Nomzodlik va doktorlik dissertatsiyalarining himoyasi bilan bog‘liq bo‘lgan xarajatlarni qoplash ishlarini tartibga keltirish maqsadida Vazirlar Mahkamasi qaror qiladi:

1. O‘zbekiston Respublikasi Oliy attestatsiya komissiyasi ekspert kengashlarining raislari, ilmiy kotiblari va ekspertlari ishlariga haq to‘lash to‘g‘risidagi Nizom 1-ilovaga muvofiq hamda dissertatsiyalarni ixtisoslashtirilgan kengashlarda himoya qilish bilan bog‘liq xarajatlarni qoplash to‘g‘risidagi Nizom 2-ilovaga muvofiq tasdiqlansin.

2. O‘zbekiston Respublikasi Fan va texnika davlat qo‘mitasi dissertatsiya ishlarining himoyasi va ekspertizasi bilan bog‘liq bo‘lgan xarajatlarni qoplash uchun ilmiy-tadqiqot ishlarini amalga oshirishga yo‘naltiriladigan mablag‘lar doirasida pul ajratishni har yili nazarda tutsin.

1. Ekspert kengashining raisiga, (rais yo‘q bo‘lganda) rais o‘rinbosariga va ilmiy kotibiga ekspert kengashining har bir majlisi uchun raislik qiluvchiga va ilmiy kotibga amalda sarflangan vaqt hisobidan soatbay (lekin 5 soatdan ko‘p bo‘lmagan) ish haqi to‘lanadi.

2. O‘zbekiston Respublikasi Oliy attestatsiya komissiyasi ekspert kengashi tomonidan dissertatsiyalar ekspertizasi uchun belgilangan ekspertlarga:

doktorlik dissertatsiyasi ekspertizasi uchun — 8 soat;

nomzodlik dissertatsiyasi ekspertizasi uchun — 5 soat hisobidan soatbay haq to‘lanadi.

3. Dissertatsiyalar ekspertizasini o‘tkazish bilan bog‘liq bo‘lgan xarajatlarni qoplash oliy o‘quv yurtining professori (fan doktorlariga) va dotsenti (fan nomzodlariga) soatbay haq to‘lash stavkalariga binoan Oliy attestatsiya komissiyasiga ajratilgan mablag‘lar hisobidan amalga oshiriladi.

1. Doktorlik va nomzodlik dissertatsiyalari himoyalarini o‘tkazish bilan bog‘liq bo‘lgan xarajatlar quyidagi normativlar asosida qoplanadi:

doktorlik dissertatsiyasi bo‘yicha jami 3 opponentga — fan doktoriga, har biriga 8 soat uchun;

nomzodlik dissertatsiyasi bo‘yicha jami 2 opponentga, shu jumladan, 1 fan doktori va 1 fan nomzodiga, har biriga 6 soat uchun;

doktorlik va nomzodlik dissertatsiyalari avtoreferatlarini 60 nusxadan ko‘p bo‘lmagan miqdorda chiqarish va tarqatish. Xarajatlar O‘zbekiston Respublikasi Davlat matbuot qo‘mitasining o‘quv adabiyotlarini chiqaradigan nashriyotlari uchun belgilangan amaldagi narxlar asosida aniqlanadi;

boshqa shaharlardan keladigan opponentlarning xizmat safari xarajatlari (xizmat safari muddati 3 kundan ko‘p bo‘lmasligi kerak). To‘lovlar O‘zbekiston Respublikasi budjet tashkilotlari uchun belgilangan normativlar asosida amalga oshiriladi. Alohida hollarda doktorlik dissertatsiyalari himoyasida OAK ruxsati bilan respublika tashqarisidan bir opponentni taklif qilishga yo‘l qo‘yiladi. Xorijiy opponentlarning xizmat safari xarajatlarini qoplash taklif qiluvchi tashkilot tomonidan valyutani tartibga solish haqidagi qoidalarga muvofiq amalga oshiriladi.

2. Opponentlar mehnatiga haq to‘lash oliy o‘quv yurtining professori (fan doktorlariga) va dotsenti (fan nomzodlariga) soatbay ish haqi stavkalariga asosan amalga oshiriladi.

3. Huzurida ixtisoslashtirilgan kengashlar ishlayotgan muassasa va tashkilotlarning (valyutadan tashqari) xarajatlarini O‘zbekiston Respublikasi Fan va texnika davlat qo‘mitasi yilning har choragida, tasdiqlovchi moliyaviy hujjatlarga asosan qilingan haqiqiy xarajatlar bo‘yicha qoplaydi.