Qonunchilikka muvofiq, fuqarolar oliy harbiy ta’lim muassasasini tamomlagandan so‘ng besh kalendar yil mobaynida ofitserlar tarkibi lavozimlarida harbiy xizmatni o‘tashi, xizmatni o‘tamagan taqdirda esa o‘qitish uchun sarflangan mablag‘larni Davlat budjetiga qaytarishi lozimligi belgilangan.

Shu bilan birga bugungi kunda oliy harbiy ta’lim muassasalarining bitiruvchilari nafaqat harbiy xizmatchi bo‘lib, balki xodim sifatida ham xizmatni o‘tash uchun boshqa vazirlik va idoralarga yuborilayotgani sababli ushbu bitiruvchilarning xodim sifatida besh kalendar yil davomida xizmatni o‘tashga majburligini qonunchilikda belgilash zarurati yuzaga kelmoqda.

Yuqoridagilarga ko‘ra Davlat budjetidan sarflangan mablag‘lar samarali bo‘lishini ta’minlash va yosh ofitser kadrlar qo‘nimsizligining oldini olish maqsadida qaror qilaman:

1. O‘zbekiston Respublikasi Prezidentining 2019-yil 12-sentabrdagi PQ-4447-son qarori bilan tasdiqlangan O‘zbekiston Respublikasi fuqarolarining harbiy xizmatni o‘tash tartibi to‘g‘risidagi nizomga ilovaga muvofiq oliy harbiy ta’lim muassasalari bitiruvchilari o‘qishni bitirgandan so‘ng ofitser lavozimlarida besh kalendar yil davomida xizmatni o‘tamaganda, ulardan o‘qitish uchun sarflangan mablag‘lar undirib olinishini nazarda tutuvchi o‘zgartirish va qo‘shimcha kiritilsin.

2. Milliy gvardiya, Ichki ishlar vazirligi, Mudofaa vazirligi, Favqulodda vaziyatlar vazirligi, Davlat xavfsizlik xizmati va boshqa manfaatdor tashkilotlar:

(a) ushbu qarorning ijrosini, ijrochilarga yetkazilishini hamda mohiyati va ahamiyati shaxsiy tarkib o‘rtasida tushuntirilishini ta’minlasin;

(b) oliy harbiy ta’lim muassasalari kursantlari bilan mazkur qaror bilan kiritilayotgan o‘zgartirish va qo‘shimchaga muvofiq qo‘shimcha kontraktlar tuzsin.

3. Milliy gvardiya manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

4. Mazkur qarorning ijrosini nazorat qilish O‘zbekiston Respublikasi Bosh vaziri A.N. Aripov va O‘zbekiston Respublikasi Prezidenti huzuridagi Xavfsizlik kengashi kotibi V.V. Maxmudov zimmasiga yuklansin.

1. 304-band quyidagi tahrirda bayon etilsin:

“304. Oliy harbiy ta’lim muassasasini bitirgandan keyin o‘qishni tugatgandan so‘ng tuzilgan kontrakt bo‘yicha ko‘zda tutilgan muddat tugamasdan yoki besh kalendar yil mobaynida ofitserlar tarkibi lavozimlarida xizmatni o‘tamasdan harbiy xizmatni (xizmatni) o‘tashdan bosh tortgan, shuningdek, kontrakt shartlarini bajarmaganligi, sodir etgan jinoyati uchun sudlanganligi sababli bo‘shatilayotgan yoki bunday kontraktni tuzishdan bosh tortgan harbiy xizmatchi (xodim) O‘zbekiston Respublikasi qonunchiligiga muvofiq uni o‘qitish uchun sarflangan budjet mablag‘larini davlatga qoplab beradi”.

2. 3-ilovaning 2-bandi “v” kichik bandi “besh yil muddatga kontrakt tuzish” so‘zlaridan keyin “yoki besh kalendar yil davomida ofitserlar tarkibi lavozimlarida xizmatni o‘tash” so‘zlari bilan to‘ldirilsin.