Ўзбекистон Республикасида автомототранспорт воситалари ва шаҳар электр транспорти воситалари ҳайдовчиларини тайёрлаш ва қайта тайёрлаш тизимида таълим жараёнини янада такомиллаштириш ва ўқитишнинг замонавий усулларини жорий этиш мақсадида Вазирлар Маҳкамаси қарор қилади:

1. «Avtotest Report» масъулияти чекланган жамият (кейинги ўринларда «Avtotest Report» МЧЖ деб аталади) томонидан:

автомототранспорт воситалари ҳайдовчиларини тайёрлаш ва қайта тайёрлаш бўйича «Avtotest» ва «Avtotest 2.0» маҳаллий электрон ўқув қўлланмалари ишлаб чиқилганлиги;

автомототранспорт воситалари ҳайдовчиларини тайёрлаш ва қайта тайёрлаш бўйича таълим муассасалари ўқитувчилари учун ихтисослаштирилган ўқув қўлланмаси яратилганлиги маълумот қабул қилинсин.

2. Ўзбекистон Республикаси Ички ишлар вазирлигининг:

«Avtotest Report» МЧЖга ва устав фондида улушларнинг (акцияларнинг) камида 51 фоизи «Avtotest Report» МЧЖга тегишли бўлган ташкилотларга Ўзбекистон Республикасида автомототранспорт воситалари ва шаҳар электр транспорти воситалари ҳайдовчиларини тайёрлаш ва қайта тайёрлаш бўйича фаолиятни амалга ошириш ҳуқуқини шунингдек Ўзбекистон Республикасида юридик шахсларга тегишли автотранспорт воситаларини бошқарадиган шахслар (ҳайдовчилар) малакасини ошириш фаолиятини юритиш бўйича алоҳида ҳуқуқни бериш;

республиканинг барча минтақаларида «Avtotest Report» МЧЖнинг автомототранспорт воситалари ва шаҳар электр транспорти воситалари ҳайдовчиларини тайёрлаш ва қайта тайёрлаш бўйича замонавий ахборот-коммуникация технологиялари, илғор ўқув воситалари, тренажерлар ва ўқув аэродроми билан жиҳозланган замонавий ўқув-методик комплексларини (кейинги ўринларда ўқув комплекслари деб аталади) ташкил этиш тўғрисидаги таклифига розилик берилсин.

«Avtotest Report» МЧЖ ўқув комплексларини қуриш ва жиҳозлаш учун ўз маблағлари ҳисобидан камида 4 млрд сўм инвестиция қўйиш мажбуриятини олганлиги қайд этилсин.

3. Қорақалпоғистон Республикаси Вазирлар Кенгаши ва вилоятлар ҳокимликлари «Avtotest Report» МЧЖнинг мурожаатига кўра вилоят марказларига туташ туманларда ўқув комплекслари қуриш учун камида 3 га ер участкалари бепул фойдаланиш учун берилишини бир ой муддатда таъминласинлар.

Тошкент шаҳри ҳокимлиги ўқув комплекси қуриш учун Вазирлар Маҳкамасининг «Зарар кўриб ишловчи, иқтисодий ночор ва паст рентабелли ташкилотларнинг фойдаланилмаётган ҳудудларини ва ортиқча ишлаб чиқариш майдонларини янада мақбуллаштириш чора-тадбирлари тўғрисида» 2014 йил 15 июлдаги 192-сон қарорига мувофиқ берилаётган ер захираси ҳисобига «САР» авиакомпанияси аэродромининг шарқий қисмида, Сергели тумани, «Баҳор» маҳалласи манзилида жойлашган умумий майдони 3 га ер участкасини ўқув комплекси қуриш учун «Avtotest Report» МЧЖга бепул фойдаланиш учун берилишини таъминласин.

4. Вазирлар Маҳкамасининг «Вазирлар Маҳкамасининг «Ўзбекистон Республикасида автомототранспорт воситаларини бошқариш ҳуқуқини бериш, ҳайдовчиларни тайёрлаш ва қайта тайёрлаш тартибини такомиллаштириш чора-тадбирлари тўғрисида» 2006 йил 2 августдаги 156-сон қарорига ўзгартириш ва қўшимчалар киритиш ҳақида» (Ўзбекистон Республикаси Президентининг 2010 йил 19 августдаги ПҚ-1392-сон қарори)» 2010 йил 31 декабрдаги 325-сон қарорининг 2-банди (Ўзбекистон Республикаси ҚТ, 2010 й., 12-сон, 76-модда) қуйидаги таҳрирда баён қилинсин:

«2. Белгилаб қўйилсинки, автомототранспорт воситалари ва шаҳар электр транспорти воситалари ҳайдовчиларини тайёрлаш ва қайта тайёрлаш давлат таълим муассасалари, шунингдек Мудофаага кўмаклашувчи «Ватанпарвар» ташкилоти, «Тошшаҳартрансхизмат» акциядорлик компанияси, «Transkasb» уюшмаси ва Ўзбекистон Республикаси Автомотоҳаваскорлар кўнгилли жамияти, «Avtotest Report» МЧЖ ва устав фондида улушларнинг (акцияларнинг) камида 51 фоизи «Avtotest Report» МЧЖга тегишли бўлган ташкилотлар томонидан амалга оширилади».

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.И. Икрамов ва Ўзбекистон Республикаси Ички ишлар вазири А.А. Ахмедбаев зиммасига юклансин.