“Sog‘lom avlod uchun” hukumatga qarashli bo‘lmagan xalqaro xayriya fondining faoliyatini yanada takomillashtirish, shuningdek, reproduktiv yoshdagi ayollar, homiladorlar va bolalarga ko‘rsatiladigan tibbiy yordam sifatini oshirish maqsadida Vazirlar Mahkamasi qaror qiladi:

1. “Sog‘lom avlod uchun” hukumatga qarashli bo‘lmagan xalqaro xayriya fondining (keyingi o‘rinlarda — Fond):

tuman (shahar)larda tashkil etilgan Fondning tayanch punktlarini tugatish;

tayanch punktlarining vazifalarini Fondning hududiy filiallariga yuklash;

tayanch punktlarining mavjud mol-mulkini belgilangan tartibda Fondning hududiy filiallariga o‘tkazish to‘g‘risidagi takliflari inobatga olinsin.

2. Fondga Sog‘liqni saqlash vazirligi bilan birgalikda joylarda, ayniqsa olis va chekka hududlarda reproduktiv yoshdagi ayollar, homiladorlar va bolalarga ko‘rsatiladigan tibbiy yordam sifatini oshirishni yanada yaxshilash maqsadida:

reproduktiv yoshdagi ayollar va bolalar orasida kasallanishni kamaytirishga hamda ularni sog‘lomlashtirishga yo‘naltirilgan “Sog‘lom ayol va bola oyligi”ni yiliga ikki marotaba tashkil etish;

bolalar va o‘smirlar, ayniqsa, o‘smir-qizlarni profilaktik ko‘riklar bilan qamrab olish;

bemor ayollar va nogironligi bo‘lgan bolalarni chuqurlashtirilgan tibbiy ko‘rikdan o‘tkazilishini ta’minlash hamda ularni sog‘lomlashtirish choralarini ko‘rish tavsiya etilsin.

3. Transport vazirligi, “Uzbekistan Airports” AJ Fondning murojaatiga asosan “Rease Village International” xalqaro tashkiloti tomonidan bemor bolalarni tashish uchun buyurtma qilingan havo kemasini qabul qilish va jo‘natishda aeronavigatsiya va yer usti aeroport xizmatlari uchun yig‘im va to‘lovlardan ozod etishni (yoqilg‘i uchun to‘lov bundan mustasno), shuningdek, bemor bolalar va ularni kuzatib boruvchi shifokorlarni Islom Karimov nomidagi Toshkent xalqaro aeroportining “CIP” zalidan bepul o‘tishlarini tashkil etsin.

4. Adliya vazirligi Soliq qo‘mitasi bilan birgalikda Fondga uning tuman (shahar) tayanch punktlarini belgilangan tartibda tugatish ishlarini tashkil etishda amaliy ko‘mak ko‘rsatsin.

5. O‘zbekiston Respublikasi Hukumatining ilovaga muvofiq ayrim qarorlari o‘z kuchini yo‘qotgan deb hisoblansin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — Oila va xotin qizlar qo‘mitasi raisi Z.B. Maxkamova hamda sog‘liqni saqlash vaziri A.A. Xudayarov zimmasiga yuklansin.

1. Vazirlar Mahkamasining “Sog‘lom avlod uchun” hukumatga qarashli bo‘lmagan xalqaro xayriya jamg‘armasining takliflari to‘g‘risida” 1993-yil 28-oktabrdagi 524-son qarorining 5-bandi.

2. Vazirlar Mahkamasining “Sog‘lom avlod uchun” hukumatga qarashli bo‘lmagan xalqaro xayriya jamg‘armasini davlat tomonidan qo‘llab-quvvatlash to‘g‘risida” 1994-yil 5-martdagi 119-son qarori.

3. Vazirlar Mahkamasining “Sog‘lom avlod uchun” hukumatga qarashli bo‘lmagan xalqaro xayriya fondini qo‘llab-quvvatlashga doir qo‘shimcha chora-tadbirlar to‘g‘risida” 2014-yil 30-yanvardagi 20-son qaroriga 2-ilovaning “Fondning tayanch punktlari” bloki va 6-ilovaning 1-bandi.

4. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “Tadbirkorlik subyektlariga davlat xizmatlarini ko‘rsatish mexanizmlarini takomillashtirishga doir qo‘shimcha chora-tadbirlar to‘g‘risida” 2017-yil 1-fevraldagi PQ-2750-son qarori)” 2017-yil 1-maydagi 252-son qaroriga 1-ilovaning 1-bandi.

5. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida” 2017-yil 11-maydagi 270-son qaroriga 1-ilovaning 3-bandi.

6. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida (O‘zbekiston Respublikasi Prezidentining “Aholiga davlat xizmatlari ko‘rsatishning milliy tizimini tubdan isloh qilish chora-tadbirlari to‘g‘risida” 2017-yil 12-dekabrdagi PF-5278-son Farmoni va O‘zbekiston Respublikasi Prezidentining “O‘zbekiston Respublikasi Adliya vazirligi huzuridagi Davlat xizmatlari agentligi faoliyatini tashkil etish to‘g‘risida” 2017-yil 12-dekabrdagi PQ-3430-son qarori)” 2018-yil 22-yanvardagi 40-son qaroriga ilovaning 1-bandi.

7. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida (O‘zbekiston Respublikasining “Normativ-huquqiy hujjatlar to‘g‘risida” 2021-yil 20-apreldagi O‘RQ-682-son Qonuni)” 2022-yil 4-apreldagi 153-son qaroriga ilovaning 4-bandi.