Ushbu Qonunning maqsadi o‘simliklarni himoya qilish sohasidagi munosabatlarni tartibga solishdan iborat.

O‘simliklarni himoya qilish to‘g‘risidagi qonunchilik ushbu Qonun va boshqa qonunchilik hujjatlaridan iboratdir.

Agar O‘zbekiston Respublikasining xalqaro shartnomasida O‘zbekiston Respublikasining o‘simliklarni himoya qilish to‘g‘risidagi qonunchiligida nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.

Ushbu Qonunda quyidagi asosiy tushunchalar qo‘llaniladi:

biologik himoya vositalari — o‘simliklarning va o‘simlik mahsulotining zararli organizmlariga qarshi kurashish uchun qo‘llaniladigan foydali organizmlar yoki ularning yashash faoliyati mahsulotlari;

zararli organizmlar — o‘simliklarning, hayvonlarning yoxud kasallik qo‘zg‘atuvchi agentlarning o‘simliklarga yoki o‘simlik mahsulotlariga zarar yetkazuvchi har qanday turi, xili yoki biotipi;

kimyolashtirish vositalari — o‘simliklarning rivojlanishini, pishib yetilishini tezlashtirish, hosildorligini va sifatini oshirish, shuningdek tuproq unumdorligini yaxshilash uchun foydalaniladigan kimyoviy vositalar;

mineral o‘g‘itlar — tayyorlangan yoki qazib olingan, tarkibida mineral shaklidagi oziqlantiruvchi moddalar mavjud bo‘lgan o‘g‘itlar;

pestitsidlar — zararli organizmlarga qarshi kurashish uchun qo‘llaniladigan moddalar;

fitosanitariya tadbirlari — zararli organizmlar tomonidan yetkaziladigan iqtisodiy zarar miqdorini kamaytirishga qaratilgan tadbirlar majmui;

o‘simliklarni himoya qilish — zararli organizmlarga qarshi kurashishga qaratilgan tadbirlar majmui;

o‘simliklarni himoya qilish vositalari — o‘simliklarni himoya qilish uchun foydalaniladigan kimyoviy vositalar va biologik himoya vositalari.

O‘simliklarni himoya qilish sohasidagi asosiy prinsiplar quyidagilardan iborat:

qonuniylik;

inson sog‘lig‘i va atrof-muhit xavfsizligining ustuvorligi;

tizimlilik va uzluksizlik;

biologik usulni qo‘llash ustuvorligi;

ochiqlik va shaffoflik.

O‘zbekiston Respublikasi Vazirlar Mahkamasi:

o‘simliklarni himoya qilish sohasida yagona davlat siyosati amalga oshirilishini ta’minlaydi;

o‘simliklarni himoya qilish sohasidagi davlat dasturlarini tasdiqlaydi va ularning amalga oshirilishini tashkil etadi;

kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarni o‘tkazish, ularni ro‘yxatga olish hamda ishlab chiqarish, mineral o‘g‘itlarni va o‘simliklarni himoya qilish uchun foydalaniladigan kimyoviy vositalarni olib kirishga doir ruxsatnomalar berish, mineral o‘g‘itlarning va o‘simliklarni himoya qilish uchun foydalaniladigan kimyoviy vositalarning ulgurji hamda chakana savdosi bo‘yicha faoliyatni litsenziyalash tartibini tasdiqlaydi;

o‘simliklarni himoya qilish sohasida davlat nazoratini amalga oshirish tartibini belgilaydi;

o‘simliklarni himoya qilish sohasidagi umumiy texnik reglamentlarni tasdiqlaydi;

biologik himoya vositalarini olib kirish va olib chiqish tartibini tasdiqlaydi;

O‘zbekiston Respublikasi hududida uchraydigan karantin ahamiyatiga ega bo‘lmagan zararli organizmlar ro‘yxatini tasdiqlaydi.

O‘zbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Qishloq xo‘jaligi vazirligi:

o‘simliklarni himoya qilish sohasida yagona davlat siyosatini amalga oshiradi;

o‘simliklarni himoya qilish sohasidagi davlat dasturlarini va boshqa dasturlarni ishlab chiqish hamda amalga oshirishda ishtirok etadi;

kimyolashtirish vositalarini va o‘simliklarni himoya qilish vositalarini, yangi texnikani va texnologik jarayonlarni hamda qishloq xo‘jaligida ularning qo‘llanilish usullarini yaratishga, sinashga va joriy etishga doir ilmiy-tadqiqot, tajriba-konstruktorlik hamda loyihalashtirish ishlarini amalga oshiradi;

o‘simliklarni himoya qilish sohasida mutaxassislar tayyorlanishini, qayta tayyorlanishini va ularning malakasi oshirilishini ta’minlaydi;

kimyolashtirish vositalarini va o‘simliklarni himoya qilish vositalarini qo‘llashga doir uslubiy ko‘rsatmalarni, tavsiyanomalarni ishlab chiqish hamda joriy etishda ishtirok etadi;

qishloq xo‘jaligining kimyoviy va biologik himoya vositalariga, favqulodda vaziyatlar holatida kimyoviy vositalarning zaxiralarini shakllantirishga bo‘lgan ehtiyojini aniqlaydi.

O‘zbekiston Respublikasi Qishloq xo‘jaligi vazirligi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Qishloq xo‘jaligi vazirligi huzuridagi O‘simliklar karantini va himoyasi agentligi o‘simliklarni himoya qilish sohasidagi maxsus vakolatli davlat organidir (bundan buyon matnda maxsus vakolatli davlat organi deb yuritiladi).

Maxsus vakolatli davlat organi:

o‘simliklarni himoya qilish sohasidagi davlat dasturlarini ishlab chiqish va amalga oshirishda ishtirok etadi;

zararli organizmlarga qarshi kurashishning integratsiyalashgan tizimini ishlab chiqadi va joriy etadi;

O‘zbekiston Respublikasi hududiga boshqa mamlakatlardan zararli organizmlar kirib kelishi xavfining oldini olish va ularga qarshi kurashish choralarini ko‘radi;

kimyolashtirish vositalari va o‘simliklarni himoya qilish vositalari bo‘yicha texnik reglamentlarni ishlab chiqadi;

kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlar o‘tkazish, ro‘yxatga olish, ilmiy tadqiqotlar uchun olib kirishga ruxsat beradi;

biologik himoya vositalarini olib kirish va olib chiqish bo‘yicha faoliyatni muvofiqlashtiradi;

kimyolashtirish vositalarini va o‘simliklarni himoya qilish vositalarini ro‘yxatga olishni amalga oshiradi hamda kimyolashtirish vositalarini va o‘simliklarni himoya qilish vositalarini ro‘yxatga olganlik to‘g‘risida guvohnoma beradi;

mineral o‘g‘itlarning va o‘simliklarni himoya qilish uchun foydalaniladigan kimyoviy vositalarning ulgurji hamda chakana savdosi bo‘yicha faoliyatni amalga oshirish uchun litsenziya beradi;

mineral o‘g‘itlarni va o‘simliklarni himoya qilish uchun foydalaniladigan kimyoviy vositalarni olib kirishga doir ruxsatnoma beradi;

O‘simliklar zararkunandalari, kasalliklari va begona o‘tlarga qarshi kurashishning qo‘llash uchun ruxsat etilgan kimyoviy hamda biologik vositalari, defoliantlar va o‘simliklar o‘sishini boshqaruvchi vositalar ro‘yxatini yuritadi hamda e’lon qiladi;

O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi hamda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi bilan birgalikda o‘simliklarni himoya qilish vositalarining qo‘llanilishi taqiqlangan yoki cheklangan faol va nofaol ingrediyentlarini aniqlaydi, O‘simliklarni himoya qilish vositalarining qo‘llanilishi taqiqlangan yoki cheklangan faol va nofaol ingrediyentlari reyestrini yuritadi hamda nazorat qiladi;

respublika ijro etuvchi hokimiyat organlarining kimyolashtirish vositalarini va o‘simliklarni himoya qilish vositalarini ishlab chiqarish hamda qo‘llash, texnik reglamentlarga rioya etish, o‘simliklarni himoya qilish vositalarining inson sog‘lig‘iga va atrof-muhitga ta’sirini aniqlash bilan bog‘liq faoliyatini muvofiqlashtiradi;

kimyolashtirish vositalarining va o‘simliklarni himoya qilish vositalarining sifatini nazorat qiladi, ulardan foydalanish to‘g‘risida xulosalar beradi, inson sog‘lig‘iga va atrof-muhitga zararli ta’siri aniqlangan taqdirda ularning qo‘llanilishini taqiqlaydi;

o‘simliklarni himoya qilish sohasida kadrlar tayyorlanishini, qayta tayyorlanishini va ularning malakasi oshirilishini tashkil etadi;

kimyolashtirish vositalarini va o‘simliklarni himoya qilish vositalarini qo‘llashga doir uslubiy ko‘rsatmalarni, tavsiyanomalarni ishlab chiqadi hamda tasdiqlaydi;

O‘zbekiston Respublikasi hududida uchraydigan karantin ahamiyatiga ega bo‘lmagan zararli organizmlar ro‘yxatini ishlab chiqadi va tasdiqlash uchun O‘zbekiston Respublikasi Vazirlar Mahkamasiga kiritadi;

o‘simliklarni himoya qilish to‘g‘risidagi qonunchilikning ijro etilishi ustidan davlat nazoratini amalga oshiradi;

o‘simliklarni himoya qilish sohasida xalqaro hamkorlikni amalga oshiradi;

kimyolashtirish vositalarini va o‘simliklarni himoya qilish vositalarini hisobga olish, olib kirish, saqlash, realizatsiya qilish, qo‘llash, zararsizlantirish, ko‘mib tashlash va yo‘q qilishning avtomatlashtirilgan axborot tizimini joriy etadi.

Maxsus vakolatli davlat organi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi:

kimyolashtirish vositalarini va o‘simliklarni himoya qilish vositalarini ishlab chiqarish, saqlash, realizatsiya qilish, qo‘llash, tashish, muomaladan chiqarish, zararsizlantirish, utilizatsiya qilish, ko‘mib tashlash hamda yo‘q qilish chog‘ida normalar, qoidalar va normativlarga rioya etilishi ustidan davlat sanitariya nazoratini amalga oshiradi;

toksikologik-gigiyenik jihatdan baholash bo‘yicha ilmiy tadqiqotlarni tashkil etadi va o‘tkazadi, pestitsidlarning oziq-ovqat mahsulotlaridagi, ishlab chiqarish obyektlaridagi va atrof-muhit obyektlaridagi gigiyenik normativlari hamda reglamentlarini ishlab chiqadi;

pestitsidlarning qishloq xo‘jaligi mahsulotlaridagi va boshqa o‘simlik mahsulotidagi qoldiq miqdorini davlat toksikologik ekspertizasidan o‘tkazadi;

o‘simliklarni himoya qilish vositalarining davlat sanitariya-gigiyena ekspertizasini o‘tkazadi;

o‘simliklarni himoya qilish vositalari bilan ishlaydigan shaxslarning dastlabki va davriy tibbiy ko‘riklari o‘tkazilishini, shuningdek pestitsidlardan zaharlangan bemorlarga tashxis qo‘yilishini tashkil etadi.

O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi:

ro‘yxatga olish uchun taqdim etiladigan o‘simliklarni himoya qilish vositalarining atrof-muhitga ta’sirini baholashni amalga oshiradi;

kimyolashtirish vositalarining va o‘simliklarni himoya qilish vositalarining davlat ekologik ekspertizasini o‘tkazadi;

yaroqsiz holga kelgan kimyolashtirish vositalarini va o‘simliklarni himoya qilish vositalarini hamda ularning idishlarini ko‘mib tashlash jarayonida ishtirok etadi;

kimyolashtirish vositalarini va o‘simliklarni himoya qilish vositalarini ishlab chiqarish, tashish, saqlash, qo‘llash, zararsizlantirish, utilizatsiya qilish, ko‘mib tashlash va yo‘q qilish chog‘ida atrof-muhitni muhofaza qilish talablariga rioya etilishi ustidan davlat nazoratini amalga oshiradi;

O‘zbekiston Respublikasida zaharli kimyoviy moddalar va boshqa toksik moddalar saqlanayotgan yoki ko‘mib tashlangan maxsus obyektlar faoliyatini tartibga soladi.

O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi qonunchilikka muvofiq boshqa vakolatlarni ham amalga oshirishi mumkin.

Mahalliy davlat hokimiyati vakillik organlari o‘simliklarni himoya qilish sohasidagi hududiy dasturlarni tasdiqlaydi va ularning bajarilishi ustidan nazoratni amalga oshiradi.

Mahalliy ijro etuvchi hokimiyat organlari:

o‘simliklarni himoya qilish sohasidagi davlat dasturlarini va boshqa dasturlarni ishlab chiqish hamda amalga oshirishda ishtirok etadi;

o‘simliklarni himoya qilish sohasidagi hududiy dasturlarni tasdiqlash uchun mahalliy davlat hokimiyati vakillik organlariga kiritadi va amalga oshiradi;

O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi, maxsus vakolatli davlat organi, O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi bilan kelishilgan holda, yaroqsiz holga kelgan va (yoki) qo‘llanilishi taqiqlangan kimyolashtirish vositalarini va o‘simliklarni himoya qilish vositalarini zararsizlantirish ishlarini tashkil etadi;

respublika ijro etuvchi hokimiyat organlari va xo‘jalik boshqaruvi organlari hududiy bo‘linmalarining zararli organizmlarga qarshi kurashishga qaratilgan fitosanitariya tadbirlarini amalga oshirishga doir faoliyatini muvofiqlashtiradi;

o‘simliklarni himoya qilish uchun foydalaniladigan kimyoviy vositalarning zaxiralarini shakllantiradi;

zararli organizmlarga, shu jumladan zarar keltiradigan chigirtkaga qarshi kurashish bo‘yicha dasturlarni tasdiqlaydi;

o‘simliklarga zarar yetkazishi mumkin bo‘lgan favqulodda vaziyatlarning oldini olish bo‘yicha ishchi guruhlarni shakllantiradi va ularning faoliyatini muvofiqlashtiradi.

Mahalliy davlat hokimiyati organlari qonunchilikka muvofiq boshqa vakolatlarni ham amalga oshirishi mumkin.

Respublika ijro etuvchi hokimiyat organlari, xo‘jalik boshqaruvi organlari, yuridik va jismoniy shaxslar tomonidan o‘simliklarni himoya qilish to‘g‘risidagi qonunchilikning ijro etilishi ustidan davlat nazoratini maxsus vakolatli davlat organi amalga oshiradi.

Maxsus vakolatli davlat organi quyidagilar ustidan davlat nazoratini amalga oshiradi:

o‘simliklarni zararli organizmlardan himoya qilish bo‘yicha chora-tadbirlarning amalga oshirilishi;

mineral o‘g‘itlarni va o‘simliklarni himoya qilish uchun foydalaniladigan kimyoviy vositalarni olib kirishga doir ruxsatnomani, mineral o‘g‘itlarning va o‘simliklarni himoya qilish uchun foydalaniladigan kimyoviy vositalarning ulgurji hamda chakana savdosi bo‘yicha faoliyatni amalga oshirish uchun litsenziyani olish tartibiga rioya etilishi;

mineral o‘g‘itlarni va o‘simliklarni himoya qilish uchun foydalaniladigan kimyoviy vositalarni olib kirish chog‘ida ko‘rikdan o‘tkazish, ularni saqlash, realizatsiya qilish, qo‘llash, tashish, muomaladan chiqarish, zararsizlantirish, utilizatsiya qilish, ko‘mib tashlash va yo‘q qilish tartibiga rioya etilishi;

biologik himoya vositalarini olib kirish va olib chiqish tartibiga rioya etilishi;

biologik himoya vositalarini ishlab chiqarishning texnologik jarayonlariga va ularda yetishtiriladigan biologik mahsulotlarning sifat ko‘rsatkichlariga doir talablarga rioya etilishi.

Kimyolashtirish vositalarini va o‘simliklarni himoya qilish vositalarini ishlab chiqarish, saqlash, realizatsiya qilish, qo‘llash, tashish, muomaladan chiqarish, zararsizlantirish, utilizatsiya qilish, ko‘mib tashlash hamda yo‘q qilish chog‘ida sanitariya va ekologiya talablariga rioya etilishini tekshirish davlat sanitariya nazorati hamda ekologik nazorat doirasida amalga oshiriladi.

O‘simliklarni himoya qilish sohasidagi davlat nazoratini amalga oshirish tartibi O‘zbekiston Respublikasi Vazirlar Mahkamasi tomonidan belgilanadi.

O‘simliklar karantini davlat inspektorlari o‘z vakolatlari doirasida quyidagi huquqlarga ega:

respublika ijro etuvchi hokimiyat organlari, xo‘jalik boshqaruvi organlarining, yuridik va jismoniy shaxslarning hududiga qonunchilikda belgilangan tartibda kirish;

o‘simliklarni himoya qilish to‘g‘risidagi qonunchilikning buzilishlari aniqlangan taqdirda, kimyolashtirish vositalari va o‘simliklarni himoya qilish vositalari mavjud bo‘lgan yuklarning O‘zbekiston Respublikasi hududiga olib kirilishini taqiqlash;

bojxona organlaridan, temir yo‘l stansiyalarining, avtovokzallarning (avtostansiyalarning), aeroportlarning va boshqa tashkilotlarning ma’muriyatlaridan olib kirilayotgan hamda olib chiqilayotgan kimyolashtirish vositalari va o‘simliklarni himoya qilish vositalari to‘g‘risidagi ma’lumotlarni so‘rab olish;

biologik himoya vositalarini olib kirish va olib chiqish tartibiga muvofiq hujjatlarni talab qilish;

o‘simliklarni himoya qilish to‘g‘risidagi qonunchilik buzilishlarini bartaraf etish va ularning oldini olish bo‘yicha ijro etilishi shart bo‘lgan ko‘rsatmalar kiritish;

kimyolashtirish vositalarining va o‘simliklarni himoya qilish vositalarining kimyolashtirish vositalarini va o‘simliklarni himoya qilish vositalarini ro‘yxatga olganlik to‘g‘risidagi guvohnomaga muvofiqligini aniqlash maqsadida ulardan laboratoriya tekshiruvlari hamda tegishli ekspertiza uchun namunalar olish;

zararli organizmlar rivojlanishi va tarqalishining oldini olish maqsadida fitosanitariya monitoringi hamda prognozini, shuningdek o‘simliklarni himoya qilish bo‘yicha tadbirlarning bajarilishi ustidan davlat nazoratini amalga oshirish.

O‘simliklar karantini davlat inspektorlari qonunchilikka muvofiq boshqa huquqlarga ham ega bo‘lishi mumkin.

O‘simliklar karantini davlat inspektorlari:

mineral o‘g‘itlarni va o‘simliklarni himoya qilish uchun foydalaniladigan kimyoviy vositalarni olib kirish chog‘ida mineral o‘g‘itlarni va o‘simliklarni himoya qilish uchun foydalaniladigan kimyoviy vositalarni olib kirishga doir ruxsatnoma mavjudligini tekshirishi hamda ularning mazkur ruxsatnomaga muvofiqligini baholashni amalga oshirishi;

biologik himoya vositalarini olib kirish va olib chiqish chog‘ida ularning fitosanitariya sertifikatiga, karantin ruxsatnomasiga muvofiqligini baholashni amalga oshirishi;

kimyolashtirish vositalarining va o‘simliklarni himoya qilish vositalarining laboratoriya tekshiruvlari o‘tkazilishini tashkil etishi;

zarur bo‘lganda biologik himoya vositalarini ishlab chiqarish bilan bog‘liq hujjatlarni so‘rab olishi va ularga baho berishi;

biologik himoya vositalarining samaradorligi monitoringini o‘tkazishi;

o‘simliklarni zararli organizmlardan himoya qilishga doir tadbirlarni belgilashi shart.

O‘simliklar karantini davlat inspektorlarining zimmasida qonunchilikka muvofiq boshqa majburiyatlar ham bo‘lishi mumkin.

Respublika ijro etuvchi hokimiyat organlari, xo‘jalik boshqaruvi organlari, yuridik va jismoniy shaxslar quyidagi huquqlarga ega:

maxsus vakolatli davlat organidan zararli organizmlarni aniqlash maqsadida fitosanitariya monitoringi va nazorat tekshiruvlari o‘tkazilishini talab qilish;

kimyolashtirish vositalarini va o‘simliklarni himoya qilish vositalarini ro‘yxatga olish to‘g‘risida arizalar berish hamda kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarni o‘tkazuvchi tashkilotlar bilan shartnomalar tuzish;

zararli organizmlarga qarshi kurashish tadbirlarini ishlab chiqishda ishtirok etish;

kimyolashtirish vositalarini va o‘simliklarni himoya qilish vositalarini ro‘yxatga olish to‘g‘risidagi arizani ko‘rib chiqishni rad etish haqidagi, kimyolashtirish vositalarini va o‘simliklarni himoya qilish vositalarini ro‘yxatga olganlik to‘g‘risida guvohnoma berish haqidagi yoxud uni berishni rad etish to‘g‘risidagi qarorlar ustidan qonunchilikda belgilangan tartibda shikoyat qilish;

tegishli davlat organlaridan o‘simliklarni himoya qilishga taalluqli ma’lumotlarni va axborotni olish;

kimyolashtirish vositalarini va o‘simliklarni himoya qilish vositalarini qonunchilikda belgilangan tartibda O‘zbekiston Respublikasi hududiga olib kirish va uning hududidan olib chiqish.

Respublika ijro etuvchi hokimiyat organlari, xo‘jalik boshqaruvi organlari, yuridik va jismoniy shaxslar qonunchilikka muvofiq boshqa huquqlarga ham ega bo‘lishi mumkin.

Respublika ijro etuvchi hokimiyat organlari, xo‘jalik boshqaruvi organlari, yuridik va jismoniy shaxslar:

kimyolashtirish vositalarini va o‘simliklarni himoya qilish vositalarini qo‘llash qoidalariga rioya etishi;

sinovlarni o‘tkazuvchi tashkilotlar tomonidan ro‘yxatga olish uchun sinovlarni o‘tkazish maqsadida kimyolashtirish vositalari va o‘simliklarni himoya qilish vositalari namunalarining hamda texnik hujjatlarining, taqqoslash uchun etalonlarning va ta’sir etuvchi moddalar tahliliy standartlarining zarur bo‘lgan miqdorini taqdim etishi;

o‘simliklarni himoya qilish sohasidagi texnik reglamentlarda ko‘rsatilgan xavfsizlik talablariga rioya etishi;

kimyolashtirish vositalarini va o‘simliklarni himoya qilish vositalarini zararsizlantirishi hamda ularni maxsus omborxonalarda yoki maxsus xonalarda tegishli ravishda saqlashi;

o‘simliklar karantini davlat inspektorlarining ijro etilishi majburiy bo‘lgan ko‘rsatmalarini bajarishi;

sertifikatlashtirilgan biologik himoya vositalarini qo‘llashi;

fitosanitariya tadbirlarini o‘z vaqtida amalga oshirishi;

kimyolashtirish vositalarini va o‘simliklarni himoya qilish vositalarini olib kirish, saqlash, tashish, realizatsiya qilish hamda qo‘llashning qonunchilikda belgilangan tartibiga va qoidalariga rioya etishi, shuningdek o‘simliklarning, qishloq xo‘jaligi mahsulotlarining va boshqa o‘simlik mahsulotining hamda atrof-muhitning ushbu vositalar bilan ifloslantirilishiga yo‘l qo‘ymasligi shart.

Respublika ijro etuvchi hokimiyat organlarining, xo‘jalik boshqaruvi organlarining, yuridik va jismoniy shaxslarning zimmasida qonunchilikka muvofiq boshqa majburiyatlar ham bo‘lishi mumkin.

O‘zbekiston Respublikasida ishlab chiqariladigan yoki boshqa mamlakatlardan olib kelinadigan kimyolashtirish vositalari va o‘simliklarni himoya qilish vositalari ro‘yxatga olinishi lozim.

Kimyolashtirish vositalarini va o‘simliklarni himoya qilish vositalarini ro‘yxatga olish maxsus vakolatli davlat organi tomonidan o‘tkazilgan sinovlar natijalari asosida amalga oshiriladi.

Kimyolashtirish vositalari va o‘simliklarni himoya qilish vositalari besh yil muddatga ro‘yxatga olinadi.

Ro‘yxatga olinmagan kimyolashtirish vositalarini va o‘simliklarni himoya qilish vositalarini ishlab chiqarish, olib kirish, realizatsiya qilish hamda qo‘llash taqiqlanadi, bundan ushbu Qonunning 22-moddasida nazarda tutilgan o‘simliklarni himoya qilish vositalarini qo‘llash hollari mustasno.

Kimyolashtirish vositalarini va o‘simliklarni himoya qilish vositalarini ro‘yxatga olganlik uchun O‘zbekiston Respublikasi Vazirlar Mahkamasi tomonidan belgilangan miqdorda yig‘im undiriladi.

Kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarni o‘tkazish quyidagilarni o‘z ichiga oladi:

kimyolashtirish vositalarini va o‘simliklarni himoya qilish vositalarini qo‘llash samaradorligini aniqlashni;

kimyolashtirish vositalarining va o‘simliklarni himoya qilish vositalarining inson sog‘lig‘iga salbiy ta’siri xavfini baholashni hamda sanitariya normalari va qoidalarini, gigiyena normativlarini ishlab chiqishni;

kimyolashtirish vositalarining va o‘simliklarni himoya qilish vositalarining qo‘llanilishiga ekologik jihatdan baho berishni.

Maxsus vakolatli davlat organi ariza beruvchilar tomonidan taqdim etilgan hujjatlarni O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi hamda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi bilan birgalikda o‘rganishni amalga oshiradi.

O‘rganish natijalariga ko‘ra, kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarni o‘tkazish rejasi tasdiqlanadi yoki sinovlarni o‘tkazish rad etiladi.

Maxsus vakolatli davlat organi Kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarni o‘tkazuvchi tashkilotlar ro‘yxatini tasdiqlaydi.

Kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlar kimyolashtirish vositalarining hamda o‘simliklarni himoya qilish vositalarining biologik samaradorligini, toksikologik-gigiyenik xossalarini va ekologik xossalarini aniqlash uchun, ushbu moddaning uchinchi qismida belgilangan tartibda tasdiqlangan rejalarga muvofiq o‘tkaziladi.

Kimyolashtirish vositalarini va o‘simliklarni himoya qilish vositalarini ro‘yxatga olishga doir ariza bergan respublika ijro etuvchi hokimiyat organlari, xo‘jalik boshqaruvi organlari, yuridik va jismoniy shaxslar sinovlarni o‘tkazish uchun kimyolashtirish vositalarining va o‘simliklarni himoya qilish vositalarining zarur miqdordagi namunalarini, texnik hujjatlarni, taqqoslash uchun etalonlarni, ta’sir etuvchi moddalarning tahliliy standartlarini taqdim etishi shart.

Kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarni o‘tkazish muddati ikki yildan oshmasligi kerak.

Kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarni o‘tkazgan tashkilotlar tegishli xulosani yoki ilmiy hisobotni tayyorlaydi hamda uni maxsus vakolatli davlat organiga taqdim etadi.

Maxsus vakolatli davlat organi xulosalarga va ilmiy hisobotlarga asosan yakuniy xulosa tayyorlaydi hamda ularning natijalariga ko‘ra kimyolashtirish vositalarini va o‘simliklarni himoya qilish vositalarini ro‘yxatga olish haqida yoxud ro‘yxatga olishni rad etish to‘g‘risida qaror qabul qiladi.

Maxsus vakolatli davlat organi kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarning natijalarini tahlil qiladi hamda baholashni amalga oshiradi.

Sinovlarni o‘tkazgan tashkilotlar yoki ulardan biri sinovlar yakunlari bo‘yicha salbiy xulosa chiqargan taqdirda, kimyolashtirish vositalarini va o‘simliklarni himoya qilish vositalarini ro‘yxatga olish rad etiladi.

Kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarning natijalari to‘g‘risidagi xulosani tayyorlash muddati olti oydan oshmasligi kerak.

Kimyolashtirish vositalarini va o‘simliklarni himoya qilish vositalarini ro‘yxatga olish uchun ariza bergan shaxslar, shuningdek ushbu vositalarni ishlab chiqaruvchilar kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarning natijalari to‘g‘risidagi xulosani tayyorlashda ishtirok etishga haqli emas.

Kimyolashtirish vositalarini va o‘simliklarni himoya qilish vositalarini ro‘yxatga olish uchun sinovlarning natijalari to‘g‘risidagi xulosa ustidan belgilangan tartibda shikoyat qilinishi mumkin.

Maxsus vakolatli davlat organining kimyolashtirish vositalarini va o‘simliklarni himoya qilish vositalarini ro‘yxatga olish haqidagi qarori kimyolashtirish vositalarini va o‘simliklarni himoya qilish vositalarini ro‘yxatga olganlik to‘g‘risida guvohnoma berish uchun asos bo‘ladi.

Kimyolashtirish vositalarini va o‘simliklarni himoya qilish vositalarini ro‘yxatga olganlik to‘g‘risidagi guvohnomaning shakli O‘zbekiston Respublikasi Vazirlar Mahkamasi tomonidan belgilanadi.

Kimyolashtirish vositalarini va o‘simliklarni himoya qilish vositalarini qayta ro‘yxatga olish qonunchilikda belgilangan tartibda maxsus vakolatli davlat organi tomonidan tegishli arizaga asosan amalga oshiriladi.

Kimyolashtirish vositalarini va o‘simliklarni himoya qilish vositalarini ro‘yxatga olganlik to‘g‘risidagi guvohnomaning amal qilishi quyidagi hollarda tugatiladi:

qo‘llanilayotgan kimyolashtirish vositalarining va o‘simliklarni himoya qilish vositalarining tarkibida boshqa aralashmalar mavjud bo‘lganda yoki ularning tarkibi ro‘yxatga olingan tarkibdan farq qilganda;

ro‘yxatga olingan kimyolashtirish vositalari va o‘simliklarni himoya qilish vositalari qo‘llanilganda inson sog‘lig‘iga, atrof-muhitga yoki biologik himoya vositalariga zarar yetkazilishi ehtimoli to‘g‘risida ilmiy jihatdan tasdiqlangan yangi ma’lumotlar mavjud bo‘lganda;

ro‘yxatga olingan kimyolashtirish vositalarining va o‘simliklarni himoya qilish vositalarining nomaqbul xossalari, biologik samaradorligi past ekanligi aniqlanganda.

Kimyolashtirish vositalarini va o‘simliklarni himoya qilish vositalarini ro‘yxatga olganlik to‘g‘risidagi guvohnomaning amal qilishi maxsus vakolatli davlat organi tomonidan tegishincha O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasining, O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligining xulosasiga asosan tugatiladi.

O‘simliklarni himoya qilish bo‘yicha shoshilinch choralar ko‘rilishini talab qiluvchi holatlar mavjud bo‘lgan taqdirda, ro‘yxatdan o‘tkazilmagan o‘simliklarni himoya qilish vositalarini bir yilgacha bo‘lgan muddatda tajriba tariqasida qo‘llashga yo‘l qo‘yiladi.

O‘simliklarni himoya qilish vositalarini tajriba tariqasida qo‘llashga doir ruxsatnoma maxsus vakolatli davlat organi tomonidan O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi hamda O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi bilan kelishilgan holda, oldindan belgilangan maydon yoki hudud uchun bir vegetatsiya davriga bo‘lgan muddatga beriladi.

O‘simliklarni himoya qilish vositalarini tajriba tariqasida qo‘llashga doir ruxsatnomani berish chog‘ida maxsus vakolatli davlat organi tajriba rahbarini, shuningdek uni o‘tkazish qoidalari va shartlarini belgilaydi.

O‘simliklarni himoya qilish vositalarini tajriba tariqasida qo‘llash muddati tugaganidan keyin tajriba rahbari maxsus vakolatli davlat organiga tajriba natijalari to‘g‘risidagi hisobotni, shuningdek o‘simliklarni himoya qilish vositalari qoldiqlari, asboblar va moslamalar turgan joy haqidagi axborotni taqdim etadi.

Kimyolashtirish vositalarini va o‘simliklarni himoya qilish vositalarini standartlashtirish hamda sertifikatlashtirish O‘zbekiston Respublikasi Investitsiyalar, sanoat va savdo vazirligi huzuridagi O‘zbekiston texnik jihatdan tartibga solish agentligi tomonidan amalga oshiriladi, bundan biologik himoya vositalari mustasno.

Biologik himoya vositalarining sifatini sertifikatlashtirish maxsus vakolatli davlat organi tomonidan amalga oshiriladi.

Kimyolashtirish vositalarini va o‘simliklarni himoya qilish vositalarini tamg‘alash ishlab chiqaruvchi tomonidan amalga oshiriladi.

Kimyolashtirish vositalarini va o‘simliklarni himoya qilish vositalarini standartlashtirish, sertifikatlashtirish hamda tamg‘alash tartibi O‘zbekiston Respublikasi Vazirlar Mahkamasi tomonidan belgilanadi.

Kimyolashtirish vositalarini va o‘simliklarni himoya qilish vositalarini O‘zbekiston Respublikasi hududida realizatsiya qilishga, olib kirishga va olib chiqishga muvofiqlik sertifikati olinganidan hamda ular O‘zbekiston Respublikasida ro‘yxatdan o‘tkazilganidan keyin yo‘l qo‘yiladi.

Mineral o‘g‘itlarni va o‘simliklarni himoya qilish uchun foydalaniladigan kimyoviy vositalarni olib kirish tegishli ruxsatnoma asosida amalga oshiriladi.

Mineral o‘g‘itlarning va o‘simliklarni himoya qilish uchun foydalaniladigan kimyoviy vositalarning ulgurji hamda chakana savdosi bo‘yicha faoliyat litsenziyaga asosan amalga oshiriladi.

Kimyolashtirish vositalari va o‘simliklarni himoya qilish vositalari fitosanitariya, sanitariya holati hamda ekologik holat hisobga olingan holda qo‘llaniladi.

Mineral o‘g‘itlar o‘simliklarning ehtiyoji, yerlarning sifati, shuningdek tuproq tahliliga va boshqa tahlillarga asosan aniqlanadigan tuproq unumdorligining holatini baholash natijalari hisobga olingan holda qo‘llaniladi.

Kimyolashtirish vositalarini va o‘simliklarni himoya qilish vositalarini qo‘llash tegishli texnik reglamentlarda ko‘rsatilgan xavfsizlik talablariga rioya etilgan holda amalga oshiriladi.

Kimyolashtirish vositalarini va o‘simliklarni himoya qilish vositalarini ro‘yxatga olishga doir ariza bergan yuridik hamda jismoniy shaxslar iste’molchilarni kimyolashtirish vositalari va o‘simliklarni himoya qilish vositalari bilan bog‘liq ishlarni xavfsiz amalga oshirish to‘g‘risidagi axborot bilan ta’minlash maqsadida ularga kimyolashtirish vositalarini va o‘simliklarni himoya qilish vositalarini tashish, qo‘llash, saqlash va qadoqlash haqidagi axborotni hamda ogohlantiruvchi tamg‘asi mavjud bo‘lgan idish yorlig‘ini taqdim etishi shart.

Kimyolashtirish vositalarini va o‘simliklarni himoya qilish vositalarini realizatsiya qilish chog‘ida sotuvchi (yetkazib beruvchi) idishning har bir birligiga kimyolashtirish vositalarini va o‘simliklarni himoya qilish vositalarini tashish, qo‘llash, saqlash hamda qadoqlashga doir tavsiyanomalarni, shuningdek idish yorlig‘ini joylashtirishi kerak.

Kimyolashtirish vositalarini va o‘simliklarni himoya qilish vositalarini tashish, qo‘llash, saqlash hamda qadoqlashga doir tavsiyanomalarning shakli va ularni tasdiqlashga hamda idishning yorlig‘iga oid talablar maxsus vakolatli davlat organi tomonidan belgilanadi.

Kimyolashtirish vositalarini va o‘simliklarni himoya qilish vositalarini ishlab chiqaruvchilar quyidagilarni ta’minlashi shart:

kimyolashtirish vositalarining va o‘simliklarni himoya qilish vositalarining normativ hujjatlarga muvofiq iste’molchi hamda chakana savdo uchun qulay va xavfsiz bo‘lgan o‘rovlarda ishlab chiqarilishini;

kimyolashtirish vositalarining va o‘simliklarni himoya qilish vositalarining o‘simlik xom ashyosidagi, dorivor xom ashyodagi va oziq-ovqat mahsulotlaridagi qoldiq miqdorining belgilangan standartlarga muvofiqligini;

agar realizatsiya qilish, foydalanish, tashish hamda saqlash chog‘ida xavfsizlik talablariga rioya etilmaganligi natijasida kimyolashtirish vositalarining va o‘simliklarni himoya qilish vositalarining samaradorligi pasaygan bo‘lsa, ularning realizatsiya qilinishi tugatilishini va belgilangan tartibda muomaladan chiqarilishini.

Kimyolashtirish vositalarining va o‘simliklarni himoya qilish vositalarining idishlari va o‘rovlari uchun foydalaniladigan materiallar insonni, atrof-muhitni kimyolashtirish vositalarining va o‘simliklarni himoya qilish vositalarining xavfli xossalaridan himoya qilish uchun maxsus moslashtirilgan bo‘lishi, ushbu vositalar tarkibidagi moddalarning yemiruvchi yoki boshqacha ta’siriga chidamli bo‘lishi, shuningdek bir-biriga o‘zaro ta’sir qilmasligi va ular bilan xavfli oqibatlarni keltirib chiqaruvchi reaksiyaga kirishmasligi kerak.

Ro‘yxatga olinmagan kimyolashtirish vositalarini va o‘simliklarni himoya qilish vositalarini ishlab chiqarish taqiqlanadi.

Kimyolashtirish vositalarini va o‘simliklarni himoya qilish vositalarini faqat maxsus omborxonalarda yoki maxsus xonalarda saqlashga yo‘l qo‘yiladi. Kimyolashtirish vositalarini va o‘simliklarni himoya qilish vositalarini maxsus idishsiz saqlash taqiqlanadi.

Kimyolashtirish vositalarini va o‘simliklarni himoya qilish vositalarini saqlash chog‘ida sanitariya normalari va qoidalariga hamda ekologik normativlarga rioya etilishi kerak.

Kimyolashtirish vositalarini va o‘simliklarni himoya qilish vositalarini saqlashga doir talablar O‘zbekiston Respublikasi Vazirlar Mahkamasi tomonidan tasdiqlangan umumiy texnik reglamentlarda belgilanadi.

Yaroqsiz holga kelgan va (yoki) qo‘llanilishi taqiqlangan kimyolashtirish vositalarini va o‘simliklarni himoya qilish vositalarini hamda ularning idishlarini zararsizlantirish, utilizatsiya qilish, ko‘mib tashlash hamda yo‘q qilish O‘zbekiston Respublikasi Vazirlar Mahkamasi tomonidan belgilangan tartibda amalga oshiriladi.

Yaroqsiz holga kelgan va (yoki) qo‘llanilishi taqiqlangan kimyolashtirish vositalarini va o‘simliklarni himoya qilish vositalarini hamda ularning idishlarini zararsizlantirish, utilizatsiya qilish, ko‘mib tashlash hamda yo‘q qilish yuridik va jismoniy shaxslar tomonidan maxsus vakolatli davlat organi, O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi, O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi vakillarining nazorati ostida amalga oshiriladi.

Yuridik hamda jismoniy shaxslar kimyolashtirish vositalarini va o‘simliklarni himoya qilish vositalarini hamda ularning idishlarini saqlash, ulardan foydalanish, ularni zararsizlantirish va ko‘mib tashlash chog‘ida sanitariya-gigiyena normalariga, shuningdek hayvonot va o‘simlik dunyosini muhofaza qilish talablariga rioya etishi shart.

Kimyolashtirish vositalarini va o‘simliklarni himoya qilish vositalarini insonning sog‘lig‘iga hamda atrof-muhitga zarar yetkazish ehtimolini istisno etgan holda, maxsus jihozlangan transport vositalarida tashishga yo‘l qo‘yiladi.

Kimyolashtirish vositalarini va o‘simliklarni himoya qilish vositalarini tashish tartibi O‘zbekiston Respublikasi Vazirlar Mahkamasi tomonidan tasdiqlanadi.

O‘simliklarni himoya qilish uchun qo‘llaniladigan o‘ta zaharli, kuchli ta’sir etuvchi zaharli, radioaktiv va boshqa moddalarni ishlab chiqarish, saqlash, tashish va ulardan foydalanish chog‘ida ekologik xavf ehtimoli bo‘lgan vaziyatlar yuzaga kelgan taqdirda tegishli ishlab chiqarish obyektlari atrofida, transport magistrallari bo‘ylab qonunchilikka muvofiq alohida huquqiy rejim o‘rnatiladi.

O‘simliklarni himoya qilish sohasidagi xalqaro hamkorlik O‘zbekiston Respublikasining xalqaro shartnomalariga va qonunchiligiga muvofiq amalga oshiriladi.

Maxsus vakolatli davlat organi o‘simliklarni himoya qilish sohasidagi xalqaro hamkorlik doirasida:

xorijiy mamlakatlarning vakolatli organlari va o‘simliklarni himoya qilish sohasidagi davlat nazoratini amalga oshiruvchi xalqaro tashkilotlar bilan o‘zaro axborot almashishni amalga oshiradi;

O‘zbekiston Respublikasi hududiga olib kirish uchun mo‘ljallangan o‘simlik mahsulotini yetishtirish va qadoqlash joylarida pestitsidlarni qo‘llashga doir majburiy talablarga rioya etilishini nazorat qiladi.

Zararli organizmlarga qarshi kurashish hamda fitosanitariya xavfsizligini ta’minlash uchun har yili O‘zbekiston Respublikasining Davlat budjetidan mablag‘lar ajratiladi.

O‘simliklarni himoya qilishga doir faoliyat O‘zbekiston Respublikasining Davlat budjeti mablag‘lari, budjetdan tashqari jamg‘armalar va qonunchilikda taqiqlanmagan boshqa manbalar hisobidan moliyalashtiriladi.

Maxsus vakolatli davlat organining o‘simliklarni himoya qilish sohasidagi davlat xizmatlari, shuningdek zarur hujjatlarni rasmiylashtirish bilan bog‘liq xarajatlarning o‘rni tegishli respublika ijro etuvchi hokimiyat organlarining, xo‘jalik boshqaruvi organlarining, yuridik va jismoniy shaxslarning mablag‘lari hisobidan qoplanadi.

Respublika ijro etuvchi hokimiyat organlari, xo‘jalik boshqaruvi organlari, yuridik va jismoniy shaxslar o‘ziga tegishli hududlarda o‘simliklarning himoya qilinishini ta’minlashga doir xarajatlarni o‘z mablag‘lari hisobidan amalga oshiradi.

O‘simliklarni himoya qilish sohasidagi nizolar qonunchilikda belgilangan tartibda hal etiladi.

O‘simliklarni himoya qilish to‘g‘risidagi qonunchilikni buzganlikda aybdor shaxslar belgilangan tartibda javobgar bo‘ladi.

Quyidagilar o‘z kuchini yo‘qotgan deb topilsin:

1) O‘zbekiston Respublikasining 2000-yil 31-avgustda qabul qilingan “Qishloq xo‘jalik o‘simliklarini zararkunandalar, kasalliklar va begona o‘tlardan himoya qilish to‘g‘risida”gi 116-II-sonli Qonuni (O‘zbekiston Respublikasi Oliy Majlisining Axborotnomasi, 2000-yil, № 7-8, 208-modda);

2) O‘zbekiston Respublikasi Oliy Majlisining 2000-yil 31-avgustda qabul qilingan “Qishloq xo‘jalik o‘simliklarini zararkunandalar, kasalliklar va begona o‘tlardan himoya qilish to‘g‘risida”gi O‘zbekiston Respublikasi Qonunini amalga kiritish haqida”gi 117-II-sonli Qarori (O‘zbekiston Respublikasi Oliy Majlisining Axborotnomasi, 2000-yil, № 7-8, 209-modda);

3) O‘zbekiston Respublikasining 2014-yil 11-dekabrda qabul qilingan “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘RQ-381-sonli Qonunining (O‘zbekiston Respublikasi Oliy Majlisi palatalarining Axborotnomasi, 2014-yil, № 12, 343-modda) 17-moddasi;

4) O‘zbekiston Respublikasining 2017-yil 14-sentabrda qabul qilingan “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish, shuningdek ayrim qonun hujjatlarini o‘z kuchini yo‘qotgan deb topish to‘g‘risida”gi O‘RQ-446-sonli Qonunining (O‘zbekiston Respublikasi Oliy Majlisi palatalarining Axborotnomasi, 2017-yil, № 9, 510-modda) 45-moddasi;

5) O‘zbekiston Respublikasining 2021-yil 21-aprelda qabul qilingan “O‘zbekiston Respublikasining ayrim qonun hujjatlariga o‘zgartishlar kiritish to‘g‘risida”gi O‘RQ-683-sonli Qonunining (O‘zbekiston Respublikasi Oliy Majlisi palatalarining Axborotnomasi, 2021-yil, 4-songa ilova) 118-moddasi;

6) O‘zbekiston Respublikasining 2021-yil 26-aprelda qabul qilingan “Sanitariya-epidemiologiya xizmati takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartishlar kiritish to‘g‘risida”gi O‘RQ-685-sonli Qonunining (O‘zbekiston Respublikasi Oliy Majlisi palatalarining Axborotnomasi, 2021-yil, № 4, 290-modda) 3-moddasi.

O‘zbekiston Respublikasi Qishloq xo‘jaligi vazirligi huzuridagi O‘simliklar karantini va himoyasi agentligi hamda boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

Ushbu Qonun rasmiy e’lon qilingan kundan e’tiboran uch oy o‘tgach kuchga kiradi.