“Sug‘urta to‘g‘risida”gi O‘zbekiston Respublikasi Qonuniga muvofiq, milliy eksport qiluvchilarni sarmoya, tovarlar va xizmatlar xalqaro bozorlarida sug‘urtalash maqsadida Vazirlar Mahkamasi qaror qiladi:

1. Belgilansinki:

to‘lovni kechiktirish shartlarida amalga oshirilayotgan hamda birinchi darajali banklarning to‘lov majburiyatlari bilan ta’minlanmagan eksport kontraktlarini siyosiy va tijorat tavakkalchiliklaridan sug‘urta qilish ilovaga muvofiq tartibga binoan amalga oshiriladi.

2. To‘lov kechiktirilishini nazarda tutuvchi eksport kontraktlari bo‘yicha siyosiy va tijorat tavakkalchiliklaridan sug‘urta qoplamasi O‘zbekiston Respublikasi rezidentlari bo‘lgan eksport qiluvchilar va tijorat banklariga sug‘urta tashkilotlari tomonidan beriladi.

Eksport yuk tashishlarni sug‘urta qilish O‘zbekiston Respublikasining amaldagi qonun hujjatlariga hamda “Inkoterms” xalqaro qoidalariga muvofiq tijorat tashkilotlari bo‘lgan va tegishli turdagi sug‘urtalashni amalga oshirish uchun litsenziyaga ega bo‘lgan yuridik shaxslar tomonidan amalga oshiriladi.

3. Mazkur qarorning bajarilishini nazorat qilish Bosh vazir o‘rinbosari B. S. Hamidov zimmasiga yuklansin.

Mazkur Tartib eksport kontraktlarini sug‘urta qilish, shuningdek sarmoya, tovarlar va xizmatlar xalqaro bozorlarida davlatning va milliy eksport qiluvchilarning manfaatlarini siyosiy va tijorat tavakkalchiliklaridan himoya qilish maqsadida eksport kontraktlari bo‘yicha tijorat banklarining kreditlariga sug‘urta qoplamasi berish tartibini belgilab beradi.

1. Sug‘urta qoplamasi O‘zbekiston Respublikasi rezidentlari bo‘lgan eksport qiluvchilarga (keyingi o‘rinlarda “eksport qiluvchi” deb ataladi) va O‘zbekiston Respublikasi rezidenti bo‘lgan tijorat banklariga faqat kelib chiqqan mamlakati O‘zbekiston bo‘lgan mahsulotlarni eksport qilish (lizing ham shu jumlaga kiradi) bilan bog‘liq operatsiyalar bo‘yicha beriladi.

2. Tijorat tashkilotlari bo‘lgan va tegishli turdagi sug‘urtani amalga oshirish uchun litsenziyaga ega bo‘lgan hamda sug‘urta shartnomasiga muvofiq sug‘urta tovoni to‘lovini amalga oshirish majburiyatini oluvchi yuridik shaxslar sug‘urta tashkilotlari deb e’tirof etiladi.

3. Eksport kontraktlarini sug‘urta qilish tavakkalchiliklarning quyidagi guruhi qoplanishini ta’minlaydi:

Siyosiy tavakkalchiliklar — xorijiy hamkor mamlakatida uning tomonidan qabul qilingan kontrakt majburiyatlari bajarilishiga to‘liq yoki qisman to‘sqinlik qiluvchi siyosiy va makroiqtisodiy vaziyat noqulay o‘zgarishi bilan bog‘liq tavakkalchiliklar, ular eksport kontraktlari bajarilishi va investitsiya loyihalari amalga oshirilishi bilan bog‘liq tavakkalchiliklarga bo‘linadi.

Eksport kontraktlari bajarilishi bilan bog‘liq siyosiy tavakkalchiliklarga quyidagilar kiradi:

import yoki eksportga embargo joriy qilish;

xorijiy hamkor mamlakatidagi e’lon qilingan yoki e’lon qilinmagan urushlar, fuqarolar g‘alayonlari, inqiloblar, terroristik harakatlar, sabotaj;

xorijiy hamkor mamlakati hukumatining tuzilgan kontrakt shartlari umuman yoki uning qismlari bajarilishiga to‘sqinlik qiluvchi xatti-harakatlari, shu jumladan O‘zbekistonga nisbatan kamsituvchi tusdagi yangi qonun hujjatlari joriy etilishi;

xorijiy hamkor mamlakatida konvertatsiya qilinadigan valyuta yetishmasligi tufayli transfert kechiktirilishi, O‘zbekiston bilan xorijiy hamkor mamlakati o‘rtasidagi to‘lovlarni cheklab qo‘yuvchi xorijiy hamkor mamlakatining O‘zbekistonga tashqi qarziga xizmat ko‘rsatishga moratoriy e’lon qilinishi.

Investitsiya loyihalari amalga oshirilishi bilan bog‘liq siyosiy tavakkalchiliklarga quyidagilar kiradi:

mulkning ekspropriatsiya qilinishi, shuningdek xorijiy hamkor mamlakatida qabul qilingan mulk yoki ulardan olinadigan daromad ustidan nazorat qilish yo‘qotilishiga olib keladigan har qanday qonun hujjatlari yoki ma’muriy choralar, xorijiy hamkor mamlakati hukumati tomonidan o‘z hududida iqtisodiy faoliyatni tartibga solish maqsadida joriy etiladigan umumiy qo‘llaniladigan kamsitmaydigan tusdagi choralardan tashqari;

xorijiy hamkor mamlakatidagi e’lon qilingan yoki e’lon qilinmagan urushlar, fuqarolar g‘alayonlari, inqiloblar, terroristik harakatlar, sabotaj.

Tijorat tavakkalchiliklari. Bu — xorijiy hamkorning moliyaviy-iqtisodiy ahvoli bilan bevosita bog‘liq bo‘lgan hamda uning isbot qilingan to‘lovga qodir emasligi yoki bankrotligi bilan va kontrakt bo‘yicha uning tomonidan qabul qilingan moliyaviy majburiyatlar bajarilishi mumkin emasligi bilan ifodalanadi.

4. Bank kreditlarini jalb qilmasdan to‘lovni to‘liq (yoki qisman) kechiktirish shartlarida amalga oshiriladigan eksport kontrakti bo‘yicha sug‘urta qoplamasi olish uchun eksport qiluvchi sug‘urta tashkilotiga:

ariza — so‘rovnoma;

eksport kontraktining asl nusxasini va nusxasini;

eksport kontraktini amalga oshirishdagi tavakkalchilik darajasidan kelib chiqib sug‘urta tashkiloti kontrakt majburiyatlarini bajarish bo‘yicha xorijiy xaridorning javob tariqasidagi kafolatini yoki kafolatini talab etishga haqlidir.

eksport kontrakti qiymatining kamida 15 foizi miqdorida avans to‘lovi olinganligi to‘g‘risida bankning (eksport qiluvchining vakolatli bankining) ma’lumotnomasi nusxasini taqdim etadi, qonun hujjatlarida nazarda tutilgan hollar bundan mustasno. Kichik biznes va xususiy tadbirkorlik subyektlaridan ushbu ma’lumotnoma taqdim etish talab qilinmaydi.

Amaldagi qonun hujjatlariga muvofiq tuzilgan kontraktlar ko‘rib chiqish uchun qabul qilinadi (A-ilova — eksport kontraktlarini siyosiy va tijorat tavakkalchiliklaridan sug‘urta qilish sxemasi)*.

Berilgan sug‘urta qoplamasi sug‘urta tashkiloti tomonidan tasdiqlangan standart polis ko‘rinishida rasmiylashtiriladi.

Sug‘urta mukofotini to‘lash shartlari sug‘urtalanuvchi bilan sug‘urta tashkiloti o‘rtasida tuziladigan sug‘urta shartnomasida qayd etiladi.

Sug‘urta tashkilotining sug‘urta polisi bo‘yicha majburiyatlari sug‘urta mukofoti uning hisob raqamlariga tushgan kundan boshlab kuchga kiradi.

5. O‘zbekiston Respublikasi rezidentlari bo‘lgan tijorat banklari va (yoki) eksport qiluvchilar tomonidan eksportga kredit berishning xalqaro amaliyotiga muvofiq shartlarda va muddatlarga beriladigan kreditlar sug‘urta bilan ta’minlanadi, xususan:

xorijiy hamkor (xaridor) tomonidan kontrakt qiymatining kamida 15 foizi miqdoridagi avans to‘lovi to‘langanda, basharti kredit bir yildan ortiq davrga berilsa;

kreditdan foydalanishning 5 yilgacha (imtiyozli davr chiqarib tashlangan holda) bo‘lgan, tovarlarning ayrim turlari bo‘yicha 12 yilgacha bo‘lgan eng ko‘p muddatiga rioya qilinganda;

eksport kontrakti bajarilgandan keyin kredit bo‘yicha asosiy qarz kreditning to‘lanmagan summasiga qo‘shilgan foizlar bilan bir vaqtda to‘langan holda kamida har olti oyda izchil teng to‘lovlarda qaytarilganda.

6. Eksport va kredit talablariga yon bosish faqat sug‘urta tashkiloti bilan yozma kelishuvga ko‘ra qonun hujjatlarida belgilangan tartibda amalga oshirilishi mumkin.

Kompensatsiya yoki qarshi bitishuv tuzilgan taqdirda eksport va import kontraktlari mutlaqo bir-biridan ajratilishi va bir-biriga bog‘liq bo‘lmasligi kerak.

7. Tijorat banklarining eksport qiluvchilarga to‘lovni kechiktirish bilan bog‘liq bo‘lmagan kontraktlar uchun beriladigan kreditlari sug‘urta qilinmaydi.

8. Tijorat banklarining eksport kontraktlari bo‘yicha kreditlari mahsulot yetkazib beruvchining krediti va xaridorga beriladigan kredit sifatida berilishi mumkin.

Mahsulot yetkazib beruvchining krediti — kredit eksport qiluvchi tomonidan yetkazib berilgan texnologiya, tovarlar va ko‘rsatilgan xizmatlar uchun to‘lovni kechiktirish ko‘rinishida Xaridorga beriladi.

Eksport qiluvchi sug‘urtalanuvchi, eksport qiluvchi va (yoki) O‘zbekiston Respublikasining vakolatli tijorat banki benefitsiar (naf ko‘ruvchi) bo‘ladi.

“Mahsulot yetkazib beruvchining krediti” turi bo‘yicha sug‘urta qoplamasi berish kuyidagi izchillikda amalga oshiriladi (B-ilova — eksport kontraktlari yuzasidan “mahsulot yetkazib beruvchining krediti” turi bo‘yicha tijorat banklarining kreditini sug‘urta qilish sxemasi)*:

eksport qiluvchi bilan xorijiy xaridor o‘rtasida eksport kontrakti shartlarining kelishilishi;

vakolatli tijorat bankiga va sug‘urta tashkilotiga ariza va zarur hujjatlar turkumini taqdim etish;

arizaning vakolatli tijorat bankida va sug‘urta tashkiloti tomonidan ko‘rib chiqilishi, loyihani mablag‘ bilan ta’minlash maqsadga muvofiqligi va sug‘urta qoplamasi berish (yoki rad etish) imkoniyati to‘g‘risidagi xulosa asosida qaror qabul qilish;

eksport qiluvchi tomonidan xorijiy xaridor bilan mahsulot yetkazib berish yuzasidan kontrakt tuzilishi;

eksport kontraktini amalga oshirishdagi tavakkalchilik darajasidan kelib chiqib sug‘urta tashkiloti xorijiy xaridor tomonidan eksport qiluvchiga yoki sug‘urta tashkilotiga kontrakt majburiyatlari bajarilishi bo‘yicha kafolat yoki kafillik taqdim etilishini talab etishga haqlidir.

vakolatli tijorat banki bilan eksport qiluvchi o‘rtasida kredit shartnomasi tuzilishi va mablag‘ bilan ta’minlash boshlanishi;

eksport qiluvchi tomonidan xorijiy hamkorning majburiyatlari bajarilishi bo‘yicha talablar huquqining sug‘urta tashkilotiga berilishi, sug‘urta mukofoti to‘lanishi, sug‘urta tashkilotidan sug‘urta polisi olinishi;

kredit bir yildan ortiq muddatga berilgan taqdirda xorijiy xaridor tomonidan kontrakt qiymatining kamida 15 foizi miqdorida avans to‘lanishi;

tuzilgan kontrakt shartlariga muvofiq eksport qiluvchi tomonidan xorijiy xaridorga mahsulot yetkazib berilishi. Qarz majburiyatlarining O‘zbekistonning vakolatli tijorat bankida hisobga olinishi;

eksport kontrakti bo‘yicha yetkazib berilgan mahsulot uchun xorijiy xaridor tomonidan eksport qiluvchiga haq to‘lanishi;

eksport qiluvchi tomonidan kreditning vakolatli tijorat bankiga qaytarilishi;

sug‘urta voqeasi yuz bergan taqdirda:

a) eksport qiluvchi yoki vakolatli tijorat banki sug‘urta voqeasi yuz berganligi to‘g‘risida sug‘urta tashkilotiga xabardor qiladi;

b) eksport qiluvchi yoki vakolatli tijorat banki sug‘urta tashkilotiga mazkur Tartibning 12¹-bandida ko‘rsatilgan hujjatlarni ilova qilgan holda sug‘urta tovonini to‘lash to‘g‘risidagi talabnoma yo‘llaydi, shuningdek zararlar bo‘yicha regress huquqiga ko‘ra talabnoma beradi;

v) sug‘urta tashkiloti e’tirozni o‘rganib chiqadi va sug‘urta tovoni to‘lash yoki uni berishni rad etish haqida asoslangan qaror qabul qiladi;

g) xaridorning kafili yoki kafillikka o‘tuvchi yoki xorijiy xaridor kontrakt bo‘yicha qarzni sug‘urta tashkiloti foydasiga to‘laydi.

Sug‘urta tashkiloti va o‘zbekistonlik eksport qiluvchi sug‘urta zarari qaytarilishi chora-tadbirlarini ko‘radi (sug‘urta tashkiloti tomonidan to‘langan sug‘urta qoplamasi summasiga muqobil bo‘lgan nobudgarchilikni qoplash).

“Xaridorga beriladigan kredit” — kredit amaldagi qonun hujjatlariga muvofiq O‘zbekiston Respublikasi rezidenti bo‘lgan tijorat banki tomonidan, kreditni keyinchalik xorijiy xaridorga qayta moliyalash uchun xorijiy xaridor bankiga — Qarz oluvchiga yoxud eksport kontrakti haqini to‘lash uchun to‘g‘ridan to‘g‘ri xorijiy xaridorga — Qarz oluvchiga beriladi.

O‘zbekiston Respublikasi rezidenti — vakolatli tijorat banki sug‘urtalanuvchi bo‘ladi.

Sug‘urta qoplamasi berish quyidagi izchillikda amalga oshiriladi (V-ilova — eksport kontraktlari yuzasidan “xaridorga beriladigan kredit” turi bo‘yicha tijorat banklari kreditlarini sug‘urta qilish sxemasi)*:

eksport qiluvchi bilan xorijiy xaridor o‘rtasida mahsulot yetkazib berishga eksport kontrakti shartlarining kelishilishi;

vakolatli tijorat banki bilan xorijiy xaridor yoki xorijiy xaridor banki o‘rtasida kredit bitimi loyihasining kelishilishi;

eksport kontraktiga sug‘urta qoplamasi olish uchun vakolatli tijorat banki nomidan sug‘urta tashkilotiga ariza berilishi;

arizaning sug‘urta tashkilotida ko‘rib chiqilishi va sug‘urta qoplamasini ma’qullash (rad etish) to‘g‘risidagi xulosa asosida qaror qabul qilish;

O‘zbekistonlik eksport qiluvchi bilan xorijiy xaridor o‘rtasida eksport kontrakti imzolanishi;

O‘zbekiston Respublikasi rezidenti bo‘lgan vakolatli tijorat banki bilan xorijiy xaridor banki yoki xorijiy xaridor o‘rtasida kredit bitimi imzolanishi;

kredit bitimini amalga oshirishdagi tavakkalchilik darajasidan kelib chiqib sug‘urta tashkiloti qarz oluvchi tomonidan kreditor bankka yoki sug‘urta tashkilotiga kredit bo‘yicha majburiyatlar bajarilishi yuzasidan kafolat yoki kafillik berilishini talab qilishga haqlidir;

vakolatli tijorat banki bilan sug‘urta tashkiloti o‘rtasida sug‘urta shartnomasi tuzilishi;

vakolatli tijorat banki tomonidan sug‘urta mukofotining to‘lanishi, sug‘urta tashkiloti tomonidan eksport krediti qoplamasining berilishi;

qarz oluvchi tomonidan eksport kontrakti summasining kamida 15 foizi to‘lanishi;

vakolatli tijorat banki tomonidan mablag‘ bilan ta’minlash boshlanishi;

eksport kontrakti shartlariga muvofiq eksport qiluvchi tomonidan mahsulot yetkazib berilishi;

xorijiy xaridor (bank) tomonidan vakolatli tijorat bankiga kreditning to‘lanishi;

sug‘urta voqeasi yuz bergan taqdirda:

a) vakolatli tijorat banki tomonidan sug‘urta tashkilotining sug‘urta voqeasi yuz berganligi to‘g‘risida xabardor qilinishi;

b) vakolatli tijorat banki sug‘urta tashkilotiga mazkur Tartibning 12¹-bandida ko‘rsatilgan hujjatlarni ilova qilgan holda sug‘urta tovonini to‘lash to‘g‘risida talabnoma yo‘llaydi, shuningdek zararlar bo‘yicha regress huquqiga ko‘ra talabnoma beradi;

v) sug‘urta tashkiloti tomonidan e’tirozning o‘rganib chiqilishi va sug‘urta tovoni to‘lash yoki uni berishni rad etish to‘g‘risida asoslangan qaror qabul qilinishi;

g) sug‘urta tashkiloti va eksport qiluvchiga xizmat ko‘rsatuvchi tijorat banki tomonidan zararning qaytarilishi chora-tadbirlari ko‘rilishi (sug‘urta tashkiloti tomonidan to‘langan sug‘urta qoplamasi summasiga muqobil bo‘lgan nobudgarchiliklarni qaytarish).

9. Tavakkalchiliklarni qoplash sug‘urta tashkiloti tomonidan franshiza belgilanmagan holda xorijiy valyutada amalga oshiriladi.

Kichik biznes va xususiy tadbirkorlik subyektlari uchun tavakkalchiliklarni qoplash sug‘urta tashkiloti tomonidan milliy valyutada ham amalga oshirilishi mumkin.

10. Sug‘urta mukofoti to‘lash tuzilgan sug‘urta shartnomasiga muvofiq amalga oshiriladi.

12. Sug‘urta mukofotini to‘lash xarajatlari eksport kontraktining qiymatiga kiritiladi.

12¹. Sug‘urta tovonini to‘lash to‘g‘risidagi qaror sug‘urtalanuvchi tomonidan sug‘urta tashkilotiga taqdim etiladigan, sug‘urta hodisasini va uning sababini hamda yetkazilgan zarar miqdorini tasdiqlovchi quyidagi hujjatlar asosida sug‘urtalanuvchining birinchi talabiga ko‘ra qabul qilinadi:

sug‘urtalanuvchining eksport kontrakti yoki kredit bitimi bo‘yicha pul mablag‘lari tushmaganligi to‘g‘risidagi arizasi;

eksport kontrakti bo‘yicha tushum tushmagan invoyslar nusxalari;

eksport qiluvchiga xizmat ko‘rsatuvchi bankning eksport kontrakti bo‘yicha tushmagan pul mablag‘lari miqdori to‘g‘risidagi xati;

eksport kontrakti bo‘yicha yuk xatlari (eksportga sotilganligini tasdiqlovchi hujjatlar) va bojxona yuk deklaratsiyalari nusxalari;

kredit bitimi bo‘yicha vakolatli tijorat banki — O‘zbekiston Respublikasi rezidenti tomonidan xorijiy hamkorga pul mablag‘lari o‘tkazilganligini tasdiqlovchi hujjat.

Sug‘urtalanuvchi quyidagi hujjatlardan birini:

eksport kontraktlari bajarilishi bilan bog‘liq siyosiy tavakkalchiliklar yuzaga kelganda: xorijiy hamkor mamlakatining normativ-huquqiy hujjatlari, O‘zbekiston Respublikasining xorijiy hamkor mamlakatidagi vakolatxonasi xati, O‘zbekiston Respublikasi Tashqi ishlar vazirligining xati, ommaviy axborot vositalaridagi, internetdagi yangiliklar yoki ko‘rsatilgan tavakkalchiliklarning yuzaga kelganligini tasdiqlovchi boshqa hujjatlar. Xorijiy hamkor mamlakatida konvertatsiya qilinadigan valyuta yetishmasligi tufayli transfert kechiktirilsa, O‘zbekiston bilan xorijiy hamkor mamlakati o‘rtasidagi to‘lovlarni cheklab qo‘yuvchi xorijiy hamkor mamlakatining tashqi qarziga xizmat ko‘rsatishga O‘zbekistonga moratoriy e’lon qilinganda sug‘urtalanuvchi yuqorida keltirilgan hujjatlarga qo‘shimcha ravishda xorijiy hamkorga xizmat ko‘rsatuvchi bankning xorijiy hamkor hisob raqamidagi yetarli mablag‘ deponentga qo‘yilganligi va xorijiy hamkor mamlakatining hukumati yoki boshqa vakolatli organining qarori tufayli eksport kontrakti bo‘yicha eksport qiluvchiga valyuta o‘tkazishning imkoniyati mavjud emasligi to‘g‘risidagi xatini;

investitsiya loyihalari amalga oshirilishi bilan bog‘liq siyosiy tavakkalchiliklar yuzaga kelganda: xorijiy hamkor mamlakatining normativ-huquqiy hujjatlari, O‘zbekiston Respublikasining xorijiy hamkor mamlakatidagi vakolatxonasi xati, O‘zbekiston Respublikasi Tashqi ishlar vazirligining xati, ommaviy axborot vositalaridagi, internetdagi yangiliklar, xorijiy hamkor mamlakati sudining qarorlari yoki ko‘rsatilgan tavakkalchiliklarning yuzaga kelganligini tasdiqlovchi boshqa hujjatlarni;

tijorat tavakkalchiliklari yuzaga kelganda: eksport kontrakti yoki kredit bitimi bo‘yicha tushmagan pul mablag‘lari xorijiy hamkorning qarzdorlikni tan olganligi to‘g‘risidagi xati, sudning xorijiy hamkorni bankrot deb e’tirof etish to‘g‘risidagi sudning qarori yoki xorijiy hamkor mamlakati qonunchiligiga muvofiq xorijiy hamkor tomonidan kontrakt bo‘yicha qabul qilingan moliyaviy majburiyatlar bajarilishi imkonsizligini tasdiqlovchi boshqa hujjatlarni qo‘shimcha ravishda taqdim etadi.

Sug‘urta tashkilotlariga sug‘urtalanuvchidan ushbu Tartibning mazkur bandida nazarda tutilmagan qo‘shimcha hujjatlarni talab qilish taqiqlanadi.

13. Sug‘urta qoplamasi bo‘yicha sug‘urta tovoni:

a) urush, inqiloblar yoki fuqarolarning g‘alayonlari bo‘lgan hollarda asosiy sarmoyaga to‘g‘ridan to‘g‘ri ziyon yetkazilgani isbotlanganda yoki xorijiy hamkor 10 oy majburan bekor turgan taqdirda;

b) mulk ekspropriatsiya qilingan taqdirda hodisa yuz bergan sanadan 10 oydan keyin;

v) ma’murlar tomonidan pul o‘tkazishga cheklashlar joriy etilganda 6 oy mobaynida valyutani repatriatsiya qilishning imkoniyati bo‘lmagan taqdirda;

g) kontrakt munosabatlariga xorijiy hamkor ma’murlari aralashgan taqdirda ma’murlar aralashuvi yuridik tan olingan sanadan boshlab 6 oy o‘tgandan keyin;

d) O‘zbekistonlik investorlarga nisbatan kamsituvchi tusga ega bo‘lgan yangi qonun-qoidalar joriy etilgan taqdirda joriy etilgan yangi qonun-qoidalarning kamsituvchi tusdaligi xalqaro e’tirof etilgan sanadan boshlab 6 oydan keyin;

e) xorijiy xaridordan va (yoki) xorijiy xaridor bankidan belgilangan to‘lov kunidan boshlab 6 oy (kontrakt yoki kredit bitimida kelishilgan sana) o‘tgandan keyin kutilayotgan to‘lovlar olinmagan taqdirda;

j) xorijiy xaridor va (yoki) xorijiy xaridor banki bankrotlikka uchragan taqdirda ularning bankrotligi e’tirof etilganligining isboti taqdim etilgandan keyin 30 kun mobaynida to‘lanadi.

14. Kichik biznes va xususiy tadbirkorlik subyektlari uchun berilgan sug‘urta qoplamasi bo‘yicha sug‘urta tovoni, ushbu Tartibning 12¹-bandida ko‘rsatilgan hujjatlar taqdim etilgan taqdirda, sug‘urta voqeasi yuz bergan sanadan boshlab 60 kun ichida to‘lanadi, bundan ushbu Tartibning 13-bandi “j” kichik bandida nazarda tutilgan holat mustasno.