O‘zbekiston Respublikasi Vazirlar Mahkamasining 2024-yil 4-oktabrdagi 630-son “Bojxona tartib-taomillari yanada takomillashtirilganligi munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek, ba’zilarini o‘z kuchini yo‘qotgan deb hisoblash to‘g‘risida”gi va 2024-yil 26-noyabrdagi 787-son “Maxsus elektron tizim orqali ruxsat etish xususiyatiga ega ayrim hujjatlarni berish sohasidagi qonunchilik hujjatlari tizimlashtirilishi munosabati bilan Vazirlar Mahkamasining “Xalqaro yo‘llarda tashish daftarchasini qo‘llagan holda yuklarni xalqaro tashish sohasidagi ayrim normativ-huquqiy hujjatlarni tasdiqlash to‘g‘risida” 2021-yil 2-dekabrdagi 727-son qaroriga o‘zgartirish va qo‘shimchalar kiritish to‘g‘risida”gi qarorlariga muvofiq O‘zbekiston Respublikasi Iqtisodiyot va moliya vazirligi hamda Ichki ishlar vazirligi qaror qiladi:

1. O‘zbekiston Respublikasi Davlat bojxona qo‘mitasi va Ichki ishlar vazirligining 2010-yil 28-oktabrdagi 01-02/12-8, 20-son qarori (ro‘yxat raqami 2156, 2010-yil 19-noyabr) (O‘zbekiston Respublikasi qonun hujjatlari to‘plami, 2010-y., 47-son, 439-modda) bilan tasdiqlangan Bojxona chegarasidan olib o‘tilayotgan avtotransport vositalarini bojxona rasmiylashtiruvidan o‘tkazish tartibi to‘g‘risidagi nizomga ilovaga muvofiq qo‘shimchalar va o‘zgartirish kiritilsin.

2. Mazkur qaror rasmiy e’lon qilingan kundan e’tiboran kuchga kiradi.

1. 26, 54 va 57¹-bandlar “erkin muomalaga chiqarish” degan so‘zlardan keyin “(import)” degan so‘z bilan to‘ldirilsin.

2. 52-bandning birinchi xatboshisi quyidagi tahrirda bayon etilsin:

“52. Tovar sifatida olib kirilgan avtotransport vositasi “erkin muomalaga chiqarish (import)” yoki “vaqtincha olib kirish” bojxona rejimiga rasmiylashtirilgandan so‘ng, TIF bojxona posti tomonidan ushbu Nizomning 5-ilovasiga muvofiq Davlat bojxona xizmatining hududiy organi tomonidan DYHXXning hududiy organlariga elektron tarzda taqdim qilinadigan ma’lumotlar (keyingi o‘rinlarda elektron ma’lumotlar deb yuritiladi) Bojxona qo‘mitasining elektron bazasi orqali shakllantiriladi va DYHXXga real vaqt rejimida yuboriladi”.

3. 57-band “Erkin muomalaga chiqarish” degan so‘zlardan keyin “(import)” degan so‘z bilan to‘ldirilsin.