O‘zbekiston Respublikasi Prezidentining “Ekologiya va atrof-muhitni muhofaza qilish sohasini transformatsiya qilish va vakolatli davlat organi faoliyatini tashkil etish chora-tadbirlari to‘g‘risida” 2023-yil 31-maydagi PF-81-son Farmoni, “Ekologiya, atrof-muhitni muhofaza qilish va iqlim o‘zgarishi vazirligi faoliyatini samarali tashkil etish chora-tadbirlari to‘g‘risida” 2023-yil 31-maydagi PQ-171-son qarori hamda “O‘zbekiston-2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturi to‘g‘risida” 2024-yil 21-fevraldagi PF-37-son Farmoni ijrosini ta’minlash, shuningdek, ekologik markirovkalashning samarali tizimini joriy etish maqsadida Vazirlar Mahkamasi qaror qiladi:

1. O‘zbekiston Respublikasi Ekologiya va iqlim o‘zgarishi milliy qo‘mitasi (keyingi o‘rinlarda — Ekologiya qo‘mitasi) hamda Investitsiyalar, sanoat va savdo vazirligining:

O‘zbekiston Respublikasi hududida ISO 14024 xalqaro standartiga muvofiq butun hayotiy davr bo‘yicha (I tip) “Yashil belgi” mahsulot va xizmatlarni yagona ixtiyoriy ekologik markirovkalash tizimini (keyingi o‘rinlarda — ekologik markirovkalash tizimi);

mahsulot va xizmatlarning ekologik markirovkalash standartlariga muvofiqligini ekologik markirovkalash tizimida avtorizatsiyadan o‘tgan yuridik shaxslar (keyingi o‘rinlarda — ekologik markirovkalash organi) tomonidan baholash tartibini joriy etish to‘g‘risidagi takliflari ma’qullansin.

2. Ekologiya qo‘mitasi ekologik markirovkalash tizimini tartibga solish sohasida vakolatli davlat organi etib belgilansin hamda unga quyidagi vazifalar yuklansin:

ekologik markirovkalash tizimini tartibga solish hujjatlarini, shu jumladan, ekologik markirovkalash tizimi qoidalari, ekologik markirovkalash organini avtorizatsiyadan o‘tkazish, xorijiy davlatlarning ekologik markirovka tizimlarini tan olish hamda ekologik markirovka belgisini qo‘llash tartiblarini tasdiqlash;

ekologik markirovkalash organlariga qo‘yiladigan talablarni tasdiqlash;

ekologik markirovkalash standartlariga muvofiq ekologik jihatdan afzal, shu jumladan, resurslarni tejovchi, kam chiqitli va chiqindisiz, atrof-muhitga salbiy ta’siri kamaytirilgan mahsulotlarni keng ishlab chiqarishni rag‘batlantirishga qaratilgan takliflarni ishlab chiqish va kiritish;

ekologik markirovkalash standartlarini ishlab chiqish;

ekologik markirovkalash sohasida faoliyat yurituvchi xodimlarni qayta tayyorlash va ularning malakasini oshirishni tashkil etish.

3. Ekologiya qo‘mitasi huzuridagi “Davlat ekologik sertifikatlashtirish va standartlashtirish markazi” mas’uliyati cheklangan jamiyati ekologik markirovkalash tizimining operatori etib belgilansin hamda unga quyidagi vazifalar yuklansin:

Ekologik markirovkalash organlarini ekologik markirovkalash tizimida avtorizatsiyadan o‘tkazish;

ekologik markirovkalash standartlarini amaliyotga tatbiq etish;

mahsulot va xizmatlarga berilgan ekologik markirovkalash sertifikatining haqiqiyligi va amal qilish muddatlari to‘g‘risidagi ma’lumotlarni tasdiqlash hamda ochiqligini ta’minlash maqsadida ushbu sertifikatlar reyestrini yuritish;

ekologik markirovkalash organlari manfaatlarini himoya qilish bo‘yicha ekologik markirovka belgisidan to‘g‘ri foydalanilishini ommalashtirish hamda uning xalqaro miqyosdagi nufuzini oshirish;

xalqaro ekologik sertifikatlashtirish va standartlashtirish tashkilotlari, uyushmalar va ishchi guruhlarda ekologik markirovkalash tizimini taqdimot qilish;

ekologik markirovkalash organlari mutaxassislari malakasini oshirish va ularning xalqaro ekologik sertifikatlashtirish hamda standartlashtirish tashkilotlarida tajriba almashishini tashkil etish.

4. Ekologik markirovka belgisi 1-ilovaga muvofiq tasdiqlansin.

5. Shunday tartib o‘rnatilsinki, unga muvofiq:

a) ekologik markirovkalash organi ekologik markirovkalash tizimining operatori bilan tuziladigan shartnoma asosida avtorizatsiyadan o‘tkaziladi. Bunda ekologik markirovkalash organining quyidagi talablarga javob berishi baholanadi:

ekologik markirovkalash organining markirovkalash jarayonlari ISO 14024 xalqaro standartiga muvofiq bo‘lishi;

ekologik markirovkalash organining sertifikatlashtirish faoliyatiga oid ichki tartib va qoidalari Ekologik markirovkalash tizimi qoidalari hamda ekologik markirovka belgisini qo‘llash qoidalariga muvofiq bo‘lishi;

asosiy ish joyi ushbu yuridik shaxsda hisoblangan tegishli mutaxassislar ISO 14024 xalqaro standarti bo‘yicha bilim va ko‘nikmalarga ega bo‘lishi;

b) ekologik markirovkalash sertifikatisiz mahsulotlarning nomi, qadog‘i, kuzatuv hujjatlari va reklamasida hamda xo‘jalik yurituvchi subyektning nomida ekologik markirovka belgisidan foydalanish yoki bunday mahsulot va xizmatlarni realizatsiya qilish taqiqlanadi;

v) sertifikatlashtirish ishlari ixtiyoriy ravishda tadbirkorlik subyektlarining murojaatiga muvofiq ekologik markirovkalash organi bilan tuzilgan shartnoma asosida amalga oshiriladi;

g) ekologik markirovka belgisidan mahsulotning nomi, qadog‘i, kuzatuv hujjatlari, shuningdek, uni reklama qilishda foydalanish, mahsulot ishlab chiqaruvchilar tomonidan tegishli mahsulotlar uchun ekologik markirovkalash sertifikati olingandan keyin Ekologik markirovkalash tizimi operatori bilan tuzilgan shartnoma asosida amalga oshiriladi.

6. Belgilansinki, ekologik markirovkalash tizimi quyidagi talablarga mos kelishi lozim:

ISO 14024 xalqaro standartiga muvofiq mahsulotning butun hayotiy davrini ko‘rib chiqishga asoslangan bo‘lishi;

ekologik jihatdan afzal mahsulotni, ya’ni ishlab chiqarish, foydalanish, iste’mol qilish, transportda tashish, saqlash va utilizatsiya qilishda bir turdagi mahsulot guruhi doirasida o‘xshashiga nisbatan atrof-muhitga ekologik markirovkalash standartlariga muvofiq kam ta’sir ko‘rsatuvchi mahsulotni ajratishi;

atrof-muhitni muhofaza qilish sohasidagi qonunchilik normalariga rioya etiladigan mahsulotlarni ekologik markirovkalashni ko‘zda tutishi;

ekologik markirovka belgisini qo‘llash qoidalarini ko‘zda tutishi hamda mazkur qoidalar bajarilishi ustidan nazoratni amalga oshirishi;

barcha manfaatdor tomonlar uchun ekologik markirovkalash tizimining asosiy elementlari, shu jumladan, ekologik markirovkalash tizimida sertifikatlashtirish ishlari o‘tkaziladigan standartlar va sertifikatlashtirish jarayonlari, shuningdek, ekologik markirovka belgisini qo‘llash qoidalarining shaffofligi hamda tushunarliligini ta’minlashi.

7. Belgilab qo‘yilsinki, bir turdagi mahsulot guruhi uchun ekologik markirovkalash standartlari qonunchilik hujjatlarida belgilangan talablardan tashqari quyidagi talablarga javob berishi lozim:

aniq o‘lchanadigan sifat va miqdoriy ekologik afzallik mezonlari hamda ularni tekshirish uslublariga ega bo‘lishi;

bir turdagi mahsulotlarning ma’lum bir guruhiga oid mahsulot hayotiy davrining asosiy bosqichlariga qo‘yiladigan talablarni, shu jumladan, ishlab chiqarish, foydalanish, iste’mol qilish, transportda tashish, saqlash va utilizatsiya qilishni qamrab olishi;

ekologik markirovkalash sertifikatiga ega va ega bo‘lmagan mahsulotlar o‘rtasida o‘lchanadigan ko‘rsatkichlar farqni aks ettirishi.

8. Ekologiya qo‘mitasi manfaatdor vazirlik va idoralar bilan birgalikda:

a) ekologik markirovkalash sohasidagi qonunbuzarlik holatlarini aniqlash va ularni bartaraf etish choralarini ko‘rsin;

b) ikki oy muddatda quyidagilarni nazarda tutuvchi normativ-huquqiy hujjatlarni ishlab chiqsin va tasdiqlasin:

ekologik markirovkalash tizimi qoidalari;

ekologik markirovkalash organini avtorizatsiyadan o‘tkazish tartibi;

xorijiy davlatlarning ekologik markirovka tizimlarini tan olish tartibi;

ekologik markirovka belgisini qo‘llash tartibi;

v) uch oy muddatda quyidagilarni nazarda tutuvchi normativ-huquqiy hujjat loyihasini Vazirlar Mahkamasiga kiritsin:

ekologik markirovkalashni rag‘batlantirish bo‘yicha chora-tadbirlarni;

davlat xaridlarini amalga oshirishda ekologik markirovkalash sertifikatiga ega bo‘lgan mahsulotlarning ustuvorligini;

ekologik markirovka belgisidan ekologik markirovkalash sertifikatisiz foydalanganlik uchun javobgarlikni belgilash.

9. O‘zbekiston Milliy axborot agentligi, O‘zbekiston Milliy teleradiokompaniyasiga Ekologiya vazirligi bilan birgalikda mazkur qarorning mazmun-mohiyatini ommaviy axborot vositalarida keng yoritish, ekologik markirovkalash tartibotlari, talablari va ekologik markirovkalash standartlarini keng targ‘ib qilish uchun tematik davriy dasturlarni amalga oshirish tavsiya etilsin.

10. Vazirlar Mahkamasining 2020-yil 20-martdagi 175-son qarori bilan tasdiqlangan Vakolatli organlarning meva-sabzavotlar, to‘qimachilik mahsulotlari va buyumlarini eksport qilish uchun zarur ruxsatnoma va sertifikatlarni rasmiylashtirish bilan bog‘liq xarajatlarini qoplab berish tartibi to‘g‘risidagi nizomga 2-ilovaga muvofiq qo‘shimchalar kiritilsin.

11. O‘zbekiston Respublikasi Hukumatining 3-ilovaga muvofiq ayrim qarorlari o‘z kuchini yo‘qotgan deb hisoblansin.

12. Mazkur qaror rasmiy e’lon qilingan kundan e’tiboran uch oy o‘tgach kuchga kiradi.

13. Mazkur qarorning bajarilishini nazorat qilish O‘zbekiston Respublikasi ekologiya, atrof-muhitni muhofaza qilish va iqlim o‘zgarishi vaziri A.A. Abduxakimov zimmasiga yuklansin.

1. Ekologik markirovka belgisi — oq fonda to‘q yashil rangdagi “YASHIL BELGI” so‘zlaridan hamda to‘q yashil va och yashil ranglardagi ikkita barg tasviridan iborat bo‘lib, ular to‘q yashil rangdagi to‘rtburchak shakl ichida joylashtirilgan. Bunda:

barglar tasviri “YASHIL BELGI” so‘zlarining yuqori qismiga joylashtirilgan;

“YASHIL BELGI” so‘zlari ekologik markirovkalash tizimini anglatadi;

to‘rtburchak shakli ekologik markirovkalash tizimi aniq talab va chegaralarni belgilaydigan standartlarga asoslanganligini ifodalaydi.

2. Mahsulot yoki xizmatlar xususiyatlaridan kelib chiqib ekologik markirovka belgisi oq-qora yoxud monoxrom ranglarda tasvirlanishi mumkin.

Monoxrom ko‘rinishidagi ekologik markirovkalash belgisi faqat to‘q yashil yoki och yashil rangda bo‘lishiga ruxsat etiladi.

1. 2-bandning ikkinchi xatboshisi “Ekologiya, atrof-muhitni muhofaza qilish va iqlim o‘zgarishi vazirligi huzuridagi “Davlat ekologik sertifikatlashtirish va standartlashtirish markazi” MCHJ” so‘zlari bilan to‘ldirilsin.

2. 1-ilova “1-bosqich” pozitsiyasining “Mas’ul ijrochilar” ustuni “O‘zbekekspertiza” AJ” so‘zlaridan keyin “Ekologiya, atrof-muhitni muhofaza qilish va iqlim o‘zgarishi vazirligi huzuridagi “Davlat ekologik sertifikatlashtirish va standartlashtirish markazi” MCHJ” so‘zlari bilan to‘ldirilsin.

1. Vazirlar Mahkamasining “O‘zbekiston Respublikasida mahsulotlarni ixtiyoriy ekologik markirovkalash tizimini joriy etish to‘g‘risida” 2019-yil 27-maydagi 435-son qarori.

2. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida (O‘zbekiston Respublikasining “Normativ-huquqiy hujjatlar to‘g‘risida” 2021-yil 20-apreldagi O‘RQ-682-son Qonuni)” 2022-yil 4-apreldagi 153-son qaroriga ilovaning 632-bandi.