«ЎЗМЕД-ЛИЗИНГ» ОЧИҚ АКЦИЯДОРЛИК ЖАМИЯТИ ИХТИСОСЛАШТИРИЛГАН ЛИЗИНГ КОМПАНИЯСИНИ ТАШКИЛ ЭТИШ ТЎҒРИСИДА
LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Ўзбекистон Республикаси Президентининг «Республика тиббиёт муассасалари фаолиятини ташкил этишни такомиллаштириш чора-тадбирлари тўғрисида» 2007 йил 2 октябрдаги ПҚ-700-сон қарорига мувофиқ, шунингдек тиббиёт муассасаларини замонавий тиббиёт асбоб-ускуналари билан жиҳозлаш, Ўзбекистон Республикасининг соғлиқни сақлаш тизимида лизинг муносабатларини ривожлантириш мақсадида Вазирлар Маҳкамаси қарор қилади:
1. Ўзбекистон Республикаси Молия вазирлиги, Соғлиқни сақлаш вазирлиги, Давлат мулки қўмитаси, Ўзбекистон Республикаси Ташқи иқтисодий фаолият миллий банки, «Асака» банки, «Пахта-банк», «Ўзсаноатқурилишбанк», Ипотека-банкнинг бошланғич устав фонди 1,5 млрд сўм миқдорида бўлган ва муассислар ўртасида 1-иловага мувофиқ тақсимланадиган очиқ акциядорлик жамияти шаклидаги «ЎзМЕД-лизинг» ихтисослаштирилган лизинг компаниясини ташкил этиш тўғрисидаги таклифига розилик берилсин.
2. Қуйидагилар «ЎзМЕД-лизинг» очиқ акциядорлик жамияти ихтисослаштирилган лизинг компанияси фаолиятининг асосий йўналишлари эканлиги маълумот учун қабул қилинсин:
ўз маблағлари ҳисобига, шунингдек мамлакатимиз ва чет эл банклари кредитлари ва қарзларини жалб этиш йўли билан замонавий юқори технологияли тиббиёт асбоб-ускуналари, улар учун эҳтиёт қисмлар, анжомлар ва махсус транспорт (кейинги ўринларда «тиббиёт асбоб-ускуналари» деб юритилади) харид қилиш;
тиббиёт асбоб-ускуналарини шартнома асосида лизингга ва узоқ муддатли ижарага бериш, шунингдек уларни тиббиёт муассасаларига сотиш.
3. «ЎзМЕД-лизинг» очиқ акциядорлик жамияти ихтисослаштирилган лизинг компаниясининг ходимларининг чекланган умумий сони 17 нафар, шу жумладан бошқарув ходимлари сони 15 нафар бўлган бошқарув тузилмаси 2-иловага мувофиқ маъқуллансин.
4. Ўзбекистон Республикаси Давлат мулки қўмитаси бошқа муассислар билан биргаликда бир ой муддатда «ЎзМЕД-лизинг» очиқ акциядорлик жамиятининг таъсис йиғилишини ўтказсин ва лизинг компаниясининг таъсис ҳужжатлари белгиланган тартибда тасдиқланишини, шунингдек компаниянинг давлат рўйхатига олинишини таъминласин.
5. Тошкент шаҳар ҳокимлиги бир ой муддатда «ЎзМЕД-лизинг» очиқ акциядорлик жамияти ихтисослаштирилган лизинг компаниясини жойлаштириш учун белгиланган тартибда бино ажратсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Р.С. Қосимов ва Р.С. Азимов зиммасига юклансин.
«ЎзМЕД-лизинг» очиқ акциядорлик жамияти ихтисослаштирилган лизинг компанияси устав фондининг таркиби
Муассислар | Устав фондидаги улуши | |
фоизларда | суммаси (млн сўм) | |
Ўзбекистон Республикаси Давлат мулки қўмитаси* | 13 | 200,0 |
«Ўзмиллийбанк» | 20 | 300,0 |
«Пахта-банк» | 13 | 200,0 |
«Асака» банки | 20 | 300,0 |
«Ўзсаноатқурилишбанк» | 17 | 250,0 |
Ипотека-банк | 17 | 250,0 |
Жами: | 100 | 1 500,0 |