O‘zbekiston Respublikasi Prezidentining “Iste’mol bozorlarida narxlar barqarorligini ta’minlashga va monopoliyaga qarshi choralarning ta’sirchanligini oshirishga doir qo‘shimcha chora-tadbirlar to‘g‘risida” 2022-yil 31-maydagi PF-145-son Farmoni ijrosini ta’minlash hamda mamlakatimizda moyli urug‘larni qayta ishlash sohasida biznes muhitini yaxshilash maqsadida Vazirlar Mahkamasi qaror qiladi:

1. Xo‘jalik yurituvchi subyektlarga ularning tashkiliy-huquqiy shaklidan qat’i nazar, o‘zlari import qilgan o‘simlik yog‘lari hamda moyli ekinlar (paxta, kungaboqar va soya) urug‘larini qayta ishlashdan olingan o‘simlik yog‘larini ilovada belgilangan miqdorlarda eksport qilishga ruxsat berilsin.

2. Kungaboqar va paxta yog‘i (TIF TN kodi 1512) hamda aralash yog‘lardan (TIF TN kodi 1517 90 910 0) tashqari boshqa o‘simlik va meva urug‘lari yog‘larini O‘zbekiston Respublikasi bojxona hududidan tashqariga olib chiqish (eksport qilish) bo‘yicha cheklovlar bekor qilinsin.

3. O‘zbekiston Respublikasi Iqtisodiyot va moliya vazirligi huzuridagi Bojxona qo‘mitasi mahsulotlarni “eksport” bojxona rejimiga joylashtirishda ushbu qarorning 1-bandida nazarda tutilgan shartlarning xo‘jalik yurituvchi subyektlar tomonidan bajarilishini nazorat qilsin.

Belgilab qo‘yilsinki, mazkur qarorga asosan eksport qilinishi mumkin bo‘lgan o‘simlik yog‘i hajmini aniqlashda xo‘jalik yurituvchi subyektlar tomonidan 2024-yil 1-yanvardan boshlab import qilingan moyli ekinlar urug‘lari va o‘simlik yog‘lari hajmlari inobatga olinadi.

4. Belgilansinki, O‘zbekiston Respublikasi Bosh vazirining o‘rinbosari — iqtisodiyot va moliya vaziri J.A. Qo‘chqorovga aholining asosiy turdagi oziq-ovqat mahsulotlari bilan ta’minlanganlik darajasi hamda ichki bozordagi narx barqarorligidan kelib chiqqan holda, Iqtisodiyot va moliya vazirligining asoslantirilgan taklifiga ko‘ra import qilingan o‘simlik yog‘ining 50 foizdan oshmagan miqdorini eksport qilishga ruxsat berishni bekor qilish huquqi beriladi.

5. O‘zbekiston Respublikasi Iqtisodiyot va moliya vazirligi Investitsiyalar, sanoat va savdo vazirligi, Savdo-sanoat palatasi bilan birgalikda zarur hollarda, oziq-ovqat xavfsizligi va bir oy muddatda o‘simlik yog‘i ishlab chiqaruvchilarni moliyaviy qo‘llab-quvvatlash yuzasidan Vazirlar Mahkamasiga takliflar kiritsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari J.A. Qo‘chqorov va J.A. Xodjayev zimmasiga yuklansin.