O‘zbekiston Respublikasi Prezidentining 2024-yil 3-iyundagi “Alkogol va tamaki mahsulotlari bozorini tartibga solish hamda ularning noqonuniy aylanmasining oldini olish chora-tadbirlarini kuchaytirish to‘g‘risida”gi PF-84-son Farmoni ijrosini ta’minlash maqsadida:

1. O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti qoshidagi Alkogol va tamaki bozorini tartibga solish inspeksiyasining (keyingi o‘rinlarda — Inspeksiya) tuzilmasi 1-ilovaga muvofiq tasdiqlansin.

Bosh prokurorga, zarur hollarda, Inspeksiyaning tuzilmasiga boshqaruv xodimlarining belgilangan soni va mehnatga haq to‘lash fondi doirasida o‘zgartirishlar kiritish huquqi berilsin.

2. Belgilansinki:

Inspeksiya faoliyati respublika budjeti va budjetdan tashqari mablag‘lar hisobidan moliyalashtiriladi;

Inspeksiya boshlig‘i maqomi, mehnatga haq to‘lash shartlari, tibbiy va transport xizmati ko‘rsatish sharoitlari bo‘yicha Bosh prokuratura huzuridagi Iqtisodiy jinoyatlarga qarshi kurashish departamenti (keyingi o‘rinlarda — Departament) boshlig‘i o‘rinbosariga tenglashtiriladi;

Inspeksiyaga Bosh prokuror o‘rinbosari — Departament boshlig‘ining taqdimnomasiga asosan Bosh prokuror tomonidan lavozimga tayinlanadigan va lavozimidan ozod qilinadigan boshliq rahbarlik qiladi;

Inspeksiya Bosh prokurorga hamda Bosh prokuror o‘rinbosari — Departament boshlig‘iga bo‘ysunuv va hisobdorlik asosida faoliyat ko‘rsatadi;

Inspeksiya yuridik shaxs hisoblanadi, mustaqil balansga, Iqtisodiyot va moliya vazirligi G‘aznachilik xizmati qo‘mitasida shaxsiy g‘azna hisobvaraqlariga, O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga va blankalarga ega bo‘ladi;

Inspeksiya xodimlari Inspeksiya boshlig‘ining taqdimnomasiga asosan Bosh prokuror o‘rinbosari — Departament boshlig‘i tomonidan lavozimga tayinlanadi va lavozimidan ozod etiladi;

prokuratura organlari xodimlari xizmatda qoldirilgan holda Inspeksiyada lavozimga tayinlanishi mumkin. Bunda lavozimga tayinlangan xodimning faoliyat davri navbatdagi darajali unvon berish, ko‘p yillik xizmati uchun ustama haq to‘lash, maoshini belgilash, pullik ta’minot va pensiya tayinlash huquqini berish uchun prokuratura organlaridagi xizmat stajiga qo‘shib hisoblanadi.

Belgilansinki, Inspeksiyada xizmatni o‘tash tartibi Bosh prokuror tomonidan belgilanadi. Bunda xodimlarni lavozimga tayinlash va lavozimidan ozod etishda Departament organlariga xizmatga qabul qilish va xizmatdan bo‘shatish talablari va shartlari tatbiq etiladi.

3. Inspeksiyaning yuridik shaxs tashkil etmagan holda budjetdan tashqari jamg‘armasi (keyingi o‘rinlarda — Jamg‘arma) tashkil etilsin.

4. Belgilab qo‘yilsinki:

a) quyidagilar Jamg‘armani shakllantirish manbalari hisoblanadi:

alkogol va tamaki mahsulotlarini noqonuniy ishlab chiqarganlik yoki iste’mol etil spirti hamda alkogol mahsulotlarining noqonuniy aylanmasi uchun undiriladigan jarima summasining 50 foizi;

iste’mol va texnik etil spirti, alkogol va tamaki mahsulotlarini ishlab chiqarish, ulgurji va chakana savdo yo‘nalishida litsenziyalash va xabardor qilish tartib-taomillari sohasidagi huquqbuzarliklar uchun yuridik shaxslarga solinadigan jarimalar;

iste’mol va texnik etil spirtidan maqsadsiz foydalanilganlik uchun undiriladigan moliyaviy jarima summasining 20 foizi;

iste’mol va texnik etil spirtini transport vositalarida tashish bo‘yicha litsenziya talablarini buzganlik uchun undiriladigan moliyaviy jarima summasining 50 foizi;

tamaki mahsulotlari ishlab chiqarish faoliyatini amalga oshirish huquqiga litsenziya berganlik uchun davlat boji, shuningdek, iste’mol va texnik etil spirti, alkogol mahsulotlarini ishlab chiqarishga, alkogol mahsulotlarining ulgurji savdosini amalga oshirishga litsenziyalar berish uchun to‘lanadigan yig‘imlar va yillik litsenziya to‘lovlari;

xalqaro moliya institutlari va xorijiy hukumat moliya tashkilotlarining kreditlari (qarzlari) va grantlari;

qonunchilik hujjatlarida taqiqlanmagan boshqa manbalar;

b) Jamg‘arma mablag‘lari quyidagilarga yo‘naltiriladi:

Inspeksiyaning samarali faoliyatini ta’minlash va moddiy-texnik bazasini mustahkamlash;

xodimlarni moddiy rag‘batlantirish va ularga qo‘shimcha haq to‘lash;

alkogol mahsulotlarini ishlab chiqarish jarayonlarini monitoring va nazorat qilish imkonini beruvchi videokuzatuv vositalarini o‘rnatish bilan bog‘liq xarajatlar;

alkogol va tamaki bozori holatini tahlil qilishga sohada amaliy ish tajribaga ega bo‘lgan mahalliy va (yoki) xorijiy mutaxassislarni jalb qilish hamda tadqiqotlar o‘tkazish;

qonunchilik hujjatlarida taqiqlanmagan boshqa tadbirlar.

5. Alkogol va tamaki bozorini tartibga solish inspeksiyasi xodimlarini moddiy qo‘llab-quvvatlash choralari 2-ilovaga muvofiq tasdiqlansin.

6. Departament ikki oy muddatda:

a) Inspeksiyaning yuqori malakali kadrlar bilan, birinchi navbatda, alkogol va tamaki mahsulotlari ishlab chiqarish va realizatsiya qilish sohasida amaliy ish tajribasiga ega va Inspeksiya zimmasiga yuklatilgan vazifalarni professional darajada bajarishga qodir shaxslar orasidan to‘ldirilishini;

b) Inspeksiya xodimlari samarali faoliyat ko‘rsatishi uchun mebel, kompyuter texnikasi, aloqa vositalari va boshqa jihozlar bilan ta’minlasin.

Bunda ushbu kichik bandning birinchi xatboshisida nazarda tutilgan xarajatlar Vinochilikni rivojlantirish jamg‘armasi mablag‘lari hisobidan moliyalashtiriladi;

v) quyidagilarni tasdiqlashni nazarda tutuvchi qaror loyihasini Vazirlar Mahkamasiga kiritsin:

Alkogol va tamaki bozorini tartibga solish inspeksiyasi to‘g‘risidagi nizom;

Alkogol va tamaki bozorini tartibga solish inspeksiyasining budjetdan tashqari jamg‘armasi to‘g‘risidagi nizom;

iste’mol va texnik etil spirti, alkogol va tamaki mahsulotlari ishlab chiqarishni va ularning aylanmasini nazorat qilish bo‘yicha xavfni tahlil etish avtomatlashtirilgan tizimini joriy etish tartibi to‘g‘risidagi nizom.

7. Departament Raqamli texnologiyalar vazirligi bilan birgalikda 2025-yil 1-yanvarga qadar quyidagi axborot tizimlari (keyingi o‘rinlarda — hisobga olish axborot tizimi) amalda joriy etilishini ta’minlasin:

iste’mol va texnik etil spirti, alkogol va tamaki mahsulotlarini ishlab chiqarish va ularning aylanmasi hajmini hisobga olish axborot tizimi;

iste’mol va texnik etil spirti, alkogol va tamaki mahsulotlarini ishlab chiqarishni va ularning aylanmasini nazorat qilish bo‘yicha xavfni tahlil qilish tizimi;

iste’mol va texnik etil spirti tashuvchi avtotransport vositalari harakatini markazlashtirilgan tarzda monitoring va nazorat qilish imkoniyatiga ega geoaxborot tizimi.

Bunda:

hisobga olish axborot tizimlari “Unicon-Soft” MCHJ tomonidan ishlab chiqiladi;

2025-yil 1-yanvarga qadar hisobga olish axborot tizimlari o‘zaro axborot almashinuvini yo‘lga qo‘yish uchun Soliq qo‘mitasi, Bojxona qo‘mitasi, Kadastr agentligi, “O‘zbekiston respublika tovar-xomashyo birjasi” AJ, “Asl belgisi” mahsulotlarni markirovkalash va kuzatib borish milliy axborot tizimi (keyingi o‘rinlarda — “Asl belgisi” axborot tizimi) hamda boshqa manfaatdor idoralarning axborot tizimlari bilan integratsiya qilinadi.

Ushbu axborot tizimlarini ishlab chiqish hamda tizim ishlashi uchun zarur infratuzilmani yaratish bo‘yicha ishlarni moliyalashtirish Inspeksiyaning budjetdan tashqari jamg‘armasi mablag‘lari hisobidan amalga oshiriladi.

8. Departament:

O‘zbekiston texnik jihatdan tartibga solish agentligi bilan birgalikda 2025-yil 1-yanvarga qadar iste’mol va texnik etil spirti hamda alkogol mahsulotlari ishlab chiqarish korxonalarida realizatsiya qilingan etil spirti hamda ishlab chiqarilgan alkogol mahsulotlari miqdorining onlayn hisobini yuritadigan elektron hisoblagichlarga muvofiqlik sertifikatini berish hamda o‘lchov uskunalarining hisobga olish axborot tizimiga integratsiya qilinishini ta’minlasin. Bunda hisobga olish axborot tizimi bilan integratsiya qilinmagan va axborot (ma’lumot) berilishi ta’minlanmagan taqdirda, iste’mol va texnik etil spirti hamda alkogol mahsulotlari ishlab chiqarish uchun berilgan litsenziya bekor qilinadi;

2024-yil 1-avgustga qadar iste’mol va texnik etil spirti hamda alkogol mahsulotlarini ishlab chiqarish normalarini qayta ko‘rib chiqish orqali xalqaro talablarga muvofiqlashtirsin;

ikki oy muddatda iste’mol va texnik etil spirti hamda alkogol mahsulotlarini ishlab chiqarish, idishlarga quyish, saqlash va ulgurji sotishni hisobga olish hamda nazorat qilishga doir yangi tahrirdagi nizom loyihasini ishlab chiqib, Vazirlar Mahkamasiga kiritsin;

uch oy muddatda Ichki ishlar vazirligi, Soliq qo‘mitasi, Bojxona qo‘mitasi bilan birgalikda iste’mol va texnik etil spirti, alkogol va tamaki mahsulotlarini ishlab chiqarish hamda savdo subyektlari tomonidan qonun talablarini buzish holatlarini hamkorlikda aniqlash hamda o‘zaro axborot almashish tartibini ishlab chiqsin va tasdiqlasin.

9. Soliq qo‘mitasi Iqtisodiyot va moliya vazirligi bilan birgalikda 2024-yil 1-iyulga qadar o‘z ehtiyojlarida texnik spirtni olish uchun sarflangan etil spirtining boshlang‘ich fraksiyasiga aksiz solig‘ini hisoblashni takomillashtirish bo‘yicha Vazirlar Mahkamasiga taklif kiritsin.

10. Soliq qo‘mitasi:

a) Raqamli texnologiyalar vazirligi, “Asl belgisi” axborot tizimi operatori bilan birgalikda ikki oy muddatda:

“Asl belgisi” axborot tizimi ma’lumotlari asosida raqamli markirovkalangan mahsulotlarni tizimga kiritish, ularning harakatini avtomatlashtirilgan tarzda tahlil va nazorat qilish imkonini beruvchi dasturiy mahsulotni ishlab chiqsin;

quyidagilarni nazarda tutgan holda “Asl belgisi” axborot tizimini takomillashtirsin:

ishlab chiqarilgan va realizatsiya qilingan raqamli markirovkalangan mahsulotlarning hisobini to‘g‘ri yuritish hamda mahsulotlar harakati zanjirini axborot tizimida to‘liq va haqqoniy aks ettirish;

mahsulotlar harakati zanjirini axborot tizimida to‘liq va haqqoniy aks ettirish maqsadida raqamli markirovkalangan mahsulotlar aylanmasi ishtirokchilarining aniq faoliyat manzili, shu jumladan, mahsulotlarni ishlab chiqarish, saqlash va realizatsiya qilish manzillari hisobini to‘g‘ri yuritish;

shubhali holatlarni aniqlash va bunday ma’lumotlarni soliq organlariga avtomatlashtirilgan tarzda taqdim etish;

b) Raqamli texnologiyalar vazirligi, Adliya vazirligi bilan birgalikda uch oy muddatda litsenziya (ruxsat etish, xabarnoma hujjati), raqamli markirovka kodlarini to‘g‘ri o‘qishni va aniqlashni ta’minlovchi maxsus qurilmalar mavjudligi, “Asl belgisi” axborot tizimida ro‘yxatdan o‘tganligi hamda raqamli markirovka kodlari to‘g‘ri aks ettirilishini elektron hisobvaraq-fakturada avtomatik tekshirish tizimini joriy etsin.

11. Milliy statistika qo‘mitasi Inspeksiyani statistik axborot majburiy tarqatiladigan reyestrga kiritsin, shuningdek, belgilangan tartibda doimiy asosda Inspeksiya so‘rovlariga muvofiq, uni zarur qo‘shimcha statistik axborot bilan ta’minlasin.

12. Belgilansinki, Inspeksiyani saqlash va axborot tizimini yaratish bilan bog‘liq xarajatlar joriy yilda Vinochilikni rivojlantirish jamg‘armasining 2024-yil boshiga qoldiq mablag‘larining 25 milliard so‘m miqdoridagi qismi hisobidan moliyalashtiriladi, 2025-yildan boshlab esa tegishli yil uchun Davlat budjeti parametrlarini shakllantirishda nazarda tutiladi.

Qishloq xo‘jaligi vazirligi bir hafta muddatda Vinochilikni rivojlantirish jamg‘armasi hisobidan 25 milliard so‘m mablag‘ Inspeksiyaning budjetdan tashqari jamg‘armasiga o‘tkazilishini ta’minlasin.

13. Inspeksiya Toshkent shahri, Yashnobod tumani, Taraqqiyot 1-berk ko‘chasi, 8-uy manzilidagi binoga bepul foydalanish huquqi asosida joylashtirilsin.

14. Ichki ishlar vazirligi, Soliq qo‘mitasi, Bojxona qo‘mitasi, Raqobatni rivojlantirish va iste’molchilar huquqlarini himoya qilish qo‘mitasi Inspeksiya zimmasiga yuklatilgan vazifalarni amalga oshirishda unga har tomonlama ko‘maklashsin.

15. Departament manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida takliflar kiritsin.

16. Mazkur qarorning ijrosini samarali tashkil qilishga mas’ul va shaxsiy javobgar etib Bosh prokuror N.T. Yo‘ldoshev belgilansin.

Qaror ijrosini nazorat qilish O‘zbekiston Respublikasi Bosh vaziri A.N. Aripov zimmasiga yuklansin.

1. Alkogol va tamaki bozorini tartibga solish inspeksiyasi (keyingi o‘rinlarda — Inspeksiya) xodimlarining ish haqi fondi quyidagilar hisobidan shakllantiriladi:

Yagona tarif setkasi bo‘yicha tasdiqlangan razryadlarga muvofiq lavozim maoshi;

lavozim maoshining 40 foizi miqdorida ustama (mehnatni rag‘batlantirish koeffitsiyenti);

uzoq muddat uzluksiz xizmati uchun lavozim maoshiga 20 foizdan 60 foizgacha miqdorda ustama;

o‘z vazifalarini vijdonan, shuningdek, alohida muhim va mas’uliyatli ishlarni bajarayotgan xodimlarni mehnatga haq to‘lash fondi doirasida mukofotlash;

yilda bir marta oylik mehnatga haq to‘lash fondi miqdorida moddiy yordam ko‘rsatish;

moddiy rag‘batlantirish maxsus fondi mablag‘lari hisobidan shaxsiy ustamalar.

2. Inspeksiya xodimlariga budjetdan tashqari jamg‘arma mablag‘lari hisobidan quyidagi miqdorlarda uzoq muddat uzluksiz xizmati uchun har oylik lavozim maoshiga ustama to‘lanadi (rag‘batlantirish koeffitsiyentini inobatga olgan holda lavozim maoshiga nisbatan koeffitsiyentlarda):

1 yildan 5 yilgacha — 0,2;

5 yildan 10 yilgacha — 0,3;

10 yildan 20 yilgacha — 0,4;

20 yildan ortiq — 0,6.

Bunda, ko‘p yillik ishlaganlik uchun ustama olish huquqini beruvchi ish staji Inspeksiya boshlig‘i tomonidan tasdiqlanadigan tartib asosida amalga oshiriladi.

3. Inspeksiya xodimlarining Yagona tarif setkasi bo‘yicha mehnatga haq to‘lash razryadlari ilovaga muvofiq miqdorda qo‘llanadi.

4. O‘zbekiston Respublikasi Davlat budjeti mablag‘lari hisobidan Inspeksiya xodimlarining yagona tarif setkasi bo‘yicha mehnatga haq to‘lashning tasdiqlangan razryadlariga muvofiq lavozim maoshini belgilashda tarif koeffitsiyenti — 1,5 baravarga oshirilgan miqdorda qo‘llanadi.

5. Inspeksiyasi xodimlarini moddiy rag‘batlantirish tartibi to‘g‘risidagi nizom Iqtisodiyot va moliya vazirligi bilan kelishilgan holda Bosh prokuror tomonidan tasdiqlanadi.