Vazirlar Mahkamasining “1998 — 2002-yillarda O‘zbekiston kimyo sanoati korxonalarini kompleks rivojlantirish Dasturi to‘g‘risida” 1998-yil 25-martdagi 129-son qarorini bajarish yuzasidan Farg‘ona “Azot” ishlab chiqarish birlashmasida eksportga mo‘ljallangan ishlab chiqarishlarni barpo etish maqsadida Vazirlar Mahkamasi qaror qiladi:

1. Quyidagilar:

“Bektel Interneyshnl Inki kompaniyasi Farg‘ona “Azot” ishlab chiqarish birlashmasida yiliga 200 ming tonna karbamid, 20 ming tonna melamin ishlab chiqaradigan quvvatlarni tashkil etish va karbamid ishlab chiqarish bo‘yicha quvvatlarni yiliga 330 ming tonnadan 495 ming tonnagacha ko‘paytirish loyihasi bo‘yicha bosh kontraktor sifatida belgilanganligi;

“Bektel Interneyshnl Ink” kompaniyasi tomonidan loyiha, injiniringdan boshlab qurilmalarni loyiha quvvatiga chiqargan holda, foydalanishga tayyor qilib ishga tushirishgacha bo‘lgan barcha ishlar kompleksini o‘z ichiga oluvchi shartlarda amalga oshirilishi;

“Bektel Interneyshnl Ink” kompaniyasi mazkur loyihani amalga oshirish uchun jalb qilinadigan kredit resurslarining AQSh Eksimbanki va boshqa eksport-sug‘urta agentliklarida sug‘urtalash masalalarini hal etishni o‘z zimmasiga olishi;

“O‘zkimyosanoat” uyushmasi, Farg‘ona “Azot” ishlab chiqarish birlashmasi va “Bektel Interneyshnl Ink” kompaniyasi o‘rtasida loyihaning texnik-iqtisodiy asoslanishini ishlab chiqish kompaniya mablag‘lari hisobiga 1998-yilning 1-iyuligacha tugallanishini nazarda tutuvchi bitim imzolanganligi;

Farg‘ona “Azot” ishlab chiqarish birlashmasi tomonidan “Bektel Interneyshnl Ink” kompaniyasi bilan dastlabki injiniringni, loyiha bo‘yicha kapital xarajatlarni baholash va mablag‘ bilan ta’minlashni tashkil etishni o‘z ichiga oluvchi bazaviy loyihani ishlab chiqish yuzasidan kontrakt imzolanganligi;

bazaviy loyihaning ishlab chiqilishini mablag‘ bilan ta’minlashga “Doych Morgan Grenfel” banki roziligi mavjudligi ma’lumot uchun qabul qilinsin.

2. Vazirlar Mahkamasining Investitsiya dasturlari departamenti “O‘zkimyosanoat” uyushmasi, O‘zbekiston Respublikasi Makroiqtisodiyot va statistika vazirligi, Moliya vazirligi, Tashqi iqtisodiy aloqalar vazirligi va Tashqi iqtisodiy faoliyat milliy bankini jalb qilgan holda loyihaning texnik-iqtisodiy asoslanishi olingandan so‘ng uni ikki hafta muddatda ko‘rib chiqsin va O‘zbekiston Respublikasi Vazirlar Mahkamasi tasdiqlashi yuzasidan taklif kiritsin.

3. Loyihani amalga oshirish jadvali ilovaga* muvofiq tasdiqlansin.

4. Makroiqtisodiyot va statistika vazirligi mazkur loyihani O‘zbekiston Respublikasining 1999-yilgi va keyingi yillardagi Investitsiya dasturiga kiritishni nazarda tutsin.

5. “O‘zkimyosanoat” uyushmasi:

bir hafta muddatda Farg‘ona “Azot” ishlab chiqarish birlashmasi tomonidan “Bektel Interneyshnl Ink” kompaniyasi bilan imzolangan bazaviy loyihani ishlab chiqish yuzasidan kontraktga, kontrakt qiymatini 6 mln AQSh dollarigacha kamaytirgan holda, ishlar hajmidan texnik-iqtisodiy asoslashni chiqarib tashlab tegishli tuzatishlar kiritsin;

loyihani amalga oshirish muddatini qisqartirish maqsadida “Bektel Interneyshnl Ink” kompaniyasi bilan uzil-kesil kontraktning kuchga kirishiga ko‘ra tayyorlash jarayoni uzoq bo‘lgan asbob-uskunalarga buyurtmanomalarni birinchi navbatda joylashtirish, ammiak ishlab chiqarish qurilmalarini 2000-yil oxirida, karbamid va melamin ishlab chiqarish qurilmalarini 2001-yilning birinchi choragida ishga tushirgan holda obyektlarda qurilish-montaj ishlarini 1999-yilning ikkinchi choragida boshlash imkoniyatlari va shartlarini kelishib olsin.

6. O‘zbekiston Respublikasi Tashqi iqtisodiy aloqalar vazirligi bazaviy loyihani ishlab chiqish yuzasidan kontraktni belgilangan tartibda ro‘yxatdan o‘tkazsin.

7. O‘zbekiston Respublikasi Tashqi iqtisodiy faoliyat milliy banki:

“Doych Morgan Grenfel” banki bilan bazaviy loyihani ishlab chiqish yuzasidan kontraktni mablag‘ bilan ta’minlash yuzasidan bir oy muddatda kredit bitimini tuzsin va “O‘zkimyosanoat” uyushmasi mablag‘larini qayta moliyalashtirsin;

“O‘zkimyosanoat” uyushmasi va “Bektel Interneyshnl Ink” kompaniyasi bilan birgalikda import bo‘yicha texnologik asbob-uskunalarni va materiallarni yetkazib berishni, injiniring ishlarini o‘tkazish va obyektlarni qurish xarajatlarini AQSh Eksim-banki va boshqa mamlakatlar eksport-sug‘urta agentliklari orqali mablag‘ bilan ta’minlashni ishlab chiqsin.

8. Belgilab qo‘yilsinki, bazaviy loyihani ishlab chiqish yuzasidan kreditni qaytarish kimyo sanoatini rivojlantirish dasturini amalga oshirish uchun 1999-yilda O‘zbekiston Respublikasi Investitsiya dasturida “O‘zkimyosanoat” uyushmasiga nazarda tutiladigan mablag‘lar hisobidan amalga oshiriladi.

9. Moliya vaziri bazaviy loyihani ishlab chiqish uchun jalb qilinadigan valyuta krediti bo‘yicha “Doych Morgan Grenfel” bankiga va O‘zbekiston Respublikasi Tashqi iqtisodiy faoliyat milliy bankiga O‘zbekiston Respublikasi Hukumati kafolatini belgilangan tartibda berishga vakil qilinsin.

10. Adliya vazirligi amaldagi qonun hujjatlariga muvofiq O‘zbekiston Respublikasi Hukumati kafolatlari bo‘yicha yuridik xulosalarni rasmiylashtirsin.

11. O‘zbekiston Respublikasi Tashqi ishlar vazirligi “O‘zkimyosanoat” uyushmasi buyurtmanomalari bo‘yicha kompaniya va uning subpudratchilari xodimlariga, vizalarni rasmiylashtirish uchun konsullik yig‘imlari to‘lashdan ozod etgan holda, ko‘p martalik kelish-ketish vizalari belgilangan tartibda berilishini ta’minlasin.

12. Vazirlar Mahkamasining 1996-yil 26-iyuldagi 264-son qarori o‘z kuchini yo‘qotgan deb hisoblansin.

13. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T. Sultonov zimmasiga yuklansin.