Keyingi yillarda tadbirkorlik subyektlarining huquqlarini, erkinliklarini va qonuniy manfaatlarini ishonchli himoya qilish mexanizmlarini takomillashtirish borasida salmoqli ishlar amalga oshirilmoqda.

Shu bilan birga qonun talablarini buzgan tadbirkorlik subyektlariga nisbatan huquqiy taʼsir choralarini qoʻllash va bunday huquqbuzarlik bartaraf etilganidan keyin tadbirkorlik subyektining ish faoliyatini tezda tiklash imkoniyatini cheklaydigan ayrim ortiqcha maʼmuriy tartib-taomillar saqlanib qolmoqda.

Mazkur Qonun bilan Oʻzbekiston Respublikasining Iqtisodiy protsessual kodeksiga banklardagi hisobvaraqlar boʻyicha operatsiyalarni toʻxtatib turish tarzidagi huquqiy taʼsir chorasini qoʻllash toʻgʻrisidagi arizaga ilova qilinadigan hujjatlar doirasiga taalluqli oʻzgartirishlar kiritilmoqda.

Shuningdek Oʻzbekiston Respublikasining Soliq kodeksiga tadbirkorlik subyektining banklardagi hisobvaraqlari boʻyicha operatsiyalarni toʻxtatib turish yuzasidan chiqarilgan soliq organining qaroriga nisbatan tadbirkorlik subyekti tomonidan eʼtiroz bildirilgan taqdirda, ushbu huquqiy taʼsir chorasini qoʻllash masalasi sud tartibida koʻrib chiqilishini, chiqarilgan qarorni mazkur operatsiyalarni toʻxtatib turish uchun asos boʻlgan holatlar bartaraf etilgach bekor qilish tartibini nazarda tutuvchi oʻzgartirish va qoʻshimchalar kiritilmoqda.

Ushbu Qonun banklardagi hisobvaraqlari boʻyicha operatsiyalar toʻxtatib turilgan tadbirkorlik subyektlarining oʻz faoliyatini tezda tiklash imkoniyatini cheklaydigan ortiqcha tartib-taomillarni bartaraf etishga va tadbirkorlik subyektlari faoliyatining barqarorligini taʼminlashga xizmat qiladi.

1-modda. Oʻzbekiston Respublikasining 2018-yil 24-yanvarda qabul qilingan OʻRQ-461-sonli Qonuni bilan tasdiqlangan Oʻzbekiston Respublikasining Iqtisodiy protsessual kodeksiga (Oʻzbekiston Respublikasi Oliy Majlisi palatalarining Axborotnomasi, 2018-yil, 1-songa 2-ilova, № 7, 433-modda, № 10, 672-modda; 2019-yil, № 3, 166-modda, № 5, 261, 266-moddalar, № 9, 592-modda, № 10, 671-modda, № 11, 791-modda, № 12, 880-modda; 2020-yil, № 1, 1-modda, № 3, 198-modda, № 10, 593-modda; 2021-yil, № 1, 10-modda, 4-songa ilova, № 8, 803-modda, № 9, 903-modda; 2022-yil, № 3, 216-modda, № 5, 463-modda, № 6, 577-modda, № 8, 787-modda; 2023-yil, № 4, 269-modda, № 12, 1008-modda; 2024-yil, № 2, 111-modda, № 9, 964, 969-moddalar, № 12, 1280, 1286-moddalar; 2025-yil, № 3, 373-modda, № 6, 729-modda, № 9, 1042-modda, № 10, 1153-modda, № 11, 1237-modda, № 12, 1328-modda; 2026-yil, № 2, 132-modda) quyidagi oʻzgartirishlar kiritilsin:

1) 217-modda birinchi qismining beshinchi xatboshisidagi “toʻxtatib qoʻyish, bundan qonunda nazarda tutilgan hollar mustasno” degan soʻzlar “toʻxtatib turish” degan soʻzlar bilan almashtirilsin;

2) 219-modda birinchi qismining 3-bandi quyidagi tahrirda bayon etilsin:

“3) banklardagi hisobvaraqlar boʻyicha operatsiyalarni toʻxtatib turish toʻgʻrisidagi arizaga — soliq toʻlovchi tomonidan bankdagi hisobvaraqlari boʻyicha operatsiyalarni toʻxtatib turish uchun asos boʻladigan qonun talablari buzilganligini tasdiqlovchi dalil, soliq organi tomonidan soliq toʻlovchiga uning bankdagi hisobvaraqlari boʻyicha operatsiyalar toʻxtatib turilishi toʻgʻrisida xabarnoma yuborilganligining dalili, soliq toʻlovchining bankdagi hisobvaraqlari boʻyicha operatsiyalarni toʻxtatib turish toʻgʻrisidagi soliq organining qarori yuzasidan bildirgan eʼtirozi”;

3) 222-modda uchinchi qismining 4-bandidagi “toʻxtatib qoʻyilganligi” degan soʻzlar “toʻxtatib turilganligi” degan soʻzlar bilan almashtirilsin.

2-modda. Oʻzbekiston Respublikasining 2019-yil 30-dekabrda qabul qilingan OʻRQ-599-sonli Qonuni bilan yangi tahrirda tasdiqlangan Oʻzbekiston Respublikasining Soliq kodeksiga (Oʻzbekiston Respublikasi Oliy Majlisi palatalarining Axborotnomasi, 2019-yil, 12-songa 1-ilova; 2020-yil, № 3, 198-modda, № 10, 593-modda, № 11, 652-modda, № 12, 690, 691-moddalar; 2021-yil, № 1, 6-modda, № 4, 294-modda, 4-songa ilova, № 8, 800-modda, № 9, 901-modda, № 10, 968, 969, 972, 973-moddalar, № 12, 1199-modda; 2022-yil, № 2, 79-modda, № 3, 215, 216-moddalar, № 5, 461, 464, 467-moddalar, № 6, 570-modda, № 7, 664, 666-moddalar, № 12, 1190-modda; 2023-yil, № 6, 444, 446-moddalar, № 7, 540-modda, № 12, 1011-modda; 2024-yil, № 2, 106, 110, 111-moddalar, № 4, 346-modda, № 5, 458, 459-moddalar, № 8, 822, 831-moddalar, № 9, 958-modda, № 10, 1076-modda, № 11, 1190-modda, № 12, 1283, 1284, 1296, 1297-moddalar; 2025-yil, № 2, 188, 194-moddalar, № 4, 519, 520, 521, 522-moddalar, № 5, 644, 645-moddalar, № 6, 729, 731-moddalar, № 8, 971-modda, № 10, 1153-modda, № 12, 1322, 1324, 1328, 1329-moddalar; 2026-yil, № 3, 251, 255-moddalar) quyidagi oʻzgartirish va qoʻshimchalar kiritilsin:

1) 111-modda:

birinchi qismi quyidagi tahrirda bayon etilsin:

“Soliq toʻlovchining (soliq agentining) bankdagi hisobvaraqlari boʻyicha operatsiyalarni toʻxtatib turish toʻgʻrisidagi qaror soliq organining rahbari (rahbar oʻrinbosari) tomonidan qabul qilinishi mumkin. Soliq toʻlovchi (soliq agenti) bankdagi hisobvaraqlari boʻyicha operatsiyalarni toʻxtatib turish toʻgʻrisidagi soliq organining qarori yuzasidan eʼtiroz bildirgan taqdirda, soliq toʻlovchining (soliq agentining) bankdagi hisobvaraqlari boʻyicha operatsiyalarni toʻxtatib turish toʻgʻrisidagi qaror soliq organining eʼtiroz taqdim etilgan kundan keyin uch kundan kechiktirmay bergan arizasiga asosan sud tomonidan qabul qilinishi mumkin. Bunda soliq toʻlovchining (soliq agentining) bank hisobvaraqlari boʻyicha operatsiyalari sud tomonidan qaror qabul qilinguniga qadar toʻxtatib turiladi”;

quyidagi mazmundagi yettinchi qism bilan toʻldirilsin:

“Ushbu moddaning uchinchi qismida nazarda tutilgan hollar soliq toʻlovchi (soliq agenti) tomonidan bartaraf etilgan taqdirda, soliq organi soliq toʻlovchining (soliq agentining) bankdagi hisobvaraqlari boʻyicha operatsiyalarni toʻxtatib turish toʻgʻrisidagi qarorini ushbu Kodeksning 112-moddasiga muvofiq bekor qiladi”;

2) 112-moddaning birinchi qismi quyidagi mazmundagi 5-band bilan toʻldirilsin:

“5) ushbu Kodeks 111-moddasining uchinchi qismida belgilangan hollar asosida — soliq toʻlovchining (soliq agentining) bankdagi hisobvaraqlari boʻyicha operatsiyalarni toʻxtatib turishni rad etish toʻgʻrisidagi sudning qarori qonuniy kuchga kirgan kunda”.

3-modda. Oʻzbekiston Respublikasi Oliy sudi, Soliq qoʻmitasi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

4-modda. Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

5-modda. Ushbu Qonun rasmiy eʼlon qilingan kundan eʼtiboran kuchga kiradi.