Sog‘liqni saqlash obyektlaridan samarali foydalanish hamda aholiga zamonaviy, yuqori texnologik, ixtisoslashtirilgan tibbiy yordam ko‘rsatish tizimini yanada takomillashtirish maqsadida Vazirlar Mahkamasi qaror qiladi:

1. Quyidagilar:

a) Vazirlar Mahkamasining “Toshkent shahar bolalar ko‘p tarmoqli shifoxonasini tashkil etish to‘g‘risida” 2024-yil 24-iyuldagi 446-son qaroriga muvofiq:

“Zangiota-2” shifoxonasi faoliyati tugatilib, uning bino va inshootlarida Davlat budjeti hisobidan moliyalashtiriladigan davlat muassasasi shaklidagi 500 o‘ringa mo‘ljallangan Toshkent shahar bolalar ko‘p tarmoqli shifoxonasi (keyingi o‘rinlarda — Bolalar shifoxonasi) tashkil etilganligi;

“Zangiota-2” shifoxonasining bino va inshootlari tegishli hududi bilan birgalikda Bolalar shifoxonasiga operativ boshqaruv huquqi asosida bepul berilganligi;

b) Toshkent shahar bolalar ko‘p tarmoqli shifoxonasining bino va inshootlarida 1 000 o‘ringa mo‘ljallangan quvvat mavjud ekanligi;

v) O‘zbekiston Respublikasi Prezidentining “Davlat tibbiy sug‘urtasi mexanizmlarini joriy etishga oid chora-tadbirlar to‘g‘risida” 2024-yil 5-sentabrdagi PQ-311-son qaroriga muvofiq 2024-yil 1-oktabrdan Toshkent shahrida Davlat budjeti mablag‘lari hisobidan qoplanadigan tibbiy yordamning kafolatlangan hajmlari (keyingi o‘rinlarda — kafolatlangan paket) doirasidagi tibbiy xizmatlar va dori vositalari Davlat tibbiy sug‘urtasi jamg‘armasi (keyingi o‘rinlarda — Jamg‘arma) mablag‘lari hisobidan qoplanishi ma’lumot uchun qabul qilinsin.

2. Sog‘liqni saqlash vazirligi, Iqtisodiyot va moliya vazirligi hamda Toshkent shahar hokimligining Bolalar shifoxonasi negizida 700 o‘ringa mo‘ljallangan Toshkent shahar ko‘p tarmoqli shifoxonasini (keyingi o‘rinlarda — Shifoxona) tashkil etish to‘g‘risidagi taklifiga rozilik berilsin.

Bunda qo‘shimcha tashkil etiladigan 100 ta o‘rin Toshkent shahar davlat tibbiyot muassasalari shifo o‘rinlarini maqbullashtirish hisobidan va 100 ta o‘rin pulli xizmat ko‘rsatish hisobidan tashkil etiladi.

3. Quyidagilar Shifoxonaning asosiy vazifalari etib belgilansin:

bolalar va katta yoshdagi aholi o‘rtasida eng ko‘p tarqalgan kasalliklarning asosiy yo‘nalishlari (xirurgiya, pediatriya, lor, terapiya, kardiologiya, nevrologiya, pulmonologiya, endokrinologiya va boshqalar) bo‘yicha ixtisoslashtirilgan, yuqori texnologiyali diagnostika, davolash va profilaktika tibbiy yordami ko‘rsatishga bo‘lgan ehtiyojni qondirish;

aholiga kafolatlangan paketga kiritilgan tibbiy xizmatlar ko‘rsatish;

Toshkent shahar tuman tibbiyot birlashmalariga amaliy-metodik yordam ko‘rsatish;

Toshkent shahar tibbiyot muassasalari amaliyotiga zamonaviy tibbiyot texnologiyalari va boshqaruv usullarini joriy etishda ko‘maklashish;

Toshkent shahar tibbiyot muassasalarida tibbiy xizmatlar ko‘rsatishning zamonaviy metodlari va texnologiyalari joriy etilishini metodik ta’minlash;

tibbiyot sohasidagi ta’lim muassasalari bilan hamkorlikda tibbiyot kadrlarini tayyorlashda ishtirok etish;

fundamental, amaliy va innovatsion ilmiy izlanish hamda tadqiqotlar olib borish, ularning natijalarini keng joriy etish bo‘yicha takliflar ishlab chiqish;

xorijiy ilmiy-tadqiqot tibbiyot markazlari, klinikalar va ta’lim muassasalari bilan hamkorlik aloqalarini rivojlantirish, qo‘shma ilmiy loyihalarni amalga oshirish;

tibbiy turizm sohasida tibbiy xizmatlar va yuqori malakali tibbiyot kadrlarini tayyorlash, mazkur xizmatlarni eksport qilish.

4. Quyidagilar Shifoxona faoliyatini moliyalashtirish manbalari etib belgilansin:

kafolatlangan paketga kiritilgan tibbiy xizmatlar uchun Davlat tibbiy sug‘urtasi jamg‘armasi tomonidan ajratiladigan mablag‘lar;

pulli tibbiy xizmat ko‘rsatishdan olinadigan mablag‘lar;

jismoniy va yuridik shaxslarning homiylik xayriyalari;

qonunchilik hujjatlari bilan taqiqlanmagan boshqa manbalar.

5. Shifoxonaga quyidagi huquqlar berilsin:

chet ellik va mahalliy mutaxassislarni boshqaruvchi, maslahatchi (konsultant), tibbiyot xodimi sifatida jalb qilish va ularga mehnat bozorining amaldagi konyunkturasini hisobga olgan holda, lavozim maoshi hamda boshqa to‘lovlarni belgilash va to‘lash;

shtatlar jadvalini mustaqil ravishda ishlab chiqish va tasdiqlash, Shifoxona xodimlari mehnatiga haq to‘lash va ularni moddiy rag‘batlantirish shartlarini bajariladigan ishlarning murakkablik darajasi, sifati va hajmiga nisbatan tabaqalashtirilgan tarzda mustaqil belgilash;

Shifoxona o‘rinlari sonini ehtiyojdan kelib chiqib, o‘zgartirish va bo‘limlardagi shifo o‘rinlari sonini belgilash.

6. Sog‘liqni saqlash vazirligi:

a) ikki hafta muddatda:

Shifoxonaning tuzilmasi va ustavini tasdiqlasin hamda uning belgilangan tartibda davlat ro‘yxatidan o‘tkazilishini ta’minlasin;

Shifoxonaning jihozlash tabelini ishlab chiqib, tasdiqlasin;

b) uch oy muddatda Shifoxona faoliyatini yo‘lga qo‘yish uchun zarur bo‘ladigan jihozlar hamda tibbiy texnika bilan ta’minlash choralarini ko‘rsin.

7. Belgilansinki:

a) Shifoxonani saqlash bilan bog‘liq xarajatlar O‘zbekiston Respublikasi Sog‘liqni saqlash vazirligiga respublika budjetidan ajratilgan mablag‘lar doirasida amalga oshiriladi.

Bunda mazkur mablag‘lar Sog‘liqni saqlash vazirligi tomonidan Davlat tibbiy sug‘urta jamg‘armasiga o‘tkazib beriladi;

b) Shifoxona Bolalar shifoxonasining huquq va majburiyatlari, shuningdek, tuzilgan shartnomalari bo‘yicha huquqiy vorisi hisoblanadi.

8. Toshkent shahar hokimligi uch oy muddatda Shifoxonaning bino va inshootlarida zarur qurilish hamda ta’mirlash ishlarini amalga oshirish orqali uni tegishli tibbiy yordam ko‘rsatishga moslashtirish choralarini ko‘rsin.

9. Vazirlar Mahkamasining “Toshkent shahar bolalar ko‘p tarmoqli shifoxonasini tashkil etish to‘g‘risida” 2024-yil 24-iyuldagi 446-son qarori o‘z kuchini yo‘qotgan deb hisoblansin.

10. Mazkur qarorning bajarilishini nazorat qilish O‘zbekiston Respublikasi sog‘liqni saqlash vaziri A.A. Xudayarov hamda Toshkent shahar hokimi Sh.B. Umurzakov zimmasiga yuklansin.