Mamlakatimizda rivojlanib kelayotgan kulolchilik anʼanalarini asrab-avaylash, kulollar faoliyatini yanada qoʻllab-quvvatlash, soha vakillarining nufuzini oshirish, arzon va sifatli kulolchilik mahsulotlarini ishlab chiqarish, ichki va tashqi bozorlarda sotish uchun qulay shart-sharoitlar yaratish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining tadbirkorlar bilan toʻrtinchi ochiq muloqotida belgilangan vazifalarni amalga oshirish chora-tadbirlari toʻgʻrisida” 2024-yil 30-avgustdagi PF-132-son Farmoni ijrosini taʼminlash maqsadida Vazirlar Mahkamasi qaror qiladi:

1. Fargʻona viloyati hokimligi, Oʻzbekiston Respublikasi Madaniy meros agentligi va Savdo-sanoat palatasining Fargʻona viloyati Rishton tumanining “M. Topivoldiyev” MFY Toʻqimachi koʻchasidagi 20a-uyda joylashgan, Savdo-sanoat palatasiga tegishli boʻlgan binoda Rishton anʼanaviy kulolchiligi tarixi nodavlat muzeyini (keyingi oʻrinlarda — muzey) tashkil qilish toʻgʻrisidagi taklifi maʼqullansin.

2. Quyidagilar muzeyning asosiy vazifalari etib belgilansin:

muzey ashyolari va kolleksiyalarini aniqlash, toʻplash va saqlash;

madaniy, maʼrifiy, ilmiy va taʼlim faoliyatini amalga oshirish;

yoshlarni “ustoz-shogird” anʼanalari asosida kulolchilik hunariga oʻrgatish;

kulolchilikning boy madaniy merosi, insoniyat tarixidagi rolini haqqoniy yoritish;

ekspozitsiyalarni tashkil etishda zamonaviy axborot texnologiyalaridan keng foydalanish;

chet el muzeylari bilan koʻrgazmalar tashkil etish borasida oʻzaro manfaatli hamkorlik oʻrnatish.

3. Rishton anʼanaviy kulolchiligi tarixi muzeyini tashkil etish boʻyicha ishchi guruh tarkibi ilovaga muvofiq tasdiqlansin.

Quyidagilar ishchi guruhning asosiy vazifalari etib belgilansin:

muzey konsepsiyasini ishlab chiqish va tasdiqlash;

muzey faoliyatini yoʻlga qoʻyish;

muzey fondi tarkibiga kiritilgan muzey ashyolari va kolleksiyalarining but saqlanishini taʼminlash hamda tekshirib borish;

muzeyning aholi va sayyohlarga sifatli xizmat koʻrsatishi uchun barcha zarur shart-sharoitlarni yaratish;

muzeyda madaniy-maʼrifiy, targʻibot-tashviqot, ilmiy-tadqiqot ishlari saviyasini oshirish, uning moddiy-texnik bazasini mustahkamlash uchun homiylar mablagʻlarini jalb etish;

xorijiy tajribalarni oʻrgangan holda, doimiy ravishda muzey faoliyatini takomillashtirib borish;

muzeyni zamonaviy interfaol axborot-kommunikatsiya texnologiyalari bilan taʼminlash;

muzeyni malakali kadrlar bilan toʻldirish.

4. Ishchi guruh:

bir oy muddatda muzey konsepsiyasini ishlab chiqib, Oʻzbekiston Respublikasi Madaniy meros agentligi, Fargʻona viloyati hokimligi, Turizm qoʻmitasi, “Hunarmand” uyushmasi va Savdo-sanoat palatasiga tasdiqlash uchun kiritsin hamda muzey faoliyati bilan bogʻliq barcha chora-tadbirlarni amalga oshirsin;

2025-yil 1-aprelga qadar Fargʻona viloyatining Rishton tumani “M. Topivoldiyev” MFY Toʻqimachi koʻchasidagi 20a-uyda joylashgan, Savdo-sanoat palatasiga tegishli boʻlgan binoning toifasini muzey faoliyatiga toʻliq moslashtirsin.

5. Oʻzbekiston Respublikasi Savdo-sanoat palatasiga muzeyni tashkil etish va uning faoliyat yuritishini taʼminlash, shu jumladan:

muzeyning moddiy-texnik bazasini (imoratlar, kommunikatsiyalar, jihozlar, muzey fondining ashyo va kolleksiyalari, boshqalar) boyitishga;

muzey fondining ashyo va kolleksiyalarini aniqlash, toʻplash va saqlashga;

muzeyda madaniy, maʼrifiy, ilmiy va taʼlim faoliyatini amalga oshirishga;

muzeyning bino va inshootlarini texnika xavfsizligi hamda sanitariya normalari va qoidalariga muvofiq jihozlashga;

qonunchilik hujjatlarida taqiqlanmagan sohaga doir boshqa chora-tadbirlarni amalga oshirish bilan bogʻliq xarajatlarni qoplash uchun Hunarmandchilik va kasanachilikni qoʻllab-quvvatlash jamgʻarmasidan Tarmoqlarni qoʻllab-quvvatlash jamgʻarmasiga amalga oshiriladigan ajratmalar hisobidan zarur mablagʻlarni ajratishga ruxsat berilsin.

6. Fargʻona viloyati hokimligi, Oʻzbekiston Respublikasi Turizm qoʻmitasi va “Hunarmand” uyushmasi hamkorlikda Rishton anʼanaviy kulolchiligi tarixi muzeyi hamda Rishton Xalqaro kulollar markazida “Usta-shogird” anʼanalari asosida yoshlarga kulolchilik hunarini oʻrgatishni tashkil qilsin.

7. Oʻzbekiston Respublikasi Savdo-sanoat palatasi hamda “Hunarmand” uyushmasiga Oʻzbekiston Respublikasi Prezidentining “Aholini hunarmandchilikka jalb qilish va hunarmandchilik faoliyatini rivojlantirish uchun qulay shart-sharoitlar yaratish chora-tadbirlari toʻgʻrisida” 2023-yil 12-iyundagi PF-91-son Farmoniga muvofiq Rishton tumanida:

“Usta-shogird” anʼanalari asosida yoshlarga kulolchilik hunarini oʻrgatayotgan hunarmandlarga — shogirdlar tayyorlash, zarur xomashyo sotib olish va shogirdlarni ish haqi bilan taʼminlash uchun bazaviy hisoblash miqdorining 2 baravari miqdorida;

kulolchilik hunarini oʻrgangan shogirdlarga — mustaqil kulolchilik faoliyatini boshlash hamda zarur asbob-uskuna va jihozlarni sotib olish uchun xarajatlarning 50 foizi, biroq bazaviy hisoblash miqdorining 25 baravaridan koʻp boʻlmagan miqdorda subsidiya ajratish tavsiya etilsin.

8. Oʻzbekiston Respublikasi Iqtisodiyot va moliya vazirligi Savdo-sanoat palatasi hamda “Hunarmand” uyushmasi bilan birgalikda ikki oy muddatda hunarmandchilikni, jumladan, kulolchilikni rivojlantirishga qaratilgan imtiyozlar berish, shuningdek, mavjud imtiyozlarning amal qilish muddatini uzaytirishga qaratilgan takliflarni belgilangan tartibda Vazirlar Mahkamasiga kiritsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.