Respublika iste’molchilarining neft mahsulotlariga bo‘lgan ehtiyojini yanada to‘liq qondirish, aholini ular bilan ta’minlashda zarur tartib o‘rnatish va jismoniy shaxslar tomonidan neft mahsulotlarini noqonuniy sotish hollarini bartaraf etish maqsadida Vazirlar Mahkamasi qaror qiladi:

2. Toshkent shahrini neft mahsulotlari bilan ta’minlash to‘g‘risidagi nizom ilovaga muvofiq tasdiqlansin.

Neft mahsulotlarini sotishning belgilangan tartibiga rioya etilishi yuzasidan javobgarlik O‘zbekiston Respublikasi Davlat soliq qo‘mitasi, Ichki ishlar vazirligi, Toshkent shahar hokimligi va “O‘zdavneftmahsulot” birlashmasiga yuklansin.

3. “O‘zdavneftmahsulot” birlashmasi:

Toshkent shahar avtomobil yonilg‘isi quyish shoxobchalariga avtobenzinning ularning buyurtmasiga muvofiq har sutkada kafolatli yetkazib berilishini;

xususiylashtirilgan avtomobil yonilg‘isi quyish shoxobchalariga avtobenzin, ularning quvvatidan kelib chiqqan holda, to‘liq miqdorda berilishini ta’minlasin.

4. Toshkent shahar hokimligi “O‘zdavneftmahsulot” birlashmasi bilan birgalikda avtomobil yonilg‘isi quyish shoxobchalarining neft mahsulotlarini iste’molchilarga uzluksiz berilishini ta’minlaydigan ish tartibini o‘rnatsin, bunda shaharning eng serqatnov uchastkalarida, shu jumladan aylanma yo‘lda joylashgan avtomobil yonilg‘isi quyish shoxobchalarining butun sutka davomida ishlashini nazarda tutsin.

O‘zbekiston Respublikasi Markaziy banki, “O‘zdavneftmahsulot” birlashmasi avtomobil yonilg‘isi quyish shoxobchalarining neft mahsulotlari sotishdan olingan har kungi tushumining o‘z vaqtida inkassatsiya qilinishini ta’minlasinlar, bunda xizmat xodimlarining tungi vaqtdagi xavfsizligini ta’minlashga alohida e’tibor bersinlar.

5. O‘zbekiston Respublikasi Ichki ishlar vazirligi, Davlat soliq qo‘mitasi, Davlat bojxona qo‘mitasi neft mahsulotlarining o‘g‘irlanish yo‘llarini, ularning bojxona chegarasi orqali noqonuniy olib o‘tilishi hollarini aniqlash va bartaraf etish bo‘yicha muntazam ravishda qo‘shma tekshirishlar o‘tkazsinlar, neft mahsulotlarini sotish borasida noqonuniy faoliyat bilan shug‘ullanuvchi shaxslarni aniqlash va javobgarlikka tortishga doir qattiq choralar ko‘rsinlar.

Avtomobil yonilg‘isi quyish shoxobchalarini va ularga tutash hududlarni hamda uy-joy imoratlarini yong‘indan muhofaza qilishning ahvoli ustidan umumiy nazorat O‘zbekiston Respublikasi Ichki ishlar vazirligiga yuklansin.

6. O‘zbekiston Respublikasi Adliya vazirligi, “O‘zbekneftgaz” korporatsiyasi qonun hujjatlariga neft mahsulotlarini sotishga litsenziya berish va ularni sotish qoidalarini buzganlik uchun jazoni kuchaytirish bo‘yicha o‘zgartirishlar kiritish yuzasidan belgilangan tartibda takliflar tayyorlasinlar.

7. Bosh vazir O‘. T. Sultonov 3 kun muddatda maxsus attestatsiya komissiyasi tarkibi bo‘yicha takliflar kiritsin va bir oy muddatda:

“O‘zdavneftmahsulot” birlashmasi markaziy apparati rahbar xodimlarini, neft mahsulotlari bilan ta’minlash bo‘yicha Qoraqalpog‘iston Respublika, viloyatlar va Toshkent shahar korxonalari va neft bazalari rahbarlarini, shuningdek avtomobil yonilg‘isi quyish shoxobchalari rahbarlari va mutaxassislarini navbatdan tashqari attestatsiyadan o‘tkazsin;

aholini neft mahsulotlari bilan ta’minlashda yo‘l qo‘yilgan qoida buzishlar va suiiste’molchiliklar uchun qonunchilikka muvofiq jinoiy ish qo‘zg‘ash maqsadida materiallarni prokuratura organlariga berishgacha bo‘lgan qattiq javobgarlik choralarini ko‘rsin;

Toshkent shahrining neft mahsulotlarini xususiylashtirilgan avtomobil yonilg‘isi quyish shoxobchalariga shartnoma asosida sotish bo‘yicha tajribasini respublikaning boshqa mintaqalariga yoysin.

8. Quyidagilar o‘z kuchini yo‘qotgan deb hisoblansin:

O‘zbekiston Respublikasi Vazirlar Mahkamasining 1994-yil 9-iyundagi 290-son qarorining 5, 6, 7-bandlari; ushbu qaror bilan tasdiqlangan Xususiylashtirilgan xususiy avtoyonilg‘i quyish shoxobchalarining ishlash tartibi to‘g‘risida Vaqtinchalik nizom 2-bandining birinchi xatboshi;

O‘zbekiston Respublikasi Vazirlar Mahkamasining 1995-yil 10-iyundagi 215-son qarorining 5, 6-bandlari;

O‘zbekiston Respublikasi Vazirlar Mahkamasining 1996-yil 20-martdagi 107-son qarorining 4-bandi.

9. Mazkur qarorning bajarilishini nazorat qilish Bosh vazir O‘. T. Sultonov zimmasiga yuklansin.

Mazkur Nizom avtomobil yonilg‘isini quyish shoxobchalari, moy almashtirish va avtoservis punktlari orqali neft mahsulotlarini sotish qoidalarini hamda avtomobil yonilg‘isini quyish shoxobchalari (AYQSh)ning ishlash tartibini belgilab beradi.

1. Aholiga avtomobil benzini va dizel yonilg‘isi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan beriladigan litsenziyalar asosida faqat umumiy foydalanishdagi turg‘un va konteyner, shu jumladan xususiylashtirilgan AYQShlar orqali, texnik moylar va moylash materiallari esa moy almashtirish punktlari, ixtisoslashtirilgan avtoservis punktlari va avtodo‘konlar orqali sotiladi.

Toshkent shahar hokimligi AYQShlar tomonidan sanitariya, ekologiya, yong‘inga qarshi me’yorlar va savdo qoidalariga rioya qilinishi ustidan nazoratni ta’minlaydi va to‘liq javob beradi. Bu me’yorlar va qoidalar buzilgan taqdirda litsenziyalar olib qo‘yiladi.

3. Sotilayotgan neft mahsulotlari sifati belgilangan davlat standartlariga va texnik shartlarga javob berishi kerak.

8. AYQShlarga neft mahsulotlari “O‘zneftmahsulot” aksiyadorlik kompaniyasining ixtisoslashtirilgan avtomobil transportida tamg‘alangan sisternalarda yetkazib beriladi.

9. AYQShga tushadigan hamma neft mahsulotlari majburiy ravishdagi sifat pasporti bilan tovar-transport yukxati bo‘yicha qabul qilinadi.

10. Tovar-transport yukxatida ko‘rsatilgan miqdor bilan amalda qabul qilingan neft mahsulotlari miqdori o‘rtasida farq bo‘lmagan taqdirda operator qabul qilingan yukxatini imzolaydi, uning bir nusxasini AYQShda qoldiradi, uch nusxasini esa neft mahsulotlarini yetkazib kelgan haydovchiga qaytaradi.

11. Kelib tushgan neft mahsulotlari miqdori tovar-transport yukxati bilan to‘g‘ri kelmagan taqdirda kamomad yuzasidan belgilangan shakl bo‘yicha dalolatnoma tuziladi va belgilangan tartibda neftbazaga taqdim etiladi. Neft mahsulotlarining kamomadi to‘g‘risida tovar-transport yukxatining barcha nusxalariga tegishlicha belgi qo‘yiladi.

12. Neft mahsulotlarining AYQShga kelib tushishi va kirim qilinishini nazorat qilish uchun belgilangan shakldagi kelib tushgan neft mahsulotlarini hisobga olish daftari yuritiladi.

Hisob daftarining betlari raqamlanadi va muhr bilan tasdiqlanadi. Daftardagi varaqlar soni korxona rahbarining imzosi bilan tasdiqlanadi.

13. Neft mahsulotlari nazorat-kassa mashinalarini majburan qo‘llagan holda naqd pulga sotiladi, shuningdek belgilangan tartibda tijorat banklarining so‘mlardagi elektron kartochkalari yoki tarqatish vedomostlari bo‘yicha beriladi.

14. Har bir AYQShning ishlash tartibi, kecha-kunduz ishlovchi AYQShlarni belgilangan holda, Toshkent shahar hokimligi tomonidan belgilanadi.

15. AYQShlarning o‘lchov vositalari bilan jihozlanishi, texnika xizmati ko‘rsatish, foydalanish tartibi, ularni saqlash va tejash, shuningdek xizmat ko‘rsatish madaniyati amaldagi qoidalarga muvofiq amalga oshirilishi kerak.

AYQSh tegishli javonlar, reklama taxtalari, ko‘rgazmali tashviqot vositalari bilan jihozlangan bo‘lishi kerak. AYQSh hududidagi beton va asfalt qoplamalari va avtomobil yo‘lidan kirish yo‘laklari nuqsonsiz bo‘lishi kerak. AYQSh uchun maydonchalar tekis bo‘lishi va avtomashinalarning kolonnalar va quyish moslamalari yoniga bemalol kelishini ta’minlashi kerak. AYQSh binolari, inshootlari, maydonchalari, shuningdek unga tutashgan hududlar sanitariya-maishiy, estetik, yong‘inga qarshi va ekologik talablarga javob berishi kerak.

AYQShda foydalaniladigan asbob-uskunalar va avtomatik ravishda quyish texnikasi tegishli me’yorlarga javob berishi va atrof muhitni ifloslantirmasligi kerak.

16. AYQSh hududlari qorong‘i paytlarda tegishli me’yorlarga muvofiq yoritilishi kerak. Asosiy e’tibor neft mahsulotlarini to‘ldirish va quyish joylarining yoritilishiga qaratilishi zarur.

17. AYQSh telefon va ovozni kuchaytiradigan aloqa va qo‘riqlash signalizatsiyasi bilan jihozlangan bo‘lishi kerak.

18. AYQSh xodimlari “O‘zbekneftgaz” milliy korporatsiyasi korxonalari bilan tuzilgan shartnomalarga muvofiq tayyorlov, qayta tayyorlov, malaka oshirish, texnika va yong‘in xavfsizligi bo‘yicha bilim tekshiruvidan o‘tishi shart. “O‘zbekneftgaz” milliy korporatsiyasining tegishli guvohnomasi mavjud bo‘lgandagina ishlashga ruxsat etiladi.

19. Har bir smena tugagandan so‘ng schyotchiklarning jamlama ko‘rsatkichlari bo‘yicha aniqlanadigan smena davomida neft mahsulotlarining kelib tushganligi va sotilgan neft mahsulotlarining miqdori, smena boshlanishidagi neft mahsulotlarining qoldig‘i haqidagi ma’lumotlar ko‘rsatilgan holda belgilangan shakl bo‘yicha smena hisoboti tuziladi.

20. Rezervuarlarda qolgan neft mahsulotlarining qoldig‘ini o‘lchash asosida smena oxiriga kelib neft mahsulotlarining haqiqiy qoldig‘i aniqlanadi, bu hisobotning tegishli ustunida aks ettiriladi.

21. Smenani qabul qilishda va topshirishda namunaviy o‘lchagichlar yordamida har bir yonilg‘i tarqatuvchi kolonkaning amaldagi o‘lchov xatolari foizlarda va litrlarda aniqlanadi va smena hisobotida aks ettiriladi.

22. Smena hisoboti ikki nusxada tuziladi va smenani topshiruvchi va qabul qiluvchi operatorlar tomonidan imzolanadi.

Hisobotning birinchi nusxasi tovar-transport yukxati, neft mahsulotlarini qabul qilish dalolatnomalari, naqd pullar topshirilishini tasdiqlovchi hujjatlar bilan smenani topshiruvchi operator tomonidan tilxat bilan korxona buxgalteriyasiga beriladi, ikkinchi nusxasi esa AYQShda smena hisoboti kitobida qoladi va smenalar operatorlari uchun nazorat nusxasi hisoblanadi.

23. Har bir AYQShda neft mahsulotlarini hisobga olish va o‘lchovlarning haqqoniyligini va birligini ta’minlash, shuningdek ularning sifatini nazorat qilish uchun “O‘zdavstandart” markazi tomonidan qo‘llashga ruxsat etilgan va Davlat metrologiya xizmatining tamg‘asiga yoki tekshirish guvohnomasiga ega bo‘lgan zarur asbob-uskunalar va o‘lchov vositalari bo‘lishi kerak.

24. Har bir AYQShda neft mahsulotlarini xatlash belgilangan tartibda, bir oyda kamida bir marta o‘tkazilishi kerak.

25. Xatlash majburiy tartibda quyidagi hollarda ham o‘tkaziladi:

ishni qabul qilish - topshirish kunida — moddiy javobgar shaxslar almashgan taqdirda;

o‘marish, talon-taroj, o‘g‘irlik yoki suiiste’mol qilish, shuningdek buzilish faktlari aniqlanganda — bunday faktlar aniqlanganda darhol;

yong‘in yoki tabiiy ofatlar (suv bosishi, zilzila va boshqalar)dan keyin — yong‘in yoki tabiiy ofat tugashi bilan darhol.