Soʻnggi yillarda nodavlat taʼlim xizmatlarini koʻrsatish sohasida amalga oshirilgan islohotlar natijasida taʼlim tizimida xususiy sektorning ulushi bir necha barobarga oshishiga erishildi.

Shu bilan birga, hozirgi kunda nodavlat taʼlim xizmatlari koʻrsatish sohasidagi yuridik shaxslar uchun yanada qulay shart-sharoitlar yaratilishini taʼminlash, ularning faoliyat yuritishiga toʻsqinlik qilayotgan ayrim byurokratik toʻsiqlarning oldini olish hamda respublikaning olis va chekka hududlarida ham nodavlat taʼlim tashkilotlari salmogʻini oshirish zarurati yuzaga kelmoqda.

Nodavlat taʼlim tashkilotlari tarmogʻini kengaytirish, sohada litsenziyalash va ruxsat berish tartib-taomillarini soddalashtirish maqsadida Vazirlar Mahkamasi qaror qiladi:

1. Vazirlar Mahkamasining 2022-yil 21-fevraldagi 80-son qarori bilan tasdiqlangan Maxsus elektron tizim orqali ayrim faoliyat turlarini litsenziyalash tartibi toʻgʻrisidagi yagona nizomga ilovaga muvofiq quyidagilarni nazarda tutuvchi oʻzgartirishlar kiritilsin:

taʼlim tashkiloti, taʼlim oluvchilar va pedagog xodimlar toʻgʻrisidagi maʼlumotlarni taʼlim sohasida vakolatli davlat organlarining tegishli axborot tizimlariga kiritish va muntazam ravishda yangilab borish;

tadbirkorlik subyektlarini nodavlat maktabgacha va umumiy oʻrta taʼlim xizmatlarini koʻrsatish faoliyatini litsenziyalashda pedagog kadrlar haqidagi maʼlumotlarni taqdim qilish yuzasidan muqobil talablar va shartlarni belgilash.

2. Mazkur qarorning bajarilishini nazorat qilish Oʻzbekiston Respublikasi maktabgacha va maktab taʼlimi vaziri H.Oʻ. Umarova zimmasiga yuklansin.

2-ilova (Nodavlat taʼlim xizmatlarini koʻrsatish sohasidagi faoliyatni litsenziyalash pasporti)da:

5-pozitsiyaning uchinchi ustunida:

“b” kichik band quyidagi tahrirda bayon etilsin:

“b) oʻquv rejasi va dasturlarining elektron nusxalari”;

“v” kichik band chiqarib tashlansin;

9-pozitsiyaning uchinchi ustuni “I. Nodavlat taʼlim sohasida umumiy litsenziya talablari va shartlari:” boʻlimi “g” kichik bandi quyidagi tahrirda bayon etilsin:

“g) litsenziat tomonidan nodavlat taʼlim sohasidagi faoliyati uchun litsenziya olingan kunidan soʻng bir oy muddat ichida taʼlim tashkiloti, taʼlim oluvchilar va pedagog xodimlar toʻgʻrisidagi toʻgʻri, toʻliq va ishonchli maʼlumotlarni taʼlim sohasida vakolatli davlat organlarining tegishli axborot tizimlariga kiritish va muntazam ravishda yangilab borish.

Bunda umumiy oʻrta taʼlim xizmatlarini koʻrsatuvchi subyektlar taʼlim tashkiloti, taʼlim oluvchilar va pedagog xodimlar toʻgʻrisidagi maʼlumotlarni Maktabgacha va maktab taʼlimi vazirligining Yagona elektron dasturi (erp.maktab.uz) va elektron platformalariga (my.maktab.uz, e-shahodatnoma.uz, emaktab.uz) kiritish va muntazam ravishda yangilab borish (maktabgacha taʼlim xizmatlarini koʻrsatuvchi subyektlar va “Bolalar bogʻchasi” (bbit.uz) axborot tizimiga ham ushbu maʼlumotlarni kiritib boradi);

oliy taʼlim tashkiloti oʻquv, ilmiy va maʼmuriy jarayonlarini boshqaruvchi hamda taʼlim sifatini nazorat qiluvchi oʻz axborot tizimiga ega boʻlishi hamda uni Oliy taʼlim, fan va innovatsiyalar vazirligi tomonidan belgilangan talablar boʻyicha vazirlikning Oliy taʼlim jarayonlarini boshqarish axborot tizimiga (HEMIS) integratsiya qilishi shart*”.