“Oʻzbekiston — 2030” strategiyasida belgilangan keng koʻlamli islohotlarni samarali amalga oshirish, xalqimizning kundalik hayotida ijobiy oʻzgarishlarga erishish boʻyicha tizimli harakatlarni izchil davom ettirish maqsadida “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 16-moddasiga asosan Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi Prezidentining 2024-yil 25-dekabrdagi “Oʻzbekiston Respublikasining “2025-yil uchun Oʻzbekiston Respublikasining Davlat budjeti toʻgʻrisida”gi Qonuni ijrosini taʼminlash chora-tadbirlari toʻgʻrisida”gi PQ-455-sonli Qaroriga asosan Tashabbusli budjet jarayoni uchun tuman (shahar)larda ajratiladigan mablagʻlar miqdorini rejalashtirishda hududdagi aholi sonidan kelib chiqib taqsimlash nazarda tutilganligi maʼlumot uchun qabul qilinsin.

2. Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi Nizomga ilovaga muvofiq oʻzgartirish va qoʻshimchalar kiritilsin.

3. Belgilansinki, oʻzini-oʻzi moliyalashtirish tizimiga oʻtganligini inobatga olgan holda 2025-yil 1-mavsumdan boshlab moliyaviy mustaqil boʻlgan Oliy oʻquv muassasalarining Tashabbusli budjet jarayonlarida ishtirok etishiga ruxsat etilmaydi.

4. Mablagʻlardan samarali foydalanish hamda ijtimoiy muammolarga koʻproq eʼtibor qaratish maqsadida Tashabbusli budjet jarayoni doirasida tashkilotlar tomonidan barcha turdagi avtomobillar, jamoat xavfsizligini taʼminlashga oid jihozlar (radar, jamoat joylaridagi kuzatuv kameralari, “svetofor”), rahbar xodimlar uchun mebel jihozlarini xarid qilish taqiqlanadi.

5. Maktabgacha va maktab taʼlimi hamda Sogʻliqni saqlash vazirliklari oʻn kun muddatda Tashabbusli budjet doirasida xarid qilinishi ruxsat etilgan tovarlarning aniq tavsiflarini aks ettirgan holda qayta shakllantirilgan jihozlar reyestrini Iqtisodiyot va moliya vazirligiga taqdim etsin.

6. Kambagʻallikni qisqartirish va bandlik vazirligi Iqtisodiyot va moliya vazirligi bilan hamkorlikda budjet tashkiloti xodimlarini majburiy ovoz berishga jalb etish holatlarining oldini olish boʻyicha tizimli ishlarni tashkil etsin hamda har mavsum yakuniga koʻra Oliy Majlis Senatiga axborot kiritib borsin.

7. Iqtisodiyot va moliya vazirligi hamda Oʻzbekiston axborot va ommaviy kommunikatsiyalar agentligi mazkur qaror bilan Tashabbusli budjet jarayoniga kiritilgan oʻzgartirish va qoʻshimchalarni aholiga yetkazish boʻyicha zarur choralar koʻrsin.

8. Mazkur Qarorning ijrosini nazorat qilish Oʻzbekiston Respublikasi Oliy Majlisi Senatining Budjet va iqtisodiy masalalar qoʻmitasi raisi E. Gadoyev zimmasiga yuklansin.

Oʻzbekiston Respublikasi Oliy Majlis Senati Kengashining 2024-yil 30-yanvardagi KQ-666-IV-son qarori bilan tasdiqlangan ““Tashabbusli budjet jarayonlarini oʻtkazish hamda moliyalashtirish tartibi toʻgʻrisida”gi Nizomga quyidagi oʻzgartirish va qoʻshimchalar kiritilsin:

1) 6-band ikkinchi xatboshi quyidagi tahrirda bayon etilsin:

“tuman (shahar)lar budjetlarida Tashabbusli budjet jarayoni uchun rejalashtirilgan mablagʻlar. Bunda, har yili tuman va shaharlar budjetida 10 tadan kam boʻlmagan, koʻpi bilan 30 ta loyiha uchun yetarli mablagʻlar rejalashtiriladi hamda 10 tadan ortiq loyihalar uchun mablagʻlar tuman yoki shahar aholisining tegishli hududning aholi sonidagi ulushidan kelib chiqib taqsimlanadi;”;

beshinchi xatboshi chiqarib tashlansin.

2) 9-band ikkinchi xatboshi quyidagi tahrirda bayon etilsin:

“tuman (shahar) budjetlarida rejalashtirilgan mablagʻlarning teng yarmi — birinchi mavsum uchun yanvar oyidan boshlab, qolgan qismi ikkinchi mavsum uchun may oyidan boshlab oʻtkazib beriladi;”

uchinchi xatboshi chiqarib tashlansin.