Hozirgi kunda mamlakatimizda Vazirlar Mahkamasining “O‘zbekiston Respublikasi hududida foydalanilayotgan, sotish yoki shaxsiy foydalanish uchun olib kiriladigan va ishlab chiqariladigan mobil qurilmalarni ro‘yxatga olish tartibi to‘g‘risidagi nizomni tasdiqlash haqida” 2019-yil 17-sentabrdagi 778-son qaroriga asosan mobil qurilmalarni ro‘yxatga olish amalga oshirib kelinmoqda.

Mobil qurilmalarni ro‘yxatga olishda shaxsga doir ma’lumotlardan noqonuniy foydalanishning oldini olish va yurtimizga tashrif buyuruvchi turistlar uchun qulay shart-sharoitlar yaratish maqsadida mavjud tizimni yanada takomillashtirish talab etilmoqda.

Shu bilan birga, jismoniy shaxslar tomonidan O‘zbekiston Respublikasi Davlat chegarasining aviatsiya o‘tkazish punktlari orqali bojxona to‘lovlari undirilmaydigan ayrim tovarlarni olib o‘tishning miqdor normalari belgilanmaganligi sababli import qiluvchilar tomonidan respublika hududiga mobil qurilmalarni tijorat maqsadlarida bojxona to‘lovlarisiz olib o‘tish holatlari mavjud.

Shunga ko‘ra, Vazirlar Mahkamasining “Jismoniy shaxslar tomonidan O‘zbekiston Respublikasiga tovarlarni olib o‘tish tartibini takomillashtirishga doir qo‘shimcha chora-tadbirlari to‘g‘risida” 2018-yil 22-iyundagi 463-son hamda “O‘zbekiston Respublikasi hududida foydalanilayotgan, sotish yoki shaxsiy foydalanish uchun olib kiriladigan va ishlab chiqariladigan mobil qurilmalarni ro‘yxatga olish tartibi to‘g‘risidagi nizomni tasdiqlash haqida” 2019-yil 17-sentabrdagi 778-son qarorlariga yuqorida qayd etilgan talablardan kelib chiqib tegishli o‘zgartirish va qo‘shimchalar kiritish zarurati yuzaga kelmoqda.

O‘zbekiston Respublikasi hududida foydalanilayotgan, sotish yoki shaxsiy foydalanish uchun olib kiriladigan mobil qurilmalarni ro‘yxatga olish tartibini yanada takomillashtirish, jismoniy shaxslar tomonidan mobil qurilmalarni respublika hududiga olib kirilishini tartibga solish, bojxona rasmiylashtiruvi shartlarini umume’tirof etilgan jahon standartlariga muvofiqlashtirish hamda xalqaro o‘ziga xos identifikatsiya kodlari bo‘yicha ro‘yxatga olish tizimini takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Hukumatining ayrim qarorlariga ilovaga muvofiq quyidagilarni nazarda tutuvchi o‘zgartirish va qo‘shimchalar kiritilsin:

jismoniy shaxslar tomonidan O‘zbekiston Respublikasi Davlat chegarasining aviatsiya o‘tkazish punktlari orqali bojxona to‘lovlari undirilmaydigan ayrim tovarlarni olib o‘tishning miqdor normalarini belgilash;

norezidentlarga tegishli mobil qurilmalar IMEI-kodlarining kulrang ro‘yxatda bo‘lish muddatini 30 kalendar kunidan 60 kalendar kuniga uzaytirish;

veb-sayt va mobil ilovalar orqali IMEI-kodlarini ro‘yxatga olish tartibini joriy etish;

import qiluvchilar tomonidan olib kirilayotgan mobil qurilmalarning bojxona rasmiylashtiruvi tizimini takomillashtirish.

2. O‘zbekiston Respublikasi Raqamli texnologiyalar vazirligi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

3. Ushbu qaror rasman e’lon qilingan kundan e’tiboran uch oy o‘tgach kuchga kiradi.

4. Mazkur qarorning bajarilishini nazorat qilish O‘zbekiston Respublikasi raqamli texnologiyalar vaziri Sh.X. Shermatov zimmasiga yuklansin.

1. Vazirlar Mahkamasining “Jismoniy shaxslar tomonidan O‘zbekiston Respublikasiga tovarlarni olib o‘tish tartibini takomillashtirishga doir qo‘shimcha chora-tadbirlari to‘g‘risida” 2018-yil 22-iyundagi 463-son qarorida:

a) muqaddimadagi “temir yo‘l va daryo o‘tkazish punktlari orqali” so‘zlari “temir yo‘l, aviatsiya va daryo o‘tkazish punktlari orqali” so‘zlari bilan almashtirilsin;

b) 1-band quyidagi tahrirda bayon etilsin:

“1. Quyidagilar:

Jismoniy shaxslar tomonidan O‘zbekiston Respublikasi Davlat chegarasining avtoyo‘l (yo‘lovchi), temir yo‘l va daryo o‘tkazish punktlari orqali bojxona to‘lovlari undirilmaydigan ayrim tovarlarni olib o‘tishning miqdor normalari 1-ilovaga muvofiq;

Jismoniy shaxslar tomonidan O‘zbekiston Respublikasi Davlat chegarasining aviatsiya o‘tkazish punktlari orqali bojxona to‘lovlari undirilmaydigan ayrim tovarlarni olib o‘tishning miqdor normalari 2-ilovaga muvofiq tasdiqlansin”;

v) ilova 1-ilova deb hisoblansin;

g) 1-ilovaning 15-pozitsiyasi “Tovarning nomi” ustunidagi “qo‘l telefoni” so‘zlari “mobil aloqa moduliga ega bo‘lgan mobil telefonlar va qurilmalar” so‘zlari bilan almashtirilsin;

d) quyidagi mazmundagi 2-ilova bilan to‘ldirilsin:

2. Vazirlar Mahkamasining “O‘zbekiston Respublikasi hududida foydalanilayotgan, sotish yoki shaxsiy foydalanish uchun olib kiriladigan va ishlab chiqariladigan mobil qurilmalarni ro‘yxatga olish tartibi to‘g‘risidagi nizomni tasdiqlash haqida” 2019-yil 17-sentabrdagi 778-son qarorida:

a) 4-banddagi “Axborot texnologiyalari va kommunikatsiyalarini rivojlantirish vazirligi” so‘zlari “Raqamli texnologiyalar vazirligi” so‘zlari bilan almashtirilsin;

b) ilovada:

2-bandda:

o‘n sakkizinchi xatboshi quyidagi tahrirda bayon etilsin:

“kul rang ro‘yxat — oq yoki qora ro‘yxatlarga kiritilmagan, ammo mobil aloqa operatorining tarmog‘ida birinchi tarmoq hodisasi paytidan boshlab 30 kalendar kunidan ko‘p bo‘lmagan muddatga mobil aloqa xizmatlaridan foydalanish imkoniyatiga ega bo‘ladigan mobil qurilmalarning IMEI-kodlari ro‘yxati (norezidentlarga tegishli mobil qurilmalar IMEI-kodlari ushbu ro‘yxatda bo‘lishi mumkin bo‘lgan muddat 60 kalendar kunini tashkil qiladi)”;

yigirma beshinchi xatboshi quyidagi tahrirda bayon etilsin:

“mobil qurilmalar — mobil aloqa moduliga ega bo‘lgan mobil telefonlar, qurilmalar va ularning ehtiyot qismlari (platalar)”;

yigirma to‘qqizinchi xatboshi chiqarib tashlansin;

o‘ttizinchi — o‘ttiz to‘qqizinchi xatboshilar tegishlicha yigirma to‘qqizinchi — o‘ttiz sakkizinchi xatboshilar deb hisoblansin;

11-band quyidagi mazmundagi xatboshi bilan to‘ldirilsin:

“Import qiluvchilar tomonidan olib kirilayotgan mobil qurilmalarning Tizimda ro‘yxatga olinishi “erkin muomalaga chiqarish” (IM-40) bojxona rejimiga rasmiylashtirilganidan so‘ng uch kun muddatda amalga oshiriladi”;

14-band quyidagi mazmundagi xatboshi bilan to‘ldirilsin:

“Import qiluvchilar tomonidan olib kirilgan qurilmalar partiyasi “erkin muomalaga chiqarish” (IM-40) bojxona rejimiga rasmiylashtirilmaguncha, mazkur qurilmalarning IMEI kodlari Tizimda ro‘yxatdan o‘tkazilishiga yo‘l qo‘yilmaydi”;

22-band “to‘lov” so‘zidan keyin “10 ish kuni ichida” so‘zlari bilan to‘ldirilsin;

28-band quyidagi tahrirda bayon etilsin:

“28. O‘zbekiston Respublikasi fuqarosi tomonidan mobil qurilmalar IMEI-kodlarini ro‘yxatga olish:

Tizim operatori yoki Tizim ro‘yxatga oluvchisiga shaxsan kelib murojaat qilish yo‘li bilan, O‘zbekiston Respublikasi fuqarosi uchun JShShIR mavjud shaxsni tasdiqlovchi hujjat va ushbu Nizomning 5b-ilovasiga muvofiq O‘zbekiston Respublikasiga olib kirilgan mobil qurilmaning IMEI-kodlari, soni, modeli va markasi ko‘rsatilgan anketani to‘ldirgan holda;

YIDXP orqali — jismoniy shaxsning elektron raqamli imzosi yoki Mobil-ID tizimi yordamida;

Tizim operatorining veb-sayti orqali — ro‘yxatdan o‘tkazilayotgan mobil qurilmaning IMEI-kodi, JShShIR va abonent raqamini kiritish orqali;

Tizim operatorining veb-sayti va mobil ilovalar orqali — shaxsning biometrik ma’lumotlarini identifikatsiya qilish va mobil qurilma IMEI kodlarini kiritish bilan amalga oshiriladi”;

28¹-bandda:

quyidagi mazmundagi sakkizinchi xatboshi bilan to‘ldirilsin:

“mobil ilovalar orqali — shaxsning biometrik ma’lumotlarini identifikatsiya qilish va mobil qurilma IMEI kodlarini kiritish bilan amalga oshiriladi”;

sakkizinchi — o‘ninchi xatboshilar tegishlicha to‘qqizinchi — o‘n birinchi xatboshilar deb hisoblansin;

29-band quyidagi tahrirda bayon etilsin:

“29. Mobil qurilmalarni ro‘yxatga olish uchun jismoniy shaxs quyidagilarni taqdim etadi:

ushbu Nizomga 5-ilovaga muvofiq shakl bo‘yicha to‘ldirilgan Anketani, shu jumladan O‘zbekiston Respublikasi hududiga olib kirilgan mobil qurilmalarning markasi, modeli, soni va IMEI-kodlari;

o‘zi kelib murojaat etganda — Tizim operatori yoki Tizim ro‘yxatga oluvchisi uchun JShShIR mavjud shaxsni tasdiqlovchi hujjat;

anketa YIDXP orqali elektron shaklda taqdim etilganda jismoniy shaxsdan fuqarolik pasporti va elektron raqamli imzosi talab etilmaydi;

Tizim operatorining saytida — abonent ro‘yxatdan o‘tkaziladigan mobil qurilmaning IMEI-kodi, ariza beruvchining JShShIR va telefon raqamini ko‘rsatadi.

Veb-sayt va mobil ilovalar orqali shaxsning biometrik ma’lumotlarini identifikatsiya qilish va mobil qurilma IMEI-kodlarini kiritish bilan amalga oshiriladi”;

quyidagi mazmundagi 29¹-band bilan to‘ldirilsin:

“29¹. Jismoniy shaxslar tomonidan mobil qurilmalarni olib kirishda bojxona to‘lovlari undirilmaydigan cheklangan me’yorlaridan qat’i nazar, deklaratsiya to‘ldiriladi”;

31-band quyidagi tahrirda bayon etilsin:

“31. Jismoniy shaxslar tomonidan xalqaro pochta yoki kuryerlik jo‘natmalari orqali olib kiritilgan mobil qurilmalar Tizim operatori yoki Tizim ro‘yxatga oluvchisiga shaxsan murojaat etish yo‘li bilan, shuningdek, tizim operatorining sayti orqali, mos ravishda pochta identifikatorining shtrix kodi, kalendar shtempeli bo‘lgan konvert va jo‘natma oluvchining JShShIR mavjud shaxsni tasdiqlovchi hujjatini ko‘rsatgan holda amalga oshiriladi”;

quyidagi mazmundagi 31²-band bilan to‘ldirilsin:

“31². Mobil qurilmalar belgilangan me’yordan ortiq miqdorda olib kirilgan holatlarda yoki ularning bojxona rasmiylashtiruvidan o‘tganligi to‘g‘risida hujjatlar taqdim etilmagan taqdirda, Tizim tomonidan ushbu mobil qurilmalarning modeliga muvofiq umumiy bojxona to‘lovlari hamda ro‘yxatdan o‘tkazish to‘lovlari miqdori shakllantiriladi.

Bojxona to‘lovlari miqdori Bojxona qo‘mitasi ma’lumotlar bazasi bilan yo‘lga qo‘yilgan elektron axborot almashinuvi orqali belgilanadi.

Bunda jismoniy shaxs tomonidan to‘langan bojxona to‘lovlari Davlat budjetiga, mobil qurilmani ro‘yxatdan o‘tkazish uchun to‘lovlar Tizim operatorining mahsus hisobvarag‘iga yo‘naltiriladi”;

quyidagi mazmundagi 38¹-band bilan to‘ldirilsin:

“38¹. Ro‘yxatdan o‘tkazish uchun to‘lovlar ariza berilgan kundan boshlab o‘n kalendar kuni ichida amalga oshiriladi.

To‘lovlar O‘zbekiston Respublikasi qonunchiligida taqiqlanmagan usullar, shu jumladan, jismoniy shaxsning telefon raqami hisobidagi mablag‘dan amalga oshirilishi mumkin”;

43-band quyidagi tahrirda bayon etilsin:

“43. Mobil qurilmalarning IMEI-kodlarini ro‘yxatga olish uchun to‘lov Tizim operatorining maxsus hisobvarag‘iga kelib tushadi.

Kelib tushgan mablag‘lar quyidagilarga yo‘naltiriladi:

tizim operatori o‘z faoliyatini yuritish xarajatlari va majburiyatlari uchun;

O‘zbekiston Respublikasi Raqamli texnologiyalar vazirligining qaror, buyruq va farmoyishlariga asosan davlat organlarida amalga oshirilayotgan axborot-kommunikatsiya texnologiyalarini joriy etish loyihalarini maqsadli moliyalashtirish uchun (ushbu xarajatlarga Tizim operatorining investitsiya faoliyatidan olingan daromadlari ham jalb qilinishi mumkin);

Raqamli texnologiyalarni rivojlantirish jamg‘armasiga — Vazirlar Mahkamasining qarorlariga muvofiq davlat organlarida amalga oshirilayotgan axborot-kommunikatsiya texnologiyalarini joriy etish loyihalarini maqsadli moliyalashtirish uchun;

respublika telekommunikatsiya infratuzilmasini, shu jumladan, qishloq va chekka aholi punktlari, turistik va rekreatsion hududlarda rivojlantirish loyihalari uchun”;

45-bandning sakkizinchi xatboshisi quyidagi tahrirda bayon etilsin:

“Taqdim qilingan ma’lumotlari to‘g‘ri kelmagan, uchinchi shaxslarning ma’lumotlari taqdim qilingan hollarda IMEI-kodlarni ro‘yxatdan o‘tkazishni rad etish”;

46-bandda:

quyidagi mazmundagi beshinchi xatboshi bilan to‘ldirilsin:

“tizimda ro‘yxatga olingan xorijdan olib kelingan mobil qurilmalar to‘g‘risida Bojxona qo‘mitasiga har oy yakuni bo‘yicha axborot taqdim etish”;

beshinchi xatboshi oltinchi xatboshi deb hisoblansin;

49²-band quyidagi tahrirda bayon etilsin:

“49². Ushbu Nizomda belgilangan talablarning buzilishi aniqlanganda yoki shunday holatlar to‘g‘risida shaxslardan kelib tushgan murojaatlarga asosan avval ro‘yxatdan o‘tkazilgan IMEI-kodlar bekor qilinadi va amalga oshirilgan xizmatlar uchun qabul qilingan to‘lovlar qaytarilmaydi”.