Америка Қўшма Штатлари Ҳукумати билан Ўзбекистон Республикаси Ҳукумати ўртасида тузилган «Тараққиёт учун озиқ-овқатлар» дастури бўйича қишлоқ хўжалиги маҳсулотлари етказиб бериш тўғрисидаги Битим доирасида Ўзбекистон Республикасига берилган грантдан самарали фойдаланишни таъминлаш мақсадида Вазирлар Маҳкамаси қарор қилади:

1. Ҳукуматлараро битимга мувофиқ тузилган Ўзбекистон—Америка қўшма ишчи гуруҳининг «Тараққиёт учун озиқ-овқатлар» дастури бўйича қишлоқ хўжалиги маҳсулотини сотишдан тушаётган грант маблағлари ҳисобига иловага мувофиқ қишлоқ ва сув хўжалиги соҳасидаги устувор лойиҳаларни молиялаштириш тўғрисидаги таклифига розилик берилсин.

2. Ўзбекистон Республикаси Иқтисодиёт вазирлиги, Молия вазирлиги Қишлоқ ва сув хўжалиги вазирлиги билан биргаликда иловада назарда тутилган капитал қурилиш объектларини белгиланган тартибда 2005 йил учун қурилишларнинг аниқ рўйхатига киритсин.

3. Ўзбекистон Республикаси Молия вазирлиги лойиҳада кўрсатилган устувор лойиҳалар Молия вазирлигининг «Тараққиёт учун озиқ-овқатлар» дастури бўйича тушаётган маблағларни жамлаш учун очилган махсус ҳисоб рақамидан молиялаштирилишини таъминласин.

4. Ўзбекистон Республикаси Қишлоқ ва сув хўжалиги вазирлиги, Ўзбекистон Республикаси Ер ресурслари, геодезия, картография ва давлат кадастри давлат қўмитаси «Тараққиёт учун озиқ-овқатлар» дастури бўйича олинган маблағлардан мақсадли фойдаланилишини таъминласин ва лойиҳаларнинг амалга оширилиши тўғрисидаги ахборотни йилнинг ҳар чорагида Ўзбекистон Республикаси Ташқи иқтисодий алоқалар, инвестициялар ва савдо вазирлигига ҳамда Молия вазирлигига тақдим этсин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари В.А.Голишев зиммасига юклансин.