Inson manfaatlarini taʼminlash chora-tadbirlari Dasturini bajarish va yangi tugʻilgan chaqaloqlar hamda homilador ayollardagi patologiyani barvaqt aniqlash davlat tizimini tashkil etish maqsadida Vazirlar Mahkamasi qaror qiladi:

1. Bolalikdan nogironligi boʻlgan bolalar tugʻilishining oldini olish uchun yangi tugʻilgan chaqaloqlar hamda homilador ayollarda tugʻma va boshqa patologiyani barvaqt aniqlash boʻyicha “Ona va bola skrininggi” davlat dasturi 1 va 2-ilovalarga* muvofiq tasdiqlansin.

2. Oʻzbekiston Respublikasi Sogʻliqni saqlash vazirligi va “Sogʻlom avlod uchun” jamgʻarmasiga “Ona va bola skrininggi” dasturining amalga oshirilishini muvofiqlashtirib borish va nazorat qilish vazifasi yuklansin.

3. Maʼlumot uchun qabul qilinsinki;

skrining-markazlarni tashkil etish faoliyat koʻrsatayotgan davolash-profilaktika muassasalari shoxobchalari hisobiga amalga oshiriladi. Markazlarni mablagʻ bilan taʼminlash sogʻliqni saqlashga ajratiladigan budjet mablagʻlari hamda homiylar mablagʻlari hisobiga amalga oshiriladi;

1993 — 2001-yillar davrida, “Sogʻlom avlod uchun” jamgʻarmasi tomonidan “Vallak” konserni (Finlyandiya) va “Bristol Mayers Skvibb” kompaniyasi (AQSh) bilan tuzilgan bitimlarga muvofiq, “Ona va bola skrininggi” dasturi doirasida tashkil etiladigan skrining-markazlar texnikaviy muruvvat yordami sifatida umumiy summasi 1,2 mln AQSh dollaridan iborat boʻlgan diagnostika apparatlari, tashkiliy texnika va kommunikatsiya vositalari bilan jihozlanadi.

4. Oʻzbekiston Respublikasi Moliya vazirligi “Ona va bola skrininggi” davlat dasturini amalga oshirish uchun har yili 1 va 2-ilovalarga muvofiq mablagʻlar ajratishni nazarda tutsin.

5. Oʻzbekiston Respublikasi Tashqi iqtisodiy aloqalar vazirligi, Tashqi iqtisodiy faoliyat milliy banki, Davlat bojxona qoʻmitasi “Ona va bola skrininggi” davlat dasturini bajarish doirasida tuzilgan kontraktlarni ustuvor asosda koʻrib chiqsinlar.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

bir oy muddatda “Oʻzavtotrans” korporatsiyasining hududiy boʻlinmalari bilan birgalikda skrining davomida aniqlangan patologiyali shaxslarni (homilador ayollar va bolalarni bir nafar kuzatuvchi bilan birga) shaharlararo qatnaydigan avtobuslarda yashash joyidan tegishli mintaqaviy skrining-markazgacha bepul olib kelish va olib ketish tartibini ishlab chiqsinlar;

“Sogʻlom avlod uchun” jamgʻarmasi, Oʻzbekiston Respublikasi Xotin-qizlar qoʻmitasi va “Mahalla” jamgʻarmasi bilan birgalikda “Ona va bola skrininggi” davlat dasturini bajarishni har tomonlama qoʻllab-quvvatlasinlar hamda aholi oʻrtasida bolalarning rivojlanish xastaliklari bilan tugʻilishining oldini olishning ijtimoiy ahamiyati toʻgʻrisida keng tushuntirish ishlarini tashkil qilsinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari D. Gʻulomova va A. Azizxoʻjayev zimmasiga yuklansin.