Bugungi kunda mamlakatimizda intizomli soliq toʻlovchilar faoliyatini qoʻllab-quvvatlash, inson omilining taʼsirini cheklash orqali qoʻshilgan qiymat soligʻini boshqarish tizimini takomillashtirish, soliq solishni soddalashtirish va soliq yukini kamaytirish borasida tizimli chora-tadbirlar amalga oshirilmoqda.

Shu bilan birga, soliq xavfi yuqori darajada boʻlgan kontragentlar bilan operatsiyalarni (bitimlarni) amalga oshirishni cheklashda qoʻshilgan qiymat soligʻi maʼmurchiligida ayrim noqulayliklar borligi dolzarb muammo boʻlib qolmoqda.

Qoʻshilgan qiymat soligʻi maʼmurchiligini soddalashtirish va Oʻzbekiston Respublikasi Prezidentining “Oʻzbekiston Respublikasi Prezidentining tadbirkorlar bilan 2023-yildagi ochiq muloqotida belgilangan vazifalarni amalga oshirish chora-tadbirlari toʻgʻrisida” 2023-yil 4-sentabrdagi PQ-292-son qarori ijrosini taʼminlash maqsadida Vazirlar Mahkamasi qaror qiladi:

1. Vazirlar Mahkamasining 2021-yil 22-sentabrdagi 595-son qarori bilan tasdiqlangan Qoʻshilgan qiymat soligʻi toʻlovchilarini soliq organlarida qoʻshilgan qiymat soligʻi boʻyicha maxsus roʻyxatdan oʻtkazish tartibi toʻgʻrisidagi nizomga ilovaga muvofiq qoʻshilgan qiymat soligʻi boʻyicha maxsus roʻyxatdan oʻtkazilganligi toʻgʻrisidagi guvohnomaning amal qilishini toʻxtatib turish amaliyotini bekor qilishni nazarda tutuvchi oʻzgartirishlar kiritilsin.

2. Vazirlar Mahkamasi huzuridagi Soliq qoʻmitasi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Vazirlar Mahkamasi huzuridagi Soliq qoʻmitasi raisi Sh.D. Kudbiyev zimmasiga yuklansin.

1. 10-banddagi “soliq xavfi holatlarining” soʻzlari “amalga oshirilayotgan bitimlar (operatsiyalar) xarid qilinayotgan va realizatsiya qilinayotgan tovarlar (xizmatlar) nomenklaturasiga mos kelmaganligi holatlari” soʻzlari bilan almashtirilsin.

2. 19-band oʻz kuchini yoʻqotgan deb hisoblansin.

3. 31-band quyidagi tahrirda bayon etilsin:

“31. Guvohnomaning amal qilishini toʻxtatib turish toʻgʻrisidagi qaror soliq organi tomonidan amalga oshirilayotgan bitimlar (operatsiyalar) xarid qilinayotgan va realizatsiya qilinayotgan tovarlar (xizmatlar) nomenklaturasiga mos kelmaganligi holatlari aniqlanganda qabul qilinishi mumkin.

Bunda guvohnomaning amal qilishi koʻpi bilan 30 kun muddatga toʻxtatib turiladi va ushbu muddatda kameral hamda sayyor soliq tekshiruvlari natijasiga koʻra ushbu bandning birinchi xatboshisidagi holatlar oʻz tasdigʻini topmaganda, guvohnomaning amal qilishi qayta tiklanadi”.