So‘nggi yillarda zargarlik sanoatini rivojlantirish va zargarlik buyumlari ishlab chiqaruvchilarni har tomonlama qo‘llab-quvvatlash bo‘yicha bir qator chora-tadbirlar amalga oshirilmoqda.

Xususan, zargarlik buyumlari ishlab chiqaruvchilarga qimmatbaho metallarni kechiktirib to‘lash sharti bilan sotish tartibi joriy etilishi natijasida ularning barqaror faoliyat yuritishi uchun qo‘shimcha imkoniyatlar yaratib berildi.

Shu bilan birga, qimmatbaho metallarni sotishda kechiktirib to‘lashning nisbatan uzoq muddati belgilanganligi qimmatbaho metallarni yetkazib beruvchi korxonalarning aylanma mablag‘laridan samarali foydalanish, shu jumladan investitsiya loyihalarini moliyalashtirish imkoniyatlarini cheklab qo‘ymoqda.

Zargarlik buyumlari ishlab chiqaruvchilarga qimmatbaho metallarni kechiktirib to‘lash sharti bilan sotish va zargarlik sohasida ish o‘rinlarini yaratgan tadbirkorlik subyektlariga qimmatbaho metallarni sotib olishda chegirmalar qo‘llash tartibini yanada takomillashtirish hamda ulardan samarali foydalanishni ta’minlash maqsadida:

1. O‘zbekiston Respublikasi Prezidentining ayrim qarorlariga ilovaga muvofiq quyidagilarni nazarda tutuvchi qo‘shimchalar kiritilsin:

a) qimmatbaho metallarni kechiktirib to‘lash sharti bilan sotib olish imkoniyatidan foydalanilgan har bir kun uchun foizlar hisoblash tartibini joriy qilish, xususan:

30 kun ichida amalga oshirilgan to‘lovlar qismiga — foiz hisoblamaslik;

31-kundan 180 kun ichida amalga oshirilgan to‘lovlar qismiga — Markaziy bank asosiy stavkasi miqdorida foiz hisoblash;

b) qimmatbaho metallarni birja savdolarida chegirmalar qo‘llagan holda sotib oluvchi tadbirkorlik subyektlariga qo‘yiladigan mezonlarni belgilash, shu jumladan:

yaratilgan ish o‘rinlarining kamida 70 foizini zargarlik buyumlari va qimmatbaho metall buyumlar ishlab chiqarish bilan shug‘ullanadigan ishchilar kasblari tashkil etishini;

yaratilgan ish o‘rinlariga ishga qabul qilingan xodimlarga kamida olti oy davomida ish haqi hisoblanishi va ushbu holat soliq organlari tomonidan tasdiqlangan bo‘lishini;

tadbirkorlik subyektlari zarur moddiy-texnika bazasi, uskunalar va boshqa texnika vositalari, ishlab chiqarish maydonlari hamda sharoitlarga ega bo‘lishini nazarda tutuvchi tartibni joriy qilish.

2. Mazkur qarorning ijrosini nazorat qilish O‘zbekiston Respublikasi Bosh vaziri A.N. Aripov zimmasiga yuklansin.

1. O‘zbekiston Respublikasi Prezidentining 2021-yil 22-fevraldagi “Zargarlik sanoatini yanada rivojlantirish uchun qulay shart-sharoitlar yaratish chora-tadbirlari to‘g‘risida”gi PQ-4998-son qarorining 1-bandi:

quyidagi mazmundagi to‘rtinchi xatboshi bilan to‘ldirilsin:

“kechiktirib to‘lash sharti bilan sotib olingan qimmatbaho metallar uchun to‘lovlarni amalga oshirganda, 30 kun ichida amalga oshirilgan to‘lovlar qismiga — foiz hisoblanmaydi, 31-kundan 180 kun (shu kuni ham) ichida amalga oshirilgan to‘lovlar qismiga — 30-kundan keyin kechiktirib to‘lash imkoniyatidan foydalanilgan kunlarga mos ravishda Markaziy bank asosiy stavkasi miqdorida foiz hisoblanadi”;

to‘rtinchi — sakkizinchi xatboshilar tegishincha beshinchi — to‘qqizinchi xatboshilar deb hisoblansin.

2. O‘zbekiston Respublikasi Prezidentining 2022-yil 23-dekabrdagi “Zargarlik buyumlarini ishlab chiqarish quvvatlarini kengaytirish va mahalliy zargarlarni har tomonlama qo‘llab-quvvatlash bo‘yicha qo‘shimcha chora-tadbirlar to‘g‘risida”gi PQ-452-son qarorining 2-bandi quyidagi mazmundagi xatboshilar bilan to‘ldirilsin:

“Belgilansinki, ushbu chegirmalardan foydalanadigan zargarlik buyumlarini ishlab chiqaruvchi tadbirkorlik subyektlarining ro‘yxati quyidagi mezonlarni inobatga olgan holda shakllantiriladi:

a) zargarlik buyumlarini ishlab chiqaruvchi tadbirkorlik subyektlari tomonidan yaratilgan ish o‘rinlari soni.

Bunda, ushbu ish o‘rinlarining kamida 70 foizini Xizmatchilarning asosiy lavozimlari va ishchilar kasblari klassifikatorida (MXSK — 08 bo‘yicha kodi 7313) belgilangan zargarlik buyumlari va qimmatbaho metall buyumlari ishlab chiqarish bilan shug‘ullanadigan ishchilar kasblari tashkil etishi lozim;

b) yaratilgan ish o‘rinlariga ishga qabul qilingan xodimlar bilan belgilangan tartibda mehnat shartnomasi tuzilganligi, ularga kamida olti oy davomida mehnatga haq to‘lashning eng kam miqdorining bir baravaridan kam bo‘lmagan miqdorda ish haqi hisoblanganligi hamda ushbu holat soliq organlari tomonidan tasdiqlanganligi;

v) zargarlik buyumlarini ishlab chiqaruvchi tadbirkorlik subyektlarida yuqori qo‘shilgan qiymatli zargarlik buyumlarini ishlab chiqarish uchun zarur bo‘lgan moddiy-texnika bazasi, uskunalar va boshqa texnika vositalari, shuningdek, zargarlik buyumlarini ishlab chiqarish bo‘yicha belgilangan talablarga javob beradigan ishlab chiqarish maydonlari va sharoitlarining mavjudligi.

Vazirlar Mahkamasi ikki hafta muddatda Qimmatbaho metallarni birja savdolarida sotishda chegirmalar berish uchun zargarlik buyumlarini ishlab chiqaruvchi tadbirkorlik subyektlarining ro‘yxatini shakllantirish va yuritish tartibini tasdiqlasin”.