Ушбу Қонуннинг мақсади ҳомийлик соҳасидаги муносабатларни тартибга солишдан иборат.

Ҳомийлик тўғрисидаги қонунчилик ушбу Қонун ва бошқа қонунчилик ҳужжатларидан иборатдир.

Агар Ўзбекистон Республикасининг халқаро шартномасида Ўзбекистон Республикасининг ҳомийлик тўғрисидаги қонунчилигида назарда тутилганидан бошқача қоидалар белгиланган бўлса, халқаро шартнома қоидалари қўлланилади.

Ушбу Қонунда қуйидаги асосий тушунчалар қўлланилади:

кўнгиллилар — ҳомийлик олувчининг ёхуд ҳомийлик ташкилотининг манфаатларини кўзлаб бепул ишлар бажариш, хизматлар кўрсатиш шаклидаги ҳомийликни амалга оширувчи жисмоний шахслар;

хайрия қутиси — нақд пул шаклидаги ҳомийлик хайрияларини йиғиш учун мўлжалланган идиш бўлиб, ундан фойдаланиш ҳуқуқи ҳомийлик ташкилотларига, ҳомийликни амалга оширувчи ёки ҳомийлик олувчи юридик шахсларга тегишли бўлади;

ҳомийлар — ҳомийликни амалга оширувчи юридик ва жисмоний шахслар;

ҳомийлик (ҳомийлик фаолияти) — юридик ва жисмоний шахсларнинг ҳомийлик мақсадларида бошқа юридик ва жисмоний шахсларга мол-мулкни, шу жумладан пул маблағларини қайтармаслик шарти билан ёки имтиёзли шартларда беришда, улар учун ишлар бажаришда, уларга хизматлар кўрсатиш ва уларни бошқача шаклда қўллаб-қувватлашда ифодаланадиган ихтиёрий беғараз ёрдами (фаолияти);

ҳомийлик олувчилар — ҳомийлик олувчи юридик ва жисмоний шахслар;

ҳомийлик субъектлари — ҳомийлар, кўнгиллилар, ҳомийлик ташкилотлари, шунингдек ҳомийлик олувчилар;

ҳомийлик ташкилоти — ҳомийлик фаолиятини амалга ошириш учун тузилган нодавлат нотижорат ташкилоти;

ҳомийлик хайриялари — ҳомийлик мақсадларига йўналтириладиган мол-мулк, шу жумладан пул маблағлари.

Ҳомийлик қуйидаги мақсадларда амалга оширилади:

фуқароларни ижтимоий жиҳатдан қўллаб-қувватлаш ва ҳимоя қилиш, шу жумладан аҳолининг ижтимоий жиҳатдан муҳофаза қилинмаган ва кам таъминланган тоифаларининг моддий аҳволини яхшилаш, ўз жисмоний ёки интеллектуал хусусиятлари, бошқа ҳолатлар сабабли мустақил равишда ўз ҳуқуқларини амалга ошира олмайдиган ҳамда қонуний манфаатларини ҳимоя қила олмайдиган ишсизларни, ногиронлиги бўлган шахсларни ва бошқа шахсларни ижтимоий реабилитация қилиш;

халқлар ўртасида тинчлик, дўстлик ва тотувликни мустаҳкамлашга кўмаклашиш;

оиланинг жамиятдаги нуфузи ва ролини мустаҳкамлашга кўмаклашиш;

оналик, болалик ва оталикни ҳимоя қилишга кўмаклашиш;

таълим, фан, маданият, санъат, маърифат соҳасидаги фаолиятга, шунингдек шахснинг маънавий камол топишига кўмаклашиш;

касалликлар профилактикаси ва фуқаролар соғлиғини сақлаш соҳасидаги фаолиятга, шунингдек соғлом турмуш тарзини тарғиб қилишга кўмаклашиш, фуқароларга маънавий-руҳий ёрдам кўрсатиш;

жисмоний тарбия ва оммавий спорт соҳасидаги фаолиятга кўмаклашиш;

аҳолини табиий офатлар, экология, саноат ҳалокатлари ёки бошқа ҳалокатлар оқибатларини бартараф этишга, бахтсиз ҳодисаларнинг олдини олишга тайёрлаш;

террорчилик ҳаракатлари, табиий офатлар, экология, саноат ҳалокатлари ёки бошқа ҳалокатлар натижасида жабрланганларга ёрдам кўрсатиш;

атроф табиий муҳитни муҳофаза қилиш;

маданий мерос объектларини муҳофаза қилиш.

Қонунчиликка мувофиқ ҳомийлик бошқа мақсадларда ҳам амалга оширилиши мумкин.

Тижорат ташкилотларига, сиёсий партияларга ва ҳаракатларга пул маблағлари ҳамда бошқа моддий маблағлар бериш, ўзга шаклда ёрдам кўрсатиш, шунингдек уларни қўллаб-қувватлаш ҳомийлик ҳисобланмайди.

Сайловолди ташвиқоти ва референдумга қўйилган масалалар бўйича ташвиқот мақсадида ҳомийлик қилиш тақиқланади.

Қонунга зид бўлган ҳар қандай фаолиятни ҳомийлик воситасида қўллаб-қувватлаш тақиқланади.

Юридик ва жисмоний шахслар ҳомийликни ихтиёрий равишда ҳамда монеликсиз амалга оширишга ҳақли.

Устав фондида (устав капиталида) давлат улуши 50 фоиздан юқори бўлган хўжалик жамиятларининг ҳомийликка сарфланадиган ҳар йилги харажатлари ўтган йилда олинган соф фойданинг 3 фоизидан ошмаслиги керак ҳамда бу харажатлар улар бизнес-режасининг ўтган ҳисобот давридаги соф фойдага тааллуқли қисми кўрсаткичлари бажарилганда амалга оширилади, бундан Ўзбекистон Республикаси Президентининг ва Ўзбекистон Республикаси Вазирлар Маҳкамасининг қарорларида назарда тутилган ҳоллар мустасно.

Юридик ва жисмоний шахслар ҳомийликни якка тартибда ёки бирлашиб, ҳомийлик ташкилотини ташкил этган ёхуд ташкил этмаган ҳолда амалга оширишга ҳақли.

Ҳомийлар ўз ҳомийлик хайрияларидан фойдаланиш мақсадлари ва тартибини белгилашга ҳақли.

Ҳомийлик олувчилар (юридик шахслар):

олинган ҳомийлик хайрияларининг ҳисобини юритиши;

ҳомийлик хайриялари олинган кундан эътиборан ўн кун ичида оммавий ахборот воситаларида, шунингдек мавжуд бўлган тақдирда ўз расмий веб-сайтларида ёки ижтимоий тармоқлардаги саҳифаларида олинган ҳомийлик хайриялари тўғрисидаги ахборотни ошкор этиши шарт.

Ҳомийлик олувчи жисмоний шахслар ҳомийлик хайрияларининг миқдори ва улардан мақсадли фойдаланилганлиги тўғрисидаги маълумотни ушбу хайрияларни берган шахсларнинг талабига кўра тақдим этади.

Ҳомийлик хайрияларини йиғиш муайян ҳомийлик олувчиларнинг манфаатларини кўзлаб, олдиндан эълон қилинган муддат давомида амалга оширилади.

Ҳомийлик хайриялари ҳомийлик ташкилотлари, ҳомийликни амалга оширувчи ёки ҳомийлик олувчи юридик шахслар томонидан ўз банк ҳисобварақларига пул маблағларини ўтказиш орқали, нақд пул ёки мол-мулк шаклида йиғилиши мумкин.

Ҳомийлик ташкилотлари, ҳомийликни амалга оширувчи ёки ҳомийлик олувчи юридик шахслар томонидан ҳомийлик хайрияларини нақд пул шаклида йиғиш фақат хайрия қутиси ёрдамида амалга оширилади, бундан нақд пул шаклидаги ҳомийлик хайрияларини уларнинг банк ҳисобварақларига қонунчиликда белгиланган тартибда ўтказиш ҳоллари мустасно.

Ҳомийлик ташкилотлари, ҳомийликни амалга оширувчи ёки ҳомийлик олувчи юридик шахслар томонидан ҳомийлик хайриялари мол-мулк шаклида йиғилган тақдирда, қабул қилиб олинган мол-мулк рўйхати шакллантирилиб, мол-мулкнинг тури, миқдори (ҳажми) кўрсатилган ҳолда далолатнома тузилади.

Ҳомийлик хайрияларини йиғиш жараёни бошланишидан камида бир кун олдин ҳомийлик ташкилотлари, ҳомийликни амалга оширувчи ёки ҳомийлик олувчи юридик шахслар ҳомийлик хайрияларини йиғиш шаклларига қараб, улар йиғиладиган банк ҳисобварақлари, хайрия қутилари жойлаштириладиган ва мол-мулк йиғиладиган манзиллар, ҳомийлик хайрияларини йиғишнинг мақсади, муддатлари, зарур бўлган пул маблағининг (мол-мулкнинг) миқдори тўғрисида ва ҳомийлик ташкилотлари, ҳомийликни амалга оширувчи ёки ҳомийлик олувчи юридик шахслар билан боғланиш учун маълумотларни оммавий ахборот воситаларида ёки ўз расмий веб-сайтида ёхуд ижтимоий тармоқлардаги саҳифаларида эълон қилади.

Ҳомийлик ташкилотлари ва ҳомийликни амалга оширувчи юридик шахслар йиғилган ҳомийлик хайриялари миқдори тўғрисидаги маълумотни ҳомийлик хайриялари йиғиш жараёни тугагач бир кун ичида оммавий ахборот воситаларида ёки ўз расмий веб-сайтида ёхуд ижтимоий тармоқлардаги саҳифаларида эълон қилади.

Ҳомийлик ташкилотлари, ҳомийликни амалга оширувчи ёки ҳомийлик олувчи юридик шахслар йиғилган ҳомийлик хайрияларидан ҳомийлик мақсадларида фойдаланилганлиги тўғрисидаги батафсил маълумотни тегишли солиқ ҳисоботида акс эттириши шарт.

Жисмоний шахс ҳомийлик хайрияларини фақат ўзи ёки яқин қариндошлари (ота-онаси, туғишган ва ўгай ака-укаси ва опа-сингиллари, эри (хотини), фарзанди, шу жумладан фарзандликка олинган болалари, бобоси, бувиси, неваралари, шунингдек эрнинг (хотиннинг) ота-онаси, туғишган ва ўгай ака-ука ва опа-сингиллари) учун ўз банк ҳисобварақларига ёки шахсий банк картасига пул ўтказиш орқали, нақд пул ёки мол-мулк шаклида йиғишга ҳақли.

Кўнгиллилар ҳомийлик олувчиларнинг манфаатларини кўзлаб, ҳомийлик хайрияларини йиғишга фақат эълон бериш орқали кўмаклашади, бундан ушбу модданинг саккизинчи қисмида назарда тутилган ҳоллар мустасно. Бунда ҳомийлик хайрияларини йиғиш ҳомийлик олувчи жисмоний шахслар ёки уларнинг яқин қариндошлари номларига очилган банк ҳисобварақларига ёки шахсий банк карталарига пул ўтказиш орқали ёки уларга бевосита нақд пул (мол-мулк) бериш орқали, шунингдек ҳомийлик олувчи юридик шахсларнинг банк ҳисобварақларига пул маблағларини ўтказиш ёки уларга мол-мулк бериш орқали амалга оширилади.

Жисмоний шахслар томонидан ҳомийлик олувчиларнинг манфаатларини кўзлаб ҳомийлик хайрияларини йиғишга ҳамда пул йиғиш учун ўзига тегишли бўлган банк ҳисобварақлари ва банк карталари рақамлари ҳақида эълон беришига йўл қўйилмайди, бундан ушбу модданинг саккизинчи қисмида назарда тутилган ҳоллар мустасно.

Ҳомийлик хайрияларини йиғиш учун хайрия қутиларидан фақат ҳомийлик ташкилотлари, ҳомийликни амалга оширувчи ва ҳомийлик олувчи юридик шахслар фойдаланади.

Хайрия қутиси шаффоф бўлиши ва уни очиш жойи ҳомийлик ташкилотининг, ҳомийликни амалга оширувчи ёки ҳомийлик олувчи юридик шахснинг раҳбари ёки у ваколат берган шахс томонидан имзоланган ҳамда ҳомийлик ташкилотининг, ҳомийликни амалга оширувчи ёки ҳомийлик олувчи юридик шахснинг муҳри билан муҳрланган қоғозли пломба ёки рақамланган пломба билан пломбаланган бўлиши шарт.

Ҳомийлик ташкилоти, ҳомийликни амалга оширувчи ёки ҳомийлик олувчи юридик шахс томонидан хайрия қутисида ҳомийлик хайрияларини йиғиш мақсади тўғрисидаги ахборот, ўзининг расмий номи ва юридик манзили, у билан алоқа боғлашга доир маълумотлар, шунингдек расмий веб-сайти ёки ижтимоий тармоқлардаги саҳифалари ҳақидаги маълумотлар жойлаштирилиши шарт.

Хайрия қутисини ўрнатиш кўчмас мулк эгаси ёки у ваколат берган шахс ва ҳомийлик ташкилоти, ҳомийликни амалга оширувчи ёки ҳомийлик олувчи юридик шахс ўртасида ёзма шаклда тузилган шартнома асосида амалга оширилади (бундан кўчмас мулк ҳомийлик ташкилотининг, ҳомийликни амалга оширувчи ёки ҳомийлик олувчи юридик шахснинг эгалигида ёки фойдаланишида бўлган ҳоллар, шунингдек хайрия қутисининг ҳомийлик ташкилоти, ҳомийликни амалга оширувчи ёки ҳомийлик олувчи юридик шахс томонидан ташкил этиладиган тадбир жойида ва тадбир вақтида ўрнатилганлиги ҳоллари мустасно). Хайрия қутисини кўчмас мулк ҳудудида сақлаш шартлари шартномада кўрсатилади.

Хайрия қутисидаги йиғилган пул маблағлари хайрия қутиси тўлганда, тўпланган маблағлардан фойдаланиш эҳтиёжи юзага келганда ёки ҳомийлик хайрияларини йиғиш муддатлари тугаганда олинади.

Хайрия қутиси ҳомийлик ташкилотининг, ҳомийликни амалга оширувчи ёки ҳомийлик олувчи юридик шахснинг ваколатли ходими томонидан камида икки нафар холис ҳозирлигида хайрия қутиси ўрнатилган жойда очилади ва ҳисоблаб чиқилади. Хайрия қутисини очиш ва маблағларни ҳисоблаб чиқиш жараёни видеоёзувга олинади.

Хайрия қутисидан олинган пул маблағларининг миқдори ҳомийлик ташкилотининг, ҳомийликни амалга оширувчи ёки ҳомийлик олувчи юридик шахснинг ваколатли ходими ва камида икки нафар холис томонидан имзоланадиган далолатномада қайд этилади.

Далолатнома ва видеоёзув ҳомийлик ташкилотида, ҳомийликни амалга оширувчи ёки ҳомийлик олувчи юридик шахсда сақланади ҳамда далолатнома тузилган кундан эътиборан бир кун ичида далолатномадаги маълумотлар оммавий ахборот воситаларида ёки уларнинг расмий веб-сайтида ёхуд ижтимоий тармоқлардаги саҳифаларида эълон қилинади.

Пул маблағлари ҳомийлик ташкилоти, ҳомийликни амалга оширувчи ёки ҳомийлик олувчи юридик шахс томонидан хайрия қутисидан олинган кунда ёки кейинги иш кунида ҳомийлик ташкилотининг, ҳомийликни амалга оширувчи ёки ҳомийлик олувчи юридик шахснинг банкдаги ҳисобварағига ўтказилиши шарт.

Ушбу модданинг қоидалари эҳсон қутиларини ўрнатган диний ташкилотларга ва улар томонидан ташкил этилган жамоат фондларига нисбатан татбиқ этилмайди.

Ҳомийлик ташкилотлари жамоат бирлашмаси, жамоат фонди шаклида, шунингдек қонун ҳужжатларида назарда тутилган бошқа шаклда ташкил этилиши мумкин.

Ҳомийлик ташкилотлари ўз фаолиятларини мувофиқлаштириш, шунингдек умумий манфаатларини ифода этиш ва ҳимоя қилиш мақсадида нодавлат нотижорат ташкилотлари ҳисобланувчи уюшмаларга (иттифоқларга) ва ўзга бирлашмаларга бирлашишлари мумкин.

Ҳомийлик ташкилотларининг ташкилий-ҳуқуқий шаклига қараб юридик ва (ёки) жисмоний шахслар уларнинг муассислари бўлиши мумкин.

Давлат ҳокимияти ва бошқаруви органлари, фуқароларнинг ўзини ўзи бошқариш органлари, шунингдек, давлат муассасалари ҳамда ташкилотлари ҳомийлик ташкилотининг муассислари бўлиши мумкин эмас.

Ҳомийлик ташкилотларини давлат рўйхатидан ўтказиш қонунчиликда белгиланган тартибда адлия органлари томонидан амалга оширилади.

Адлия органининг ҳомийлик ташкилотини давлат рўйхатидан ўтказишни рад этиш ҳақидаги қарори, шунингдек мазкур органнинг давлат рўйхатидан ўтказиш муддатларини бузганлиги устидан судга шикоят қилиниши мумкин.

Бинолар, ер участкалари, транспорт, иншоотлар, асбоб-ускуналар, пул маблағлари, қимматли қоғозлар ва бошқа мол-мулк, шунингдек ахборот ресурслари ва ўзга интеллектуал фаолият натижалари ҳомийлик ташкилотининг мулки бўлиши мумкин.

Ҳомийлик ташкилоти ўзида бўлган мол-мулкка нисбатан қонунчиликка, ташкилотнинг уставига ва ҳомийлик мақсадларига зид бўлмаган ҳар қандай битим тузишга ҳақли.

Ҳомийлик ташкилоти ўз таъминоти (шу жумладан фаолияти билан боғлиқ барча харажатлари) учун молия йилида ўзи сарфлайдиган молиявий маблағларнинг кўпи билан 30 фоизидан фойдаланишга ҳақли. Ушбу чеклов ҳомийлик дастурларини амалга оширишда иштирок этадиган шахсларнинг меҳнатига ҳақ тўлашга нисбатан қўлланилмайди.

Ҳомийлик ташкилоти кўнгиллиларнинг ушбу ташкилотдаги фаолияти билан боғлиқ харажатларини (хизмат сафари, транспорт харажатларини ва бошқа харажатларини) тўлаши мумкин.

Ўзбекистон Республикаси Давлат бюджети ва давлат мақсадли жамғармаларидан ҳомийлик ташкилотининг ҳисобварағига тушган маблағлардан фақат бу маблағларни ажратиш чоғида назарда тутилган ҳомийлик мақсадлари учун фойдаланилади.

Ҳомийлик ташкилотларига берилган ҳомийлик хайрияларидан фақат ҳомийлик мақсадларида фойдаланилади ва бу хайриялардан ҳомийлик ташкилотларини сақлаш учун фойдаланилиши мумкин эмас.

Ҳомийлик ташкилотининг мол-мулки бу ташкилотнинг муассисларига ёки аъзоларига бошқа шахсларга сотилиши ёхуд берилишига қараганда қулайроқ шартларда сотилиши ёки берилиши мумкин эмас.

Ҳомийлик ташкилоти ўз мажбуриятлари юзасидан қонунда белгиланган тартибда ундирув қаратилиши мумкин бўлган мол-мулки билан жавоб беради.

Ҳомийлик ташкилотининг мол-мулкини шакллантириш манбалари қуйидагилар бўлиши мумкин:

ҳомийлик ташкилоти муассисларининг бадаллари, аъзоликка асосланган ҳомийлик ташкилотлари учун эса аъзолик бадаллари;

юридик ва жисмоний шахсларнинг пул ва (ёки) бошқа мол-мулк шаклидаги ҳомийлик хайриялари;

акциялар ва бошқа қимматли қоғозлардан олинган даромадлар;

қонун билан рухсат этилган тадбиркорлик фаолиятидан олинган даромадлар, шу жумладан ҳомийлик ташкилоти таъсис этган тижорат тузилмаларидан тушган тушумлар;

ҳомийлар ва кўнгиллиларни жалб этиш, шу жумладан ҳомийлик хайриялари йиғиш мақсадида ўтказиладиган кўнгилочар, маданий, спорт тадбирлари ва бошқа оммавий тадбирларни ташкил этиш кампанияларини ўтказишдан тушадиган маблағлар;

қонунчиликда белгиланган тартибда лотереялар ва кимошди савдолари ўтказишдан олинган даромадлар;

Ўзбекистон Республикаси Давлат бюджети ва давлат мақсадли жамғармалари маблағлари;

қонунчиликда тақиқланмаган бошқа тушумлар.

Ҳомийлик дастури ҳомийлик ташкилотининг юқори бошқарув органи томонидан тасдиқланган ва мазкур ташкилотнинг уставда белгиланган мақсадларига мос келадиган вазифаларни ҳал қилишга қаратилган тадбирлар мажмуидир.

Ҳомийлик дастури мўлжалланаётган тушумлар ҳамда режалаштирилаётган харажатлар сметасини (шу жумладан ҳомийлик дастурини амалга оширишда иштирок этаётган шахсларнинг меҳнатига ҳақ тўлашни) ўз ичига олади, дастурни амалга ошириш босқичлари ва муддатларини белгилайди.

Ҳомийлик дастурларини (шу жумладан ҳомийлик дастурларини амалга оширишда иштирок этаётган шахсларнинг меҳнатига ҳақ тўлаш харажатларини ва ҳомийлик дастурларини амалга ошириш билан боғлиқ бошқа харажатларни) молиялаштириш учун молия йилида тушган даромадларнинг, қонун билан рухсат этилган тадбиркорлик фаолиятидан олинган даромадларнинг, шу жумладан ҳомийлик ташкилоти таъсис этган тижорат тузилмаларидан тушган тушумларнинг камида 70 фоизидан фойдаланилиши керак.

Ҳомийлик дастурлари амалга оширилаётганда тушган маблағлардан шу дастурларда белгиланган муддатларда фойдаланилади.

Ҳомийлик ташкилотини қайта ташкил этиш ва тугатиш қонунда белгиланган тартибда амалга оширилади.

Ҳомийлик ташкилоти тугатилганда унинг кредиторлар талаблари қаноатлантирилганидан кейин қолган мол-мулкидан ташкилот уставида назарда тутилган тартибда ёки, агар ҳомийлик ташкилотининг мол-мулкидан фойдаланиш тартиби унинг уставида назарда тутилмаган бўлса ёхуд қонунда бошқача тартиб белгиланмаган бўлса, тугатиш комиссиясининг қарорига биноан ҳомийлик мақсадларида фойдаланилади.

Ҳомийлик субъектларининг ҳуқуқлари ва қонуний манфаатлари давлат томонидан кафолатланади.

Ҳомийлик субъектининг ўз ҳомийлик мақсадларини ва амалга ошириш шаклларини танлаш эркинлигини чеклашга йўл қўйилмайди.

Давлат ҳомийликни қуйидаги шаклларда қўллаб-қувватлаши мумкин:

ҳомийлик ташкилотлари ишлаб чиқадиган ҳомийлик дастурларини танлов асосида давлат томонидан молиялаштириш;

давлат мол-мулкини ҳомийлик ташкилотларига қонунчиликда назарда тутилган тартибда бепул ёки имтиёзли асосда мулк қилиб бериш;

давлат мулки бўлган бинолар, жойлар ва бошқа мол-мулк ижараси ҳақини тўлаш бўйича имтиёзлар бериш;

ҳомийлик ташкилотларининг моддий-техника базасини мустаҳкамлашга кўмаклашиш;

ҳомийлар, кўнгиллилар ҳамда ҳомийлик ташкилотларини рағбатлантириш.

Қонунчиликка мувофиқ давлат ҳомийликни бошқа шаклларда ҳам қўллаб-қувватлаши мумкин.

Ҳомийлик олувчилар томонидан ҳомийлик хайрияларининг олиниши уларнинг қонунчиликда белгиланган бошқа ёрдам турларидан, тўловлардан ёки имтиёзлардан фойдаланишини чеклаш ёки тўхтатиш учун асос бўлмайди.

Ҳомийлик субъектларига қонунчиликка мувофиқ имтиёзлар берилади.

Адлия органлари ҳомийлик ташкилотининг устави қоидаларига риоя этилиши устидан ўз ваколатлари доирасида назоратни амалга оширади.

Ҳомийлик ташкилотининг молиялаштириш манбалари ва даромадлари ҳамда солиқлар ва бошқа мажбурий тўловларни тўлаши устидан давлат солиқ хизмати органлари қонунчиликка мувофиқ давлат назоратини амалга оширади.

Ҳомийлик ташкилотининг фаолияти тўғрисидаги ҳисобот қонунчиликда назарда тутилган тартибда адлия ва давлат солиқ хизмати органларига тақдим этилади.

Ҳомийлик ташкилотига мол-мулк, шу жумладан пул маблағлари берувчи ҳомийлар мазкур ташкилотдан шу мол-мулкдан мақсадли фойдаланилганлиги тўғрисида ҳисобот талаб қилишга ҳақли.

Ҳомийлик ташкилоти ўз йиллик ҳисоботларидан эркин фойдаланилишини таъминлайди.

Ҳомийлик ташкилоти даромадлари ва харажатларининг миқдорлари ҳамда тузилиши, мол-мулки, ходимларининг сони, уларнинг меҳнатига ҳақ тўлаш ва кўнгиллиларни жалб этиш тўғрисидаги маълумотлар тижорат сири бўлмайди.

Адлия органлари ҳомийлик ташкилоти томонидан ўтказиладиган тадбирларда иштирок этиш учун ўз вакилларини юборишга, мазкур ташкилот аъзоларидан ва бошқа фуқаролардан ҳомийлик ташкилотининг уставига риоя этилиши билан боғлиқ масалалар юзасидан тушунтиришлар олишга ҳақли.

Ҳомийлар, кўнгиллилар ҳамда ҳомийлик ташкилотлари Ўзбекистон Республикасининг қонунчилигида ҳамда халқаро шартномаларида белгиланган тартибда халқаро ҳомийлик фаолиятини амалга оширишга ҳақли.

Халқаро ҳомийлик фаолияти халқаро ҳомийлик лойиҳаларида, халқаро ҳомийлик ташкилотларининг ишида иштирок этиш, ҳомийлик фаолияти соҳасида хорижий шериклар билан ҳамкорлик қилиш орқали, шунингдек халқаро амалиётда қабул қилинган ҳамда халқаро ҳуқуқ принциплари ва нормаларига, Ўзбекистон Республикасининг Конституциясига ва Ўзбекистон Республикасининг қонунчилигига зид бўлмаган бошқа ҳар қандай шаклда амалга оширилиши мумкин.

Ҳомийлик ташкилоти чет эл фуқароларидан, фуқаролиги бўлмаган шахслардан, халқаро ва чет эл ташкилотларидан Ўзбекистон Республикасининг қонунчилигига мувофиқ ҳомийлик хайриялари олиш ҳуқуқига эга.

Чет эл фуқаролари, фуқаролиги бўлмаган шахслар, халқаро ва чет эл ташкилотлари Ўзбекистон Республикаси ҳудудида ҳомийлар ва кўнгиллилар сифатидаги фаолиятни ушбу Қонунга мувофиқ амалга оширишлари мумкин.

Чет эл фуқароларининг, фуқаролиги бўлмаган шахсларнинг, шунингдек халқаро ва чет эл ташкилотларининг ҳомийлик хайрияларидан мақсадли фойдаланилиши мониторингини олиб бориш ҳамда бундай хайриялардан мақсадли фойдаланилиши устидан назорат қилиш Ўзбекистон Республикаси Вазирлар Маҳкамаси томонидан белгиланадиган тартибда амалга оширилади.

Ушбу Қонунда манфаатлар тўқнашуви деганда ҳомийлик ташкилоти ва манфаатдор шахслар (мазкур ташкилот бошқарув органларининг ходимлари, шу жумладан мансабдор шахслари, аъзолари, уларнинг яқин қариндошлари ёки кредиторлари, шунингдек ўзларининг ҳомийлик ташкилоти билан ўзаро муносабатлари оқибатида ташкилотнинг мол-мулкини тасарруф қилишга таъсир этиши мумкин бўлган ҳамда шахсий манфаат кўриш мақсадида ташкилот билан шахсан ёки ўз вакиллари орқали ҳамкорлик қилувчи юридик ва жисмоний шахслар) ўртасида амалга ошириладиган, ҳомийлик ташкилотининг мол-мулкини тасарруф этишга дахлдор бўлган, ҳомийлик фаолиятининг манфаатлари ҳамда мақсадларига мос келмаган ёки мос келмаслиги мумкин бўлган битимлар ва (ёки) операциялар эътироф этилади.

Ҳомийлик ташкилотининг манфаатдор шахслар билан битимлар тузишига, шунингдек ҳомийлик ташкилоти томонидан манфаатдор шахслар фойдасига бошқа ҳаракатлар амалга оширилишига ҳомийлик ташкилотининг юқори бошқарув органи розилиги билан йўл қўйилади.

Манфаатлар тўқнашуви чоғида вужудга келадиган низолар ҳомийлик ташкилотининг юқори бошқарув органи томонидан, келишувга эришилмаган тақдирда эса суд томонидан ҳал қилинади.

Ҳомийликни амалга ошириш соҳасида юзага келадиган низолар қонунчиликда белгиланган тартибда ҳал этилади.

Ҳомийлик тўғрисидаги қонунчиликни бузганликда айбдор шахслар белгиланган тартибда жавобгар бўладилар.

Ўзбекистон Республикаси Вазирлар Маҳкамаси:

ҳукумат қарорларини ушбу Қонунга мувофиқлаштирсин;

давлат бошқаруви органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.

Ушбу Қонун расмий эълон қилинган кундан эътиборан кучга киради.