Oʻzbekiston Respublikasi Saylov kodeksining 14 va 16-moddalari, Oʻzbekiston Respublikasi Markaziy saylov komissiyasi Reglamentining 7-bandiga muvofiq Oʻzbekiston Respublikasi Markaziy saylov komissiyasi qaror qiladi:

1. Oʻzbekiston Respublikasi Markaziy saylov komissiyasining emblemasi oʻrniga yangi namunadagi rasmiy ramzi joriy etilsin.

2. Quyidagilar:

Oʻzbekiston Respublikasi Markaziy saylov komissiyasining rasmiy ramzi namunasi va tavsifi 1-ilovaga muvofiq;

Oʻzbekiston Respublikasi Markaziy saylov komissiyasining rasmiy ramzidan foydalanish tartibi toʻgʻrisidagi nizom 2-ilovaga muvofiq tasdiqlansin.

3. Markaziy saylov komissiyasi Kotibiyati rahbari (A. Roʻziyev):

hamkor tashkilotlar va saylov jarayoni ishtirokchilari tomonidan foydalanish uchun Markaziy saylov komissiyasining yangi namunadagi rasmiy ramzining elektron shakllarini rasmiy veb-saytga joylashtirish;

Markaziy saylov komissiyasining maʼmuriy binosi, tegishli jihozlari, rasmiy veb-sayti, ijtimoiy tarmoqlardagi sahifalari, mobil ilovalar va boshqa joylarda foydalanilayotgan eski namunadagi emblemani yangi namunadagi rasmiy ramzga oʻzgartirish choralarini koʻrsin.

4. Oʻzbekiston Respublikasi Markaziy saylov komissiyasining “Oʻzbekiston Respublikasi Markaziy saylov komissiyasining emblemasi toʻgʻrisida” 1999-yil 18-maydagi 12-son qarori oʻz kuchini yoʻqotgan deb hisoblansin.

5. Mazkur qaror Oʻzbekiston Respublikasi Markaziy saylov komissiyasining rasmiy veb-saytida eʼlon qilinsin.

6. Mazkur qarorning ijrosini nazorat qilish Oʻzbekiston Respublikasi Markaziy saylov komissiyasi Raisining oʻrinbosari B. Kuchkarov zimmasiga yuklansin.

Oʻzbekiston Respublikasi Markaziy saylov komissiyasining rasmiy ramzining asosi toʻgʻri burchakli toʻrtburchak boʻlib, saylov prinsiplarining oʻzgarmasligini ifodalaydi.

Rasmiy ramzda moviy rangdan geometrik shakllar va yozuvda keng foydalanilgan. Moviy rang tenglik, ochiqlik, oshkoralik va adolat ramzi sifatida ifodalangan.

Toʻrtburchak ichida oʻzbek milliy naqshi hisoblangan sakkizburchak asosida tuzilgan yaxlit naqshlar kompozitsiyasi oʻrin olgan. Sakkizburchak hurlik va qatʼiyatlilikni, naqshlar uygʻunligi Oʻzbekiston Respublikasi saylov sohasi boʻyicha oʻz milliy saylov qonunchiligi va standartlariga ega ekanligini anglatadi.

Toʻrtburchak ichida Oʻzbekiston Respublikasi Markaziy saylov komissiyasining qisqartirilgan nomi oq rangda lotin alifbosida “MSK” harflari koʻrinishida keltirilgan boʻlib, har bir harf oq chiziq bilan ajratilgan. Chiziq balandligi harf balandligida bir oz uzunroq. Mazkur abbreviatura ramzning Oʻzbekiston Respublikasi Markaziy saylov komissiyasiga tegishli ekanligini oson va tez anglashda yordam beradi.

Toʻgʻri burchakli toʻrtburchakning pastki qismida moviy rangli bosh harflar bilan lotin alifbosida: birinchi qatorda “OʻZBEKISTON RESPUBLIKASI”, ikkinchi qatorda “MARKAZIY SAYLOV KOMISSIYASI” degan soʻzlar yozilgan.

1. Mazkur Nizom Oʻzbekiston Respublikasi Markaziy saylov komissiyasining (bundan buyon matnda Markaziy saylov komissiyasi deb yuritiladi) rasmiy ramzidan (bundan buyon matnda rasmiy ramz deb yuritiladi) foydalanish tartibini belgilaydi.

2. Rasmiy ramzdan foydalanishda uning tasdiqlangan namunasi va tavsifiga qatʼiy rioya qilish talab etiladi.

Rasmiy ramzdan foydalanishda uning shakliga oʻzgartishlar kiritish yoki uni boshqacha tarzda buzib foydalanish taqiqlanadi.

3. Rasmiy ramzdan quyidagi maqsadlarda va oʻrinlarda foydalanish mumkin:

Markaziy saylov komissiyasi va hududiy saylov komissiyalarining maʼmuriy binolarida va axborot burchaklariga oʻrnatilgan devoriy stendlarda;

Markaziy saylov komissiyasi va hududiy saylov komissiyalarining rasmiy veb-saytlarida, ijtimoiy tarmoqlardagi sahifalarida, mobil ilovalarida hamda nashrlarida;

saylov yoki referendumga tayyorgarlik koʻrish va oʻtkazish davrida, shu jumladan Markaziy saylov komissiyasi va hududiy saylov komissiyalari faoliyatiga doir axborot, targʻibot va tashviqot materiallarida;

saylov komissiyalari aʼzolarining malakasini oshirishni tashkil etish, saylov jarayonlari ishtirokchilarining huquqiy madaniyatini yuksaltirish hamda saylovchilarning elektoral madaniyatini oshiruvchi materiallarda (banner, plakat, flayer, buklet, stend va boshqalar);

tashkiliy tadbirlar uchun moʻljallangan hujjatlarda, sovgʻalar va boshqa materiallarda;

Markaziy saylov komissiyasi va hududiy saylov komissiyalarining faoliyati uchun ajratilgan avtomototransport vositalari hamda boshqa texnika vositalarida.

Rasmiy ramzdan mazkur Nizomda nazarda tutilmagan, biroq Markaziy saylov komissiyasi Raisining farmoyishi bilan boshqa maqsadlarda ham foydalanish mumkin.

4. Rasmiy ramz tasviri tushirilgan bayroq namunalari joriy etilishi mumkin. Bayroq namunalari katta va kichik oʻlchamli koʻrinishlarda boʻladi.

Katta oʻlchamli bayroq — Markaziy saylov komissiyasi maʼmuriy binosining mehmonlarni kutib olish qismiga, saylov yoki referendumga tayyorgarlik koʻrish va oʻtkazish davrida esa saylov kampaniyasining ramzi tushirilgan bayroq bilan birga Markaziy saylov komissiyasi maʼmuriy binosining tegishli qismiga, shuningdek saylov va referendum davrida tashkil etiladigan Matbuot markazi binosida oʻrnatilishi mumkin.

Kichik oʻlchamli bayroq — Markaziy saylov komissiyasiga tashrif buyuruvchi turli xalqaro darajadagi tashkilot tuzilmalari, missiyalar rahbarlari va vakillari ishtirokidagi uchrashuv, davra suhbati oʻtkaziladigan xonadagi stol ustida mazkur tashkilotning bayrogʻi bilan birga qoʻyiladi. Davlatlar nomidan tashrif buyuruvchi turli darajadagi delegatsiya vakillari bilan oʻtkaziladigan uchrashuv va davra suhbatlari bundan mustasno.

5. Rasmiy ramz Markaziy saylov komissiyasi aʼzolari va Kotibiyati masʼul xodimlari uchun qonunchilik hujjatlarida belgilangan tartibda koʻkrak nishoni tariqasida joriy etilishi mumkin. Bunda oq rang oʻrniga kumush rangdan foydalanishga yoʻl qoʻyiladi.

6. Rasmiy ramzdan Markaziy saylov komissiyasi aʼzolari va Kotibiyati masʼul xodimlari, saylov jarayoni ishtirokchilarining, shuningdek ommaviy axborot vositalari tomonidan mazkur Nizomda belgilangan tartibda va maqsadlarda foydalanishga yoʻl qoʻyiladi.

7. Rasmiy ramzdan foydalanish uchun Markaziy saylov komissiyasining rasmiy veb-saytida rasmiy ramzning elektron shakllari joylashtiriladi.