Халқаро ташкилотларга Ўзбекистон Республикаси бадалларини тўлашни тартибга солиш мақсадида Вазирлар Маҳкамаси қарор қилади:

1. Халқаро ташкилотларга Ўзбекистон Республикаси бадалларини тўлаш тартиби тўғрисидаги низом иловага мувофиқ тасдиқлансин.

2. Ўзбекистон Республикаси Молия вазирлиги Ташқи ишлар вазирлиги ҳамда бошқа манфаатдор вазирликлар ва идоралар билан биргаликда халқаро шартномаларни ва уларга мувофиқ Ўзбекистон Республикаси халқаро ташкилотлар аъзоси ҳисобланадиган бошқа ҳужжатларни бир ой муддатда хатловдан ўтказсин.

3. Ўзбекистон Республикаси вазирликлари, давлат қўмиталари, идоралари, уюшмалари, компаниялари, концернлари Ўзбекистон Республикаси Молия вазирлиги ва Ташқи ишлар вазирлиги билан биргаликда бир ҳафта муддатда халқаро ташкилотларга аъзолик бадалларининг тўланишини солиштириб чиқсинлар ҳамда 2000 йилда уларни тўлашнинг мақсадга мувофиқлигини асосласинлар ва ҳисоб-китобларни тайёрласинлар.

Ўзбекистон Республикаси Молия вазирлиги Ташқи ишлар вазирлиги билан биргаликда 2000 йилда йил чораклари бўйича халқаро ташкилотларга тўловлар ҳажми ва манбалари юзасидан умумлаштирилган рўйхатни 2000 йил 15 январгача Вазирлар Маҳкамасига киритсинлар.

4. Асослашлар ва ҳисоб-китоблар ўз вақтида тақдим этилиши юзасидан шахсий масъулият вазирликлар, давлат қўмиталари, идоралар, концернлар, уюшмалар ва компаниялар раҳбарлари зиммасига юклансин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.С. Ҳамидов зиммасига юклансин.

1. Халқаро ташкилотларга Ўзбекистон Республикаси бадалларини тўлаш халқаро шартномалар ва битимлар, шунингдек, халқаро ҳуқуқларда ва Ўзбекистон Республикасининг халқаро ташкилотларга кириши ёки қўшилиши тўғрисидаги Ўзбекистон Республикаси қонун ҳужжатларида назарда тутилган ҳужжатлар асосида амалга оширилади.

2. Давлатлараро, ҳукуматлараро ва идоралараро даражаларда халқаро шартномаларга қўшилиш бўйича қарорлар қабул қилиш тартиби «Ўзбекистон Республикасининг халқаро шартномалари тўғрисида»ги Қонун ҳамда Ўзбекистон Республикаси Вазирлар Маҳкамасининг «Ўзбекистон Республикасининг идоравий тусдаги халқаро шартномаларини тузиш, бажариш, тўхтатиб туриш, тўхтатиш ва бекор қилиш тартиби тўғрисида» 1998 йил 12 январдаги 15-сон қарори билан тартибга солиб борилади.

3. Ушбу Низом Ўзбекистон аъзоси бўлган халқаро ташкилотларга Ўзбекистон Республикаси бадалларини тўлаш тартибини белгилайди.

4. Бадалларни тўлаш давлат бюджети маблағлари ҳамда халқаро шартномалар (битимлар) қатнашчилари бўлган Ўзбекистон Республикаси вазирликлари ва идораларининг ўз маблағлари ҳисобига, шу жумладан, хорижий валютада амалга оширилади. Бадалларни тўлашга мўлжалланган маблағлар Ўзбекистон Республикасининг ички валюта бозорида белгиланган тартибда конвертация қилинади.

5. Халқаро ташкилотларга бадаллар тўловчи вазирликлар ва идоралар келгуси молия йилида бадалларни тўлаш юзасидан буюртманомаларни, аъзолик ҳақидаги ҳужжатлар нусхаларини, келгусида халқаро ташкилотда қатнашишнинг мақсадга мувофиқлиги тўғрисидаги асословчи материалларни илова қилган ҳолда, тўловлар бўйича қарзларни, шунингдек, бошланадиган молия йилидаги тўловлар ҳисоб-китобларини кўрсатиб, 15 июлгача бўлган муддатда Ўзбекистон Республикаси Ташқи ишлар вазирлигига ва Молия вазирлигига киритадилар.

Халқаро ташкилотларга ўз маблағлари ҳисобидан бадал тўловчи вазирликлар ва идоралар Ўзбекистон Республикаси Ташқи ишлар вазирлигига ва Молия вазирлигига, тўловлар суммасини кўрсатган ҳолда, халқаро ташкилотларга бадал ўз вақтида тўланганлиги тўғрисида тасдиқнома тақдим этадилар.

Ўзбекистон Республикаси Марказий банки, Ташқи иқтисодий фаолият миллий банки Халқаро валюта жамғармасига, Халқаро тикланиш ва тараққиёт банкига, Осиё тараққиёт банкига, Европа тикланиш ва тараққиёт банкига ва бошқа халқаро молиявий ташкилотларга бадаллар тўлашнинг мақсадга мувофиқлиги тўғрисида Молия вазирлигига ва Ташқи ишлар вазирлигига хулосалар тақдим этадилар.

6. Буюртманомалар бериш муддатлари тамом бўлгандан кейин бадал тўлаш масалалари кўриб чиқилмайди.

7. Бошланган молиявий йилда бадал тўланиши зарур бўлган халқаро ташкилотлар рўйхати (кейинги ўринларда Рўйхат деб аталади) Ўзбекистон Республикаси Ташқи ишлар вазирлиги томонидан Молия вазирлиги билан биргаликда бадаллар тўлаш асослари, уларни тўлаш манбалари, тўловлар суммаси, тўлаш муддатлари, бадал тўловчи вазирликлар ва идоралар кўрсатилган, шунингдек, бюджет ажратмалари ёки ўз манбалари суммаси Ўзбекистон Республикасининг миллий валютасида ҳамда хорижий валютага конвертация қилиш эҳтиёжи аниқланган ҳолда тузилади.

8. Ўзбекистон Республикаси Молия вазирлиги келгуси молия йилида миллий ва хорижий валютада бадал тўлаш ҳажми ва маблағ билан таъминлаш манбалари юзасидан йил чораклари бўйича тақсимланган умумлаштирилган Рўйхат тузади.

9. Ўзбекистон Республикаси Молия вазирлиги Ташқи ишлар вазирлиги билан келишган ҳолда 20 августгача Рўйхатни кўриб чиқиш учун Ўзбекистон Республикаси Вазирлар Маҳкамасига киритади.

10. Рўйхат Ўзбекистон Республикаси Вазирлар Маҳкамасининг фармойиши билан тасдиқланади, кейинчалик бюджет прогнозига ва келгуси молия йилида республиканинг йиғма валюта балансига киритиш учун Ўзбекистон Республикаси Ташқи ишлар вазирлигига ва Молия вазирлигига юборилади.

11. Бадаллар тўлаш бўйича тўловларнинг бажарилиши келгуси йил учун Ўзбекистон Республикаси давлат бюджети прогнози ва Ўзбекистон Республикасининг йиғма валюта баланси тегишли равишда Ўзбекистон Республикаси Олий Мажлиси ва Ўзбекистон Республикаси Вазирлар Маҳкамаси томонидан белгиланган тартибда тасдиқлангандан кейин амалга оширилади.

12. Давлат бюджети ва йиғма валюта балансининг тасдиқланган параметрлари доирасида бадаллар тўлаш прогнозига тузатишлар киритиш Ўзбекистон Республикаси Ташқи ишлар вазирлигининг Молия вазирлиги билан келишилган таклифлари асосида фақат Ўзбекистон Республикаси Вазирлар Маҳкамасининг қарорига кўра амалга оширилади.

13. Ўзбекистон Республикаси Молия вазирлиги йилнинг ҳар чорагида Вазирлар Маҳкамасига ва Ташқи ишлар вазирлигига халқаро ташкилотларга бадаллар тўлашнинг бажарилиши бўйича тўлиқ ахборот тақдим этади.