Yuridik shaxs boʻlmasdan tadbirkorlik faoliyati bilan shugʻullanuvchi jismoniy shaxslarning Toshkent shahar “Otchopar buyum bozori” ochiq turdagi aksiyadorlik jamiyati hududida isteʼmol tovarlari sotishini tartibga solish maqsadida Vazirlar Mahkamasi qaror qiladi:

1. Belgilab qoʻyilsinki, 1998-yil 1-iyuldan boshlab jismoniy shaxslar yuridik shaxs boʻlmasdan tadbirkorlik faoliyati tartibida isteʼmol tovarlarini sotish uchun Toshkent shahar “Otchopar buyum bozori” hududiga faqat tadbirkorlarda tuman soliq inspeksiyalari tomonidan beriladigan nomi yozilgan guvohnomalar mavjud boʻlgan taqdirda kiritiladi.

2. “Yuridik shaxs boʻlmasdan tadbirkorlik faoliyati bilan shugʻullanuvchi jismoniy shaxslar tomonidan Toshkent shahar “Otchopar buyum bozori” ochiq turdagi aksiyadorlik jamiyati hududida isteʼmol tovarlari savdosini amalga oshirish tartibi toʻgʻrisida”gi Nizom ilovaga muvofiq tasdiqlansin.

3. Belgilab qoʻyilsinki, 1998-yil 1-iyuldan boshlab:

Toshkent shahar “Otchopar buyum bozori” ochiq turdagi aksiyadorlik jamiyati hududida isteʼmol tovarlari sotuvchi jismoniy shaxslar daromadlaridan olinadigan soliq har oyda eng kam oylik ish haqining: oziq-ovqat tovarlari uchun 30 baravari miqdorida; nooziq-ovqat tovarlari uchun 20 baravari miqdorida belgilanadi. Bir jismoniy shaxs tomonidan ayni bir vaqtda oziq-ovqat va nooziq-ovqat tovarlari bilan savdo qilingan taqdirda soliq miqdori oziq-ovqat tovarlari sotish uchun belgilangan soliq miqdoridan kelib chiqqan holda belgilanadi;

Toshkent shahar “Otchopar buyum bozori” ochiq turdagi aksiyadorlik jamiyati hududida isteʼmol tovarlari bilan savdo qilish huquqiga ruxsat olgan jismoniy shaxslar oʻziga berilgan nomi yozilgan guvohnoma amalda boʻladigan butun davr mobaynida ushbu bozorda daromadlar va xarajatlar daftarini yuritishdan ozod qilinadilar.

Soliq va toʻlov intizomini mustahkamlash Hukumat komissiyasiga “Otchopar buyum bozori” ochiq turdagi aksiyadorlik jamiyati hududida oziq-ovqat va nooziq-ovqat tovarlari bilan savdo qiluvchi jismoniy shaxslar daromadlaridan olinadigan soliq miqdorlarini koʻrib chiqish va oʻzgartirish toʻgʻrisida qaror qabul qilish huquqi berilsin.

4. Oʻzbekiston Respublikasi Davlat soliq qoʻmitasi “Otchopar buyum bozori” ochiq turdagi aksiyadorlik jamiyati hududida isteʼmol tovarlari bilan savdo qilish huquqini beruvchi nomi yozilgan guvohnomalar oʻz vaqtida tayyorlanishini va jismoniy shaxslarga berilishini taʼminlasin, bunda 1998-yil 1-iyuldan boshlab koʻrsatish uchun, ularning guvohnomalarni oʻz vaqtida olishlari uchun imkoniyatlar yaratishni nazarda tutsin.

5. Toshkent shahar hokimligi:

“Otchopar buyum bozori” ochiq turdagi aksiyadorlik jamiyati hududida savdo faoliyatini amalga oshiruvchi tadbirkorlar oʻrtasida zarur tayyorgarlik va tushuntirish ishlarini olib borsin;

“Oʻrikzor” mavzesida qurilayotgan “Karvon bozor” ulgurji bozorini foydalanishga topshirishni tezlashtirsin va Oʻzbekiston Respublikasi Ichki ishlar vazirligi bilan isteʼmol tovarlari ulgurji savdosi ushbu bozorga koʻchirilishini taʼminlasin.

Toshkent shahar hokimi (K. N. Toʻlaganov) zimmasiga “Otchopar buyum bozori” ochiq turdagi aksiyadorlik jamiyatida savdo-sotiqni tashkil etishning yangi tartibini joriy qilishga doir zarur tashkiliy tadbirlarni amalga oshirish, shu jumladan, tasdiqlangan Nizomga muvofiq belgilangan muddatlarda nomi yozilgan guvohnomalar olgan tadbirkorlarga bozorda oʻz vaqtida joy berish yuzasidan shaxsan javobgarlik yuklansin.

6. Oʻzbekiston Respublikasi Ichki ishlar vazirligiga shu yilning 1-iyulidan boshlab “Otchopar buyum bozori” ochiq turdagi aksiyadorlik jamiyati hududida jismoniy shaxslar tomonidan nomi yozilgan guvohnomalar asosidagina savdo qilinishi ustidan qattiq nazorat oʻrnatish yuklansin. Bundan buyon bozorga tutash hududlarda, shu jumladan tungi vaqtlarda savdo-sotiq qilishga barham berish va unga yoʻl qoʻymaslik boʻyicha taʼsirchan chora-tadbirlar koʻrilsin.

7. Toshkent shahar hokimligi Oʻzbekiston Respublikasi Davlat soliq qoʻmitasi va Ichki ishlar vazirligi bilan birgalikda “Otchopar buyum bozori” ochiq turdagi aksiyadorlik jamiyati hududida savdoni tashkil etishning yangi tartibini joriy etish natijalarini umumlashtirsin hamda maqsadga muvofiq boʻlgan taqdirda savdoning xuddi shunday tartibini Toshkent shahrining boshqa buyum bozorlarida ham joriy etish toʻgʻrisida 1998-yil 1-oktabrgacha Vazirlar Mahkamasiga takliflar kiritsin.

8. Mazkur qarorning bajarilishini nazorat qilish Toshkent shahar hokimi K. N. Toʻlaganov va Bosh vazir oʻrinbosari B. S. Hamidov zimmasiga yuklansin.

1.1. Ushbu Nizom Oʻzbekiston Respublikasi Vazirlar Mahkamasining 1998-yil 18-maydagi 218-son qaroriga muvofiq ishlab chiqilgan va yuridik shaxs boʻlmasdan Toshkent shahar “Otchopar buyum bozori” (bundan keyingi oʻrinlarda Bozor deb ataladi) hududida tadbirkorlik faoliyati tartibida isteʼmol tovarlari savdosi bilan shugʻullanuvchi jismoniy shaxslarga tatbiq etiladi.

1.2. Bozorda isteʼmol tovarlari savdosi bilan shugʻullanishga belgilangan tartibda:

yuridik shaxs boʻlmasdan tadbirkorlik faoliyati bilan shugʻullanishga ruxsat olgan;

ushbu Bozorda savdo qilish huquqi uchun nomi yozilgan guvohnoma olgan;

Bozorda kamida olti oy muddatga savdo qilish joyini ijaraga olganlik uchun talon olgan jismoniy shaxslarga ruxsat etiladi.

1.3. Jismoniy shaxslarning yuridik shaxs boʻlmasdan tadbirkorlar sifatida Bozorda isteʼmol tovarlari sotishiga qalbakilashtirishdan himoya qiluvchi maxsus vositalarga va tadbirkor toʻgʻrisidagi asosiy maʼlumotlardan iborat axborotlarning magnitli manbalariga ega boʻlgan nomi yozilgan Guvohnomalar (bundan keyingi oʻrinlarda Guvohnoma deb ataladi) boʻyicha ruxsat etiladi (1-ilova).

1.4. Bozordagi savdo oʻrinlari soni Bozor direksiyasi tomonidan aniqlanadi va Toshkent shahar hokimligi tomonidan tasdiqlanadi. Toshkent shahar hokimligi Bozordagi boʻsh savdo oʻrinlari mavjudligini doimiy ravishda tezkorlik bilan hisobga olib boradi va keyinchalik ularni Bozorda savdo qilishni xohlovchi jismoniy shaxslarga, tushgan arizalar boʻyicha, navbati bilan berish uchun tuman hokimliklariga maʼlum qiladi.

1.5. Ilgari ushbu Bozorda savdo qilish huquqiga ega boʻlgan hamda savdo va tadbirkorlik faoliyati qoidalarini buzmagan tadbirkorlar Bozordagi boʻsh va boʻshab qolgan savdo oʻrinlarida savdo qilishda ustun huquqqa ega boʻladilar.

2.1. Bozorda isteʼmol tovarlari bilan savdo qilish xohishini bildirgan jismoniy shaxslar Guvohnoma olish uchun Toshkent shahrining oʻzi yashaydigan joydagi tegishli tuman hokimligiga (boshqa shaharliklar esa — Chilonzor tumani hokimligiga) quyidagi hujjatlarni taqdim etadilar:

a) yuridik shaxs boʻlmasdan tadbirkor sifatida roʻyxatdan oʻtish uchun belgilangan namunadagi ariza yoki ilgari uning yuridik shaxs boʻlmasdan tadbirkor sifatida roʻyxatdan oʻtkazilganligi toʻgʻrisidagi hokimlik qarori mavjud boʻlsa — ana shu qaror;

b) kelgusi olti oy uchun Bozorda savdo qilish huquqiga ruxsatnoma olish uchun belgilangan namunadagi ariza;

v) tadbirkorni roʻyxatdan oʻtkazish uchun (ilgari roʻyxatdan oʻtkazilmagan tadbirkorlar uchun) yigʻim toʻlanganligi toʻgʻrisidagi kvitansiya;

g) pasport (shaxsan koʻrsatiladi);

d) 2 dona fotosurat (3,5X4,5 sm).

2.2. Tuman hokimligi 2 kun muddatda:

a) jismoniy shaxsni yuridik shaxs boʻlmasdan tadbirkor sifatida roʻyxatdan oʻtkazish toʻgʻrisida;

b) unga, boʻsh oʻrinlar mavjudligidan kelib chiqqan holda, Bozorda isteʼmol tovarlari (tovarlar turi koʻrsatilgan holda — oziq-ovqat, nooziq-ovqat tovarlari) bilan savdo qilish huquqini berish toʻgʻrisida qaror chiqaradi.

Qaror nusxalari tuman soliq inspeksiyasiga yuboriladi.

2.3. Bozorda boʻsh savdo oʻrinlari boʻlmagan hollarda tadbirkorga uning Bozorda savdo qilish huquqini olish boʻyicha navbatining tartib raqami xabar qilinadi. Tadbirkor xohishiga koʻra, oʻzining navbati kelgungacha oʻtadigan davrda, belgilangan tartibda boshqa bozorlarda savdo bilan shugʻullanishi mumkin.

2.4. Tuman soliq inspeksiyasi ushbu Nizomning 2.2-bandida koʻrsatilgan hujjatlar nusxalari asosida:

bir kun mobaynida tadbirkorga jismoniy shaxsning tadbirkorlik faoliyatidan tushadigan daromadlaridan olinadigan soliqni toʻlash, shuningdek nomi yoziladigan roʻyxatdan oʻtkazish Guvohnomasini tayyorlash xarajatlari boʻyicha belgilangan nusxadagi (2-ilova) toʻlov bildirishnomalarini;

bankning jismoniy shaxs tomonidan olti oy uchun koʻrsatilgan soliq hamda Guvohnomani tayyorlash xarajatlari avans tariqasida toʻlanganligi toʻgʻrisidagi hujjatlari asosida, berilgan kunidan boshlab olti oy mobaynida haqiqiy hisoblanadigan, belgilangan namunadagi Guvohnomani uch kun mobaynida rasmiylashtiradi va tadbirkorga beradi.

2.5. Amalda boʻlish muddati tugagach Guvohnoma olingan joyiga qaytarib beriladi, keyinchalik u Toshkent shahar Davlat soliq bosh boshqarmasiga topshiriladi.

Tadbirkor Bozorda savdo faoliyatini davom ettirish xohishini bildirgan taqdirda, tuman soliq inspeksiyasi, jismoniy shaxs tomonidan navbatdagi davr uchun tegishli soliq, zarurat boʻlganda esa yangi Guvohnoma berish xarajatlari ham toʻlangandan keyin Guvohnomaning amalda boʻlish muddatini yangi muddatga uzaytiradi.

2.6. Bozor maʼmuriyati tadbirkor Guvohnomani koʻrsatgach undan savdo oʻrni ijarasi uchun belgilangan yigʻimni oladi va unga ijaraning butun muddati mobaynida savdo qilish joyi koʻrsatilgan tegishli talonni beradi.

2.7. Bozorda isteʼmol tovarlari bilan savdo qilish huquqini beruvchi hujjatlarni rasmiylashtirishning umumiy sxemasi 3-ilovada koʻrsatilgan.

3.1. Jismoniy shaxslarning tadbirkorlik faoliyatidan oladigan daromadlaridan undiriladigan soliq eng kam oylik ish haqiga nisbatan quyidagi miqdorlarda belgilanadi:

— oziq-ovqat tovarlari uchun — oyiga eng kam oylik ish haqining 30 baravari miqdorida;

— nooziq-ovqat tovarlari uchun — oyiga eng kam oylik ish haqining 20 baravari miqdorida.

Bir jismoniy shaxs tomonidan bir vaqtning oʻzida oziq-ovqat va nooziq-ovqat tovarlari bilan savdo qilingan hollarda soliq miqdori oziq-ovqat tovarlarini sotish stavkalaridan kelib chiqib belgilanadi.

3.2. Koʻrsatib oʻtilgan soliqni toʻlash va Guvohnoma uchun haq toʻlash jismoniy shaxslar tomonidan naqd pul bilan (jismoniy shaxsning shaxsiy schyoti boʻlganda pul oʻtkazish bilan) Xalq banki yoki boshqa vakil qilingan bank muassasalari orqali amalga oshiriladi.

3.3. Koʻrsatib oʻtilgan soliqni undirishdan tushgan pul mablagʻlari Toshkent shahrining tegishli tumanlari mahalliy budjeti daromadiga oʻtkaziladi.

3.4. Bozorda savdo qilish huquqini olgan tadbirkorlar Bozorda savdo ishlarini amalga oshirish davrida daromadlar va xarajatlarni hisobga olish daftari yuritishdan ozod etiladilar.

4.1. Guvohnomaga ega boʻlmagan shaxslar tovarlarni sotish uchun Bozor hududiga kiritilmaydi.

4.2. Savdo faoliyatini amalga oshirish chogʻida tadbirkor oʻz ustki qiyimining koʻrinadigan joyiga guvohnomasini doimiy ravishda taqib yurishga majburdir.

4.3. Har bir guvohnoma ajratib berilgan bir savdo qilish joyida (savdo nuqtasida) faqat uning egasiga savdo qilish huquqini beradi.

4.4. Bozor hududida belgilangan tartibni buzgan holda isteʼmol tovarlarini sotish bilan shugʻullanayotgan shaxslar amaldagi qonunchilikka muvofiq javobgarlikka tortiladilar:

a) “Otchopar buyum bozori” ochiq turdagi aksiyadorlik jamiyati hududida nomi yozilgan guvohnoma yoki boshqa shaxsga tegishli boʻlgan nomi yozilgan guvohnoma bilan savdo faoliyatini amalga oshirish roʻyxatdan oʻtkazishdan boʻyin tovlagan holda savdo faoliyatini amalga oshirish deb qaraladi va Oʻzbekiston Respublikasining Maʼmuriy javobgarlik toʻgʻrisidagi kodeksining 176-moddasi 2-qismida nazarda tutilgan, huquqbuzarlik ashyolarini musodara qilgan holda, eng kam oylik ish haqining uch baravaridan besh baravarigacha miqdorda jarima solishga olib keladi. Bunday huquqbuzarliklar toʻgʻrisidagi materiallar ichki ishlar organlari xodimlari tomonidan bayonnoma shaklida rasmiylashtiriladi va u sudga oshiriladi. Bunda jismoniy shaxs bozorda savdo qilish huquqidan mahrum etiladi, nomi yozilgan guvohnoma esa haqiqiy egasiga nisbatan chora koʻrish uchun tuman soliq inspeksiyasiga qaytariladi;

b) maʼmuriy jazo qoʻllanilgandan soʻng bir yil davomida takroran sodir etilgan shunday harakat, bunday harakat uchun maʼmuriy jazo qoʻllanilgandan soʻng sodir etilgan nazorat qilinmaydigan foyda (daromad) olish maqsadida belgilangan tartibda roʻyxatdan oʻtishdan boʻyin tovlagan holda savdo faoliyatini amalga oshirish deb qaraladi va Oʻzbekiston Respublikasining Jinoyat kodeksi 188-moddasi 1-qismi boʻyicha 3 yilgacha muayyan huquqdan mahrum qilib, eng kam oylik ish haqining 50 baravarigacha miqdorda jarima solishga yoki 2 yilgacha axloq tuzatish ishlari yoxud mol-mulkini musodara qilgan holda, 6 oygacha qamoq jazosiga olib keladi. Bunday huquqbuzarliklar toʻgʻrisidagi materiallar ichki ishlar xodimlari tomonidan bayonnoma shaklida rasmiylashtiriladi va u sudga oshiriladi. Bunda jismoniy shaxs bozorda savdo qilish huquqidan mahrum etiladi, nomi yozilgan guvohnoma esa haqiqiy egasiga nisbatan chora koʻrish uchun tuman soliq inspeksiyasiga qaytariladi;

v) guvohnomani savdo faoliyatini amalga oshirish uchun boshqa shaxsga berish qatʼiy taqiqlanadi va tadbirkorlik faoliyati bilan shugʻullanishning belgilangan tartibini buzish deb qaraladi. Tuman soliq inspeksiyasi mazkur huquq buzishni aniqlagan ichki ishlar organlarining taqdimnomasi asosida, Oʻzbekiston Respublikasining Maʼmuriy javobgarlik toʻgʻrisidagi kodeksining 176-moddasi 1-qismiga muvofiq eng kam oylik ish haqining uch baravaridan besh baravarigacha miqdorda jarima soladi. Bunda jismoniy shaxs savdo qilish huquqidan mahrum etiladi, nomi yozilgan guvohnoma esa olib qoʻyiladi.

Guvohnoma qatʼiy hisobda turadigan hujjat hisoblanadi. Ular Toshkent shahar Davlat soliq bosh boshqarmasi tomonidan tayyorlanadi, u guvohnomalarni keyinchalik tuman soliq inspeksiyalari boʻyicha taqsimlagan holda ularning hisobi va saqlanishi uchun javob beradi.

6.1. Bozorda jismoniy shaxslar tomonidan savdo faoliyatini amalga oshirishda ularning mazkur Nizomga rioya qilishlari ustidan nazoratni ichki ishlar organlari, zarur hollarda esa — davlat soliq xizmati organlari bilan birgalikda amalga oshiradilar.

6.2. Yuridik shaxslar tomonidan savdo faoliyati (koʻchma savdo) mazkur Nizomga muvofiq toʻlovlarni undirgan holda umumiy belgilangan tartibda amalga oshiriladi.