Oʻzbekiston Respublikasi Oliy Kengashining 1992-yil 14-yanvardagi “Oʻzbekiston Respublikasi hududida joylashgan harbiy qismlar va harbiy taʼlim muassasalari toʻgʻrisida”gi qaroriga va Minsk shahrida Mustaqil Davlatlar Hamdoʻstligiga aʼzo davlatlar Rahbarlari Kengashining 1992-yil 14-fevraldagi kelishuviga muvofiq:

1. Belgilansinki, Oʻzbekiston Respublikasi yurisdiksiyasiga oʻtkazilgan harbiy tuzilmalarni strategik va operativ rejalashtirishni muvofiqlashtirish Mustaqil Davlatlar Hamdoʻstligi Birlashgan Qurolli Kuchlari Bosh qoʻmondonligi tomonidan amalga oshiriladi.

2. Oʻzbekiston Respublikasi yurisdiksiyasiga oʻtkazilgan birlashma, qoʻshilma, harbiy bilim yurtlari, muassasalar va Umumiy moʻljallanishdagi kuchlarning boshqa harbiy tuzilmalariga rahbarlik qilish Oʻzbekiston Respublikasi Mudofaa ishlari vazirligi zimmasiga yuklansin.

3. Oʻzbekiston Respublikasi Vazirlar Mahkamasiga (Oʻ. Mutalovga), oʻn kun muddatda Oʻzbekiston Respublikasi yurisdiksiyasiga oʻtkazilgan harbiy qism, muassasa, korxona, tashkilot, harbiy bilim yurtlari, oliy va oʻrta-maxsus taʼlim muassasalarining harbiy kafedralari va tayyorlash boʻlinmalari ishchi va xizmatchilarining hamda haqiqiy harbiy xizmatdagi harbiy xizmatchilarning lavozim okladlari, tarif stavkalari va ofitserlar tarkibining harbiy unvonlari uchun okladlar kattaligini 1991-yilga nisbatan 2 barobarga oshirish boʻyicha maxsus qaror ishlab chiqilsin va qabul qilinsin, shuningdek, aʼlo xizmatlari uchun qoʻshimcha moliyaviy ragʻbatlantirish va turar joy ijarasi uchun kompensatsiya toʻlash belgilansin.

4. Oʻzbekiston Respublikasi Mudofaa ishlari vazirligiga (Oʻ. Axmedovga), Oʻzbekiston Respublikasi Adliya vazirligiga (Oʻ. Malikov), manfaatdor vazirlik va idoralar bilan birgalikda bir oy muddatda mudofaa, umumharbiy majburiyat, harbiy xizmatchilarning ijtimoiy va huquqiy himoyasi toʻgʻrisida, shuningdek, Oʻzbekiston Respublikasi hududida joylashgan strategik kuchlar statusi toʻgʻrisida Oʻzbekiston Respublikasi qonunlari loyihalari ishlab chiqilsin va belgilangan tartibda Oʻzbekiston Respublikasi Oliy Kengashiga koʻrib chiqish uchun kiritilsin.

5. Oʻzbekiston Respublikasi Mudofaa ishlari vazirligi Markaziy apparati Turkiston harbiy okrugi boshqarmasi shtabi binosida quyidagi manzilda joylashtirilsin: Toshkent sh., M. Gorkiy prospekti, 100.

6. Mazkur Farmonning 4-moddasidagi Oʻzbekiston Respublikasi qonunlari qabul qilingunga qadar, sobiq SSR ittifoqining tegishli normativ hujjatlariga, agar ular respublika qonunchiligiga zid kelmasa, amal qilinsin.