LexUZ шарҳи
Мазкур қарор Ўзбекистон Республикаси Президентининг 2020 йил 27 сентябрдаги ПФ-6075-сонли «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида»ги Фармонига асосан ўз кучини йўқотган.
Кўргазма-ярмарка фаолияти соҳасида тадбирлар қатнашчиларига кўрсатиладиган хизматлар сифатини ошириш ва турларини кўпайтириш ҳамда «Ўзэкспомарказ» миллий кўргазма мажмуаси» очиқ акциядорлик жамияти негизида Ўзбекистон Республикаси Халқаро савдо-кўргазма марказини янада ташкиллаштириш учун шарт-шароитларни шакллантириш мақсадида:
1. Маълумот учун қабул қилинсинки, Ўзбекистон Республикаси Ташқи иқтисодий алоқалар, инвестициялар ва савдо вазирлиги томонидан «Ўзэкспомарказ» МКМ» ОАЖнинг иловага* мувофиқ ҳудуди ва объектларини шахсий ҳамда қарз маблағлари ҳисобига молиялаштириб қуриш ва реконструкция қилиш бўйича лойиҳа тайёрланди ва уни амалга ошириш ишлари олиб борилмоқда.
* Илова рус тилидаги матнда берилган.
2. «Ўзэкспомарказ» МКМ» ОАЖ ҳудуди ва объектларини қуриш ҳамда реконструкция қилиш бўйича мазкур лойиҳани амалга ошириш доирасида олиб келинадиган асбоб-ускуналар, қурилиш материаллари ва мебеллар, Ўзбекистон Республикаси Вазирлар Маҳкамаси томонидан тасдиқланадиган рўйхатга мувофиқ, божхона тўловлари (божхона расмийлаштируви йиғимларидан ташқари) тўлашдан озод этилсин.
3. Вазирлар Маҳкамасининг «Халқаро савдо-кўргазма комплекси қурилишини тугаллаш чора-тадбирлари тўғрисида» 2002 йил 8 ноябрдаги 386-сонли қарорининг 7-бандида назарда тутилган имтиёзларнинг амал қилиш муддати 2011 йилнинг 1 майигача узайтирилсин.
LexUZ шарҳи
Ўзбекистон Республикаси Президентининг «Ўзэкспомарказ» МКМ» очиқ акциядорлик жамиятининг кўргазма майдонларини кенгайтиришга оид қўшимча чора-тадбирлар тўғрисида»ги 2010 йил 15 февралдаги ПҚ-1282-сонли қарорига мувофиқ 3-банднинг амал қилиши 2014 йилнинг 31 декабригача узайтирилган.
4. Белгилансинки, ушбу Қарорда назарда тутилган имтиёзлар берилиши натижасида бўшайдиган маблағлар, «Ўзэкспомарказ» МКМ» ОАЖ ҳудуди ва объектларини қуриш ҳамда реконструкция қилиш учун жалб қилинган кредитларни тўлашга йўналтирилади.
5. Ўзбекистон Республикаси Иқтисодиёт вазирлиги «Ўзэкспомарказ» МКМ» ОАЖ ҳудуди ва объектларини қуриш ҳамда реконструкция қилиш лойиҳасини белгиланган тартибда Ўзбекистон Республикасининг 2007 йилги Инвестиция дастурига киритсин.
6. Мазкур Қарорнинг бажарилишини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.