Zamonaviy xalqaro talablarga javob beradigan avtomobil yo‘llari tarmog‘ini yanada rivojlantirish, transport kommunikatsiyalari tizimining xalqaro transport koridorlariga keng integratsiyalashuvini ta’minlash, transport xarajatlarini qisqartirish chora-tadbirlarini amalga oshirish, umum foydalanadigan avtomobil yo‘llarini loyihalashtirish, qurish, ta’mirlash va mablag‘ bilan ta’minlashga yo‘naltiriladigan davlat moliyaviy resurslaridan samarali foydalanish, shuningdek, O‘zbekiston Respublikasi Moliya vazirligi huzuridagi Respublika yo‘l fondi tarkibini takomillashtirish va uning samaradorligini oshirish maqsadida:

1. Quyidagilar:

Xalqaro transport koridorlari tarkibiga kiruvchi umum foydalanadigan avtomobil yo‘llarini rekonstruksiya qilish, kapital va o‘rtacha ta’mirlash ishlarining 2006-yilgi Dasturi 1-ilovaga* muvofiq;

respublika ichki viloyatlararo umum foydalanadigan avtomobil yo‘llarini rekonstruksiya qilish, kapital va o‘rtacha ta’mirlash ishlarining 2006-yilgi Dasturi 2-ilovaga* muvofiq;

2006-yilda viloyatlar va tumanlar ichidagi umum foydalanadigan avtomobil yo‘llarini kapital va joriy ta’mirlashning yig‘ma parametrlari 3-ilovaga* muvofiq tasdiqlansin.

2. Qurilish, rekonstruksiya qilish va ta’mirlash ishlarini amalga oshirishda buyurtmachi, texnik va moliyaviy nazorat o‘rnatish vazifasi:

xalqaro transport koridorlari tarkibiga kiruvchi umum foydalanadigan avtomobil yo‘llari, respublika ichki viloyatlararo yo‘llar — O‘zbekiston Respublikasi Moliya vazirligi huzuridagi Respublika yo‘l fondi zimmasiga;

viloyatlar va tumanlar ichidagi umum foydalanadigan avtomobil yo‘llari — Qoraqalpog‘iston Respublikasi Vazirlar Kengashi va viloyatlar hokimliklari huzuridagi yagona buyurtmachi xizmatlari zimmasiga yuklansin.

Buyurtmachilar bajarilgan ishlarni nazorat qilish va qabul qilib olishda qurilish, rekonstruksiya qilish, kapital va joriy ta’mirlash kabi ish turlari bo‘yicha loyiha-smeta hujjatlari parametrlari va ularning alohida pudratchi tashkilotlar bajargan ishlar hajmi va sifatiga mos kelishi aniq ko‘rsatiladigan qat’iy tartibga rioya etsinlar.

3. O‘zbekiston Respublikasi Moliya vazirligining, 4-ilovaga* muvofiq, Respublika yo‘l fondi Ijroiya direksiyasi tarkibida daromadlarni prognoz qilish va dasturlarni moliyalashtirish boshqarmasi hamda xalqaro, respublika ichki va viloyatlararo umum foydalanadigan avtomobil yo‘llarini qurish, rekonstruksiya qilish va ta’mirlash konsepsiyasi hamda dasturlarini amalga oshirish boshqarmasini tashkil etgan holda uning tashkiliy tuzilmasi bo‘yicha takliflari qabul qilinsin.

4. O‘zbekiston Respublikasi Moliya vazirligi huzuridagi Respublika yo‘l fondi O‘zbekiston transport va transport kommunikatsiyalari uyushmasi, “O‘zavtoyo‘l” DAK, “Yo‘l-Loyiha byurosi” loyihalash instituti, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda uch oy muddatda 2007—2010-yillarda umum foydalanadigan avtomobil yo‘llarini rivojlantirish konsepsiyasi va dasturini ishlab chiqsin hamda belgilangan tartibda Vazirlar Mahkamasiga taqdim etsin.

Mazkur hujjatni ishlab chiqishda avtomobil yo‘llarini qurish va rekonstruksiya qilishni tashkil etishning ustuvor yo‘nalishlarini belgilovchi quyidagi asosiy mezonlarga amal qilinsin:

a) yo‘l kategoriyasi va transportda tashish hajmlaridan kelib chiqqan holda, yo‘l tarmog‘ining tegishli darajada o‘tkazish qobiliyatini talab etadigan transport serqatnovligi;

b) yo‘llar va muhandislik inshootlarining zamonaviy xalqaro talabalarga javob beradigan yuksak texnikaviy darajasini ta’minlash asosida yo‘l harakati xavfsizligi va ishonchliligi;

v) yo‘l qurilishi sohasiga zamonaviy texnologiyalarni tadbiq etish, yo‘l kategoriyasiga qarab xarajatlarni optimallashtirish hisobiga avtomobil yo‘llari qurish va rekonstruksiya qilishga xarajatlarning nisbatan kam sarflanishi.

5. O‘zbekiston Respublikasi Moliya vazirligi, Iqtisodiyot vazirligi, O‘zbekiston transport va transport kommunikatsiyalari uyushmasi va “O‘zavtoyo‘l” DAKning Avtomobil yo‘llarini rekonstruksiya qilish va qurilishini amalga oshirish bo‘yicha “O‘zavtoyo‘l” davlat-aksiyadorlik kompaniyasiga qarashli birlashgan direksiyasini tugatish to‘g‘risidagi taklifiga rozilik berilsin.

6. Umum foydalanadigan avtomobil yo‘llarini, jumladan 2007—2010-yillarda rivojlantirish konsepsiyasi va dasturini tayyorlash uchun javobgarlik O‘zbekiston Respublikasi Moliya vazirligi huzuridagi Respublika yo‘l fondiga va “O‘zavtoyo‘l” davlat-aksiyadorlik kompaniyasiga hisobot beruvchi “Yo‘l-Loyiha byurosi” loyihalash instituti zimmasiga yuklansin.

“Yo‘l-Loyiha byurosi” loyihalash instituti tuzilmasida umum foydalanadigan avtomobil yo‘llarini rivojlantirish konsepsiyasi va dasturini tayyorlash bo‘yicha bo‘lim tashkil etilsin.

7. O‘zbekiston Respublikasi Vazirlar Mahkamasi bir oy muddatda:

Respublika yo‘l fondining daromadlarini shakllantirish va uning mablag‘larini sarflash tartibi to‘g‘risida yangi tahrirdagi nizomni, Avtomobil yo‘llarini loyihalashtirish, qurish va rekonstruksiya qilish tartibi to‘g‘risidagi nizomni, Bajarilgan ishlar sifatini nazorat qilish va qabul qilib olish to‘g‘risidagi nizomni, shuningdek, umum foydalanadigan avtomobil yo‘llarini ta’mirlash va mablag‘ bilan ta’minlash bo‘yicha ishlar Tasnifini tasdiqlasin;

tarmoqda xususiylashtirish jarayonlari chuqurlashuvini hisobga olgan holda “O‘zavtoyo‘l” DAK tashkiliy tuzilmasini takomillashtirish, shuningdek, ekspluatatsiya va pudrat tashkilotlarini optimallashtirish bo‘yicha takliflar kiritsin.

8. O‘zbekiston Respublikasi Adliya vazirligi, Iqtisodiyot vazirligi, Moliya vazirligi hamda boshqa manfaatdor idoralar va tashkilotlar bilan birgalikda uch oy muddatda respublika avtomobil yo‘llari tizimini rivojlantirishning zamonaviy bosqichi talablaridan, avtomobil yo‘llarini qurish va foydalanishni tashkil etishning xalqaro tajribasidan kelib chiqqan holda “O‘zbekiston Respublikasi avtomobil yo‘llari to‘g‘risida” yangi tahrirdagi Qonuni loyihasini ishlab chiqsin va kiritsin.

9. O‘zbekiston Respublikasi Moliya vazirligi, Iqtisodiyot vazirligi:

15,0 mlrd. so‘m miqdordagi Respublika yo‘l fondi daromadlarini 2006-yilda maktab ta’limini rivojlantirish Davlat umummilliy Dasturini moliyalashtirish uchun Maktab ta’limi jamg‘armasiga yo‘naltirsin;

Respublika yo‘l fondi daromad qismining amaliy ijrosi bo‘yicha har chorak yakunlariga ko‘ra prognoz qilingandan ortiq tushumlardan foydalanish bo‘yicha takliflar kiritsin.

10. “O‘zbekiston Respublikasining 2006-yilgi Investitsiya dasturi to‘g‘risida” O‘zbekiston Respublikasi Prezidentining 2005-yil 8-noyabrdagi PQ-216-son qarorining 4-ilovasiga 2006-yilda avtomobil yo‘llari qurish va rekonstruksiya qilish dasturini amalga oshirish uchun markazlashtirilgan kapital mablag‘larning limitlarini hisobga olgan holda 5-ilovaga* muvofiq tegishli o‘zgartishlar kiritilsin.

11. Ushbu qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.