Boshqaruv organlari tuzilmasini takomillashtirish, uni bozor iqtisodiyoti tamoyillari va talablariga muvofiqlashtirish, ularni saqlash sarf-xarajatlarini yanada qisqartirish va kamaytirish maqsadida Vazirlar Mahkamasi qaror qiladi:

1. Ma’muriy-boshqaruv apparati tuzilmasini takomillashtirish va uning xodimlari sonini qisqartirish bo‘yicha Respublika komissiyasining:

vazirliklar, davlat qo‘mitalari, idoralar, uyushmalar, konsernlar, korporatsiyalar, kompaniyalar va ular tasarrufidagi tashkilotlar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari boshqaruv apparati xodimlari sonini 1 — 3-ilovalarga* muvofiq;

vazirlar, davlat qo‘mitalari raislari va idoralar rahbarlari o‘rinbosarlari sonini 5-ilovaga* muvofiq qisqartirish to‘g‘risidagi taklifi qabul qilinsin.

2. Vazirliklar, idoralar, uyushmalar, konsernlar, korporatsiyalar, kompaniyalar va boshqa xo‘jalik birlashmalari, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

boshqaruv apparati xodimlari sonini qisqartirish bo‘yicha belgilangan topshiriqlarning bajarilishini ta’minlasinlar va 1999-yil 1-yanvargacha shtatlar jadvalini ma’muriy-boshqaruv xodimlarining tasdiqlangan cheklangan soniga muvofiqlashtirsinlar;

O‘zbekiston Respublikasi Mehnat vazirligi bilan birgalikda boshqaruv organlari apparatidan bo‘shab qoladigan xodimlarni ish bilan ta’minlash va ijtimoiy himoya qilish masalalarini qonunchilikda belgilangan tartibda hal etsinlar.

3. O‘zbekiston Respublikasi Moliya vazirligi 1999-yil uchun Davlat budjetini shakllantirishda budjet tashkilotlari bo‘yicha ma’muriy-boshqaruv apparatini saqlash sarf-xarajatlarini vazirliklar, davlat qo‘mitalari, idoralar va ularning budjet mablag‘lari hisobidan mablag‘ bilan ta’minlanadigan tasarrufidagi tashkilotlar boshqaruv apparati xodimlarining belgilangan cheklangan soniga qat’iy muvofiq holda mablag‘ bilan ta’minlasin.

4. O‘zbekiston Respublikasi Vazirlar Mahkamasi Komplekslari, Moliya vazirligi boshqaruv apparati xodimlari sonini qisqartirish bo‘yicha belgilangan topshiriqlarning Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, vazirliklar, davlat qo‘mitalari, idoralar, uyushmalar, konsernlar, korporatsiyalar, kompaniyalar va boshqa xo‘jalik birlashmalari tomonidan bajarilishini 1999-yil I choragi yakunlariga ko‘ra tekshirsinlar hamda Vazirlar Mahkamasiga tegishli takliflar kiritsinlar.

5. Mazkur qarorning bajarilishini nazorat qilish Bosh vazir o‘rinbosari B. S. Hamidov zimmasiga yuklansin.