Ишлаб чиқаришдаги бахтсиз ҳодисаларни ва ходимлар саломатлигининг бошқа хил зарарланишини текшириш ва ҳисобга олиш тартибини такомиллаштириш, уни қонун ҳужжатларига мувофиқлаштириш мақсадида Вазирлар Маҳкамаси қарор қилади:

1. Вазирлар Маҳкамасининг 1997 йил 6 июндаги 286-сон қарори (Ўзбекистон Республикаси ҚТ, 1997 й., 6-сон, 21-модда) билан тасдиқланган Ишлаб чиқаришдаги бахтсиз ҳодисаларни ва ходимлар саломатлигининг бошқа хил зарарланишини текшириш ва ҳисобга олиш тўғрисидаги низомга иловага мувофиқ ўзгартириш ва қўшимчалар киритилсин.

2. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С.Азимов зиммасига юклансин.

1. I бўлимда:

а) 1-банддаги изоҳ қуйидаги таҳрирда баён қилинсин:

«Изоҳ. Ўқувчилар ва талабалар билан ўқув-тарбия жараёнида юз берган бахтсиз ҳодисалар Меҳнат ва аҳолини ижтимоий муҳофаза қилиш вазирлиги билан келишилган ҳолда Халқ таълими вазирлиги, Олий ва ўрта махсус таълим вазирлиги, Олий ва ўрта махсус таълим вазирлигининг Ўрта махсус, касб-ҳунар таълими маркази томонидан белгиланган тартибда текширилади ва ҳисобга олинади»;

б) 2-банд қуйидаги таҳрирда баён қилинсин:

«2. Корхона ҳудудида ва унинг ташқарисида меҳнат вазифаларини бажараётганда (шунингдек хизмат сафарларида) юз берган жароҳатланиш, заҳарланиш, иссиқлик таъсири, портлаш, фалокатлар, иморатлар, иншоотлар ва конструкциялар бузилиши, куйиш, музлаш, қизиш, электр токи ва яшин уриши, ҳайвонлар, ҳашаротлар ва судралиб юрувчилар томонидан, террористик ҳаракатлар натижасида шикастланишлар, шунингдек табиий офатлар (зилзилалар, ўпирилишлар, сув тошқинлари, тўфонлар ва бошқалар) туфайли саломатликнинг бошқа хил шикастланишлари;

ўз функционал вазифаларини бажариш юзасидан, шунингдек аварияларнинг, одамлар ҳалок бўлишининг олдини олиш ва корхонанинг мулкини сақлаш мақсадида, иш берувчи топшириқ бермаган бўлса ҳам, корхона манфаатларини кўзлаб қандайдир хатти-ҳаракатларни амалга ошираётгандаги;

ходим хизмат сафарида бўлган ёки ўз функционал вазифаларини бажариш вақтида — йўл-транспорт ҳодисасидаги, темир йўл, ҳаво йўлларидаги, денгиз ва дарё транспортидаги, электр транспортидаги ҳодиса натижасидаги;

иш берувчи томонидан буйруқ билан махсус ажратилган уйдан ишга ва/ёки ишдан уйга ходимларни ташиш учун мўлжалланган транспортда, шунингдек ушбу мақсадлар учун шартнома (буюртма)га мувофиқ ўзга ташкилот транспортида ишга кетаётган ёки ишдан қайтаётгандаги;

иш вақтида шахсий транспортда, уни хизматга оид сафарлар учун ишлатишга рухсат берилганлик ҳақида иш берувчининг ёзма буйруғи мавжуд бўлгандаги;

иш берувчининг топшириғини бажариш учун транспортда ёки пиёда ҳаракатланаётганда, шунингдек меҳнат фаолияти хизмат кўрсатиш объектлари орасида юриш билан боғлиқ ходимлар билан иш вақтида транспортда ёки пиёда кетаётгандаги;

тадбирларнинг ўтказилиши ёки ишлар бажарилиши жойидан қатъи назар, шанбалик (якшанбалик), фуқаро мудофааси бўйича ўқув машғулотлари, кўнгилли ёнғин муҳофазаси мусобақалари ўтказилаётгандаги, қишлоқ хўжалиги ишларига жалб этилгандаги, иш берувчининг ёзма фармойиши бўйича корхона томонидан оталиқ ёрдами кўрсатилаётгандаги;

ички ишлар органларининг маълумотлари асосида — иш вақтида меҳнат вазифаларини бажараётганда бошқа шахс томонидан тан жароҳати етказилгандаги;

сменали дам олишда бўлган ходим билан транспорт воситасидаги вахта шаҳарчаси ҳудудидаги ёки ижарага олинган хонадаги (кузатиб борувчи, рефрижератор бригадаси ходими, сменали ҳайдовчи, денгиз ва дарё кемалари ходимлари, шунингдек, вахта-экспедиция усулида ишлаётганлар ва бошқалар) бахтсиз ҳодисалар текширилади ва ҳисобга олинади»;

в) 6-банддаги «касаба уюшмаларининг меҳнат техник назоратчиси (Ўзбекистон Касаба уюшмалари Федерацияси Кенгашига аъзо ташкилотларда)» сўзлари чиқариб ташлансин;

г) 7-банд иккинчи хатбошининг иккинчи жумласига «вакиллик органи» сўзларидан кейин «шунингдек жабрланувчи ёки бошқа манфаатдор шахс» сўзлари қўшилсин;

2. II бўлимда:

а) 1-банднинг тўртинчи хатбоши қуйидаги таҳрирда баён қилинсин:

«дарҳол ҳодиса тўғрисида иш берувчига ва касаба уюшмасига ёки корхона ходимларининг бошқа вакиллик органига хабар қилиш»;

б) 4-банднинг тўртинчи хатбошидаги «корпорация, уюшма, концерн» сўзлари «хўжалик бошқаруви органлари» сўзлари билан алмаштирилсин;

в) 8-банд қуйидаги таҳрирда баён қилинсин:

«8. Иш берувчининг ёзма фармойиши билан вақтинча бошқа ташкилотга ишга ўтказилган ёхуд ўриндошлик бўйича ишлаётган ходим билан бахтсиз ҳодиса юз берса бахтсиз ҳодиса содир бўлган ташкилот томонидан текширилади ва ҳисобга олинади»;

г) 13-банд қуйидаги таҳрирда баён қилинсин:

«13. Корхона ходими раҳбарлигида ишлаб чиқариш амалиёти ўтаётган ёки иш бажараётган ўқувчилар, талабалар билан юз берган бахтсиз ҳодиса корхона томонидан таълим муассасаси вакили билан биргаликда текширилади ва корхона томонидан ҳисобга олинади.

Корхона томонидан ишлаб чиқариш амалиёти учун ажратилган участкада ўқитувчилари раҳбарлигида ишлаб чиқариш амалиётини ўтаётган ёки иш бажараётган ўқувчилар, талабалар билан юз берган бахтсиз ҳодисалар таълим муассасалари томонидан корхона вакили билан биргаликда текширилади ва таълим муассасаси томонидан ҳисобга олинади»;

3. III бўлимда:

а) 1-бандда:

иккинчи хатбошидаги «билан» сўзидан кейин «саломатликка етказилган зарарнинг оғирлиги даражасидан қатъи назар» сўзлари қўшилсин;

изоҳдаги «Шикастланганликнинг» сўзи «Саломатликка етказилган зарарнинг» сўзлари билан алмаштирилсин;

б) 2-бандда:

тўртинчи хатбоши рус тилида ўзгартирилади;

бешинчи хатбошидаги «прокуратурага» сўзи «ҳудудий ички ишлар органига» сўзлари билан алмаштирилсин;

тўққизинчи хатбоши қуйидаги таҳрирда баён қилинсин:

«иш берувчининг фуқаролик жавобгарлигини мажбурий суғурта қилиш шартномаси бўйича суғурталовчига»;

в) 3-бандда:

учинчи хатбошидаги «Ўзбекистон Касаба уюшмалари Федерацияси Кенгашига аъзо ташкилотда юз берган ҳолларда, касаба уюшмаларининг меҳнат (бош) техник назоратчиси» сўзлари «иш берувчининг фуқаролик жавобгарлигини мажбурий суғурта қилиш шартномаси бўйича суғурталовчининг вакили» сўзлари билан алмаштирилсин;

бешинчи хатбошидаги «юз берганида» сўзларидан кейин «иш берувчи ва касаба уюшмаси қўмитаси ёки ходимларнинг бошқа вакиллик органи вакиллари таркибида иш берувчининг буйруғи билан ташкил этилган комиссия томонидан» сўзлари қўшилсин;

тўққизинчи хатбошидаги «Давлат меҳнат техника назорати» сўзлари «Меҳнатни муҳофаза қилиш бошқармаси» сўзлари билан алмаштирилсин;

ўнинчи хатбоши чиқариб ташлансин;

ўн биринчи хатбоши ўнинчи хатбоши деб ҳисоблансин;

г) 4-банддаги учинчи хатбоши чиқариб ташлансин;

д) 5-бандга қуйидаги таҳрирдаги хатбоши қўшилсин:

«Комиссия аъзоси махсус текшириш ўтказаётган комиссия хулосасидан норози бўлганда ўзининг алоҳида фикрини билдириши мумкин»;

е) 7-бандга қуйидаги таҳрирдаги хатбошилар қўшилсин:

«ўртача ойлик иш ҳақи тўғрисида маълумотнома — етказилган зарарни қоплаш суммасини ҳисоблаб чиқиш учун;

боқувчисини йўқотганлиги муносабати билан етказилган зарарни қоплаш тўғрисидаги буйруқ нусхаси — ўлим билан тугаган бахтсиз ҳодиса юз берганда»;

ж) 8-бандда:

иккинчи хатбошидаги «прокуратурага» сўзи «ҳудудий ички ишлар органига» сўзлари билан алмаштирилсин;

учинчи хатбошидаги «корпорация, уюшма, концерн» сўзлари «хўжалик бошқаруви органи» сўзлари билан алмаштирилсин;

тўртинчи хатбошидаги «ҳамда вилоят (Қорақалпоғистон Республикаси, Тошкент шаҳар) касаба уюшмалари кенгашига ҳам, агар бахтсиз ҳодиса Ўзбекистон Касаба уюшмалари Федерацияси Кенгашига аъзо ташкилотда юз берган бўлса» сўзлари чиқариб ташлансин;

з) 9-банднинг иккинчи хатбошидаги «Саноатконтехназорат» сўзидан кейин «ёки «Ўздавэнергоназорат» инспекцияси» сўзлари қўшилсин;

и) 10-бандга қуйидаги мазмундаги хатбоши қўшилсин:

«Ушбу бахтсиз ҳодиса ўлим содир бўлган вақтдан бошлаб ўлим билан тугаган бахтсиз ҳодиса сифатида ҳисобга олиниши керак».

4. IV бўлимда:

а) 7-банддаги «прокуратура», «давлат автомобиль назорати, давлат ёнғин назорати органлари» сўзлари тегишли равишда «ҳудудий ички ишлар органлари ва йўл ҳаракати хавфсизлиги давлат хизмати, ёнғин хавфсизлиги давлат хизмати» сўзлари билан алмаштирилсин;

б) 8-банддаги «Прокуратура органлари» ва «Давлат меҳнат техника назоратига» сўзлари тегишли равишда «Ҳудудий ички ишлар органлари» Меҳнатни муҳофаза қилиш ва меҳнат шароитлари экспертизаси давлат инспекциясига» сўзлари билан алмаштирилсин.

5. Низомга 1, 3, 4 ва 5-иловалар матнидаги «корпорация, уюшма, концерн» сўзлари «хўжалик бошқаруви органи» сўзлари билан алмаштирилсин.