Aholi bilan davlat organlari o‘rtasida ochiq va samarali muloqotni ta’minlash, fuqarolarning murojaat qilish huquqini so‘zsiz amalga oshirish orqali ularning davlat boshqaruvida ishtirokini yanada kengaytirish, Xalq qabulxonalari faoliyatini samarali tashkil qilish maqsadida, shuningdek, O‘zbekiston Respublikasi Prezidentining 2025-yil 14-iyuldagi “Davlat boshqaruvi tizimida samaradorlik, proaktivlik va natijadorlikni oshirish chora-tadbirlari to‘g‘risida”gi PF-111-son Farmoniga muvofiq qaror qilaman:

1. Quyidagilar aholi bilan muloqot tizimini takomillashtirishning maqsadlari etib belgilansin:

(a) aholi bilan davlat organlari o‘rtasida ochiq va samarali muloqotni ta’minlash;

(b) Xalq qabulxonalarining yagona vertikal tizimini joriy etish orqali ular faoliyatini samarali tashkil qilish;

(v) Xalq qabulxonalarining “mahalla yettiligi”, davlat organlari va tashkilotlarining jamoatchilik bilan aloqalar bo‘limlari (axborot xizmatlari) bilan yaqin hamkorligini ta’minlash orqali murojaatlarning bevosita hududlarda qabul qilinishi va ko‘rib chiqilishiga erishish.

2. 2026-yil 1-maydan shunday tartib o‘rnatilsinki, unga muvofiq:

(a) O‘zbekiston Respublikasi Prezidenti Virtual qabulxonasi axborot tizimiga kelib tushgan murojaatlar bo‘yicha nazorat vaqti rejimi o‘rnatiladi, bunda ko‘rib chiqilishi belgilangan muddatdan o‘tgan murojaatlar ijro uchun avtomatik ravishda yuqori turuvchi davlat organiga o‘tadi;

(b) O‘zbekiston Respublikasi Prezidentining Virtual qabulxonasi axborot tizimida murojaatlarni qabul qilishda ular “shoshilinch”, “odatiy”, “maslahat talab qiluvchi” toifalariga ajratish amaliyoti yo‘lga qo‘yiladi, nazoratga qaytarilgan murojaatlar uch ish kuni ichida yuqori turuvchi organlar tomonidan qayta o‘rganib chiqiladi;

(v) aholi murojaatlari bilan ishlash bo‘yicha davlat organlari va tashkilotlari rahbarlari hisobotlarini O‘zbekiston Respublikasi Oliy Majlisining Qonunchilik palatasi va Senatida, hokimlar hamda hududiy davlat organlari va tashkilotlari rahbarlari hisobotlarini esa tegishlicha Senatda yoki mahalliy kengashlarda har chorakda kamida bir marta eshitib borish tartibi joriy qilinadi;

(g) davlat organlari va tashkilotlarining axborot xizmatlari Xalq qabulxonalari bilan hamkorlikda hududda murojaatlar bilan ishlash holatini yoritadi, shuningdek, ommaviy axborot vositalari va ijtimoiy tarmoqlardagi murojaatlarning ko‘rib chiqilishiga oid e’tirozlarni o‘rganib boradi va bu ular faoliyatining samaradorligi ko‘rsatkichlarida aks ettiriladi.

3. Belgilab qo‘yilsinki:

(a) Qoraqalpog‘iston Respublikasi Vazirlar Kengashi Raisi, viloyatlar va Toshkent shahri, tuman (shahar) hokimlari tegishli Xalq qabulxonasiga jamoatchilik asosida rahbarlik qiladi hamda muntazam ravishda Xalq qabulxonasida fuqarolarni shaxsan qabul qiladi va muammolarini joyida hal qilish choralarini ko‘radi, murojaatlar tahlilini olib boradi;

(b) vazirlik va idoralar rahbarlari, Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari tomonidan faoliyati bo‘yicha O‘zbekiston Respublikasi Prezidenti huzurida qilinadigan taqdimotlarda aholi murojaatlaridagi tizimli muammolar va ularning yechimi yuzasidan rejalari haqida alohida hisobot beriladi;

(v) kelib tushayotgan murojaatlarni hal qilish, ularni tahlil qilish, aniqlangan tizimli muammolar yechimi yuzasidan takliflar ishlab chiqish uchun davlat organlari va tashkilotlari, jumladan, mahalliy hokimliklarda doimiy faoliyat olib boradigan ishchi guruhlar tashkil etiladi hamda ularga davlat organlari va tashkilotlarining shaxsan birinchi rahbarlari boshchilik qiladi, ishlab chiqilgan takliflarni har uch oyda Vazirlar Mahkamasiga kiritib boradi;

(g) O‘zbekiston Respublikasi Prezidenti Virtual va Xalq qabulxonalariga kelib tushgan murojaatlar bilan ishlash holati bo‘yicha har olti oyda O‘zbekiston Respublikasi Prezidenti Virtual qabulxonasi axborot tizimi orqali davlat organlari va tashkilotlari hamda mahalliy hokimliklarning reytingi ochiq e’lon qilib boriladi. Reytingda murojaatlar salmog‘i, ularni hal etish darajasi, muddatlarga rioya etilganligi, murojaatlarni ko‘rib chiqish natijalari bo‘yicha tizimga kiritilgan materiallar qayta ijroga yuborilishi, takroriyligi kabi mezonlar aks ettiriladi;

(d) davlat organlari va tashkilotlari, mahalliy hokimliklar tomonidan o‘tkaziladigan shaxsiy va sayyor qabullar tizimini to‘liq raqamlashtirish orqali qabullar jarayoni ustidan nazorat o‘rnatiladi;

(j) Qoraqalpog‘iston Respublikasi Vazirlar Kengashi Raisi, viloyatlar va Toshkent shahri, tuman (shahar) hokimlari tomonidan har chorakda kamida bir marta ommaviy axborot vositalari yoki ijtimoiy tarmoqlardagi rasmiy sahifalari orqali murojaatlar bilan ishlash faoliyati, hududda muammolarni hal qilish bo‘yicha ko‘rilgan choralar, kelgusida bajariladigan ishlar va rejalar haqida keng jamoatchilikka batafsil axborot beriladi;

(z) jamoaviy tusdagi murojaatlar aholi vakillari va “mahalla yettiligi” ishtirokida o‘rganilib, ular roziligi asosida nazoratdan olinadi;

(i) davlat organlari va tashkilotlarining murojaatlar bilan ishlash bo‘linmalari xodimlari, shuningdek, “mahalla yettiligi” a’zolarining murojaatlar bilan ishlash faoliyati tegishlicha Xalq qabulxonalari tomonidan muvofiqlashtiriladi.

4. O‘zbekiston Respublikasi Prezidenti huzurida yuridik shaxs maqomiga ega bo‘lgan O‘zbekiston Respublikasi Prezidenti Xalq qabulxonasi (keyingi o‘rinlarda — Prezident Xalq qabulxonasi) tashkil etilsin.

Prezident Xalq qabulxonasi markaziy apparatining umumiy boshqaruv xodimlari shtat birliklari soni 49 ta hamda yordamchi xodimlar (xizmatchilar) soni 20 ta etib belgilanadi.

Bunda:

(a) 19 ta shtat birligi O‘zbekiston Respublikasi Prezidentining 2025-yil 14-iyuldagi PF-111-sonli Farmonida nazarda tutilganligi ma’lumot uchun qabul qilinsin;

(b) 30 ta shtat birligi O‘zbekiston Respublikasi Prezidentining tuman va shaharlardagi Xalq qabulxonalari shtat birliklarini qisqartirish hisobiga ajratilsin.

5. Belgilansinki:

(a) O‘zbekiston Respublikasi Prezidentining Qoraqalpog‘iston Respublikasi, viloyatlar va Toshkent shahri hamda tuman (shahar)dagi Xalq qabulxonalari Prezident Xalq qabulxonasining alohida bo‘linmalari sifatida yuridik shaxs tashkil etmasdan faoliyat yuritadi hamda mahalliy budjet mablag‘lari hisobidan moliyalashtiriladi;

(b) Prezident Xalq qabulxonasi markaziy apparati faoliyati O‘zbekiston Respublikasining respublika budjeti hisobidan moliyalashtiriladi.

6. O‘zbekiston Respublikasi Prezidentining Qoraqalpog‘iston Respublikasi, viloyatlar va Toshkent shahri hamda tuman (shahar)dagi Xalq qabulxonalarida mavjud shtat birliklari doirasida Xalq qabulxonasi mudir o‘rinbosari lavozimi joriy etilsin.

7. Shunday tartib o‘rnatilsinki, unga muvofiq:

(a) Prezident Xalq qabulxonasi boshlig‘i — O‘zbekiston Respublikasi Prezidenti tomonidan, uning ikki nafar o‘rinbosari, shu jumladan, bir nafar birinchi o‘rinbosari esa — O‘zbekiston Respublikasi Prezidenti Administratsiyasi rahbari tomonidan;

(b) Qoraqalpog‘iston Respublikasi, viloyatlar va Toshkent shahridagi Xalq qabulxonalari mudirlari o‘rinbosarlari O‘zbekiston Respublikasi Prezidenti Administratsiyasi rahbari bilan kelishilgan holda Prezident Xalq qabulxonasi boshlig‘i tomonidan;

(v) tuman (shahar)dagi Xalq qabulxonalari mudirlari o‘rinbosarlari, Prezident Xalq qabulxonasi markaziy apparati va Xalq qabulxonalari boshqa xodimlari — Prezident Xalq qabulxonasi boshlig‘i tomonidan lavozimga tayinlanadi va lavozimdan ozod etiladi.

8. Belgilab qo‘yilsinki:

(a) Prezident Xalq qabulxonasi o‘z faoliyatini O‘zbekiston Respublikasi Prezidenti Administratsiyasining Kommunikatsiyalar departamenti mutasaddiligida amalga oshiradi va unga hisob beradi;

(b) O‘zbekiston Respublikasi Prezidenti Administratsiyasining Kommunikatsiyalar departamenti boshlig‘i o‘rinbosari bir vaqtning o‘zida Prezident Xalq qabulxonasi boshlig‘i hisoblanadi;

(v) Prezident Xalq qabulxonasi boshlig‘i o‘rinbosarlariga O‘zbekiston Respublikasi Prezidenti Administratsiyasining boshqarma boshlig‘i uchun belgilangan mehnatga haq to‘lash shartlari tatbiq etiladi.

9. Quyidagilar Prezident Xalq qabulxonasining asosiy vazifalari etib belgilansin:

(a) O‘zbekiston Respublikasi Prezidentiga, O‘zbekiston Respublikasi Prezidenti Administratsiyasiga ariza va shikoyatlar bilan kelgan jismoniy shaxslarni va yuridik shaxslar vakillarini qabul qilish hamda ularning murojaatlari ko‘rib chiqilishini ta’minlash;

(b) murojaatlar davlat organlari va boshqa tashkilotlar tomonidan har tomonlama, to‘liq, xolis va o‘z vaqtida ko‘rib chiqilishi va nazorat qilinishini tashkil etish;

(v) murojaatlarda ko‘tarilgan, joylarda aniqlangan tizimli muammolarni tahlil qilish, natijalari bo‘yicha tegishli materiallar tayyorlash;

(g) joylardagi Xalq qabulxonalari faoliyatini muvofiqlashtirish, normativ-uslubiy va axborot-tahliliy jihatdan ta’minlash, shuningdek, ularga yuklatilgan vazifa va funksiyalarning bajarilishini monitoring qilish;

(d) vazirlik va idoralar, hokimliklarda murojaatlar bilan ishlashda qonunchilik hujjatlari talablariga rioya etilishini ta’minlash, tegishli tashkilotlarga ko‘rsatma va topshiriqlar yuborish.

10. Prezident Xalq qabulxonasi quyidagi huquq va vakolatlarga ega:

(a) O‘zbekiston Respublikasi Prezidenti Virtual va Xalq qabulxonalariga murojaat qilgan shaxslarning huquqlariga rioya etilishi bo‘yicha qonunchilik hujjatlarining so‘zsiz bajarilishi, zarur hollarda, huquqni muhofaza qiluvchi va nazorat qiluvchi organlar xodimlari va “mahalla yettiligi” a’zolarini jalb qilgan holda o‘rganilishini tashkil qilish;

(b) davlat organlari va tashkilotlari rahbarlari tomonidan sayyor va ommaviy qabullar reja-grafiklar asosida o‘tkazilishini nazorat qilish, aholi e’tirozlariga sabab bo‘layotgan masalalar bo‘yicha qabullar tashkil etish yuzasidan bajarilishi majburiy bo‘lgan talabnoma kiritish;

(v) davlat organlari va tashkilotlari rahbarlarining shaxsiy qabullari o‘tkazilishini va “ishonch telefonlari” faoliyatini monitoring qilish;

(g) aholi murojaatlari bilan ishlash holati to‘g‘risida O‘zbekiston Respublikasi Oliy Majlisining Qonunchilik palatasi va Senati hamda Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar kengashlariga tahliliy axborotlar kiritish;

(d) davlat organlari va tashkilotlari rahbarlariga jismoniy va yuridik shaxslarning murojaatlari to‘g‘risidagi qonunchilik hujjatlari buzilishi, ularni keltirib chiqargan sabab va sharoitlarni bartaraf etish bo‘yicha ko‘rib chiqilishi majburiy bo‘lgan taqdimnomalar kiritish;

(j) jismoniy va yuridik shaxslarning murojaatlari to‘g‘risidagi qonunchilik hujjatlariga rioya etilishini nazorat qilish va aniqlangan qonunbuzilishi holatlari yuzasidan ma’muriy huquqbuzarlik to‘g‘risida bayonnoma tuzish hamda ko‘rib chiqish uchun sudga yuborish;

(z) murojaatlarda ko‘tarilgan masala, muammo va keltirilgan vajlarni har tomonlama tekshirish va samarali hal qilish yuzasidan murojaatlarni ko‘rib chiquvchi davlat organlari va tashkilotlariga ko‘rsatmalar berish;

(i) o‘z vakolatlari doirasiga kiruvchi masalalar yuzasidan davlat organlari va tashkilotlaridan statistik, tahliliy materiallar, xulosalar va boshqa ma’lumotlarni talab qilib olish;

(k) davlat organlari va tashkilotlarining murojaatlar va aholi muammolari bilan ishlash, ijtimoiy soha va boshqa obyektlarda aniqlangan muammolarni hal qilish borasidagi faoliyatini o‘rganish maqsadida ularning hududi va binolariga moneliksiz kirish;

(l) mansabdor shaxslar va fuqarolardan jismoniy va yuridik shaxslarning murojaatlari to‘g‘risidagi qonunchilik hujjatlari buzilishi xususida og‘zaki va yozma tushuntirishlar talab qilib olish;

(m) davlat organlari va tashkilotlarining murojaatlar bilan ishlash faoliyatini muhokama qilishga oid yig‘ilishlarida ishtirok etish;

(n) qonunchilikda belgilangan tartibda davlat organlari va tashkilotlari ma’lumotlar bazalaridan foydalanish;

(o) aholi kayfiyatiga ta’sir qilayotgan masalalar bo‘yicha davlat organlari va tashkilotlari rahbarlarining hisobotini eshitib borish;

(p) o‘ziga yuklatilgan vazifalarni bajarish uchun, zarur hollarda, davlat organlari, ilmiy-tadqiqot muassasalari va boshqa tashkilotlar rahbarlari va mutaxassislaridan iborat tarkibda ishchi guruhlar tuzish;

(r) Prezident Xalq qabulxonasi qonunchilik hujjatlariga muvofiq boshqa huquq va vakolatlarga ham ega bo‘lishi mumkin.

11. Davlat organlari va tashkilotlari Prezident Xalq qabulxonasi va joylardagi Xalq qabulxonalari tomonidan kiritilgan talabnoma, taqdimnoma, ko‘rsatmalarni bajarmagan taqdirda, ushbu holatlar bo‘yicha materiallar tegishli choralar ko‘rish uchun prokuratura organlariga kiritiladi.

12. Prezident Xalq qabulxonasi:

(a) bir oy muddatda Prezident Xalq qabulxonasi to‘g‘risidagi nizom va uning tuzilmasi hamda shtatlar jadvalini O‘zbekiston Respublikasi Prezidenti Administratsiyasi rahbariga tasdiqlash uchun kiritsin;

(b) olti oy muddatda aholi bilan muloqotni samarali tashkil etish bo‘yicha rivojlangan xorijiy mamlakatlarning tajribasini o‘rganish orqali, shuningdek, keng jamoatchilik vakillarining takliflarini inobatga olgan holda Xalq qabulxonalari faoliyatini hamda davlat organlarida aholi murojaatlari bilan ishlash tizimini yanada takomillashtirish yuzasidan taklif kiritsin.

13. Prezident Xalq qabulxonasi Toshkent shahri Mirobod tumani Fidokorlar ko‘chasi 23-uy va Shayxontohur tumani Bunyodkor shohko‘chasi 2-uy manzillaridagi binolarga tekin foydalanish huquqi asosida joylashtirilsin.

Bunda mazkur binolarda foydalanishda bo‘lgan ofis jihozlari (kompyuter, printer va aloqa jamlamalari, mebel va boshqa kerakli inventar va uskunalar) Prezident Xalq qabulxonasining balansiga beg‘araz o‘tkazib berilishi nazarda tutilsin.

14. Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari ikki oy muddatda barcha Xalq qabulxonalarining moddiy-texnik bazasini to‘liq xatlovdan o‘tkazib, ularda xalq bilan muloqot qilish va murojaatlar bilan ishlashni yaxshilash uchun zarur sharoitlar yaratsin, Xalq qabulxonalari xodimlarini zamonaviy kompyuterlar, mebel jihozlari hamda boshqa kerakli asbob-uskunalar va anjomlar, yuqori tezlikdagi Internet tarmog‘i bilan ta’minlash choralarini ko‘rsin.

15. Iqtisodiyot va moliya vazirligi:

(a) bir oy muddatda Prezident Xalq qabulxonasi faoliyatini tashkil etish uchun talab qilinadigan mablag‘larni 2026-yilda O‘zbekiston Respublikasining respublika budjetidan birinchi darajali budjet mablag‘larini taqsimlovchilarning iqtisod qilingan mablag‘lari doirasida ajratsin. Bunda Prezident Xalq qabulxonasini zarur mebel, kompyuter va boshqa jihozlar bilan ta’minlash uchun mablag‘ ajratilishini nazarda tutsin;

(b) 2027-yildan boshlab har yili Davlat budjeti parametrlarini shakllantirishda Prezident Xalq qabulxonasi faoliyatini moliyalashtirish uchun zarur mablag‘larni nazarda tutsin.

16. Adliya vazirligi manfaatdor vazirlik va idoralar bilan birgalikda uch oy muddatda qonunchilik hujjatlariga ushbu Farmondan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

17. Quyidagilar:

(a) O‘zbekiston Respublikasining Prezidentining qabuli so‘ralgan murojaatlar bilan ishlash tartibi to‘g‘risidagi nizom 1-ilovaga* muvofiq tasdiqlansin;

(b) O‘zbekiston Respublikasi Prezidentining 2-ilovaga* muvofiq ayrim hujjatlariga o‘zgartirish va qo‘shimchalar kiritilsin.

18. Mazkur Farmonning ijrosini nazorat qilish O‘zbekiston Respublikasi Bosh vaziri A.N. Aripov va O‘zbekiston Respublikasi Prezidenti Administratsiyasi Kommunikatsiyalar departamenti boshlig‘i — O‘zbekiston Respublikasi Prezidenti matbuot kotibi Sh.I. Asadov zimmasiga yuklansin.