Ўзбекистон Республикасининг «Географик объектларнинг номлари тўғрисида»ги Қонуни (Ўзбекистон Республикаси қонун ҳужжатлари тўплами, 2011 й., 41-сон, 448-модда) ҳамда Вазирлар Маҳкамасининг 2012 йил 16 октябрдаги «Географик объектларнинг номлари тўғрисида»ги Ўзбекистон Республикаси Қонунига мувофиқ географик объектларнинг номлари соҳасидаги ишларни тартибга солиш чора-тадбирлари ҳақида»ги 295-сон қарори (Ўзбекистон Республикаси қонун ҳужжатлари тўплами, 2012 й., 41-42-сон, 483-модда) ижросини таъминлаш мақсадида Ўзбекистон Республикасининг «Маҳаллий давлат ҳокимияти тўғрисида»ги Қонунининг 6-моддасига асосан қарор қиламан:

1. Ўзбекистон Республикаси Вазирлар Маҳкамасининг 2012 йил 16 октябрдаги «Географик объектларнинг номлари тўғрисида»ги Ўзбекистон Республикаси Қонунига мувофиқ географик объектларнинг номлари соҳасидаги ишларни тартибга солиш чора-тадбирлари ҳақида»ги 295-сон қарори (Ўзбекистон Республикаси қонун ҳужжатлари тўплами, 2012 й., 41-42-сон, 483-модда) ҳамда вилоят ҳокимининг 2013 йил 19 ноябрдаги Х-342/11-сонли қарорлари раҳбарлик ва ижро учун қабул қилинсин.

2. Географик объектларни номлаш ва қайта номлаш масалалари бўйича Қарши туман комиссияси тўғрисидаги низом 1-иловага, Географик объектларни номлаш ва қайта номлаш масалалари бўйича Қарши туман комиссиясининг таркиби 2-иловага мувофиқ тасдиқлансин.

3. Туман комиссияси ўз ваколатлари доирасида қуйидагиларни таъминласин:

географик объектларни номлаш ва қайта номлаш бўйича таклифларни атрофлича ўрганиш, таклифлар киритган органларга тегишли хулосалар бериш;

географик объектларни номлаш ва қайта номлаш бўйича таклифларни уларнинг географик объектларнинг номлари тўғрисидаги қонун ҳужжатлари талабларига мувофиқлиги юзасидан давлат экспертизасидан ўтказишни ташкил қилиш;

географик объектларнинг тарихий-маданий мерос, Ўзбекистон халқининг маънавий-этник қадриятлари билан боғлиқ номларини асраш, уларни асоссиз қайта номлашнинг олдини олиш;

географик объектларни Ўзбекистон халқининг миллий анъаналари ва менталитетига ёт бўлган номлар билан ном беришга ёки қайта номлашга йўл қўймаслик;

географик объектларни номлаш ва қайта номлашда маҳаллийчилик, ошна-оғайнигарчилик, хизмат мартабасини суиистеъмол қилиш ҳолларини истисно қилиш;

қарорлар қабул қилишда холислик ва ошкоралик, шунингдек географик объектларни номлаш ва қайта номлаш тўғрисидаги таклифларни кўриб чиқиш тартиб-қоидаси ва муддатларига риоя қилиш;

географик объектларни одамларнинг исмлари билан, шунингдек тарихий воқеалар шарафига номлаш ва қайта номлаш соҳасида белгиланган чекловларга риоя қилиш;

маҳаллий аҳолининг географик, тарихий, миллий, этник, тилга оид ва бошқа хусусиятларини ўрганиш ҳамда ҳисобга олиш;

бир маъмурий-ҳудудий бирлик доирасида географик объектларга бир хил номлар берилишига йўл қўймаслик;

бериладиган номларнинг географик объектлар номларининг географик объект жойлашган жойдаги мавжуд тизимига мувофиқлиги;

географик объектлар номларининг янглишишларга сабаб бўлувчи ўхшашлигини, ушбу номлар мазмунларининг Ўзбекистон халқининг тарихи, анъаналари ва маданиятига тўғри келмаслигини назарда тутган ҳолда, истисно қилиш.

Ҳудудий комиссиялар раҳбарлари зиммасига географик объектларнинг номлари тўғрисидаги қонун ҳужжатлари талаблари сўзсиз бажарилишининг таъминланиши учун шахсий жавобгарлик юкланганлиги инобатга олинсин.

4. Ўзбекистон Республикаси Вазирлар Маҳкамасининг 2004 йил 11 августдаги 383-сонли «Ўзбекистон Республикасидаги маъмурий-ҳудудий бирликлар, аҳоли пунктлари, ташкилотларга ва бошқа топонимик объектларга ном бериш ишларини тартибга солиш тўғрисида»ги қарори ўз кучини йўқотган деб ҳисобланганлиги;

Ўзбекистон Республикаси Вазирлар Маҳкамасининг 2004 йил 19 октябрдаги 483-сонли қарори билан тасдиқланган «Ўзбекистон Республикаси ер ресурслари, геодезия, картография ва давлат кадастри давлат қўмитаси тўғрисида»ги низом 8-банди «б» кичик бандининг ўн иккинчи хатбошиси (Ўзбекистон Республикаси ҚТ, 2004 й., 10-сон, 97-модда) қуйидаги таҳрирда баён қилиниши маълумот учун қабул қилинсин.

«географик объектларни номлаш ва қайта номлаш тўғрисидаги таклифларни давлат экспертизасидан ўтказади, географик объектларнинг номларини мақбуллаштириш ишларини амалга оширади. Географик объектлар номлари давлат реестрини юритади».

5. Туман ҳокимининг 2012 йил 27 октябрдаги Х-782/10-сонли қарори ўз кучини йўқотган деб ҳисоблансин.

6. Мазкур қарорнинг ижросини назорат қилиш туман ҳокимининг ўринбосари Н. Темиров зиммасига юклатилсин.

7. Мазкур қарор расман эълон қилинган кундан эътиборан кучга киради.

1. Географик объектларни номлаш ва қайта номлаш масалалари бўйича Қарши туман комиссияси (кейинги ўринларда комиссия деб юритилади) Географик объектларни номлаш ва қайта номлаш масалаларини кўриб чиқувчи, шунингдек «Географик объектларнинг номлари тўғрисида»ги Ўзбекистон Республикаси Қонуни талабларининг бажарилишини назорат қилувчи махсус орган ҳисобланади.

2. Комиссия ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек ушбу Низомга амал қилади.

Комиссиянинг таркиби манфаатдор давлат ва хўжалик бошқаруви органлари маҳаллий давлат ҳокимияти органи раҳбари ҳамда ходимларидан, фуқаролик жамияти институтлари, фуқароларнинг ўзини ўзи бошқариш органлари вакилларидан, шунингдек фан ва маданият арбобларидан, экспертлардан, мутахассислардан ҳамда тегишли фаолият соҳаларида махсус билимларга эга бўлган бошқа шахслардан шакллантирилади.

Комиссия аъзоларининг шахсий таркиби ва улар тўғрисидаги низомлар тегишли равишда туман ҳокими томонидан тасдиқланади.

3. Қуйидагилар комиссиянинг асосий вазифалари ҳисобланади:

географик объектларнинг Ўзбекистон халқининг тарихий-маданий қадриятлари ва мероси билан боғлиқ номлари асралишини таъминлаш, уларнинг асоссиз қайта номланишини олдини олиш;

географик объектларнинг Ўзбекистон халқининг миллий анъаналари ҳамда менталитетига ёт бўлган номлар билан қайта номлашда ва уларга ном беришга йўл қўймаслик;

географик объектларни номлаш ва қайта номлашда маҳаллийчилик, ошна-оғайнигарчилик, хизмат мартабасини суиистеъмол қилиш ҳолларини истисно қилиш.

4. Комиссия ўзига юкланган вазифаларга мувофиқ қуйидаги функцияларни бажаради:

географик объектларни номлаш ва қайта номлаш тўғрисидаги таклифларни атрофлича ўрганишни ташкил этади ҳамда тегишли хулосалар беради;

қабул қилинган қарорларнинг бажарилиши юзасидан тизимли мониторинг олиб боради;

топонимик ва бошқа тадқиқотлар ўтказиш, картографик, архивга оид, тарихий ва бошқа материалларни атрофлича ўрганиш, географик объектларнинг номларини мақбуллаштириш ишларини мувофиқлаштиради;

географик объектларни асоссиз қайта номлашнинг, уларга Ўзбекистон халқининг миллий анъаналари ва менталитетига ёт бўлган номлар берилишининг олдини олиш, ушбу соҳада маҳаллийчилик, ошна-оғайнигарчилик, хизмат мартабасини суиистеъмол қилиш ҳолларига йўл қўймаслик мақсадида географик объектларни номлаш ва қайта номлаш жараёнининг холисона ҳамда ошкора бўлишини таъминлаш бўйича комплекс тадбирларни ишлаб чиқади ва тасдиқлайди;

ўз ваколатлари доирасида географик объектларнинг номларидан фойдаланиш ва уларни асраш юзасидан назоратни амалга оширади;

«Географик объектларнинг номлари тўғрисида»ги Ўзбекистон Республикаси Қонуни қоидаларини самарали амалга оширишга қаратилган бошқа функцияларни амалга оширади.

Комиссия ўз ваколати доирасида аҳоли пунктларини таркибий қисмларини (маҳаллалар, шох кўчалар, кўчалар, майдонлар, боғлар, хиёбонлар) номлаш ва қайта номлаш тўғрисидаги таклифларнинг давлат экспертизасидан ўтказилишини тайинлайди.

5. Комиссия ўзига юкланган вазифаларнинг ижро этилишини таъминлаш учун қуйидаги ҳуқуқларга эга:

давлат ва хўжалик бошқаруви органларидан, маҳаллий давлат ҳокимияти органларидан, корхоналар, муассасалар ҳамда ташкилотлардан географик объектларни номлаш ва қайта номлаш тўғрисидаги таклифларни атрофлича ўрганиш учун зарур бўлган маълумотларни белгиланган тартибда сўраш ва олиш;

зарурат бўлганда, давлат ва хўжалик бошқаруви органлари, маҳаллий давлат ҳокимияти органлари, корхоналар, муассасалар ҳамда ташкилотлар мутахассисларини, етакчи олимларни, фан ва маданият арбобларини, шунингдек тегишли фаолият соҳаларида махсус билимларга эга бўлган бошқа шахсларни географик объектларни номлаш ва қайта номлаш тўғрисидаги таклифларни атрофлича ўрганиш учун жалб этиш;

ўз ваколатига кирувчи масалалар бўйича давлат ва хўжалик бошқаруви органлари раҳбарларининг ҳисоботларини эшитиш.

6. Комиссия ўзига юкланган вазифалар ва функцияларнинг самарали бажарилиши учун жавоб беради.

Комиссия ўз фаолияти тўғрисида ҳар йили тегишли равишда халқ депутатлари туман Кенгашига ҳисобот беради.

Комиссия ҳар чоракда ўз фаолияти тўғрисида Географик объектларни номлаш ва қайта номлаш масалалари бўйича вилоят комиссиясига ахборот тақдим этади.

7. Комиссияга унинг раиси ҳисобланадиган туман ҳокими бошчилик қилади.

8. Комиссия раиси:

комиссия фаолиятига умумий раҳбарлик қилади ва унга юкланган вазифаларни бажарилиши учун шахсан жавоб беради;

комиссия аъзоларининг вазифаларини белгилайди ва уларга юкланган вазифаларни бажариш ишларини мувофиқлаштиради;

комиссиянинг иш режаларини, тушган ҳужжатларни кўриб чиқиш жадвалларини тасдиқлайди;

комиссия мажлисларининг кун тартибини ва чақирилишини белгилайди;

комиссия томонидан қабул қилинган қарорларнинг бажарилиши юзасидан назоратни ташкил этади;

комиссиянинг самарали ишларини таъминлаш бўйича бошқа ишларни амалга оширади.

9. Комиссиянинг аъзолари:

комиссия мажлисларида кўриб чиқиладиган масалаларни муҳокама қилишда ва ҳал этишда иштирок этадилар;

комиссияга географик объектларни номлаш ва қайта номлашнинг долзарб масалалари бўйича таклифлар киритадилар;

комиссия томонидан муҳокама қилинадиган масалалар бўйича хулосалар тақдим этадилар.

Комиссия аъзолари комиссиядаги ўз фаолиятини жамоатчилик асосида амалга оширадилар.

10. Комиссия котиби:

комиссиянинг навбатдаги мажлисига барча зарур ҳужжатларнинг ўз вақтида тайёрлашни таъминлайди;

кун тартибидаги масалалар бўйича комиссиянинг мажлислари ўтказилишини ташкил этади;

мажлисларнинг ўтказиладиган вақти ва жойи, шунингдек таклиф этиладиганлар контингентини комиссия раиси билан келишади;

комиссия аъзоларини ва таклиф этилган шахсларни мажлиснинг ўтказиладиган санаси, вақти, жойи тўғрисида хабардор қилади;

комиссия қарорларининг бажарилиши мониторингини юритади ва унинг натижаларини комиссия мажлисида кўриб чиқиш учун тақдим қилади;

комиссиянинг протоколларини расмийлаштиради ва тасдиқланган протоколларни комиссиянинг аъзоларига ҳамда бошқа манфаатдор ташкилотларга жўнатади.

11. Комиссия ўз ишини ўзи тасдиқлаган режалар асосида ташкил қилади ва ўз мажлисларини заруратга кўра ўтказади. Комиссия раиси томонидан комиссия аъзоларининг навбатдан ташқари мажлис ўтказиш учун сабаблар ва асослар баён этилиши лозим бўлган ёзма илтимосномалари асосида навбатдан ташқари мажлислар чақирилиши мумкин.

12. Комиссиянинг мажлисини унинг раиси олиб боради. Комиссия раиси бўлмаган тақдирда мажлисни комиссия аъзоларидан бири бошқаради.

Комиссиянинг мажлиси унинг аъзоларининг камида учдан икки қисми қатнашганда қонуний ҳисобланади.

Мажлисни ўтказиш учун кворум йиғилмаган тақдирда комиссиянинг янги мажлиси ўтказиладиган сана эълон қилинади. Янги мажлис ўтказишда кун тартибини ўзгартиришга йўл қўйилмайди.

13. Комиссиянинг мажлисига кўриб чиқиладиган масалаларнинг хусусиятига қараб давлат ва хўжалик бошқаруви органлари, бошқа ташкилотларнинг раҳбарлари ҳамда мутахассислари таклиф этилиши мумкин.

14. Комиссиянинг қарори мажлисда қатнашаётган комиссия аъзоларининг оддий кўпчилик овози билан қабул қилинади. Овозлар тенг бўлган тақдирда комиссия раисининг овози ҳал қилувчи ҳисобланади.

Комиссиянинг узил-кесил қарорни қабул қилишда Ўзбекистон Республикаси «Ергеодезкадастр» давлат қўмитаси томонидан ўтказиладиган экспертиза хулосаси инобатга олинади.

Комиссиянинг ҳар бир аъзоси қабул қилинадиган қарорлар бўйича ўз фикрини ёзма равишда билдиришга ҳақлидир.

15. Комиссиянинг раиси қарорларини тезкор қабул қилиш мақсадида комиссиянинг қарорларини унинг аъзолари билан сўров ўтказиш йўли билан келишилган айрим масалалар бўйича тасдиқлаши мумкин.

16. Комиссиянинг қарорлари комиссия мажлисининг протоколи билан расмийлаштирилади. Комиссия мажлисининг протоколига унинг барча аъзолари томонидан виза қўйилади, уни котиб имзолайди, комиссиянинг раиси тасдиқлайди ва у бир ҳафта муддатда комиссиянинг аъзоларига ҳамда манфаатдор ташкилотларга жўнатилади.

17. Комиссия протоколининг асл нусхаси ва унга тегишли материаллар тегишли равишда туман ҳокимлигининг девонхона бўлимида сақланади.

18. Комиссия котиби комиссия аъзолари ёрдамида комиссия қарорларининг бажарилишини мунтазам ўрганиб боради, зарурат бўлганда комиссия раисига тегишли таклифлар киритади.

19. Комиссия қабул қилинган қарорларнинг бажарилишини мунтазам равишда ўз мажлисларида кўриб чиқади.

20. Комиссиянинг иш тартиби Регламент билан белгиланади. Регламент комиссия томонидан қабул қилинади.

21. Комиссияга тақдим этилган ҳужжатларни кўриб чиқиш муддати уч ойдан ошмаслиги керак.

22. Комиссия белгиланган намунадаги, ўз номи ёзилган бланкаларга эга бўлади ва тегишли равишда туман ҳокимлигининг муҳридан фойдаланади.