Oʻzbekiston Respublikasi Prezidentining 2024-yil 18-yanvardagi “Qishloq xoʻjaligiga moʻljallangan yer uchastkalarini ijaraga berish tartibini takomillashtirish boʻyicha qoʻshimcha chora-tadbirlar toʻgʻrisida”gi PF-15-son Farmoni hamda 2024-yil 13-fevraldagi “Qishloq xoʻjaligi yerlari degradatsiyasiga qarshi kurashish, tuproqning gumus miqdori va unumdorligini oshirishni qoʻllab-quvvatlashning qoʻshimcha chora-tadbirlari toʻgʻrisida”gi PQ-71-son qaroriga muvofiq:

1. Oʻzbekiston Respublikasi Prezidentining ayrim hujjatlariga ilovaga muvofiq quyidagilarni nazarda tutuvchi oʻzgartirishlar kiritilsin:

qishloq xoʻjaligiga moʻljallangan yer uchastkalarini ijaraga berishda ochiq elektron tanlov oʻrniga elektron onlayn auksion savdolarini joriy etish;

maxsus iqtisodiy zonalarda, shuningdek, yirik investitsiya loyihalari uchun yer uchastkalarini ijaraga berish tartibini takomillashtirish.

2. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

1. Oʻzbekiston Respublikasi Prezidentining 2020-yil 2-sentabrdagi “Oʻzbekiston Respublikasida pillachilik va qorakoʻlchilikni yanada rivojlantirish chora-tadbirlari toʻgʻrisida”gi PF-6059-son Farmonining 14-bandi “a” kichik bandining uchinchi xatboshisidagi “tanlov” soʻzi “elektron onlayn auksion savdolari” soʻzlari bilan almashtirilsin.

2. Oʻzbekiston Respublikasi Prezidentining 2021-yil 8-iyundagi “Yer munosabatlarida tenglik va shaffoflikni taʼminlash, erga boʻlgan huquqlarni ishonchli himoya qilish va ularni bozor aktiviga aylantirish chora-tadbirlari toʻgʻrisida”gi PF-6243-son Farmonining 3-bandi uchinchi va toʻrtinchi xatboshilari quyidagi tahrirda bayon etilsin:

“maxsus iqtisodiy zonalarda investitsiya loyihalarini joylashtirish uchun, shuningdek, mahalliy va chet ellik investorlar, shu jumladan chet el investitsiyalari ishtirokidagi korxonalar, chet ellik yuridik va jismoniy shaxslar tomonidan qiymati kamida 10 million AQSh dollari ekvivalentida (yer maydoni hajmiga koʻra ortib boradi) boʻlgan yirik investitsiya loyihasini amalga oshirish uchun — eng yaxshi taklifni tanlab olish yoʻli bilan loyiha qiymatining kamida 5 foiziga teng mablagʻ avvaldan maxsus hisobraqamga joylashtirilganda hamda yer uchastkasiga ijara huquqining baholovchi tashkilot tomonidan aniqlanadigan bozor qiymatiga nisbatan koeffitsiyentlarda belgilanadigan miqdordagi mablagʻni Davlat budjetiga toʻlash sharti bilan;

xalqaro birlashmalar va tashkilotlarga”.

3. Oʻzbekiston Respublikasi Prezidentining 2021-yil 4-avgustdagi “Respublika hududlarida gulchilik va koʻchatchilik sohalarini yanada rivojlantirish toʻgʻrisida”gi PQ-5209-son qarori 4-bandida:

ikkinchi xatboshi quyidagi tahrirda bayon etilsin:

“2024-yil 1-martdan boshlab gulchilik faoliyati bilan shugʻullanayotgan tadbirkorlik subyektlarining oʻz faoliyatlarini kengaytirishlari uchun 0,06 gektardan 1 gektargacha yer maydonlari elektron onlayn auksion savdolari orqali 30 yilga dehqon xoʻjaligini yuritish maqsadlari uchun yer uchastkalarini ijaraga berish tartibida ajratiladi”;

toʻrtinchi va beshinchi xatboshilar quyidagi tahrirda bayon etilsin:

“2024-yil 1-martdan boshlab “Temir daftar”, “Ayollar daftari” va “Yoshlar daftari”ga kiritilgan fuqarolarga ochiq maydonda hamda issiqxonalarda gul yetishtirish boʻyicha agrotexnik tadbirlarni oʻrgatish maqsadida Andijon, Jizzax va Namangan viloyatlarida har birining maydoni 2 sotix boʻlgan 25 ta “Gulchilik oʻquv poligon”larini tashkil etish uchun 0,5 gektar yer maydoni tashabbuskor tadbirkorlarga elektron onlayn auksion savdolari orqali ijaraga beriladi;

2024-yil 1-martdan boshlab “Gulchilik oʻquv poligon”larida oʻquv kurslarini muvaffaqiyatli tugatgan va maxsus sertifikat olgan ishsiz, ehtiyojmand oilalarga gul va koʻchat yetishtirishni rivojlantirish maqsadida 6 sotixdan yer maydoni elektron onlayn auksion savdolari orqali ijaraga beriladi”.

4. Oʻzbekiston Respublikasi Prezidentining 2021-yil 23-noyabrdagi “Meva-sabzavotchilik va uzumchilikda oilaviy tadbirkorlikni rivojlantirish, qishloq xoʻjaligi ishlab chiqarishida dehqon xoʻjaliklarining ulushini oshirish chora-tadbirlari toʻgʻrisida”gi PQ-20-son qarorida:

a) 1-bandning “b” kichik bandi uchinchi xatboshisi quyidagi tahrirda bayon etilsin:

“2024-yil 1-martdan boshlab kam suvli yerlarda viloyatlarda 0,50 gektardan 1 gektargacha hamda Qoraqalpogʻiston Respublikasida 0,50 gektardan 2 gektargacha boʻlgan oʻlchamlarda elektron onlayn auksion savdolari orqali ijaraga berish toʻgʻrisidagi takliflari qabul qilinsin”;

b) 2-bandda:

uchinchi xatboshi quyidagi tahrirda bayon etilsin:

“2024-yil 1-martdan boshlab qishloq xoʻjaligi maqsadlari, shu jumladan, dehqon xoʻjaligini yuritish uchun yer uchastkalari “E-auksion” elektron savdo platformasida elektron onlayn auksion savdolari orqali ijaraga beriladi, bundan Yer kodeksiga muvofiq yer uchastkalarini Vazirlar Mahkamasi tomonidan ijaraga berish hollari mustasno”;

toʻrtinchi xatboshi chiqarib tashlansin;

v) 5-bandning ikkinchi xatboshisi chiqarib tashlansin;

g) 12-bandning ikkinchi xatboshisidagi “, shuningdek, ochiq elektron tanlovda ishtirok etish boʻyicha” soʻzlari chiqarib tashlansin;

d) 13-bandning sakkizinchi xatboshisi quyidagi tahrirda bayon etilsin:

“2024-yil 1-martdan boshlab intensiv bogʻlar barpo etishga yaroqli yer uchastkalarini tanlash, ularning elektron onlayn auksion savdolariga chiqarilishini tashkil etish”.

5. Oʻzbekiston Respublikasi Prezidentining 2022-yil 8-fevraldagi “Chorvachilikni yanada rivojlantirish va chorva ozuqa bazasini mustahkamlash chora-tadbirlari toʻgʻrisida”gi PQ-121-son qarorining 3-bandi uchinchi va toʻrtinchi xatboshilaridagi “ochiq elektron tanlov” soʻzlari “elektron onlayn auksion savdolari” soʻzlari bilan almashtirilsin.

6. Oʻzbekiston Respublikasi Prezidentining 2023-yil 10-iyundagi “Maʼmuriy islohotlar doirasida qishloq xoʻjaligi va oziq-ovqat sohasida davlat boshqaruvini samarali tashkil qilish chora-tadbirlari toʻgʻrisida”gi PF-90-son Farmonining 2-ilovasidan “Tuproq tarkibi va repozitoriysi, sifati tahlil markazi” davlat unitar korxonasi” bloki chiqarib tashlansin.

7. Oʻzbekiston Respublikasi Prezidentining 2023-yil 5-iyuldagi “2023 — 2025-yillarda Buxoro viloyatida paxta-toʻqimachilik va gʻallachilik klasterlari hamda kasanachilikni rivojlantirish orqali aholi bandligini taʼminlashga doir qoʻshimcha chora-tadbirlar toʻgʻrisida”gi PQ-214-son qarorining 6-bandi uchinchi xatboshisi chiqarib tashlansin.

8. Oʻzbekiston Respublikasi Prezidentining 2023-yil 15-dekabrdagi “Paxtachilikda urugʻchilik tizimini rivojlantirish hamda paxta hosildorligini oshirishning qoʻshimcha chora-tadbirlari toʻgʻrisida”gi PQ-391-son qarorining 3-bandi beshinchi xatboshisidan “Tuproq tarkibi va repozitoriysi, sifati tahlil markazi” davlat unitar korxonasi,” soʻzlari chiqarib tashlansin.