O‘zbekiston Respublikasi Prezidentining “Navoiy kon-metallurgiya kombinati” davlat korxonasini isloh qilish chora-tadbirlari to‘g‘risida” 2020-yil 6-martdagi PQ-4629-son qaroriga muvofiq hamda “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamg‘armasi” davlat muassasasi kadrlar salohiyatini yanada mustahkamlash, ishchi xodimlari hamda yuqori malakali mutaxassislarining mehnat samaradorligi, kasbiy va moddiy manfaatdorligini oshirish maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Mehnat kodeksining 484-moddasida noqulay tabiiy-iqlim sharoitlaridagi ish uchun mehnatga haq to‘lash koeffitsiyenti ayrim hududlardagi mehnat sharoitlarining xususiyatlari inobatga olingan holda, xodimlarga kompensatsiya xususiyatiga ega bo‘lgan ustama to‘lanishi belgilanganligi, shuningdek, ushbu koeffitsiyentlarning eng kam miqdorlari va ularni qo‘llash tartibi Vazirlar Mahkamasi tomonidan belgilanishi;

“Navoiyuran” davlat korxonasi tomonidan viloyatlarda amalga oshirilgan geologiya-qidiruv ishlari natijasida Buxoro viloyatining Shofirkon tumani, Jizzax viloyatining Forish tumani, Navoiy viloyatining Qiziltepa va Xatirchi tumanlari, Qashqadaryo viloyatining Muborak va Koson tumanlari, Toshkent viloyatining Angren shahri, Namangan viloyatining Pop tumanida uranga istiqbolli konlar aniqlanganligi ma’lumot uchun qabul qilinsin.

2. Vazirlar Mahkamasining “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamg‘armasi” davlat muassasasi xodimlari ish haqini tumanlar (hududlar) bo‘yicha tartibga solishni takomillashtirish to‘g‘risida” 2017-yil 24-apreldagi 232-son qaroriga ilovaga muvofiq ish haqiga belgilangan miqdorlarda tuman (hududiy) koeffitsiyentlari qo‘llaniladigan tuman va shaharlar ro‘yxatini kengaytirishni nazarda tutuvchi o‘zgartirish va qo‘shimchalar kiritilsin.

3. O‘zbekiston Respublikasi Iqtisodiyot va moliya vazirligi hamda boshqa manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish O‘zbekiston Respublikasi tog‘-kon sanoati va geologiya vaziri B.F. Islamov hamda O‘zbekiston Respublikasi kambag‘allikni qisqartirish va bandlik vaziri B.A. Musayev zimmasiga yuklansin.

1-bandda:

a) ikkinchi xatboshi “Peshku” so‘zidan keyin “va Shofirkon” so‘zlari bilan to‘ldirilsin;

b) uchinchi xatboshidagi “G‘allaorol va Zomin tumanlarida, Navoiy viloyatining Navbahor tumanida” so‘zlari “G‘allaorol, Zomin va Forish tumanlarida, Navoiy viloyatining Navbahor, Qiziltepa va Xatirchi tumanlarida” so‘zlari bilan almashtirilsin;

v) to‘rtinchi xatboshi quyidagi tahrirda bayon qilinsin:

“1,20 — Navoiy viloyatining Navoiy shahrida va Karmana tumanida, Qashqadaryo viloyatining Shahrisabz shahrida, Kitob, Muborak va Koson tumanlarida, Toshkent viloyatining Angren va Olmaliq shaharlarida, Piskent va Ohangaron tumanlarida hamda Namangan viloyatining Pop tumanida joylashgan bo‘linmalar xodimlari uchun”.