Oʻzbekiston Respublikasi Prezidentining 2023-yil 1-iyundagi PF-82-son “Aholiga sifatli ijtimoiy xizmat va yordam koʻrsatish hamda uning samarali nazorat tizimini yoʻlga qoʻyish boʻyicha kompleks chora-tadbirlar toʻgʻrisida”gi Farmoni va Oʻzbekiston Respublikasi Vazirlar Mahkamasining 2021-yil 12-oktabrdagi 638-son “Alohida taʼlim ehtiyojlari boʻlgan bolalarga taʼlim berishga oid normativ-huquqiy hujjatlarni tasdiqlash toʻgʻrisida”gi qaroriga muvofiq Oʻzbekiston Respublikasi Prezidenti huzuridagi Ijtimoiy himoya milliy agentligi, Iqtisodiyot va moliya vazirligi, Maktabgacha va maktab taʼlimi vazirligi hamda Sogʻliqni saqlash vazirligi qaror qiladi:

1. Alohida taʼlim ehtiyojlari boʻlgan bolalar uchun davlat ixtisoslashtirilgan taʼlim muassasalarida sinflarni komplektlash hamda tarifikatsiya roʻyxatlarini shakllantirish tartibi toʻgʻrisidagi nizom ilovaga muvofiq tasdiqlansin.

2. Mazkur qaror 2026-yilning 1-avgustidan eʼtiboran kuchga kiradi.

Mazkur Nizom alohida taʼlim ehtiyojlari boʻlgan bolalar uchun davlat ixtisoslashtirilgan taʼlim muassasalarida sinflarni komplektlash hamda tarifikatsiya roʻyxatlarini shakllantirish tartibini belgilaydi.

1. Mazkur Nizomda quyidagi asosiy tushunchalardan foydalaniladi:

alohida taʼlim ehtiyojlari boʻlgan bolalar — jismoniy, aqliy, sensor (sezgi) yoki ruhiy nuqsonlari boʻlgan bolalar;

alohida taʼlim ehtiyojlari boʻlgan bolalar uchun davlat ixtisoslashtirilgan taʼlim muassasalari (bundan buyon matnda ixtisoslashtirilgan taʼlim muassasalari deb yuritiladi) — taʼlim-tarbiya berish, oʻquvchilarni umumiy oʻrta taʼlim muassasalarida inklyuziv sharoitda oʻqishga tayyorlash, korreksion (tuzatuvchi) pedagogik yordam koʻrsatish, kasb oʻrgatish va sogʻlomlashtirish muassasalari;

maxsus pedagog — eshitishida, koʻrishida, ruhiy va aqliy rivojlanishida hamda tayanch-harakat apparatida nuqsoni boʻlgan bolalarni oʻqitish va jamiyatga moslashtirish bilan shugʻullanadigan mutaxassis;

bazaviy tarif stavkasi — bir stavka dars soati uchun maxsus pedagogning maʼlumoti va malaka toifasiga koʻra belgilangan bazaviy haq miqdori;

tarif stavkasi — maxsus pedagogga biriktirilgan dars soatlari asosida bir stavka uchun belgilangan bazaviy tarif stavkadan kelib chiqib aniqlanadigan miqdor;

sinf komplekti — oʻquvchilarni belgilangan meʼyorlar asosida bitta sinfga jamlash;

dars soatlari setkasi — umumiy oʻrta taʼlimning tayanch oʻquv rejasi asosida ixtisoslashtirilgan taʼlim muassasalari sinflar soni, sinf komplektidagi oʻquvchilar soni va tegishli mutaxassislik boʻyicha maxsus pedagog mavjudligini inobatga olgan holda barcha fanlar boʻyicha shakllantirilgan jami dars soatlari;

elektron dastur — ixtisoslashtirilgan taʼlim muassasalari toʻgʻrisida zarur maʼlumotlar kiritiladigan va istalgan vaqtda Internet jahon axborot tarmogʻi orqali ushbu maʼlumotlardan foydalanish imkoniyatini yaratib beruvchi dastur.

2. Ushbu Nizom talablari Oʻzbekiston Respublikasi Prezidenti huzuridagi Ijtimoiy himoya milliy agentligi (bundan buyon matnda Agentlik deb yuritiladi) tizimidagi ixtisoslashtirilgan taʼlim muassasalariga nisbatan tatbiq etiladi.

3. Ixtisoslashtirilgan taʼlim muassasalarining sinflari Oʻzbekiston Respublikasi Vazirlar Mahkamasining 2021-yil 12-oktabrdagi 638-son “Alohida taʼlim ehtiyojlari boʻlgan bolalarga taʼlim berishga oid normativ-huquqiy hujjatlarni tasdiqlash toʻgʻrisida”gi qarorida belgilangan oʻquvchilar sonidan kelib chiqib, komplektlanadi.

4. Ixtisoslashtirilgan taʼlim muassasalari har yili 30-avgustga qadar Agentlikning Qoraqalpogʻiston Respublikasi, viloyatlar va Toshkent shahar boshqarmalari (bundan buyon matnda hududiy boshqarmalar deb yuritiladi) huzuridagi yagona psixologik-tibbiy-pedagogik komissiyalarining xulosasi asosida taʼlim olayotgan hamda 1-sinfga qabul qilinayotgan oʻquvchilarning nomma-nom roʻyxatini shakllantiradi hamda elektron dastur orqali maʼlumotlarni hududiy boshqarmalarga koʻrib chiqish uchun yuboradi.

Sinflar komplektini shakllantirish toʻgʻrisidagi maʼlumotlarning toʻgʻri, toʻliq va haqqoniy kiritilishi uchun ixtisoslashtirilgan taʼlim muassasalarining direktori masʼul va javobgar hisoblanadi.

5. Ixtisoslashtirilgan taʼlim muassasalari tomonidan elektron dastur orqali yuborilgan sinflar komplektini shakllantirish toʻgʻrisidagi maʼlumotlar hududiy boshqarmalar tomonidan quyidagi mezonlar asosida koʻrib chiqiladi:

boshqa ixtisoslashtirilgan taʼlim muassasalaridan kelgan va ketgan oʻquvchilarning ixtisoslashtirilgan taʼlim muassasasi direktori buyrugʻi asosida sanoqqa kiritilganligi yoki sanoqdan chiqarilganligini oʻrganish;

har bir ixtisoslashtirilgan sinf boʻyicha oʻtgan yilga nisbatan sinf sonining oʻsishi yoki kamayishini tahlil qilish;

Oʻzbekiston Respublikasi Davlat budjeti mablagʻlaridan samarali foydalanish hamda sunʼiy ravishda sinflar sonining koʻpayishi holatlariga yoʻl qoʻymasligini oʻrganish.

6. Koʻrib chiqilgan sinflar komplektini shakllantirish toʻgʻrisidagi maʼlumotlar har yili 15-sentabrga qadar hududiy boshqarmalar tomonidan tasdiqlanadi yoki aniqlangan xato va kamchiliklarni asoslantirgan holda qayta ishlash uchun ixtisoslashtirilgan taʼlim muassasalariga yuboriladi.

7. Qayta ishlash uchun yuborilgan sinflar komplektini shakllantirish toʻgʻrisidagi maʼlumotlar ixtisoslashtirilgan taʼlim muassasalari tomonidan ikki ish kuni ichida qayta koʻrib chiqiladi va hududiy boshqarmalarga elektron dastur orqali tasdiqlash uchun qaytadan yuboriladi.

Bunda qayta yuborilgan sinflar komplektini shakllantirish toʻgʻrisidagi maʼlumotlari hududiy boshqarmalar tomonidan shu kunning oʻzida koʻrib chiqiladi va tasdiqlanadi.

8. Tasdiqlangan sinflar komplektini shakllantirish toʻgʻrisidagi maʼlumotlar asosida hududiy boshqarmalarning ixtisoslashtirilgan taʼlim muassasalarida tashkil etiladigan sinflar komplektlarini shakllantirish toʻgʻrisidagi tegishli buyrugʻi qabul qilinadi.

9. Har yili yanvar oyida, shuningdek, sinflardagi oʻquvchilar sonidan kelib chiqib zaruratga koʻra, sinflar komplektlari mazkur Nizomga asosan qayta koʻrib chiqilishi mumkin.

10. Tegishli moliya yili uchun tuzilgan xarajatlar smetasida koʻzda tutilgan sinflar sonidan ortiq sinflarni tashkil etish Agentlik bilan kelishilgan holda amalga oshiriladi.

11. Agentlik tomonidan tarifikatsiya roʻyxatlarini shakllantirish uchun ixtisoslashtirilgan taʼlim muassasalarining tayanch oʻquv rejasi ishlab chiqiladi va Oʻzbekiston Respublikasi Maktabgacha va maktab taʼlimi vazirligi bilan kelishilgan holda har yili 20-avgustga qadar tasdiqlanadi.

12. Ixtisoslashtirilgan taʼlim muassasalari Agentlik tomonidan tasdiqlangan tayanch oʻquv rejasi asosida har yili 10-sentabrga qadar:

oʻquvchilarni akademik tayyorlash (fan, sport, ijod) va kasbga oʻrgatish maqsadida ularning individual rivojlanish rejalarini ishlab chiqadi;

ixtisoslashtirilgan taʼlim muassasalarining dars soatlari setkasini Agentlikning hududiy boshqarmalari bilan kelishgan holda shakllantiradi.

13. Ixtisoslashtirilgan taʼlim muassasalarida dars berish uchun maxsus pedagogdan quyidagilar talab etiladi:

ixtisoslashtirilgan taʼlim muassasasida korreksion pedagogika va defektologiya sohasi boʻyicha oliy maʼlumot (surdopedagogika, tiflopedagogika, oligofrenopedagogika va logopediya mutaxassislari), ixtisoslashtirilgan taʼlim muassasasining faoliyat turi (sohasi) boʻyicha tegishli qayta tayyorlashdan oʻtganligi;

eshitishida nuqsonlari boʻlgan oʻquvchilarga dars berishda dars oʻtiladigan imo-ishora tilini, nutqning fonetiko-fonematik, leksik-grammatik, oʻqish va yozishdagi nuqsonlarini, duduqlanish va nutqning toʻliq rivojlanmaganligini bartaraf etishga qaratilgan maxsus taʼlim-tarbiya berishni bilishi;

koʻzi ojiz va zaif koʻruvchi oʻquvchilar uchun Brayl alifbosida oʻqitish, taktil va audio oʻquv vositalaridan foydalanish usullarini bilishi;

aqli zaif oʻquvchilar uchun nutqning fonetiko-fonematik, leksik-grammatik, oʻqish va yozishdagi nuqsonlarni, duduqlanish va nutqning toʻliq rivojlanmaganligini bartaraf etish ishlarini olib borishni bilishi.

14. Ixtisoslashtirilgan taʼlim muassasasi tomonidan shakllantirilgan dars soatlari setkasi ixtisoslashtirilgan taʼlim muassasasining pedagogik kengashi tomonidan ikki ish kuni ichida koʻrib chiqilib, har yili 15-sentabrga qadar maxsus pedagoglarga dars soatlari (fan, korreksion mashgʻulot soatlari) quyidagi koʻrsatkichlarning ustuvor ketma-ketligi asosida taqsimlanadi:

oliy malaka toifasiga ega maxsus pedagoglar (pedagogning attestatsiyadan oʻtganligi toʻgʻrisidagi sertifikatga koʻra);

pedagog xodimlarga ustama belgilashda qoʻllaniladigan milliy yoki xalqaro tan olingan sertifikatga ega maxsus pedagoglar (sertifikatning belgilangan darajasiga koʻra);

birinchi malaka toifasiga ega maxsus pedagoglar (pedagogning attestatsiyadan oʻtganligi toʻgʻrisidagi sertifikatga koʻra);

ikkinchi malaka toifasiga ega maxsus pedagoglar (pedagogning attestatsiyadan oʻtganligi toʻgʻrisidagi sertifikatga koʻra);

korreksion pedagogika va defektologiya sohasi (surdopedagogika, tiflopedagogika, oligofrenopedagogika va logopediya mutaxassisligi) boʻyicha oliy maʼlumotli (toifasiz) maxsus pedagoglar;

kasbiy qayta tayyorlash boʻyicha diplomga ega maxsus pedagoglar (agar ularda qayta tayyorlash mutaxassisligiga muvofiq mazkur bandning ikkinchi — oltinchi xatboshilarida nazarda tutilgan koʻrsatkichlardan biri mavjud boʻlsa, tegishli koʻrsatkichlarga ega boʻlgan maxsus pedagoglar bilan teng ustuvorlikka ega deb hisoblanadi);

oʻrindoshlik asosida ishlayotgan korreksion pedagogika va defektologiya sohasi (surdopedagogika, tiflopedagogika, oligofrenopedagogika va logopediya mutaxassisligi) boʻyicha oliy maʼlumotli maxsus pedagoglar.

Ushbu koʻrsatkichlar ketma-ketligi asosida ustunlikka ega boʻlgan maxsus pedagoglarga dars soatlarining maksimal miqdorlari belgilanishi tavsiya etiladi.

Maxsus pedagog mazkur koʻrsatkichlarning bir nechtasiga ega boʻlganda, koʻrsatkichlarning eng ustuvorini inobatga olgan holda dars soatlari taqsimlanadi.

Aynan bir xil koʻrsatkichlar mavjud boʻlgan bir nechta maxsus pedagoglar oʻrtasida dars soatlari teng taqsimlanadi.

15. Mazkur Nizomning 13 va 14-bandlarida nazarda tutilgan talablarga muvofiq boʻlmagan holda maxsus pedagoglarga dars soatlari taqsimlanishiga yoʻl qoʻyilmaydi.

16. Ixtisoslashtirilgan taʼlim muassasalarida tarbiyachi shtati quyidagi koʻrsatkichlarning ustuvor ketma-ketligi asosida taqsimlanadi:

korreksion pedagogika va defektologiya sohasi (surdopedagogika, tiflopedagogika, oligofrenopedagogika va logopediya mutaxassisligi) boʻyicha oliy maʼlumotli maxsus pedagoglar;

korreksion pedagogika va defektologiya sohasi (surdopedagogika, tiflopedagogika, oligofrenopedagogika va logopediya mutaxassisligi) boʻyicha kasbiy qayta tayyorlov kursini tugatgan maxsus pedagoglar;

oʻrindoshlik asosida ishlayotgan korreksion pedagogika va defektologiya sohasi (surdopedagogika, tiflopedagogika, oligofrenopedagogika va logopediya mutaxassisligi) boʻyicha oliy maʼlumotli maxsus pedagoglar;

oliy taʼlim muassasalarining korreksion pedagogika va defektologiya sohasi (surdopedagogika, tiflopedagogika, oligofrenopedagogika va logopediya mutaxassisligi) boʻyicha uchinchi va undan yuqori kurs talabalari.

Tarbiyachi mazkur koʻrsatkichlarning bir nechtasiga ega boʻlganda, koʻrsatkichlarning eng ustuvorini inobatga olgan holda dars soatlari taqsimlanadi.

Aynan bir xil koʻrsatkichlar mavjud boʻlgan bir nechta tarbiyachilar oʻrtasida tarbiyachi shtatlari teng taqsimlanadi.

Ushbu bandda nazarda tutilgan mezonlarga muvofiq boʻlmagan holda tarbiyachilarga tarbiyachilik shtati taqsimlanishiga yoʻl qoʻyilmaydi.

17. Maxsus pedagoglarga yarim (0,5) stavkadan kam va bir (1) stavkadan ortiq dars soatlari belgilanishiga yoʻl qoʻyilmaydi, ushbu bandning ikkinchi xatboshisida nazarda tutilgan hollar bundan mustasno.

Quyidagi hollarda maxsus pedagoglarga dars soatlari yarim (0,5) stavkadan kam va bir (1,0) stavkadan ortiq (bunda maxsus pedagogning tarif stavkasi bir yarim (1,5) stavkadan ortib ketishiga yoʻl qoʻyilmaydi) belgilanishi mumkin:

oʻquv rejaga muvofiq bitta fandan dars soatlari yarim (0,5) stavkagacha mavjud boʻlganda;

oʻquv rejaga muvofiq bitta fandan dars soatlari maxsus pedagoglarga bir (1,0) stavkagacha taqsimlangandan soʻng ushbu fandan ortib qolgan dars soatlari yarim (0,5) stavkagacha mavjud boʻlganda;

maxsus pedagog mehnat taʼtili, ijodiy taʼtil yoki mehnatga layoqatsizligi davrida uning darslarini tegishli fan yoʻnalishidagi boshqa maxsus pedagoglarga taqsimlash zarurati mavjud boʻlganda;

vakant soatlar mavjud boʻlganda ushbu vakant oʻringa maxsus pedagog ishga qabul qilingunga qadar.

18. Ixtisoslashtirilgan taʼlim muassasalarining pedagogik kengashi tomonidan taqsimlangan dars soatlari har yili 17-sentabrga qadar elektron dasturga kiritiladi.

Ixtisoslashtirilgan taʼlim muassasasi pedagogik kengashi tomonidan dars soatlari qayta taqsimlanishi mumkin. Bunda qayta taqsimlangan dars soatlari bir ish kuni ichida elektron dasturga kiritiladi.

19. Homiladorlik va tugʻish taʼtili hamda bola parvarishidan qaytgan maxsus pedagoglarga, shuningdek, pensiya yoshidagi maxsus pedagog va tarbiyachilarga dars soatlari mehnat qonunchiligiga asosan tegishlicha mazkur Nizomning 14 va 16-bandlarida belgilangan koʻrsatkichlar ustuvor ketma-ketligi asosida taqsimlanadi.

20. Maxsus pedagoglarning tarifikatsiya roʻyxatini shakllantirish maqsadida ixtisoslashtirilgan taʼlim muassasasining oʻquv ishlari boʻyicha oʻrinbosari tomonidan har yili 20-sentabrga qadar elektron dasturga quyidagi maʼlumotlar kiritiladi va hududiy boshqarmalarga koʻrib chiqish uchun yuboriladi:

maxsus pedagogning ismi, familiyasi, otasining ismi, diplom boʻyicha maʼlumoti, malaka toifasi toʻgʻrisidagi maʼlumotlar;

bazaviy tarif stavkalari toʻgʻrisidagi maʼlumotlar, shu jumladan maxsus pedagogning tarif stavkalari toʻgʻrisidagi maʼlumotlar (bunda maxsus pedagogning har bir fan uchun maʼlumoti va tegishli malaka toifasi berilgan sanasi va amal qilish muddati koʻrsatiladi);

pedagogik kengash tomonidan maxsus pedagoglar oʻrtasida taqsimlangan dars soatlari;

daftarlarni va yozma ishlarni tekshirganlik uchun qoʻshimcha haq toʻlovlari;

maxsus pedagogga biriktirilgan sinf va sinf rahbarligi uchun qoʻshimcha haq toʻlovlari;

uyda yakka tartibda mashgʻulotlar olib borayotgan maxsus pedagoglarga taqsimlangan dars soatlari va ular boʻyicha maxsus pedagogning tarif stavkalari;

qonunchilik hujjatlariga muvofiq belgilanadigan boshqa ustama va qoʻshimcha toʻlovlar.

21. Hududiy boshqarmalar tomonidan maxsus pedagoglarning tarifikatsiya roʻyxati uch ish kuni ichida mazkur Nizomning 20-bandidagi maʼlumotlarning toʻgʻri va toʻliq kiritilganligi yuzasidan koʻrib chiqiladi hamda Agentlikka tasdiqlash uchun yuboriladi yoki aniqlangan xato va kamchiliklarni asoslantirgan holda qayta ishlash uchun ixtisoslashtirilgan taʼlim muassasalariga qaytariladi.

22. Qayta ishlash uchun yuborilgan maxsus pedagoglarning tarifikatsiya roʻyxati ixtisoslashtirilgan taʼlim muassasalari tomonidan ikki ish kuni ichida qayta koʻrib chiqiladi va hududiy boshqarmalarga elektron dastur orqali qaytadan yuboriladi.

Bunda qayta yuborilgan tarifikatsiya roʻyxati hududiy boshqarmalar tomonidan shu kunning oʻzida koʻrib chiqiladi va Agentlikka tasdiqlash uchun yuboriladi.

23. Agentlik tomonidan har yili 25-sentabrga qadar maxsus pedagoglarning tarifikatsiya roʻyxati quyidagi mezonlar asosida koʻrib chiqiladi hamda tasdiqlanadi:

bir (1) stavkada ishlovchi maxsus pedagog uchun I — IV sinflardagi haftalik oʻquv yuklamasi — 18 soat va pedagogik yuklamasi — 18 soatni hamda V — XI sinflardagi haftalik oʻquv yuklamasi — 20 soatni va pedagogik yuklama — 16 soatni tashkil etadi, bunda maxsus pedagogning pedagogik yuklamasi haftalik oʻquv yuklamasiga mos ravishda I — IV sinflarda 1,0 koeffitsiyentga, V — XI sinflarda 0,8 koeffitsiyentga koʻpaytirilgan holda hisoblanganligi;

uyda yakka tartibda mashgʻulotlar olib borayotgan maxsus pedagoglarga haq toʻlash bazaviy tarif stavkasini oʻquv va pedagogik yuklamalarga boʻlish, ularni yakka tartibda oʻtkazilgan haqiqiy dars soatlariga koʻpaytirish va qonunchilik hujjatlarida belgilangan miqdorda maxsus pedagogning tarif stavkasi hamda lavozim maoshlari miqdoriga qoʻshimcha toʻlov amalga oshirilganligi (bunda yakka tartibda oʻquvchini uyda oʻqitayotgan maxsus pedagoglarning asosiy oylik yuklamasi ixtisoslashtirilgan taʼlim muassasasida boʻlishi shart);

maxsus pedagoglarga ketma-ket ikki oydan ortiq boʻlmagan davrda kasallik yoki boshqa sabablar bilan ishda boʻlmagan xodimlarning oʻrnini bosish tartibida ishlab berilgan soatlari uchun soatbay haq toʻlashda maxsus pedagoglarning lavozimi va malaka toifasi uchun qonunchilik hujjatlarida belgilangan bazaviy tarif stavkalari asosida toʻlovlar, ustamalar va qoʻshimcha toʻlovlar amalga oshirilganligi;

daftarlarni va yozma ishlarni tekshirganlik uchun qoʻshimcha haq maxsus pedagogning daftarlar va yozma ishlar boʻyicha tekshiriladigan fanlarning umumiy soatlari va sinf komplektidagi oʻquvchilar sonidan kelib chiqqan holda hisoblanganligi;

sinf rahbarligi uchun qoʻshimcha haq Oʻzbekiston Respublikasi Vazirlar Mahkamasining 2005-yil 21-dekabrdagi 275-son “Xalq taʼlimi xodimlari mehnatiga haq toʻlashning takomillashtirilgan tizimini tasdiqlash toʻgʻrisida”gi qaroriga muvofiq sinfdagi oʻquvchilar soniga koʻra belgilangan miqdorlar boʻyicha hisoblanganligi;

maxsus pedagoglarga bittadan ortiq sinfga rahbarlik qilishga va mehnatini soatbay asosda olib boruvchi maxsus pedagoglarga sinfga rahbarlik qilishga yoʻl qoʻyilmasligi (bunda boshlangʻich sinflarda sinf rahbarligi ona tili, oʻqish va matematika fanlaridan dars oʻtadigan maxsus pedagoglarga yuklatiladi);

maxsus pedagoglarga har oylik qoʻshimcha toʻlovlar va ustamalar qonunchilik hujjatlariga muvofiq belgilanganligi;

fanlar boʻyicha vakant soatlar uchun mablagʻlarni rejalashtirish barcha ustama va qoʻshimchalarni inobatga olib, bir (1,0) stavkada ishlovchi maxsus pedagogning bazaviy tarif stavkasi hisobidan kelib chiqqan holda elektron dastur orqali hisoblanganligi;

vakant sinf rahbarligi boʻyicha qoʻshimcha haq toʻlovlari sinfdagi oʻquvchilar soniga koʻra belgilangan miqdorlarda hisoblanganligi.

24. Maxsus pedagoglarning tarifikatsiya roʻyxati mazkur Nizomning 23-bandidagi mezonlarga muvofiq holda elektron dastur orqali kiritilgan boʻlsa, Agentlik tomonidan tasdiqlanadi.

25. Mazkur Nizomning 23-bandidagi mezonlarga nomuvofiq holda elektron dastur orqali kiritilgan maxsus pedagoglarning tarifikatsiya roʻyxatini tasdiqlash Agentlik tomonidan xato va kamchiliklar koʻrsatilgan holda rad etiladi.

Rad etilgan maxsus pedagoglarning tarifikatsiya roʻyxati xato va kamchiliklarni asoslantirgan holda qayta ishlash uchun ixtisoslashtirilgan taʼlim muassasasiga qaytariladi.

Qaytarilgan maxsus pedagoglarning tarifikatsiya roʻyxati ixtisoslashtirilgan taʼlim muassasasi tomonidan ikki ish kuni ichida qayta koʻrib chiqiladi va elektron dastur orqali hududiy boshqarmalarga qayta yuboriladi. Bunda hududiy boshqarmalar tomonidan maxsus pedagoglarning tarifikatsiya roʻyxati shu kunning oʻzida Agentlikka elektron dastur orqali yuboriladi.

Qayta yuborilgan maxsus pedagoglarning tarifikatsiya roʻyxati Agentlik tomonidan bir ish kuni ichida koʻrib chiqiladi va tasdiqlanadi.

26. Maxsus pedagoglarning tarifikatsiya roʻyxati oʻzgartirilishi va qayta koʻrib chiqilishi mumkin. Bunda maxsus pedagoglar oʻrtasida taqsimlangan dars soatlariga jami dars soatlari rejasi doirasida kiritiladigan oʻzgartirishlar ixtisoslashtirilgan taʼlim muassasasi tomonidan amalga oshiriladi.

Maxsus pedagoglarning tarifikatsiya roʻyxatidagi sinf sonining koʻpayishi yoki kamayishi oqibatida kiritiladigan oʻzgartirishlar Agentlik tomonidan qayta tasdiqlanishi lozim.

27. Manfaatdor shaxslar ixtisoslashtirilgan taʼlim muassasalarida sinflarni komplektlash hamda tarifikatsiya roʻyxatlarini shakllantirish yuzasidan norozi boʻlgan taqdirda, sudga yoki vakolatli organlarga qonunchilikda belgilangan tartibda murojaat qilish huquqiga ega.

28. Mazkur Nizom talablari buzilishida aybdor boʻlgan shaxslar qonunchilik hujjatlariga muvofiq javobgar boʻladi.