Elektr energiyasini ishlab chiqarish manbalarini diversifikatsiyalash, aholi va iqtisodiyot tarmoqlarining energiya resurslariga ortib borayotgan ehtiyojini ta’minlash, elektr energiyasini ishlab chiqarishda tabiiy gazdan foydalanishni kamaytirish hamda qayta tiklanuvchi energiya manbalaridan foydalanish ko‘lamini kengaytirish uchun to‘g‘ridan-to‘g‘ri xorijiy investitsiyalarni keng jalb qilish maqsadida:

1. Xalqaro moliya korporatsiyasining moliyaviy va texnik ko‘magida O‘zbekiston Respublikasining “Davlat-xususiy sheriklik to‘g‘risida”gi Qonuni asosida “Buxoro viloyatida quvvati 250 MVt bo‘lgan quyosh fotoelektr stansiyasini hamda 63 MVt bo‘lgan elektr energiyasini saqlash tizimini davlat-xususiy sheriklik shartlari asosida qurish va boshqarish” loyihasini (keyingi o‘rinlarda — Loyiha) moliyalashtirish, loyihalashtirish, qurish, ishga tushirish va sinovdan o‘tkazish, unga egalik qilish, texnik xizmat ko‘rsatish va undan foydalanish, ishlab chiqarilgan elektr energiyasini yetkazib berish (sotish), shuningdek, quyosh fotoelektr stansiyasini yagona elektr energetika tizimiga ulash uchun quriladigan havo elektr uzatish tarmoqlari va boshqa elektr inshootlarini barpo etish bo‘yicha xalqaro tender natijalariga ko‘ra:

a) “Abu Dhabi Future Energy Company PJSC — Masdar” (BAA) kompaniyasi tender g‘olibi (keyingi o‘rinlarda — Tender g‘olibi) deb topilganligi;

b) Tender g‘olibi tomonidan Loyihani amalga oshirish uchun xususiy sherik sifatida O‘zbekiston Respublikasida “Nur Bukhara Solar PV” MCHJ XK (keyingi o‘rinlarda — Xususiy sherik) ta’sis etilganligi;

v) O‘zbekiston Respublikasi Hukumati nomidan Iqtisodiyot va moliya vazirligi hamda Tender g‘olibi nomidan Xususiy sherik o‘rtasida 2023-yil 3-aprelda Davlat tomonidan qo‘llab-quvvatlash to‘g‘risidagi bitim tuzilganligi hamda unga muvofiq:

Loyihani amalga oshirishning butun davri mobaynida Buxoro viloyatida quvvati 250 MVt bo‘lgan quyosh fotoelektr stansiyasini hamda 63 MVt bo‘lgan elektr energiyasini saqlash tizimini Xususiy sherik loyihalashtirishi, moliyalashtirishi, qurishi va ekspluatatsiya qilishi;

yuzaga kelishi mumkin bo‘lgan xavf-xatarlarni o‘z zimmasiga olgan holda, dastlabki baholash bo‘yicha jami 273 mln AQSH dollari miqdorida to‘g‘ridan-to‘g‘ri xorijiy investitsiyalarni jalb etishi;

g) “O‘zbekiston milliy elektr tarmoqlari” AJ (keyingi o‘rinlarda — Davlat sherigi) va Xususiy sherik o‘rtasida 2023-yil 3-aprelda Elektr energiyasini sotib olish to‘g‘risida bitim imzolanganligi hamda unga muvofiq:

Xususiy sherik ishlab chiqarilgan elektr energiyasini va elektr energiyasini saqlash tizimidagi quvvatni Davlat sherigiga kafolatlangan tarzda sotish majburiyatini olishi;

Xususiy sherik qurilish davridagi o‘z majburiyatlari lozim darajada bajarilishining ta’minoti sifatida 50 mln AQSH dollari miqdorida birinchi darajali xorijiy bank kafolatini taqdim etishi;

Xususiy sherik Loyiha doirasida quyosh fotoelektr stansiyasini yagona elektr energiyasi tarmog‘iga ulash uchun quriladigan havo elektr uzatish tarmoqlarini qurish hamda ishga tushirilgandan so‘ng ularni Davlat sherigiga topshirish majburiyatini o‘z zimmasiga olishi;

Davlat sherigi 25 yil davomida elektr energiyasini kafolatlangan tarzda xarid qilish majburiyatini olishi, elektr energiyasi va elektr energiyasini saqlash tizimidan foydalanganlik uchun to‘lovni milliy valyutada amalga oshirishi ma’lumot uchun qabul qilinsin.

2. Quyidagilar:

Davlat sherigi va Xususiy sherik o‘rtasida tuzilgan Elektr energiyasini sotib olish to‘g‘risidagi bitim tasdiqlansin.

3. Davlat tomonidan qo‘llab-quvvatlash to‘g‘risidagi bitim va Elektr energiyasini sotib olish to‘g‘risidagi bitim doirasida ishlab chiqarilgan 1 kilovatt/soat elektr energiyasi uchun xorijiy valyutada denominatsiyalangan 3,044 AQSH senti hamda elektr energiyasini saqlash tizimidagi foydalanishga tayyor har bir megavattga (soatiga) 16,55563 AQSH dollari miqdorida tarif o‘rnatilganligi belgilab qo‘yilsin hamda Davlat tomonidan qo‘llab-quvvatlash to‘g‘risidagi va Elektr energiyasini sotib olish to‘g‘risidagi bitimlarda ko‘rsatilgan shartlarga ko‘ra to‘lov narxlarining AQSH dollariga bog‘lanishiga ruxsat berilsin.

4. Iqtisodiyot va moliya vazirligi, Energetika vazirligi hamda Davlat sherigiga Xususiy sherik tomonidan Loyihani amalga oshirish doirasida imzolangan bitimlar bo‘yicha majburiyatlar bajarilmagan taqdirda, Xususiy sherik va Tender g‘olibi huquqini Loyihani moliyalashtirishda ishtirok etadigan boshqa kreditorlarga to‘g‘ridan-to‘g‘ri o‘tkazish yuzasidan bitimlar tuzish huquqi berilsin.

5. Davlat sherigiga:

Xususiy sherik bilan birgalikda Elektr energiyasini sotib olish to‘g‘risidagi bitimda belgilangan tartib-taomillarga muvofiq Loyihani amalga oshirish uchun xalqaro mustaqil injiniring kompaniyasini va boshqa maslahatchilarni to‘g‘ridan-to‘g‘ri shartnomalar tuzgan holda jalb qilishga;

Xususiy sherik tomonidan ishlab chiqariladigan elektr energiyasini uch oy mobaynida sotib olish majburiyati bajarilishining ta’minoti sifatida Xususiy sherik foydasiga chet el bankining chet el valyutasida tasdiqlangan va tiklanadigan akkreditivini ochishga ruxsat berilsin.

6. Loyihani amalga oshirish doirasida Xususiy sherikka, barcha soliqlar va yig‘imlar to‘langan holda, Loyihani moliyalashtirish doirasida quyidagi huquqlar berilsin:

chet el valyutasida mablag‘lar olish va ulardan foydalanish (shu jumladan, chet el valyutasida kredit tushumlari) uchun chet eldagi xorijiy banklarda bank hisobvaraqlarini ochish;

O‘zbekiston Respublikasidan tashqarida bo‘lgan xorijiy pudrat tashkilotlari, yetkazib beruvchilar yoki xorijiy kreditorlarga to‘lovlarni O‘zbekiston Respublikasidagi bank hisobvaraqlari orqali o‘tkazmasdan, to‘g‘ridan-to‘g‘ri amalga oshirish.

7. Loyiha doirasida quyosh fotoelektr panellarini o‘rnatish bilan bog‘liq qurilish va yer ishlarini bajarish, bino va inshootlar poydevorlarini loyihalashtirish normalari va qoidalari Elektr energiyasini sotib olish to‘g‘risidagi bitimga muvofiq xalqaro standartlar bilan tartibga solinishi belgilab qo‘yilsin.

8. Energetika vazirligi, Qishloq xo‘jaligi vazirligi, Suv xo‘jaligi vazirligi, Iqtisodiyot va moliya vazirligi, Buxoro viloyati hokimligining Loyihani amalga oshirish uchun ajratiladigan Buxoro viloyati hududidagi ilovaga muvofiq jami 648,56 gektar yer uchastkasini qishloq xo‘jaligiga mo‘ljallangan yerlar toifasidan sanoat, transport, aloqa, mudofaa va boshqa maqsadlarga mo‘ljallangan yerlar toifasiga o‘tkazish to‘g‘risidagi taklifiga rozilik berilsin.

Ipakchilik va jun sanoatini rivojlantirish qo‘mitasi Buxoro viloyati hokimligi bilan birgalikda o‘n kun muddatda mazkur yer uchastkasini tuman hokimligi zaxirasiga qaytarsin.

9. Buxoro viloyati hokimligi bir oy muddatda Davlat tomonidan qo‘llab-quvvatlash to‘g‘risidagi va Elektr energiyasini sotib olish to‘g‘risidagi bitimlarda ko‘rsatilgan shartlarga mos keladigan, aholi va iqtisodiyot tarmoqlarining energiya resurslariga ortib borayotgan ehtiyojini ta’minlash maqsadida quyosh fotoelektr stansiyasi, elektr energiyasini saqlash tizimi hamda ularning faoliyatini ta’minlashga xizmat qiluvchi havo elektr uzatish tarmoqlari uchun zarur bo‘lgan yer uchastkalari Energetika vazirligiga doimiy foydalanish huquqi bilan ajratilishini ta’minlasin.

Bunda:

a) Energetika vazirligi mazkur bandga asosan o‘ziga berilgan tegishli yer uchastkasi:

quyosh fotoelektr stansiyasini qurish uchun Loyihani amalga oshirish muddatiga teng davrga Xususiy sherikka;

elektr energiyasini saqlash tizimini qurish uchun Elektr energiyasini sotib olish to‘g‘risidagi bitimda ko‘rsatib o‘tilgan muddatga Xususiy sherikka;

havo elektr uzatish tarmoqlarini qurish uchun Davlat sherigiga ijaraga berilishini ta’minlasin;

b) Loyihani amalga oshirish doirasida:

mazkur qarorga muvofiq qishloq xo‘jaligiga mo‘ljallangan yerlar toifasi o‘zgartirilishi munosabati bilan qishloq xo‘jaligi va o‘rmon xo‘jaligi ishlab chiqarishi nobudgarchiligi o‘rnini qoplash bo‘yicha kompensatsiya to‘lovlari undirilmaydi;

Xususiy sherik tomonidan yer uchastkalari uchun to‘lanadigan ijara to‘lovi miqdori yer solig‘i miqdoriga tenglashtiriladi.

10. Xususiy sherikning buyurtmanomasiga binoan:

Tashqi ishlar vazirligi — Loyihani amalga oshirish doirasida jalb qilinadigan xorijiy mutaxassislar uchun kirish vizalari, zarur hollarda, Islom Karimov nomidagi “Toshkent” xalqaro aeroportida belgilangan tartibda rasmiylashtirilishini;

Ichki ishlar vazirligi — Xususiy sherik va Loyiha doirasida jalb qilinadigan pudrat tashkilotlarining xorijiy mutaxassislari hamda ularning oila a’zolariga ko‘p martalik viza muddatlari uzaytirilishini, shuningdek, turgan joyi bo‘yicha ro‘yxatdan o‘tkazilishi va uning muddati uzaytirilishini;

Kambag‘allikni qisqartirish va bandlik vazirligi — Loyihani amalga oshirish doirasida jalb etiladigan xorijiy mutaxassislarga (O‘zbekiston Respublikasi fuqarolari orasida bunday mutaxassislar bo‘lmagan taqdirda) O‘zbekiston Respublikasi hududida mehnat faoliyatini amalga oshirish huquqini beruvchi tasdiqnomalar berilishini (muddati uzaytirilishini) belgilangan tartibda ta’minlasin.

11. Iqtisodiyot va moliya vazirligi Energetika vazirligi bilan birgalikda Loyiha amalga oshirilishi, shuningdek, tomonlarning Davlat tomonidan qo‘llab-quvvatlash to‘g‘risidagi va Elektr energiyasini sotib olish to‘g‘risidagi bitimlar doirasidagi majburiyatlari bajarilishi ustidan doimiy nazorat o‘rnatsin.

12. Adliya vazirligi Loyihani amalga oshirish doirasida Davlat tomonidan qo‘llab-quvvatlash to‘g‘risidagi bitim hamda uning qoidalariga muvofiq imzolangan bitimlar yuzasidan yuridik xulosalar bersin.

13. Kadastr agentligi Qishloq xo‘jaligi vazirligi bilan birgalikda mazkur qarorning ilovasiga asosan Yer resurslarining holati to‘g‘risidagi milliy hisobotga tegishli o‘zgartirishlar kiritsin.

14. Ekologiya, atrof-muhitni muhofaza qilish va iqlim o‘zgarishi vazirligi Loyiha hujjatlari belgilangan tartibda ekologik ekspertizadan o‘tkazilishini va Loyihani amalga oshirishda tabiatni muhofaza qilishga oid qonunchilik hujjatlariga rioya etilishini ta’minlasin.

15. Mazkur qarorning ijrosini samarali tashkil qilishga mas’ul va shaxsiy javobgar etib energetika vaziri J.T. Mirzamahmudov belgilansin.

Qaror ijrosi uchun mas’ul idoralar faoliyatini muvofiqlashtirish va nazorat qilish O‘zbekiston Respublikasining Bosh vaziri A.N. Aripov zimmasiga yuklansin.