларини лойиҳалаштириш, қуриш, улардан фойдаланиш ва уларни созлаш масалалари бўйича нормалар ва қоидалар ишлаб чиқилишида қатнашади;

газдан самарали фойдаланилиши юзасидан лойиҳалаштиришга техник шартларни беради;

ёқилғи истеъмол қилувчи корхоналар (қурилмалар), нефть-газ технология объектлари, автомобиль ёнилғиси қуйиш шохобчалари, автомобилларга компрессор воситасида газ тўлдириш шохобчалари ва автомобилларга газ қуйиш шохобчаларини қуриш, реконструкция қилиш, техника билан қайта жиҳозлаш ва газ таъминоти лойиҳаларини рўйхатдан ўтказади;

мулкчилик шаклларидан қатъи назар, корхоналар ва ташкилотларга газдан фойдаланувчи асбоб-ускуналарда ишга тушириш ва режим-созлаш ишларини амалга ошириш ҳуқуқини берувчи рухсатнома беради;

газ узатиш ташкилоти ва ҳудудий газ таъминоти корхоналари газ сарфини ҳисобга олиш приборларига эга бўлмаган газ истеъмолчиларини (аҳолидан ташқари) газ тармоқларидан ўз вақтида узиб қўйиш бўйича ишларини текширади;

ёниш жараёнларини автоматик равишда тартибга солиш воситалари ва иссиқлик-техника назорати приборлари, шунингдек газдан самарали фойдаланишни таъминловчи иссиқдан қайта фойдаланиш асбоб-ускуналари мавжудлигини, созлигини ва улардан фойдаланишни текширади,

ёқилғидан фойдаланувчи корхоналар (қурилмалар)нинг ёқилғининг улар учун белгиланган захира турларида ишлашга ҳозирлаб қўйилганлигини текширади;

газ узатиш ташкилоти, ҳудудий газ таъминоти корхоналари томонидан ишлаб чиқилган саноат корхоналарини ва электр станцияларни куз-қиш даврида ёқилғининг захира турларидан фойдаланишга ўтказиш жадвалини келишиб олади;

вазирликлар, идоралар, ташкилотлар ва корхоналар билан биргаликда нефть маҳсулотлари сифати бузилиши ва сифатсиз нефть маҳсулотлари сотилишининг олдини олиш юзасидан профилактик чоралар кўради;

«Ўздавнефтгазинспекция»нинг ёзма кўрсатмалари бўйича нефть маҳсулотларини қабул қилиш тўхтатиб қўйилган автоёнилғи қуйиш шохобчаларида, нефть базаларида нефть маҳсулотлари жўнатилиши (қабул қилиниши)ни қайтадан бошлаш мақсадида, такрорий назорат текширувларини ўтказади;

қурилиш, қурилиш-монтаж ташкилотларига ва бўлинмаларига, уларнинг қайси идораларга қарашлиликларидан қатьий назар, нефть-газ тармоғи технологик объектлари қурилишини бошлаш учун ҳамда буюртмачиларга қурилиш устидан техник назоратни амалга ошириш ҳуқуқини берувчи рухсатнома беради;

қурилиш, реконструкция қилиш, мукаммал тузатиш тугалланганда ёқилғидан фойдаланувчи корхоналар (қурилмалар)га ва нефть-газ технологик объектларига асбоб-ускуналарни комплекс синаб қуриш, режим-созлаш ишлари ва табиий газ восита сифатида қўлланганда газ қувурларини тозалаш ишлари учун газ узатишга рухсатнома беради;

қурилиши тугалланган нефть-газ технологик объектлари, нефть базалари, автоёнилғи қуйиш шохобчалари, автомобилларга компрессор воситасида газ тўлдириш шохобчалари ва автомобилларга газ тўлдириш шохобчаларини техник кўрикдан ўтказади ва уларни фойдаланишга қабул қилиш комиссиялари ишида иштирок этади;

автоёнилғи қуйиш шохобчаларига, автомобилларга компрессор воситасида газ тўлдириш шохобчаларига ва автомобилларга газ тўлдириш шохобчаларига лицензиялар берувчи ишчи гуруҳлар ишида иштирок этади;

нефть-газ тармоғи технологик объектларининг ишдан чиқиш сабабларини текшириш комиссияларининг ишида, кўрсатиб ўтилган объектлар ишдан чиқишининг олдини олиш ва уларнинг ишончлилигини ошириш тадбирларини ишлаб чиқишда қатнашади;

ёқилғидан фойдаланувчи корхоналар (қурилмалар)ни ва нефть-газ технологик объектларини лойиҳалаш, қуриш, созлаш ва фойдаланишга топширишни амалга оширувчи назоратдаги объектлар муҳандис-техник ходимларининг меъёрлар ва қоидаларга доир билимларини текширувчи комиссиялар ишида қатнашади;

етказиб берилаётган табиий газ сифатининг амалдаги стандартларга ва техник шартларга мувофиқлигини текширувдан ўтказади.

7. «Ўдавнефтгазинспекция» қуйидаги ҳуқуқларга эга:

назоратдаги объектларда ўз ваколати доирасида, қонун ҳужжатларида белгиланган тартибда, нефть маҳсулотлари, газдан оқилона ва самарали фойдаланилишини ва нефть-газ тармоғи объектларида белгиланган технология жараёнларига риоя қилинишини ҳеч қандай тўсиқларсиз текшириш. Зарур ҳолларда кўрсатиб ўтилган текширувларга тегишли вазирликлар, идоралар, корхоналар, муассасалар ва ташкилотларнинг мутахассисларини жалб этиш;

назоратдаги объектлар бўйича аниқланган бузилишлар ва камчиликлар бўйича, нефть-газ объектларини лойиҳалаш, қуриш, фойдаланишга топширишда ҳамда нефть маҳсулотлари ва газдан фойдаланишда меъёрлар ва қоидаларга риоя қилиниши масалалари юзасидан бажарилиши мажбурий бўлган ёзма кўрсатмалар бериш;

сифати бузилганлигини аниқлаш мақсадида турғун ва кўчма лабораторияларда нефть маҳсулотлари намуналарини мустақил равишда текширувдан ўтказиш ва тегишли хулосалар бериш;

нефть маҳсулотларини қабул қилиш, сақлаш, бериш, ҳисобга олиш, нефть омборхонаси ускуналарининг техник ва метрологик ҳолати қоидаларини қўпол равишда бузиш ҳоллари аниқланганда нефть маҳсулотларини сақлаш ва бериш объектларини ёпиш ва муҳрлаб қўйиш;

автоёнилғи қуйиш шохобчалари, автомобилларга компрессор воситасида газ тўлдириш шохобчалари ва автомобилларга газ тўлдириш шохобчалари орқали нефть маҳсулотлари ва газ билан савдо қилиш ҳуқуқини берувчи лицензияларни олиб қўйиш тўғрисида белгиланган тартибда таклифлар киритиш;

мулкчилик шаклларидан қатъи назар, корхоналар ва ташкилотларга берилган ишга тушириш ва режим-созлаш ишларини олиб бориш ҳуқуқини берувчи рухсатномаларнинг амал қилишини тўхтатиб қўйиш;

технологик объектлар қурилишини ва улардан фойдаланишни, уларни лойиҳалаш, қуриш ва улардан фойдаланишнинг амалдаги нормалари ва қоидалари бузилган ҳолларда ва бу бузилишлар уларнинг ишончлилиги пасайишига олиб келса, шунингдек қурилиш буюртмачининг малакали техника назорати билан ва муаллифлик назорати билан таъминламаганда, тўхтатиб қўйиш;

назоратдаги объектларда, меъёрий-техник ҳужжатларнинг ушбу объектларнинг ишончлилигини ва нефть ҳамда газдан фойдаланишнинг самарадорлигини таъминлаш бўйича тегишли талабларига мос келмайдиган аппаратуралар, асбоб-ускуналар, материаллар ва буюмларни, шунингдек технологияларни қўллашни тақиқлаш. Уларни ишлаб чиқаришдан олиб ташлаш тўғрисида тегишли органларга таклифлар киритиш;

технологик объектларни лойиҳалаш, қуриш ва фойдаланишнинг амалдаги нормалари ва қоидаларидан асосли четга чиқишларни, агар ушбу ўзгартиришлар мазкур объектлардан фойдаланишнинг ишончлилигини пасайтиришга олиб келмаса, розилик бериш;

ўз ваколати доирасида корхоналар ва ташкилотларда нефть маҳсулотлари ва газ сарфини ҳисобга олишнинг ҳолатини текшириш;

газ узатиш ташкилотига, ҳудудий газ таъминоти корхоналарига ва истеъмолчиларга (аҳолидан ташқари) газдан фойдаланувчи қурилмаларда газ беришни тўхтатиш ва қуйидаги ҳолларда:

а) «Ўздавнефтгазинспекция»нинг рухсатисиз газ берилганда;

б) газ ажратилган лимитлар (шартномавий ҳажмлар)дан ортиқ сарфланганда ва газдан фойдаланишнинг белгиланган режимига риоя қилинмаганда;

в) газ сарфини ҳисобга олиш приборлари бўлмаган газдан фойдаланиш қурилмаларидан фойдаланилганда ёхуд газдан фойдаланувчи қурилмаларда лойиҳада назарда тутилган газ ёниши жараёнларини автоматик бошқариш воситалари ёки иссиқлик-техника назорати ёки газдан самарали фойдаланишни таъминловчи иссиқликдан қайта фойдаланиш асбоб-ускуналари бўлмаганда (бузилганда);

г) газдан фойдаланиш қурилмаларини ишга тушириш ва режим-созлаш ишларини ўтказиш муддатлари барбод бўлганда;

д) захира ёқилғи хўжалиги ишга ёки газдан фойдаланиш асбоб-ускунаси ёқилғининг захира турида ишлашга тайёрлаб қўйилмаганда уларни газ тармоқларидан узиб қўйиш тўғрисида бажарилиши мажбурий бўлган ёзма кўрсатмалар бериш;

ёқилғи-энергетика ресурсларидан фойдаланишда бузилишлар учун юридик шахсларга нисбатан, уларнинг қайси идорага қарашлилиги ва мулкчилик шаклларидан қатьий назар, Ўзбекистон Республикаси қонун ҳужжатлари билан берилган ўз ваколатлари доирасида, иқтисодий санкциялар қўллаш;

«Ўздавнефтгазинспекция» ваколатига қирувчи масалалар бўйича назоратдаги объектлар раҳбарларининг ахборотларини, ҳисоботларини ва хабарларини тинглаш;

истеъмолчиларда (аҳолидан ташқари) ностандарт, маънавий эскирган ва газдан тежамсиз фойдаланувчи асбоб-ускуналар мавжудлиги аниқланганда уларнинг (хатлов натижаларига кўра) алмаштирилишидан кутиладиган газнинг тежалиш миқдорида лимитларни қисқартириш ёки сотиш баҳосини ошириш тўғрисида тегишли идораларга таклифлар тайёрлаш;

«Ўздавнефтгазинспекция» ваколатларига тааллуқли масалалар бўйича ҳокимликлар, вазирликлар, идоралар, ташкилотларга ва корхоналарга сўровномалар билан мурожаат қилиш ва улардан зарур бўлган маълумотлар ва материалларни олиш;

нефть маҳсулотлари ва газдан оқилона фойдаланиш масалаларида корхоналарга ва ташкилотларга услубий ва амалий ёрдам, хизматлар кўрсатиш;

зарурият бўлганда, текширилаётган корхоналарнинг молия-хўжалик фаолиятини тафтиш қилиш тўғрисида қонун ҳужжатларида белгиланган тартибда таклифлар киритиш;

газ узатиш ташкилоти ва ҳудудий газ таъминоти корхоналари томонидан тегишли шакллар бўйича тузиладиган статистика ҳисоботларини ўз ваколати доирасида текшириш.

8. «Ўдавнефтгазинспекция» ўз ваколати доирасида барча назоратдаги объектлар томонидан бажарилиши мажбурий бўлган меъёрий ҳужжатлар қабул қилишга ҳақлидир.

9. Газ, нефть маҳсулотлари беришни тўхтатиш тўғрисидаги қарор, унинг қабул қилиниши учун асос бўлган бузилишларни бартараф этилгунга қадар амалда бўлади. Ушбу қурилмаларга газ бериш, нефть маҳсулотларини жўнатиш ёки уларда ишларни давом эттириш «Ўздавнефтгазинспекция» рухсати билан қайта тикланади.

10. «Ўздавнефтгазинспекция» Ўзбекистон Республикаси Вазирлар Маҳкамасига бўйсунади.

11. «Ўздавнефтгазинспекция» бошлиғи ва унинг ўринбосарлари лавозимга Ўзбекистон Республикаси Вазирлар Маҳкамаси томонидан тайинланадилар.

«Ўздавнефтгазинспекция» ҳудудий бўлинмалари бошлиқлари лавозимга инспекция бошлиғи томонидан Ўзбекистон Республикаси Вазирлар Маҳкамаси билан келишилган ҳолда тайинланади.

12. «Ўздавнефтгазинспекция» бошлиғи:

«Ўздавнефтгазинспекция»га юкланган вазифалар ва функцияларнинг бажарилиши учун шахсан жавоб беради, бошлиқ ўринбосарлари ўртасида вазифаларни тақсимлайди, таркибий бўлинмалар ходимларининг масъулият даражасини белгилайди;

зарурият бўлганда Ўзбекистон Республикасининг тегишли вазирликлари, идоралари билан биргаликда буйруқлар чиқаради.

13. «Ўздавнефтгазинспекция» бошлиғи лавозимига кўра айни бир вақтда Нефть маҳсулотлари ва газдан фойдаланишни назорат қилиш Бош давлат инспектори, унинг ўринбосарлари эса Бош давлат инспектори ўринбосарлари ҳисобланади. Бош технологлар, бўлимлар бошлиқлари ва бош мутахассислар катта давлат инспекторлари ҳисобланадилар. Муҳандислар давлат инспекторлари ҳисобланадилар.

14. «Ўздавнефтгазинспекция» ёқилғи-энергетика ресурсларидан фойдаланишда бузилишлар учун, амалдаги қонун ҳужжатларига мувофиқ иқтисодий жазолар қўллашдан тушадиган маблағларнинг бир қисмидан моддий-техника базасини ривожлантириш учун фойдаланади.

15. «Ўздавнефтгазинспекция» мансабдор шахсларининг хатти-ҳаракатлари устидан судга, юқори мансабдор шахсга ёки мансабдор шахснинг ўзига қонун ҳужжатларида белгиланган тартибда шикоят қилиниши мумкин. Барча ҳолларда шикоят қилиниши шикоят қилинаётган қарорнинг бажарилишини тўхтатиб қўймайди, қонун ҳужжатларида назарда тутилган ҳоллар бундан мустасно. «Ўздавнефтгазинспекция» мансабдор шахслари ўтказилган текширишлар натижаларининг ҳаққонийлиги учун жавоб берадилар.

16. «Ўздавнефтгазинспекция» мансабдор шахслари белгиланган намунадаги гувоҳномага эга бўладилар.

17. «Ўздавнефтгазинспекция» фаолияти амалдаги қонун ҳужжатларига мувофиқ тўхтатилади.

Ҳаммаси: 164 киши, шу жумладан, марказий аппарат — 32 киши

Изоҳ: НКЛ — нефть маҳсулотлари бўйича назорат-кимё лабораторияси

1. Ўзбекистон Республикаси Вазирлар Маҳкамасининг 1994 йил 9 мартдаги 124-сон қарори (Ўзбекистон Республикаси ҲҚT, 1994 й., 3-сон, 15-модда) билан тасдиқланган «Ёқилғи-энергетика ресурсларидан фойдаланиш қоидаларини бузганлик учун иқтисодий жазоларни қўллаш тўғрисида Низом»да

Низом матнидаги «Ўзбекнефтгаз» миллий корпорациясининг «Ўзнефтгазинспекция»сига берилган кўрсатмалар «Ўздавнефтгазинспекция»га кўрсатмалар билан алмаштирилсин;

III бўлимда:

3-банддаги «Ўзбекнефтгаз» миллий корпорациясига» сўзлари «Ўзбекистон Республикаси Вазирлар Маҳкамасига» сўзлари билан алмаштирилсин;

5-банддаги «сўзсиз» сўзи «акцептсиз» сўзи билан алмаштирилсин.

2. Ўзбекистон Республикаси Вазирлар Маҳкамасининг 1998 йил 15 декабрдаги 523-сон қарори билан тасдиқланган мазкур қарорга 11-иловадаги «Акцияларининг назорат ва давлат пакетлари, мол-мулки «Ўзбекнефтгаз» миллий холдинг компанияси устав фондига бериладиган акциядорлик компаниялари, корхоналар ва ташкилотлар рўйхати»дан ҳамда 12-иловадаги «Ўзбекнефтгаз» миллий холдинг компанияси тузилмаси»дан «Ўзнефтгазинспекция» Ўзбекистон нефть маҳсулотлари ва газдан фойдаланишни назорат қилиш давлат инспекцияси» ҳамда «Ўзнефтгазинспекция» сўзлари чиқариб ташлансин.