Kichik biznes subyektlariga kredit va moliya xizmati ko‘rsatishni kengaytirish, mikro moliyalashtirishni rivojlantirishni yanada rag‘batlantirish maqsadida Vazirlar Mahkamasi qaror qiladi:

1. Osiyo taraqqiyot banki Direktorlar kengashi O‘zbekiston Respublikasiga:

“Kichik va mikro moliyalashtirishni rivojlantirish” loyihasini (keyingi o‘rinlarda loyiha deb ataladi) amalga oshirish uchun besh yillik imtiyozli davr bilan 20 yil muddatga 20 mln AQSH dollari miqdorida qarz berilishini;

kredit uyushmalari faoliyati ustidan nazorat tizimini institutsional mustahkamlash bo‘yicha texnik ko‘maklashish maqsadida 400 ming AQSH dollari miqdorida grant berilishini ma’qullaganligi ma’lumot uchun qabul qilinsin.

2. Belgilab qo‘yilsinki:

O‘zbekiston Respublikasiga Osiyo taraqqiyot bankining qarzi O‘zbekiston Respublikasi Hukumati bilan Osiyo taraqqiyot banki o‘rtasida imzolangan Qarz bitimi asosida beriladi;

mazkur Loyiha bo‘yicha O‘zbekiston Respublikasi Moliya vazirligi qarz oluvchi hisoblanadi;

qarzning 5 mln AQSH dollari miqdoridagi qismi kredit uyushmalarini rivojlantirishni moliyalashtirishga, shuningdek Loyihani amalga oshirish davrida (2003—2010-yillar) Qarz bitimida nazarda tutilgan foizlar va vositachilik haqining bir qismini qoplashga yo‘naltiriladi;

qarzning qolgan 15 mln AQSH dollari miqdoridagi qismi kichik biznesni, shuningdek kredit uyushmalarini kreditlash bo‘yicha liniyalar ochish uchun Moliya vazirligi tomonidan “Asaka” banki va “Agrobank” ATBga qayta moliyalashtiriladi;

Qarz bitimi shartlariga muvofiq O‘zbekiston Respublikasi Markaziy banki huzuridagi Moliya sektorini rivojlantirish agentligi, “Asaka” banki va “Agrobank” ATB Loyiha ayrim komponentlarining ijro etuvchi agentliklari hisoblanadi;

“Asaka” banki va “Agrobank” ATBga qayta moliyalashtiriladigan qarz mablag‘larini, shuningdek ular bo‘yicha foizlar va vositachilik haqini to‘lash banklar mablag‘lari hisobiga amalga oshiriladi.

3. Quyidagilar:

Loyihani moliyalashtirish sxemasi 1-ilovaga* muvofiq;

Loyihani amalga oshirish bo‘yicha muvofiqlashtiruvchi kengash tarkibi 2-ilovaga* muvofiq tasdiqlansin, unga Loyihani amalga oshirishni muvofiqlashtirish hamda Osiyo taraqqiyot bankining qarz mablag‘laridan maqsadli va samarali foydalanilishini nazorat qilish vazifalari yuklansin.

4. O‘zbekiston Respublikasi Adliya vazirligi O‘zbekiston Respublikasi Hukumati bilan Osiyo taraqqiyot banki o‘rtasidagi Qarz bitimi yuzasidan belgilangan tartibda yuridik xulosa bersin.

5. O‘zbekiston Respublikasi Moliya vazirligi 2008-yildan boshlab, har yilgi Davlat budjetini shakllantirishda Osiyo taraqqiyot bankining ko‘rsatib o‘tilgan qarzi bo‘yicha asosiy qarzni, foizlar va vositachilik haqini to‘lash uchun tijorat banklarining ushbu maqsadlarga yo‘naltiriladigan mablag‘lariga qo‘shimcha ravishda mablag‘lar ajratishni nazarda tutsin.

6. “Asaka” banki, “Agrobank” ATB va Moliya sektorini rivojlantirish agentligi Osiyo taraqqiyot banki bilan Loyiha bitimlarini imzolasinlar hamda o‘z zimmalariga ko‘rsatib o‘tilgan Loyiha bitimlari shartlariga muvofiq Loyihani ijro etish majburiyatini qabul qilsinlar.

7. Belgilansinki, O‘zbekiston Respublikasi Hukumati bilan Osiyo taraqqiyot banki o‘rtasida imzolangan Qarz bitimiga, O‘zbekiston Respublikasi Soliq kodeksi va Bojxona kodeksiga muvofiq Loyiha doirasida uni amalga oshirish davrida import bo‘yicha olib kelinayotgan tovarlar, ishlar (xizmatlar) bojxona to‘lovlari (bojxonada rasmiylashtirish yig‘imlaridan tashqari), Osiyo taraqqiyot bankining qarz mablag‘lari hisobiga O‘zbekiston Respublikasi hududida xarid qilinadigan tovarlar, ishlar (xizmatlar) esa ko‘rsatib o‘tilgan Loyihani amalga oshirishga O‘zbekiston Respublikasi Hukumatining ulushi sifatida qo‘shilgan qiymat solig‘i to‘lashdan ozod qilinadi.

8. Kredit uyushmalarini rivojlantirishni rag‘batlantirish va moliyaviy xizmatlar bozorida raqobatni oshirish maqsadida:

kredit uyushmalari, bo‘shab qoladigan mablag‘lar sarmoyani ko‘paytirishga va ustav faoliyatini amalga oshirishga yo‘naltirilgan holda 2006-yil 1-yanvargacha daromad (foyda) solig‘i to‘lashdan ozod qilinsin;

belgilansinki, kredit uyushmalarining kreditlashi uchun banklar tomonidan naqd mablag‘lar berish kredit uyushmalari hisob raqamlaridagi mablag‘lar doirasida amalga oshiriladi.

9. O‘zbekiston Respublikasi Moliya vazirligi Davlat soliq qo‘mitasi va Markaziy banki bilan birgalikda kredit uyushmalarini soliqqa tortish tartibi to‘g‘risidagi nizomni bir oy muddatda ishlab chiqsin va belgilangan tartibda tasdiqlasin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov va O‘zbekiston Respublikasi Markaziy banki raisi F.M. Mullajonov zimmasiga yuklansin.