Oʻzbekiston Respublikasi Vazirlar Mahkamasining 2017-yil 31-avgustdagi 683-son “Avtomototransport vositalarini davlat roʻyxatidan oʻtkazish va ularga roʻyxatdan oʻtkazish davlat raqami belgilarini berish tartibini takomillashtirish toʻgʻrisida”gi qaroriga muvofiq buyuraman:

1. Oʻzbekiston Respublikasi ichki ishlar vazirining 2009-yil 13-oktabrdagi 107-son buyrugʻi (roʻyxat raqami 2050, 2009-yil 30-noyabr) (Oʻzbekiston Respublikasi qonun hujjatlari toʻplami, 2009-y., 50-51-son, 545-modda) bilan tasdiqlangan Avtomototransport vositalarini qayta roʻyxatdan oʻtkazishni (qayd etishni) tashkil etish va amalga oshirish tartibi toʻgʻrisidagi yoʻriqnomaga ilovaga muvofiq oʻzgartirishlar va qoʻshimcha kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. Muqaddima quyidagi tahrirda bayon etilsin:

“Ushbu Yoʻriqnoma avtomototransport vositalarini (tirkamalarini, yarim tirkamalarini) (bundan buyon matnda transport vositasi deb yuritiladi) qayta roʻyxatdan oʻtkazish (qayd etish), shuningdek, ularning yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilarini qayta tiklash va almashtirish tartibini belgilaydi.”.

2. 4-band quyidagi tahrirda bayon etilsin:

“4. Transport vositalarini qayta roʻyxatdan oʻtkazish (qayd etish) Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari va viloyatlar ichki ishlar boshqarmalari Jamoat xavfsizligi xizmati yoʻl harakati xavfsizligi boshqarmalarining roʻyxatdan oʻtkazish va imtihon olish boʻlimlari, tumanlararo roʻyxatdan oʻtkazish va imtihon olish boʻlinmalari yoki tumanlararo roʻyxatdan oʻtkazish va imtihon olish guruhlari (bundan buyon matnda ROʻvaIOB deb yuritiladi) tomonidan amalga oshiriladi.”.

3. 5, 8 va 13-bandlardagi “RIB (TRIB)larga” degan soʻz “ROʻvaIOBlarga” degan soʻz bilan almashtirilsin.

4. 6-banddagi “RIB (TRIB)lar” degan soʻz “ROʻvaIOBlar” degan soʻz bilan almashtirilsin.

5. 9-band quyidagi tahrirda bayon etilsin:

“9. ROʻvaIOB tomonidan jismoniy va yuridik shaxslarning yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilarini qayta tiklash boʻyicha murojaatlari umumlashtiriladi hamda bir oyda bir marta Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatiga (bundan buyon matnda IIV JXD YHXX deb yuritiladi) buyurtma rasmiylashtiriladi.

Bunda, ROʻvaIOB tomonidan jismoniy va yuridik shaxslarning yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilarini qayta tiklash uchun ariza berganligini tasdiqlovchi maʼlumotlar IIV JXD YHXXning Yagona avtomatlashtirilgan axborot tizimiga kiritiladi.”.

6. 10-bandda:

ikkinchi va uchinchi xatboshilar chiqarib tashlansin;

toʻrtinchi va beshinchi xatboshilar tegishli ravishda ikkinchi va uchinchi xatboshilar deb hisoblansin.

7. 11-band quyidagi tahrirda bayon etilsin:

“11. Buyurtmalar asosida yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilari IIV JXD YHXX qoshidagi “Oʻzavtomotobelgi” davlat unitar korxonasida (bundan buyon matnda Davlat unitar korxona deb yuritiladi) qayta ishlab chiqariladi. Buyurtmalar Davlat unitar korxonasiga kelib tushgandan keyin mazkur Yoʻriqnomaning 10-bandida koʻrsatilgan hujjatlar tekshiriladi.”.

8. 14-banddagi “IIV YHXBB” degan soʻzlar “IIV JXD YHXX” degan soʻzlar bilan almashtirilsin.

9. Quyidagi mazmundagi 14¹ va 14²-bandlar bilan toʻldirilsin:

“14¹. Qayta tiklangan roʻyxatdan oʻtkazish davlat raqami belgilari transport vositalarining egalariga topshirilayotganda yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilari ROʻvaIOBlarga qaytariladi hamda qabul qilish-topshirish dalolatnomasi tuziladi.

14². ROʻvaIOBlar qabul qilib olingan yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilari va qabul qilish-topshirish dalolatnomasini Davlat unitar korxonasiga yuboradi.

Davlat unitar korxonasida yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilarining haqiqiy holati koʻrib chiqiladi.

Yaroqsiz holga kelib qolgan, shikastlangan yoki buzilgan roʻyxatdan oʻtkazish davlat raqami belgilari yoʻq qilinadi va bu haqda tegishli dalolatnoma tuziladi.”.

10. 15-band quyidagi tahrirda bayon etilsin:

“15. Yangi roʻyxatdan oʻtkazish davlat raqami belgilari topshirilgan kundan boshlab oʻttiz kun ichida mexanik ravishdagi deformatsiya taʼsiri natijasida yuzaga kelmagan ishlab chiqarish kamchiliklari oqibatida quyidagi yaroqsiz holatlarga kelsa, bunday roʻyxatdan oʻtkazish davlat raqami belgilarini qayta tiklash bepul amalga oshiriladi:

roʻyxatdan oʻtkazish davlat raqami belgilari koʻrinmaydigan darajaga kelib qolganda;

himoya elementlari va yorugʻlik qaytaruvchi qoplamalari oʻz xususiyatini yoʻqotganda;

roʻyxatdan oʻtkazish davlat raqami belgilarining joylashuvidagi oʻzgarishlar (siljishlar) kuzatilganda.

Boshqa holatlarda roʻyxatdan oʻtkazish davlat raqami belgilarini qayta tiklash toʻlov asosida amalga oshiriladi.”.

11. 16 va 17-bandlar oʻz kuchini yoʻqotgan deb topilsin.

12. 17¹-bandning birinchi xatboshisidagi “IIV YHXBBga” degan soʻzlar “IIV JXD YHXXga” degan soʻzlar bilan almashtirilsin.

13. 17²-bandning birinchi xatboshidagi “IIV YHXBB” degan soʻzlar “IIV JXD YHXX” degan soʻzlar bilan almashtirilsin.