Шанхай ҳамкорлик ташкилотига аъзо давлатлар ҳукуматлари, кейинги ўринларда Томонлар,

Томонлар ҳудудларида терроризм, сепаратизм ва экстремизм билан самарали кураш олиб бориш мақсадида,

террористик, сепаратистик ва экстремистик фаолиятларга алоқадор шахсларнинг Томонлар ҳудудига суқилиб кириши Томонлар хавфсизлигига жиддий таҳдид солишини англаган ҳолда,

2002 йил 7 июндаги Шанхай ҳамкорлик ташкилоти Хартияси қоидалари, 2001 йил 15 июндаги терроризм, сепаратизм ва экстремизмга қарши курашиш тўғрисидаги Шанхай конвенцияси ҳамда 2002 йил 7 июндаги Шанхай ҳамкорлик ташкилотга аъзо давлатлар ўртасидаги Минтақавий аксилтеррор тузилма тўғрисидаги Келишувга таянган ҳолда,

терроризм, сепаратизм ва экстремизм билан курашишга қаратилган самарали чора-тадбирларни қабул қилишда ўзаро манфаатдорликдан келиб чиққан холда,

Томонлар давлат қонунчилиги ва умумэътироф этилган халқаро тамойиллар ва хуқуқ меъёрларига таянган холда,

қуйидагилар тўғрисида келишиб олинди:

Мазкур Келишув мақсадлари учун унда қўлланилган тушунчалар қуйидагиларни билдиради:

«бузғунчилар» — 2001 йил 15 июндаги терроризм, сепаратизм ва экстремизмга қарши курашиш тўғрисидаги Шанхай конвенциясида белгиланган террористик сепаратистик, экстремистик ҳаракатларни содир этганлик учун ёки содир этишда гумонланаётган, Шанхай ҳамкорлик ташкилотига аъзо давлатларнинг махсус хизматлари ва ҳуқуқни муҳофаза қилувчи органлари томонидан халқаро қидирув эълон қилинган шахслар;

«суқилиб кириш каналлари» — бузғунчиларнинг Томонлар ҳудудига қонуний ва ноқонуний суқилиб кириши йўллари.

Томонлар, суқилиб кириш каналларини аниқлаш ва ёпиш бўйича қўшма чора-тадбирларини ишлаб чиқиш мақсадида, ҳамкорлик қиладилар ва ўз фаолиятларини мувофиқлаштирадилар, давлат органлари, жамоатчилик ва бошқа ташкилотлар, Томонлар фуқаролари кучларини бирлаштирадилар, шунингдек кўрсатилган мақсадларда оммавий ахборот воситалари имкониятларидан фойдаланадилар.

Томонлар мазкур Келишув кучга кириши учун зарур давлат ички процедурларини бажарилгандан сўнг, ўттиз кун ичида мазкур Келишувни татбиқ қилиш учун жавобгар ваколатли органлари тўғрисида ёзма шаклда депозитарийни хабардор қилишади.

Томонлар ваколатли органлари қуйидаги асосий йўналишлар бўйича суқилиб кириш каналларини аниқлаш ва ёпиш соҳасида ҳамкорлик қилишади:

суқилиб кириш каналларини аниқлаш ва ёпиш соҳасида келишилган ёндашувларни ишлаб чиқиш;

суқилиб кириш каналларини аниқлаш, уларнинг устидан назорат ўрнатиш ва ёки ёпиш;

Томон давлатлари ҳудудига бузғунчилар томонидан суқилиб кириш учун фойдаланиладиган усулларини аниқлаш;

бузғунчиларни аниқлаш, уларни қўлга олиш бўйича келишилган чора-тадбирларни амалга ошириш;

суқилиб кириш каналларини ёпиш ва аниқлаш бўйича ҳамкорлик тадбирларини ўтказишда мувофиқлаштириш ва ўзаро ҳамкорлик қилиш;

суқилиб кириш каналларини аниқлаш ва ёпиш бўйича ҳамкорлик режаларини ишлаб чиқиш ва татбиқ қилиш;

суқилиб қириш каналларини аниқлаш ва ёпиш масалалари бўйича Томонлар давлат қонунчилигини мувофиқлаштириш;

суқилиб кириш каналларини аниқлаш ҳамда ёпиш масалалари бўйича мутахассисларни тайёрлаш, қайта тайёрлаш ва уларнинг малакасини ошириш;

суқилиб кириш каналларини аниқлаш ва ёпиш муаммолари бўйича ҳамкорликдаги илмий тадқиқотлар ўтказиш;

Суқилиб кириш каналларини аниқлаш ва ёпиш масалалари бўйича халқаро ташкилотлар ва халқаро форумларда иштирок этиш учун позицияларни келишиш;

Томонларнинг ваколатли органлари мазкур Келишув 4-моддасида кўрсатилган қуйидаги асосий йўналишлар бўйича ҳамкорлик қилишади:

Кўмак бериш тўғрисида талабномаларни бажариш (кейинги ўринларда — талабнома):

суқилиб кириш каналларини аниқлаш ва ёпиш бўйича келишилган оператив-қидирув тадбирларини ўтказиш;

бузғунчиларни қидирувга бериш ва қўлга олиш;

ўзаро манфаатлар асосида бошқа тадбирлар ўтказиш;

маълумот алмашиш:

Томонлар давлатлари ҳудудида террористик, сепаратистик ва экстремистик ҳаракатларни содир этиш учун суқилиб кириш каналларидан фойдаланиш тўғрисида;

суқилиб кириш каналларидан фойдаланишга алоқадорликда гумонланаётган шахслар ва ташкилотлар тўғрисида;

Томонлар давлатлари ҳудудига бузғунчилар томонидан суқилиб кириш каналларидан фойдаланиш билан боғлиқ аниқ фактлар ва ҳодисалар тўғрисида;

суқилиб кириш каналларидан фойдаланадиган алоҳида шахслар ва жиноий гуруҳлар ўртасида бўлган ёки тахминий алоқалар тўғрисида;

суқилиб кириш каналларидан фойдаланиш бўйича ташкилотлар ва алоҳида шахслар фаолиятининг шакллари ва усуллари тўғрисида;

бузғунчилар томонидан фойдаланиладиган суқилиб кириш каналлари тўғрисида;

суқилиб кириш каналларини молиялаштириш манбалари тўғрисида;

суқилиб кириш каналларини аниқлаш ва ёпиш шакллари ва усуллари тўғрисида;

суқилиб кириш каналларини аниқлаш ва ёпиш масалалари бўйича маълумотларини Шанхай ҳамкорлик ташкилоти Минтақавий аксилтеррор тузилмасининг маълумотлар банкига жўнатиш;

Томонлар давлатларининг чегараларини кесиб ўтишга ҳуқуқ берувчи ҳужжатлар намуналари билан алмашиниш хамда Томонлар давлатлари ҳудудига кириш, бўлиш ва чиқиш учун ҳужжатларга оид шакл ва талабларида ўзгаришлар тўғрисида маълумот тақдим қилиш;

иш тажрибаси билан алмашиниш, шу жумладан мажлис, конференция ва семинарлар ўтказиш йўли билан;

суқилиб кириш каналларини аниқлаш ва ёпиш масалалар бўйича қонунчилик ва бошқа меъёрий ҳуқуқий ҳужжатлар, материаллар билан алмашиш;

Томонларнинг ваколатли органлари ҳамкорликнинг бошқа ўзаро мақбул шаклларини белгилаб олишлари мумкин.

Ушбу Келишув доирасида Томонларнинг ваколатли органлари ўртасидаги ҳамкорлик талабнома асосида икки ва кўп томонлама ҳажмларда, шунингдек Томонлар давлатларидан бирининг ваколатли органларининг ташаббуси бўйича хабардор қилиш йўли билан амалга оширилади.

Талабнома ёки маълумот ёзма шаклда жўнатилади. Кечиктириб бўлмайдиган ҳолатларда талабнома ёки маълумот оғзаки тарзда етказилиши мумкин, аммо улар етмиш икки соатдан кечиктирилмасдан ёзма тарзда, зарурат туғилганда матн узатиш техник воситаларидан фойдаланган холда, расмийлаштирилиши лозим.

Талабнома ёки маълумот ёки уларнинг мазмуни ҳақиқийлигига шубҳа юзага келган ҳолларда, кўрсатилган ҳужжатларни қўшимча тасдиқлаш ёки тушинтириш талаб қилиниши мумкин.

Талабнома қуйидагиларни ўз ичига олиши шарт:

талабнома юборган ва олган ваколатли органларнинг номи;

талабнома мақсад ва асослари;

талаб этиладиган кўмак мазмунини тавсифлаш;

талабномани ўз вақтида ва тегишлича бажариш учун фойдали бўлиши мумкин бўлган бошқа маълумотлар;

агар зарур бўлса, унинг ёпиқлик даражасини кўрсатиш;

ёзма шаклда жўнатилган талабнома ёки маълумот жўнатувчи ваколатли орган раҳбари ёки унинг ўринбосарлари томонидан имзоланади ва (ёки) ушбу ваколатли орган гербли муҳри билан тасдиқланади.

Талабнома олган ваколатли органи талабномани тез ва имкон борича тўлиқроқ бажарилишини таъминлаш мақсадида барча зарур чора-тадбирларни қабул қилади ҳамда у келиб тушган кунидан бошлаб ўттиз кун муддат ичида талабнома юборган органни талабномани кўриб чиқиш натижалари тўғрисида хабардор қилади.

Талабномани бажарилишига тўсқинлик қилувчи ёки сезиларли кечиктирувчи ҳолатлар тўғрисида талабнома юборган ваколатли органи дарҳол хабардор қилинади.

Агар талабномани бажариш талабнома олган ваколатли орган ваколатига кирмаса, унда у талабномани бажаришга ваколати бўлган ўз давлатнинг бошқа ваколатли органига жўнатади ва бу тўғрисида талабнома юборган ваколатли органга дарҳол хабар беради.

Талабнома олган ваколатли орган талабномани бажариш учун, унинг фикрича, зарур маълумотларни талаб қилиши мумкин.

Талабномани бажаришда талабнома олган Томон давлатнинг қонунчилиги қўлланилади. Агар талабнома олган Томоннинг қонунчилиги ёки халқаро мажбуриятларига зид бўлмаса, унда талабнома олган ваколатли орган илтимосига кўра талабнома юборган Томон давлат қонунчилиги қўлланиши мумкин.

Талабнома олган ваколатли орган ўз давлат ҳудудида талабнома юборган томон вакилларига, агар бу унинг давлат қонунчилигига зид бўлмаса, талабномани бажаришда қатнашишга рухсат бериши мумкин.

Агар талабнома олган ваколатли орган талабномани бажариш унинг давлат суверенитети, хавфсизлиги, жамоат тартибига ёки бошқа муҳим манфаатларига зарар етказади деб ҳисобласа ёки талабнома олган Томон давлат қонунчилиги ёки халқаро мажбуриятларига зид бўлса, талабнома ижроси кечиктирилиши ёки уни бажариш тўлиқ ёхуд қисман рад қилиниши мумкин.

Агар ушбу модданинг 6- ёки 7- абзацларга мувофиқ талабномани бажарилиши тўлиқ ёки қисман рад этилса ёки унинг ижроси кечиктирилса, бу ҳақида ваколатли органга ёзма шаклда хабар берилади.

Агар олинган маълумот ва ҳужжатлар ёпиқ хусусиятга эга бўлса ёки юборган томон уларни ошкор қилиш номақбул деб ҳисобласа, ҳар бир томон уларнинг махфийлигини таъминлайди. Маълумот ва ҳужжатларнинг ёпиқлик даражаси юборувчи томонидан белгиланади.

Мазкур Келишув асосида олинган маълумот ёки талабномани бажариш натижаларини уларни тақдим қилган Томоннинг ёзма розилигисиз бошқа мақсадларда фойдаланиш мумкин эмас.

Мазкур Келишув асосида бир Томоннинг бошқа Томондан олган маълумот ва ҳужжатлари уларни тақдим қилган Томоннинг олдиндан ёзма розилигисиз учинчи томонга юборилиши мумкин эмас.

Агар ҳар бир аниқ ҳолатда олдиндан бошқача тартиб келишилмаган бўлса, Томонлар мазкур Келишувни бажаришда юзага келадиган харажатларни мустақил қоплашади.

Мазкур Келишув доирасидаги ҳамкорлик натижаларини таҳлил қилиш ва баҳолаш, шунингдек уни такомиллаштириш йўлларини ишлаб чиқиш мақсадида, Томонлар консультация ва мажлислар ўтказишлари мумкин.

Томонлар мазкур Келишув қоидаларини изоҳлаш ёки қўллаш билан боғлиқ баҳсли масалаларни консультация ва музокаралар йўли билан ҳал қилишади.

Мазкур Келишув Томонларнинг улар аъзо бўлган бошқа халқаро шартномаларидан келиб чиқадиган ҳуқуқ ва мажбуриятларига дахлдор эмас.

Мазкур Келишув доирасида ҳамкорликни амалга оширишда, Томонлар ишчи тиллари сифатида рус ва хитой тилларидан фойдаланишади.

Томонларнинг келишувига кўра, ушбу Келишувнинг 15-моддасида ўрнатилган тартибда кучга кирадиган баённомалар тузиш йўли билан, мазкур Келишувга ўзгартиришлар киритилиши мумкин.

Мазкур Келишув ноаниқ муддатга тузилади ва унинг кучга кириши учун зарур давлат ички процедураларини Томонлар орқали бажариш тўғрисида ёзма шаклдаги тўртинчи хабарни депозитарий олган санадан ўттизинчи куни кучга киради.

Мазкур Келишув депозитарийси Шанхай ҳамкорлик ташкилоти ҳисобланади ва у Мазкур Келишув имзоланганидан сўнг ўн беш кун ичида Келишувнинг тасдиқланган нусхаларини Томонларга жўнатади.

Депозитарий мазкур Келишувни татбиқ этиш учун,Томоннинг жавобгар ваколатли органларидан хабар олинган кундан ўн беш кун ичида бу тўғрисида бошқа Томонларга хабар беради.

Мазкур Келишув 2001 йил 15 июндаги терроризм, сепаратизм ва экстремизмга қарши курашиш тўғрисидаги Шанхай конвенцияси аъзолари ҳисобланадиган давлатларнинг қўшилиши учун очиқ. Мазкур Келишув қўшиладиган давлатлар учун унинг қўшилиши тўғрисидаги ҳужжат депозитарий томонидан қабул қилинган кундан ўттизинчи куни кучга киради.

Мазкур Келишув 2001 йил 15 июндаги терроризм, сепаратизм ва экстремизмга қарши курашиш тўғрисидаги Шанхай конвенцияси аъзоси ҳисобланадиган исталган Томонлар давлатига нисбатан ўз кучида қолади.

2006 йил 15 июнда Шанхай шаҳрида, битта асл нусхада рус ва хитой тилларида тузилди ва икки матн ҳам бир хил кучга эга ҳисобланади.