1. O‘zbekiston Respublikasi Ichki ishlar organlari shon-shuhrat, jasorat va e’tiqod ramzi — Jangovar Bayrog‘ining yagona nusxasi belgilansin.

2. O‘zbekiston Respublikasi Ichki ishlar organlarining Jangovar Bayrog‘i to‘g‘risidagi Nizom, uning tavsifi va Yorliq ilovaga muvofiq tasdiqlansin.

1. O‘zbekiston Respublikasi ichki ishlar organlarining Jangovar Bayrog‘i shon-shuhrat, jasorat va e’tiqod ramzidir. U O‘zbekiston Respublikasi ichki ishlar organlarining har bir xodimini xalqiga va jonajon Vataniga sadoqat bilan xizmat qilish, halol va pok vijdonli bo‘lish, xalq manfaatlariga xizmat qilish, O‘zbekiston Respublikasining manfaatlarini, fuqarolarning huquqlari va erkinliklari, qonuniy manfaatlarini jinoiy tajovuzlardan muhofaza qilishdek o‘z zimmasiga yuklatilgan xizmat burchlarini bor kuchi va bilimini, zarur bo‘lsa hayotini ham ayamasdan mardlik va matonat bilan ado etishga da’vat etadi.

2. O‘zbekiston Respublikasi Ichki ishlar vazirligiga Jangovar Bayroq O‘zbekiston Respublikasi Prezidenti vakili tomonidan, ichki ishlar organiga va oliy ta’lim muassasasiga esa O‘zbekiston Respublikasi Prezidenti nomidan O‘zbekiston Respublikasi Ichki ishlar vaziri yoki uning vakili tomonidan yorliq bilan birgalikda tantanali raviщda topshiriladi.

3. Jangovar Bayroq doimiy ravishda ichki ishlar organida belgilangan maxsus joyda saqlanadi.

4. Jangovar Bayroq ichki ishlar organlarining nomi o‘zgarishidan qat’iy nazar, doimiy saqlanadi. Basharti ichki ishlar organi nomi o‘zgarsa, bu haqda O‘zbekiston Respublikasi Prezidenti tomonidan Bayroq topshirilayotganda beriladigan Yorliqqa shu haqda tegishli o‘zgartirishlar yozib qo‘yiladi.

5. Bayroqni tantanali marosimlarga olib chiqish, joyiga o‘rnatish va uni asrash tartibi Ichki ishlar vazirligining normativ-huquqiy hujjatlari asosida amalga oshiriladi.

6. Ichki ishlar idoralarining shaxsiy tarkibi Jangovar Bayroqni doimo ko‘z qorachig‘idek asrashi zarur. Jangovar Bayroq yo‘qolgan taqdirda, ichki ishlar organi xodimlari va rahbari qonun hujjatlariga muvofiq jazolanadilar.

O‘zbekiston Respublikasi ichki ishlar organi Jangovar Bayrog‘i ikki tomonlama mato, dasta va shokilali popugdan iborat bo‘lib, uning uch tomoni 9 santimetrli gajm bilan tikib chiqiladi.

O‘zbekiston Respublikasining Davlat bayrog‘i O‘zbekiston Respublikasi Ichki ishlar vazirligi organlari Jangovar Bayrog‘ining asosi hisoblanadi.

Jangovar Bayroq butun uzunligi bo‘ylab o‘tgan to‘q moviy rang, oq rang va to‘q yashil rangli uchta endan tarkib topgan to‘g‘ri to‘rtburchak shakldagi matodir.

Jangovar Bayroqning uzunligi 160 santimetrga, kengligi 103 santimetrga teng. Moviy, oq va yashil rangli enlar kengligi bir xil. Har bir enning kengligi 33 santimetr. Bayroqning o‘rtasida joylashtirilgan oq rangli enning chetlaridan kengligi 2 santimetrga teng qizil hoshiyalar o‘tkazilgan.

Jangovar Bayroqning yuqori qismidagi moviy rangli enning oldi va orqa tomonida, dastaga yaqin joyida oq rangli yarim oy va uning yonida o‘n ikkita oq rangli besh qirrali yulduz tasvirlangan.

Yarim oy va yulduzlarning tasviri moviy rangli yuqori enning o‘rtasidan 45 x 20 santimetrga teng to‘g‘ri to‘rtburchakka sig‘adigan qilib joylashtirilgan.

Yarim oy vertikal holatda do‘ng tomoni dastaga qaratilgan, dastadan 10 santimetr masofada joylashtirilgan bo‘lib, diametri 20 santimetrli doiraga sig‘adi.

Yulduzlar diametri 4 santimetrli doiraga sig‘adi. Doiralar orasidagi masofa 2 santimetr. Yulduzlar uzunasiga va tikkasiga quyidagi tartibda joylashadi: yuqori qatorda uchta, o‘rta qatorda to‘rtta va quyi qatorda beshta yulduz. Quyi qatordagi yulduzlar yarim oyning pastki uchidan 2 santimetr masofada joylashadi.

Jangovar Bayroqning yuz tomonidagi oq rangli yo‘liga lotin yozuvi asosidagi o‘zbek alifbosida “VATAN VA XALQ MANFAATINI HIMOYA QILISH MUQADDAS BURCHDIR” shiori hamda bayroqning orqa tomoniga “O‘ZBEKISTON RESPUBLIKASI ICHKI ISHLAR VAZIRLIGI” degan yozuvlar oltin hoshiyali ipak bilan tikiladi.

Jangovar Bayroqning orqa tomonidagi oq rangli yo‘liga topshirilayotgan ichki ishlar organining nomi tikib yoziladi. Harflar kattaligi 9 santimetr, ichki ishlar organi nomidagi so‘zlarga qarab 5 santimetrgacha qisqartirilishi mumkin.

Jangovar Bayroqning dastasi yog‘ochdan yasalgan bo‘lib diametri 4 santimetr, uzunligi 2,2 metr, yog‘och dasta laklangan va pastki qismi 10 santimetrli temir gardishga mahkamlanadi, yuqori uchli qismiga nikellangan uchburchak oysimon shakldagi tug‘ kiydiriladi. Bayroqni tepa qismidan eshilgan ipakli popug pastga qarab osilib turadi, uning uzunligi 246 santimetrdan iborat bo‘ladi.