Andijon viloyatida zamonaviy menejment tamoyillari hamda davlat va tadbirkorlik subyektlari o‘rtasida o‘zaro manfaatli hamkorlik tizimini joriy etish, mavjud resurslardan samarali foydalanish, viloyatning ijtimoiy infratuzilmasi va arxitektura qiyofasini yaxshilash, shuningdek, harakat xavfsizligini ta’minlashning zamonaviy talablariga to‘liq muvofiqlashtirish, yangi avtomobil yo‘llari qurish va ulardan foydalanish talablarini yanada kuchaytirish maqsadida qaror qilaman:

1. Quyidagilar ushbu qarorni qabul qilishdan ko‘zlangan asosiy maqsadlar etib belgilansin:

(a) muhandislik-kommunikatsiya tarmoqlarini kengaytirish va to‘liq modernizatsiya qilish;

(b) viloyatning shahar va tumanlari, shu jumladan, Andijon viloyati Andijon tumani Yangi Andijon (Bobur) shaharchasini tashqi muhandislik-kommunikatsiya tarmoqlari bilan ta’minlash;

(v) investorlar faoliyatini qo‘llab-quvvatlash;

(g) sifatli darajada avtomobil yo‘llarini qurish-ta’mirlash ishlarini tashkil etish;

(d) ichimlik suvi ta’minoti va oqova suv tarmoqlarini yaxshilash.

2. Andijon viloyatida davlat va tadbirkorlik subyektlari o‘rtasida o‘zaro manfaatli hamkorlik asosida investitsiya loyihalarini amalga oshirish va viloyat infratuzilmasini yaxshilash bo‘yicha quyidagi tartib joriy etilsin:

(a) Andijon viloyati hokimligi muassisligida davlat va tadbirkorlik subyektlari o‘rtasida ko‘prik vazifasini bajaruvchi “Andijon Invest kompaniyasi” aksiyadorlik jamiyatini (keyingi o‘rinlarda — Kompaniya)ni tashkil etish;

(b) viloyat infratuzilmasini rivojlantirishga qaratilgan loyihalarni moliyalashtirish, aholining kundalik hayotidagi kommunal va boshqa sohalardagi kechiktirib bo‘lmaydigan masalalarni tezkor hal etish maqsadida Andijon viloyati hokimligi huzuridagi Tadbirkorlik infratuzilmasini rivojlantirish jamg‘armasini Andijon viloyatini rivojlantirish hududiy maqsadli jamg‘armasi (keyingi o‘rinlarda — Jamg‘arma) deb qayta nomlash va Jamg‘arma mablag‘larini boshqarish huquqini Kompaniyaga berish;

(v) yer uchastkalarini qurilish uchun ruxsat berish va loyiha hujjatlari rasmiylashtirilgan holda tayyor biznes shaklida tadbirkorlik subyektlari bilan o‘zaro manfaatli loyihalarni amalga oshirish uchun auksion savdolariga chiqarish;

(g) 2026-yil 1-martdan boshlab muhandislik-kommunikatsiya tarmoqlari va transport infratuzilmasini barpo qilish xarajatlarining bir qismini shaharsozlik faoliyati obyektini qurish yoki rekonstruksiya qilishni loyihalashtirish uchun arxitektura-rejalashtirish topshirig‘ini ishlab chiqish bo‘yicha to‘lov qiymatiga kiritish va uni biryo‘la yoki bo‘lib-bo‘lib to‘lash imkoniyati bilan to‘liq Jamg‘armaga yo‘naltirish (bundan budjet tizimi budjetlari hisobidan moliyalashtiriladigan obyektlar, yakka tartibdagi uy-joylar hamda nodavlat maktabgacha va umumiy o‘rta ta’lim tashkilotlari mustasno).

3. Quyidagilar:

(a) “Andijon Invest kompaniyasi” aksiyadorlik jamiyati faoliyatining ustuvor yo‘nalishlari 1-ilovaga muvofiq;

(b) Andijon viloyati hokimligi huzuridagi Andijon viloyatini rivojlantirish hududiy maqsadli jamg‘armasi mablag‘larini shakllantirish manbalari va sarflash yo‘nalishlari 2-ilovaga muvofiq tasdiqlansin.

4. Belgilansinki:

(a) Kompaniyaning ustav kapitali Xalq deputatlari Andijon viloyati kengashi qarori asosida Andijon viloyati viloyat budjetining qo‘shimcha manbalari va munitsipal mulklar hamda qonunchilikda taqiqlanmagan boshqa mablag‘lar hisobidan bosqichma-bosqich shakllantiriladi;

(b) Kompaniyaning alohida yo‘nalishlar bo‘yicha loyiha ofislarini tashkil etish va ularni moliyalashtirish masalalari uning muassisi tomonidan belgilanadi;

(v) Kompaniya va Jamg‘arma mablag‘larini loyihalar va boshqa maqsadlarga yo‘naltirish hamda tijorat banklari va xalqaro moliya institutlaridan qarz mablag‘larini jalb etish (davlat kafolati ostidagi jalb etiladigan qarz mablag‘lari bundan mustasno) Kompaniya muassisi qarori asosida amalga oshiriladi;

(g) Kompaniya hisobvaraqlari tijorat banklarida, Jamg‘arma hisobvaraqlari Iqtisodiyot va moliya vazirligi huzuridagi G‘aznachilik xizmati qo‘mitasida ochiladi;

(d) Jamg‘arma mablag‘laridan Andijon viloyati hokimligi majburiyatlari bo‘yicha ijro hujjatlari va inkasso topshiriqnomasi asosida mablag‘ undirishga yo‘l qo‘yilmaydi;

(j) O‘zbekiston Respublikasi Prezidentining 2022-yil 21-yanvardagi “Respublika hududlarida tadbirkorlik infratuzilmasini rivojlantirishga doir qo‘shimcha chora-tadbirlar to‘g‘risida”gi PF-54-son Farmonida belgilangan tadbirlarni Jamg‘arma mablag‘lari hisobidan moliyalashtirish tartibi saqlab qolinadi;

(z) Andijon, Samarqand, Farg‘ona viloyatlari va Toshkent shahrini rivojlantirish jamg‘armalari mahalliy budjetlar darajasidagi davlat maqsadli jamg‘armalari hisoblanadi. Bunda ushbu jamg‘armalarga g‘aznachilik xizmati ko‘rsatishning soddalashtirilgan tartibi Iqtisodiyot va moliya vazirligi tomonidan tegishli hokimliklar bilan kelishilgan holda normativ-huquqiy hujjat shaklida ishlab chiqiladi.

5. Kompaniya faoliyati ochiqligi va uning jamoatchilik oldidagi hisobdorligini ta’minlash maqsadida shunday tartib o‘rnatilsinki, unga muvofiq:

(a) Kompaniya buxgalteriya hisobotini moliyaviy hisobotning xalqaro standartlariga (MHXS) muvofiq tuzadi va mazkur hisobot auditning xalqaro standartlariga asosan auditorlik kompaniyalari tomonidan tashqi auditdan o‘tkazilgandan keyin 2027-yildan boshlab har yili 1-avgustga qadar Andijon viloyati hokimligining rasmiy veb-saytida joylashtiriladi;

(b) Kompaniya tomonidan moliyaviy va nomoliyaviy hisobotlar hamda unga nisbatan tijorat va notijorat maqsadlar 2028-yildan boshlab Andijon viloyati hokimligining rasmiy veb-saytida joylashtiriladi;

(v) 2028-yilga qadar Kompaniyada ISO, ERP va boshqaruvning boshqa zamonaviy tizimlari joriy qilinib, u tomonidan yetakchi xalqaro agentliklarning kredit reytingi olinishi ta’minlanadi;

(g) Andijon viloyati hokimining ijtimoiy-iqtisodiy rivojlanishning eng muhim va dolzarb masalalari yuzasidan Xalq deputatlari Andijon viloyati kengashi oldidagi hisobotida Kompaniya faoliyati natijadorligi va Jamg‘arma mablag‘laridan samarali foydalanilishi to‘g‘risidagi ma’lumot aks ettiriladi.

6. Vazirlar Mahkamasi:

(a) bir hafta muddatda quyidagilarni nazarda tutuvchi tegishli normativ-huquqiy hujjatni tasdiqlasin:

(i) yer uchastkalari negizida Kompaniya va tadbirkorlik subyektlari o‘rtasida o‘zaro manfaatli hamkorlik asosida investitsiya loyihalarini amalga oshirish;

(ii) Andijon viloyati muhandislik-kommunikatsiya tarmoqlari va transport infratuzilmasini barpo qilish xarajatlarining bir qismini shaharsozlik faoliyati obyektini qurish yoki rekonstruksiya qilishni loyihalashtirish uchun arxitektura-rejalashtirish topshirig‘ini ishlab chiqish bo‘yicha to‘lov qiymatiga kiritish;

(iii) Andijon viloyatida loyihalarni davlat-xususiy sheriklik shartlarida soddalashtirilgan tartibda amalga oshirish;

(iv) Andijon viloyatida shaharsozlik renovatsiya loyihalarini amalga oshirish;

(b) ikki oy muddatda Andijon shahrida qurilishga ruxsat berishga oid hujjatlarni raqamli ko‘rinishda rasmiylashtirish tartibini nazarda tutuvchi ma’muriy reglamentni tasdiqlasin.

7. Andijon viloyati hokimligi Qurilish va uy-joy kommunal xo‘jaligi vazirligi, Raqamli texnologiyalar vazirligi, Kadastr agentligi bilan birgalikda qurilishga ruxsat berishga oid hujjatlarni rasmiylashtirish jarayonlarini raqamlashtirish maqsadida 2026-yil birinchi chorak yakuniga qadar Andijon shahri bosh rejasining raqamli formatini ishlab chiqsin hamda uning “Shaffof qurilish” milliy axborot tizimiga integratsiya qilinishini ta’minlasin.

8. Hisob palatasi hokimliklar tomonidan tashkil etilgan investitsiya kompaniyalari har yili noyabr oyigacha ishlab chiqadigan biznes-rejani tanqidiy ko‘rib chiqib, ularni takomillashtirish yuzasidan muassisga takliflar berilishini hamda yil yakuni bilan kompaniyalar faoliyati audit nazoratidan o‘tkazilishini ta’minlasin.

9. Mazkur qarorning ijrosini samarali tashkil qilishga mas’ul va shaxsiy javobgar etib Andijon viloyati hokimi Sh.K. Abduraxmanov belgilansin.

10. Qaror ijrosini muhokama qilib borish, ijro uchun mas’ul idoralar faoliyatini muvofiqlashtirish va nazorat qilish O‘zbekiston Respublikasi Bosh vaziri A.N. Aripov zimmasiga yuklansin.

1. “Andijon Invest kompaniyasi” AJ (keyingi o‘rinlarda — Kompaniya) tomonidan Andijon viloyati, shahar va tumanlar hokimliklari hamda ular tarkibidagi korxona va muassasalarga tegishli mulklar (keyingi o‘rinlarda — munitsipal mulklar) holatini tahlil qilish, mavjud resurs va imkoniyatlarni aniqlash va ulardan samarali foydalanish bo‘yicha takliflar ishlab chiqish.

2. Kompaniya boshqaruviga berilgan munitsipal mulklarni boshqarish, ularning negizida davlat sherigi sifatida davlat-xususiy sheriklik loyihalarini amalga oshirish hamda ularni tadbirkorlik subyektlariga ijaraga va boshqaruvga berish, ularning monitoringini yuritish va samaradorligini baholab borish.

3. Munitsipal mulklarning investitsion jozibadorligini oshirish, kompaniya boshqaruviga berilgan munitsipal mulklar negizida investorlar bilan hamkorlikda investitsiya loyihalarini amalga oshirish.

4. Kompaniya boshqaruviga berilgan bozor va savdo komplekslari hamda boshqa munitsipal mulklarni zamonaviy talablarga moslashtirish, yaroqsiz holga kelganlarini buzib, ularning o‘rnida yangi binolar qurish va belgilangan tartibda sotish yoki ijaraga berish.

5. Tadbirkorlik subyektlarining Andijon viloyati infratuzilmasini rivojlantirish bilan bog‘liq istiqbolli loyihalarini ularning moliyaviy jozibadorligi va samaradorligidan kelib chiqib moliyalashtirishda ishtirok etish.

6. Andijon viloyatining alohida hududlarini rivojlantirish va renovatsiya dasturlari, master reja va quriladigan obyektlarning loyiha hujjatlarini ishlab chiqish jarayonlarini moliyalashtirish.

7. Hududlarni kompleks ijtimoiy-iqtisodiy rivojlantirish maqsadida avariya holatidagi yoki yaroqsiz holga kelib qolgan turar va noturar joylarni zamonaviy talablar asosida qayta qurish, kapital ta’mirlash, rekonstruksiya qilishga oid tadbirlarni amalga oshirish.

8. Andijon viloyatidagi qurilish va rekonstruksiya qilish ishlarini hamda infratuzilma tarmoqlariga ulanish jarayonlarini muvofiqlashtirish.

9. Bo‘sh yer uchastkalarini Kompaniya ustav fondiga kiritish va tadbirkor bilan loyihani amalga oshirish huquqini onlayn auksion savdolariga qo‘yish.

10. Kompaniya boshqaruviga berilgan munitsipal mulklarni hamda ustav fondiga kiritilgan yer uchastkalari negizida loyiha qiymati 1 million AQSH dollarigacha bo‘lgan ekvivalentdagi davlat-xususiy sheriklik loyihalarini amalga oshirish.

1. Jamg‘arma mablag‘lari hisobidan moliyalashtirilgan loyihalardan olingan daromadlar, shu jumladan, “Andijon Invest kompaniyasi” aksiyadorlik jamiyati (keyingi o‘rinlarda — Kompaniya) tomonidan yangidan yaratilgan aktivlarni sotishdan tushgan tushumlar.

2. Kompaniya davlat sherigi sifatida ishtirok etgan davlat-xususiy sheriklik loyihalaridan olingan daromadlar.

3. Andijon viloyatidagi qishloq xo‘jaligiga mo‘ljallanmagan yer uchastkalarini xususiylashtirishdan hamda yer uchastkalarini ijaraga olish huquqini elektron onlayn auksion orqali sotishdan tushadigan mablag‘larning Vazirlar Mahkamasi tomonidan belgilangan xarajatlar chegirib qolingandan so‘ng qolgan qismining 100 foizi va yer uchastkasi joylashgan tuman budjetiga yo‘naltiriladigan qismi, bundan maxsus iqtisodiy zonalar, yoshlar kichik sanoat va tadbirkorlik zonalaridagi yer uchastkalari mustasno.

4. Qishloq xo‘jaligiga mo‘ljallangan yer uchastkalarini ijaraga berish, qishloq xo‘jaligi yerlarini yer ijarasi huquqi asosida auksion orqali sotishdan tushadigan tushumlar, qo‘shimcha to‘lovlar hamda ijara to‘lovlarining Andijon viloyati mahalliy budjetiga yo‘naltiriladigan qismining 100 foizi.

5. Andijon viloyatida maxsus avtomatlashtirilgan foto va video qayd etish dasturiy-texnik vositalar qayd etgan yo‘l harakati qoidalari buzilganligi uchun jarimalarning Andijon viloyati mahalliy budjetiga yo‘naltiriladigan qismining 100 foizi.

6. Andijon viloyatida tashqi reklama va axborot obyektini (konstruksiyasini) joylashtirish uchun qonunchilikda belgilangan to‘lovning Andijon viloyati mahalliy budjetiga yo‘naltiriladigan qismining 100 foizi.

7. Andijon viloyatida muhandislik-kommunikatsiya tarmoqlari va transport infratuzilmasini yaratish xarajatlarining bir qismini qoplash maqsadida shaharsozlik faoliyati obyektini qurish yoki rekonstruksiya qilishni loyihalashtirish uchun arxitektura-rejalashtirish topshirig‘ini ishlab chiqish qiymatiga kiritilgan to‘lovning 100 foizi.

8. Hududi 10 ming metr kvadratgacha bo‘lgan davlat ko‘chmas mulk obyektlari, shuningdek, viloyat, tuman (shahar) hokimlarining qarorlari asosida sotiladigan davlat ko‘chmas mulk obyektlarini sotishdan tushadigan mablag‘larning viloyat mahalliy budjetiga hamda obyekt joylashgan tuman (shahar) mahalliy budjetiga tushgan qismining 100 foizi.

9. Hududi 10 ming metr kvadratdan ortiq bo‘lgan davlat ko‘chmas mulk obyektlarini sotishdan tushgan tushumlarning respublika budjetiga yo‘naltiriladigan qismining 50 foizi.

10. Yakka tartibda uy-joy qurish va uy-joyni obodonlashtirish uchun yer uchastkalarini mulk huquqi asosida elektron onlayn auksion orqali realizatsiya qilish (sotish)dan tushadigan mablag‘larning Vazirlar Mahkamasi tomonidan belgilangan xarajatlar chegirib qolingandan so‘ng qolgan qismi va yer uchastkasi joylashgan tuman budjetiga yo‘naltiriladigan qismining 100 foizi.

11. Vaqtincha bo‘sh turgan mablag‘larni tijorat banklari depozitlariga joylashtirish hisobidan olingan daromadlar.

12. Andijon viloyatining viloyat budjeti daromadlarining prognozdan oshirib bajarilgan qismidan ajratmalar.

13. Jismoniy va yuridik shaxslarning homiylik xayriyalari, xalqaro moliya institutlari va xorijiy tashkilotlarning grantlari hamda kredit mablag‘lari.

14. Qonunchilikda taqiqlanmagan boshqa manbalar.

15. Kompaniya tomonidan, shu jumladan, investorlar ishtirokida investitsiya loyihalari, davlat-xususiy sheriklik loyihalari, Andijon viloyatining infratuzilmasini rivojlantirish bilan bog‘liq istiqbolli loyihalarni amalga oshirish.

16. Andijon viloyatining alohida hududlarini rivojlantirish va renovatsiya dasturlari, master reja va quriladigan obyektlarning loyiha hujjatlarini ishlab chiqish.

17. Iqtisodiyot tarmoqlari va ijtimoiy soha obyektlarini qurish, rekonstruksiya qilish, mukammal ta’mirlash va jihozlash.

18. Hududlarni obodonlashtirish va ko‘kalamzorlashtirish.

19. Renovatsiya dasturlarini amalga oshirish.

20. Andijon viloyati Andijon tumani Yangi Andijon (Bobur shahri) shaharchasini, “Yangi O‘zbekiston” massivlari, davlat uy-joy dasturlarida ko‘zda tutilgan massivlar, shuningdek, maxsus iqtisodiy zonalar, kichik sanoat zonalari, yoshlar sanoat va tadbirkorlik zonalarini tashqi muhandislik-kommunikatsiya tarmoqlari (ichimlik va oqova suv, elektr energiyasi, tabiiy gaz tarmoqlari va avtomobil yo‘li) bilan ta’minlash.

21. Qiymati 200 milliard so‘mdan oshadigan, investorning o‘z mablag‘lari ulushi 25 foizdan kam bo‘lmagan, investitsiya dasturlariga kiritilgan loyihalar, shuningdek, xalqaro va respublika ahamiyatidagi avtomobil yo‘llari bo‘yidagi yaxlit yer maydonlarida tashkil etiladigan yo‘l bo‘yi infratuzilma obyektlarini tashqi muhandislik-kommunikatsiya tarmoqlari bilan ta’minlash.

22. Andijon viloyati hokimligining budjet ssudalarini, tijorat banklari va xorijiy moliya tashkilotlaridan jalb qilingan kreditlarni, jismoniy va yuridik shaxslarga yetkazilgan mulkiy va ma’naviy zararlarni qoplash hamda shahar va tumanlarni ijtimoiy-iqtisodiy rivojlantirishga oid tadbirlarni moliyalashtirish, shuningdek, yer uchastkalari davlat organlari va muassasalari foydalanishida bo‘lgan va ularning tashabbusi bilan elektron onlayn auksionga qo‘yilgan taqdirda, ushbu davlat organlari va tashkilotlariga yo‘naltirilishi belgilangan mablag‘larni to‘lab berish.

23. Bozorlar, savdo komplekslari, boshqa munitsipal mulklarni qayta qurish va buzish, ularning o‘rnida qurilishlar qilish bilan bog‘liq xarajatlarni qoplash.

24. Yer uchastkalarini savdoga chiqarishda ular bo‘yicha barcha ruxsat beruvchi hujjatlarni rasmiylashtirishda (arxitektura-rejalashtirish topshirig‘i, qurilish loyihalari va boshqalar) yuzaga keladigan xarajatlarni qoplash.

25. Kompaniya kuzatuv kengashi qarori asosida qonunchilik hujjatlariga zid bo‘lmagan Kompaniya faoliyati bilan bog‘liq boshqa xarajatlarni amalga oshirish.